‘Ñambopyʼaguapýkena umi ojepyʼapývape’

‘Jehová cheporavo [...] ambopyʼaguapy hag̃ua umi ojepyʼapývape.’ (ISA. 61:1, 2, ÑÑB)

1. Mbaʼéichapa Jesús oipytyvõvaʼekue yvyporakuérape, ha mbaʼérepa?

JESÚS heʼi: ‘Che rembiʼu hína kóva: Ajapo upe chembouvaʼekue rembipota ha amog̃uahẽ huʼãme pe tembiapo haʼe omeʼẽvaʼekue chéve’ (Juan 4:34, NM). Oiko aja entéro ko yvy ape ári, Jesús ohechauka ojoguaitereiha Itúvape, koʼýte ohayhúgui ipyʼaite guive yvyporakuérape (1 Juan 4:7-10). Jehová hetaiterei hendáicha ohechauka ñanderayhuha, pór ehémplo ndaipóri haʼéicha ñanembopyʼaguapýva ñaikotevẽve jave. Ndareíri Pablo heʼi hese “Ñandejára tapia oporokonsoláva” (2 Cor. 1:3, BNP). Ha oprofetisa haguéicha Isaías, Cristo avei ojapovaʼekue upéicha ñanderayhuetereígui (elee Isaías 61:1, 2). Upévare ohórõ guare Nazaret sinagógape olee upe profesía ha heʼi oñekumpliha hese (Luc. 4:16-21). Añetehápe Jesús oipytyvõvaʼekue opavavépe, ha pyʼaporãme omokyreʼỹ ha ombopyʼaguapy umi oñembyasývape.

2, 3. Mbaʼérepa ñande ñamoirũva Jesúspe ñakonsolavaʼerã umi héntepe?

 ² Ñande ñamoirũva Jesúspe ñañehaʼãvaʼerã avei ñamombarete umi ohasa asývape (1 Cor. 11:1). Pablo heʼi: “[Akóintekena] peñomokyreʼỹ ha peñopytyvõ” (1 Tes. 5:11, JMP). Koʼág̃a rupi heta hénte ipyʼaporãva ohasa asy ha oikotevẽterei ñakonsolami chupekuéra. Mbaʼérepa? Jaiko rupi peteĩ ‘tiémpo ipohyietereívape’ ha oĩháme heta hetave tapicha iñañáva ha opa mbaʼe heʼi ha ojapóvape ohechauka opensaha ijehénte (2 Tim. 3:1, ÑÑB).

³ Heʼi haguéicha umi profesía, koʼã ára pahápe hetaiterei tapicha ‘haʼentese, ohayhueterei pirapire, ojererovu, oñembotuicha, oñeʼẽ vai Ñandejárare, naiñeʼẽrendúi itúva ni isýpe, idesagradesído, hekovai, ndohayhúi avavépe, noporoperdonaséi, oñeʼẽ rei hapicháre, ndojejokokuaái, ipochy, ndohayhúi tembiapo porã, itraisionéro, hovaʼatã, ijuru guasu ha ohayhu rangue Ñandejárape ohayhu pe pekádo’. Ha káda día jaha vaive hese, heʼiháicha ko téysto: “Umi tekove ñaña ha oporombotavýva ojapo mbaʼe vaive ohóvo” (2 Tim. 3:2-4, 13, ÑÑB).

4. Mbaʼépa oiko koʼág̃a rupi ko múndo tuichakuére?

⁴ Ñande ndajahecharamói umi mbaʼe vaieta oikóva. La Biblia heʼi voi “ko múndo oĩmbaha aña poguýpe” (1 Juan 5:19, BNP). Upéva heʼise oĩha ipoguýpe umi polítiko, rrelihióso, komersiánte ha opaite mbaʼe haʼekuéra oiporúva ojagarra hag̃ua umi héntepe. Ndareíri oñehenói Satanáspe “múndo ruvicha”, ha avei “ko yvy jára” (Juan 14:30, BNP; 2 Cor. 4:4, ÑÑB). Haʼe oikuaa mbykypaitemaha itiémpo, upévare omanóta pochýgui ha ojapo sarambi opárupi (Rev. 12:12). Koʼẽrõitéma Jehová ohundíta Satanás ha imúndo aña ha ohechaukáta haʼe añoite ikatuha oisãmbyhy porã. Ajépa tuichaite ñandepiroʼýta oiko vove upéva! (Gén., kap. 3; Job, kap. 2.)

Ñamombeʼu pe marandu porã ko yvy tuichakuére

5. Mbaʼéichapa oñekumpli koʼã ára pahápe pe profesía Jesús heʼivaʼekue?

⁵ Ko tiémpo ijetuʼuetévape oñekumpli avei peteĩ profesía Cristo heʼivaʼekue: ‘Pe marandu porã oñeʼẽva Ñandejára rréino rehe oñemombeʼúta oparupiete ko yvy ape ári, ojekuaa hag̃ua opa tetã rupi, ha upéi og̃uahẽta pe ára pahaite’ (Mat. 24:14, NM). Koʼẽ koʼẽre ko marandu oñemog̃uahẽ mombyry mombyryve. Koʼág̃a oĩma 107.000 ári kongregasión ha 7.500.000 rasa maranduhára oñeʼẽva Ñandejára rréino rehe, Jesús ojapo haguéicha (Mat. 4:17). Hetaiterei tapichápe oñekonsola ko notísia porã rupive. Pór ehémplo, umi dos áño ohasavaʼekuépente  voi 570.601 tapicha oñemeʼẽ Jehovápe ha ojevautisa.

6. Mbaʼépa repensa rehechávo pe marandu porã iñasãiveha ohóvo?

⁶ Koʼág̃a avei umi puvlikasión oguenohẽva testígo de Jehová ojetradusi 500 idióma rasápe, upéicha ojekuaa ko tembiapo ohoha tenonde gotyo. Neʼĩrava gueteri ojejapo peichaite peve! Ñanemopirĩmba jahechávo mbaʼéichapa Jehová organisasión yvy arigua heta tiémporema ombaʼapo kyreʼỹ ha okakuaave ohóvo. Koʼã mbaʼe ningo ojehupyty pe espíritu sánto ñanepytyvõ ha ñanesãmbyhy rupínte. Jaikuaaháicha ko múndo oĩ Satanás poguýpe ha haʼe oñemoĩ mbarete ñanderehe. Pe marandu porã oñemombeʼúva opa tetã rupi, ndahaʼéi ñane ermanokuérapente okonsoláva, hetaiterei tapichápe ombopyʼaguapy avei oikuaávo umi mbaʼe porã ojapótava Ñandejára rréino.

Ñakonsolákena ñane ermanokuérape

7. a) Mbaʼérepa nañahaʼarõivaʼerã koʼág̃ama voi Jehová oipeʼa umi mbaʼe ñanembohasa asýva? b) Mbaʼérepa jaʼe ikatutaha jagueropuʼaka opaichagua jepyʼapy ha jehasa asy?

⁷ Ko múndope ojejapo hetaiterei mbaʼe ndevaipa jepéva, upévare ndaipóri ohasa asyʼỹva. Ñandejára nohundíri aja entéro ko múndo aña, ñambohovaimantevaʼerã heta mbaʼe ijetuʼúva. La Biblia heʼi oĩtaha avei umi oñemoĩ mbaretéva ñanderehe, upéicha jave jaaprovechavaʼerã jahechauka hag̃ua ñaneñeʼẽrenduha Ñandejárape ha jaipotaha haʼe ñanesãmbyhy (2 Tim. 3:12). Ñande Ru Jehová ñanepytyvõ ha ñanekonsola rupi jajoguáta umi unhído Tesalonicayguápe. Haʼekuéra oaguantakuaa ha ‘ojeroviágui’ ombohovái porã vaʼekue ‘opaichagua jepyʼapy ha jehasa asy’ (elee 2 Tesalonicenses 1:3-5).

8. Mbaʼérepa jaʼekuaa Jehová akóinte ombopyʼaguapyha hembiguaikuérape?

⁸ Jehová katuete omombarete hembiguaikuérape oikotevẽ jave. Ñapensamíntena Elías rehe. Pe rréina ñañaite hérava Jezabel ojukasérõ guare chupe, haʼe ndoikuaái mbaʼépa ojapóta ha osẽ oho rei, hiʼã voi chupe omano. Péro Ñandejára ndojaʼói chupe upe haguére, síno mborayhúpe okonsola ha ombopyʼaguasu Elíaspe ojapo hag̃ua hembipota (1 Rey. 19:1-21). Síglo primérope avei jahechakuaa mbaʼéichapa Jehová ombopyʼaguapy ipuévlope. Peteĩ téysto heʼi umi ermáno ‘oĩva Judea, Galilea ha Samáriape, oikoha pyʼaguapýpe ndojepersegivéigui chupekuéra ha imbareteveha ijeroviápe. Haʼekuéra heta hetave okyhyje rupi Jehovágui ha espíritu sánto oipytyvõgui chupekuéra’ (Hech. 9:31, NM). Ajépa javyʼaite jaikuaávo pe ‘espíritu sánto ñanepytyvõha’ avei koʼág̃a!

9. Mbaʼérepa ñanekyreʼỹta ñahesaʼỹijóramo Jesús rembiasakue?

⁹ Tuicha avei ñanepytyvõta ñahesaʼỹijóramo Jesús rembiasakue ha ñañehaʼãramo ñahaʼanga chupe. Haʼe heʼi: ‘Peju che rendápe peẽ penekaneʼõ ha pembaʼapo pohýiva, ha che pomombytuʼúta. Peñemoĩ chendive che júgo guýpe ha che pomboʼéta. Che ningo chepyʼaporã ha nañembotuichái, upévare pombopiroʼýta. Che júgo napendejopymoʼãi ha ivevýi pe kárga perahátava chendive’ (Mat. 11:28-30, NM). Jaikuaaháicha Jesús ohayhu ha otrata porã umi héntepe. Ñande avei ñahesaʼỹijóramo iñehémplo ha ñañehaʼã jajapo haʼe ojapo haguéicha, katuete ñanekyreʼỹ ha ñañeñandu porãvéta.

10, 11. Máva mávapa ikatu okonsola umi oikotevẽvape?

¹⁰ Ñane ermanokuéra oĩva ko múndo tuichakuére avei ñanekonsola. Koʼýte umi ansiáno ñanepytyvõ jahasa jave heta mbaʼe ijetuʼúva. Santiago heʼivaʼekue: ‘Oiméramo pende apytépe ikangýva térã hasýva, tohenói ansianokuérape ha haʼekuéra toñemboʼe hese’. Mbaʼéichapa ñanepytyvõta upéva? ‘Pe ñemboʼe ojejapóva jeroviápe omongueráta ikangýva térã hasývape, ha Ñandejára  omopuʼãta chupe, ha oimérõ hembiapo vai oñeperdonáta chupe.’ (Sant. 5:14, 15, ÑÑB.) Péro ñanemanduʼavaʼerã opavave ikatuha ñamokyreʼỹ ermanokuérape kongregasiónpe, ndahaʼéi umi ansiáno añónte.

¹¹ Sapyʼánte oĩ avei umi provléma ermanakuéra omombeʼuséva hapicha kuñámente. Upéicha jave umi ermána ikatupyry ha iñakãguapýva oñemoñeʼẽkuaa mborayhúpe umi ipyahuvévape. Haʼekuéra oiméne ohasáma umi mbaʼére ha ontendevéta chupekuéra kuña haguére. Katuete ningo tuichaiterei oporopytyvõta ipyʼaporã ha imbaʼerechakuaáramo koʼãichagua ermána ndive (elee Tito 2:3-5). Upéicharõ jepe, umi ansiáno ha ambue ermáno ‘omokyreʼỹvaʼerã umi ikangývape’ (1 Tes. 5:14, 15, JMP). Aníkena ñanderesarái Jehová ‘ñanekonsolaha [...] ikatu hag̃uáicha ñande avei ñakonsola umi ojepyʼapývape’ (2 Cor. 1:4, BNP).

12. Mbaʼérepa iñimportantete jaha rreunionhápe?

¹² Ñane rreunionkuéra ha umi téysto oñehesaʼỹijóva upépe tuicha ñanekonsola. La Bíbliape oñemombeʼu Judas ha Silas ojapo hague ‘heta diskúrso omokyreʼỹ ha omombaretéva ermanokuérape’ (Hech. 15:32). Avei oñepyrũ mboyve térã opa rire rreunión, ñañemongeta jepi ermanokuérandi ha ñañomombaretejoa. Upévare, jahasa jave peteĩ provléma ijetuʼúva, ndovaléi ñañemomombyry ermanokuéragui, upéicha nañasolusionamoʼãi mbaʼeve (Pro. 18:1). Iporãve jajapo Pablo heʼi haguéicha: “Jaheka mbaʼéichapa ikatu ñañopytyvõ jajoayhuve hag̃ua ha hetave mbaʼe iporãva jajapo hag̃ua. Ani ndajajúi ñande atyhápe, oĩháicha ojapóva, [ñañomokyreʼỹ] uvei ha taupechave koʼág̃a hiʼag̃uímava Ñandejára ára” (Heb. 10:24, 25).

Ñandejára Ñeʼẽ ñanekonsola

13, 14. Mbaʼéichapa ñanepytyvõ la Biblia?

¹³ Umi aréma ojevautisavaʼekue térã umi oñepyrũ ramóva jepe oguata Ñandejára rapére orekohína peteĩ mbaʼe oporombopyʼaguapýva. Mbaʼépa upéva? La Biblia. Pablo heʼi: ‘Opa mbaʼe ojeʼevaʼekue Ñandejára Ñeʼẽme, ojeʼe ñanerekomboʼe hag̃ua. Ikatu hag̃uáicha ñanembarete ha ñandepyʼapytuʼu umi mbaʼe ojeʼéva rupive ha jareko esperánsa’ (Rom. 15:4). Ñandejára Ñeʼẽ ñanemokyreʼỹ ha ñanembokatupyry ‘jajapo hag̃ua opa mbaʼe iporãva’ (2 Tim. 3:16, 17). Ajépa ñañeñandu porãite jaikuaávo Ñandejára rembipota ha umi mbaʼe porã omeʼẽtava ñandéve tenonderãme. Upévare jaiporúkena la Biblia ha umi puvlikasión ñanepytyvõva hesakãve hag̃ua ñandéve Jehová heʼíva. Jajapóramo upéicha tuicha ñandepyʼaguapýta ha jahupytýta hetaitereive mbaʼe porã.

¹⁴ Jesús oheja ñandéve peteĩ ehémplo iporãitereíva.  Haʼe oiporuvaʼekue Ñandejára Ñeʼẽ omboʼe ha okonsola hag̃ua umi héntepe. Upéi oñemoingove jey rire chupe, ojechauka mokõi hemimboʼépe ha ‘omyesakã chupekuéra opa mbaʼe oĩva Ñandejára Kuatiañeʼẽme’, ha umi mbaʼe omboʼéva opokoiterei hesekuéra (Luc. 24:32, NM). Pablo ohaʼanga porãiterei vaʼekue Jesúspe. Heta vése haʼe oiporu ‘Ñandejára Ñeʼẽ oñemongeta hag̃ua’ umi héntendi. Mbaʼépa ojapo umi ohendúva chupe? Pór ehémplo, umi Bereaygua ‘oguerohory voi ipyʼaite guive pe marandu porã, ha ára ha ára ohesaʼỹijo Ñandejára Ñeʼẽ’ (Hech. 17:2, 10, 11, NM ). Upévare iñimportanteterei jalee la Biblia káda día ha ñahesaʼỹijo umi puvlikasión, upéicharõmante ñandepyʼaguapýta ha ñahaʼarõta heta mbaʼe porã, jaikóramo jepe koʼã tiémpo ijetuʼuetévape.

Mbaʼéichapa ikatu avei ñaporokonsola

15, 16. Mbaʼéichapa ikatu ñaipytyvõ ha ñakonsola ñane ermanokuérape?

¹⁵ Heta mbaʼe ikatu jajapo ñambovevúi hag̃ua ñane ermanokuérape umi mbaʼe pohýi ohasáva. Pór ehémplo, jahakuaa ñambaʼejogua umi hasykatu térã ijedávape ha ñaipytyvõ chupekuéra oikotevẽramo oñemyatyrõ térã oñemopotĩ hóga (Fili. 2:4). Iporãitereíta avei jaʼe umi ermánope jaguerohoryha chupekuéra oporohayhu, ikatupyry ha ojerovia haguére térã opa mbaʼe porã ohechaukávare.

¹⁶ Mbaʼéichapa ñakonsolakuaa umi ermáno ijedávape? Jahavaʼerã javisita chupekuéra ha jajapysaka porã omombeʼu jave umi mbaʼe ohasavaʼekue ha mbaʼéichapa Jehová ovendesi iservísio. Katuete ñande avei ñanekyreʼỹta upe rire. Iporãitereíta jaleéramo chupekuéra la Biblia térã ambue puvlikasión, japrepara hendivekuéra Ñemañaha térã Ñandejára Ñeʼẽ Ñehesaʼỹijo upe semanarã. Ikatu avei jahecha hendivekuéra umi DVD vívliko, jalee térã ñamombeʼu umi ermáno rembiasakue osẽva ñande puvlikasiónpe ha omokyreʼỹtava chupekuéra.

17, 18. Mbaʼérepa jajerovia Jehováre ñanemokyreʼỹ ha ñanekonsolataha?

¹⁷ Jahecháramo peteĩ ermáno oikotevẽha ñakonsola chupe, ñanemanduʼakuaa hese ñañemboʼe jave Jehovápe ñaneañohápe (Rom. 15:30; Col. 4:12). Jahasa jave peteĩ mbaʼe ijetuʼúva térã ñakonsoláta jave ñande rapichakuérape, jahechaukavaʼerã jajeroviaha Jehováre ha jajapo pe salmísta heʼíva: “Ñandejára pópe emoĩ umi mbaʼe ndepyʼapýva ha haʼe oñangarekóta nderehe. Haʼe ndohejamoʼãi oñehundi umi hekojojáva” (Sal. 55:23 [55:22, NM]). Jaservíramo Jehovápe ñande pyʼaite guive, haʼe akóinte oĩta ñande ykére ñanepytyvõ ha ñanekonsola hag̃ua.

¹⁸ Yma Jehová heʼivaʼekue hembiguaikuérape: “Che voi romokyreʼỹ” (Isa. 51:12). Koʼág̃a avei haʼe ñanemokyreʼỹ ha ovendesi umi mbaʼe porã ñañehaʼãva jajapo ñakonsola hag̃ua ñande rapichakuérape. Enterovévape ñanemombarete Pablo ohaivaʼekue unhidokuérape: ‘Jesucristo [...] ha Ñandejára, upe ñanderayhúva ha omeʼẽvaʼekue ñandéve pyʼapytuʼu tapia g̃uarãva ha esperánsa añetegua ipyʼaporã rupi, haʼe tapenemokyreʼỹ ha tapenemombarete opa mbaʼe porã pejéva ha pejapóvape’ (2 Tes. 2:16, 17, BNP).

Ñanemanduʼápa koʼã mbaʼére?

• Mbaʼérepa jaʼekuaa pe marandu porã heta hetavépe okonsolaha ohóvo?

• Mbaʼe mbaʼépa jajapovaʼerã ñakonsola hag̃ua ñande rapichakuérape?

• Mbaʼe téystopa ohechauka Jehová okonsolaha hembiguaikuérape?

[Porandu ñahesaʼỹijóva]

[Nóta oĩva taʼanga ndive páhina 28]

Ñañehaʼãpa ñakonsola umi ohasa asývape?

[Nóta oĩva taʼanga ndive páhina 30]

Opavave ikatu ñamokyreʼỹ ñane ermanokuérape