Javyʼákena ñande rapichakuéra ndive

KOʼÁG̃A rupi ijetuʼueterei jaiko hag̃ua vyʼápe. Heta hénte opensa ndaikatumoʼãiha voi omombeʼu mbaʼeve iporãva hapichakuérape. Avei heta oĩ ojepyʼapýva ijehénte ha nopenavéimava avavére, koʼýte umi siuda tuichaháre.

Peteĩ profesór de Psicobiología hérava Alberto Oliveiro, heʼi: “Heta hénte koʼág̃a rupi oñeñandu haʼeño [...]. Ha umi siuda oĩhápe heta hénte koʼýte oñemohaʼeño hikuái, upévare ndojepyʼapýi ikompañéro de traváhore, ivesínore, ni umi oñatendévare supermerkádope térã almasénpe”. Péicha oñemohaʼeño rupi, heta héntepe ojagarra vyʼaʼỹ térã depresión.

Péro ñande kristiáno idiferénte rupi ñane situasión, ndajaikói umi hénte oikoháicha. Apóstol Pablo heʼivaʼekue voi: ‘Pevyʼa tapiaitékena’ (1 Tes. 5:16). Jaguereko ningo heta mbaʼe ñanembovyʼáva ha ikatúva ñamombeʼu ñande rapichakuérape. Pór ehémplo, ñamombaʼeguasu Jehovápe; ñantende  mbaʼépa omboʼe la Biblia; jaikuaa Ñandejára ikatuha ñandesalva ha jaikove opa ára g̃uarã, ha avei ñaipytyvõkuaa ñande rapichakuérape ohupyty hag̃ua koʼã mbaʼe neporãva (Sal. 106:4, 5; Jer. 15:16; Rom. 12:12).

Ojehechakuaa voi kristianokuéra oikoha vyʼápe ha omombeʼuha hapichakuérape mbaʼérepa oñeñandu upéicha. Pablo heʼivaʼekue voi umi Filiposguápe: ‘Avyʼa ha chepyʼarory penendive. Upéicha avei pevyʼa ha pendepyʼarory chendive’ (Fili. 2:17, 18, ÑÑB). Koʼápe Pablo heʼi dos vése voi iporãha javyʼa ha ñandepyʼarory ermanokuérandi.

Aníkena ñañemohaʼeño, upéva ikatu ñandejoko ani hag̃ua javyʼa ñane ermanokuérandi. Pablo oñemoñeʼẽ ñandéve kóicha: ‘Pevyʼákena Ñandejára renondépe’ (Fili. 3:1, BNP). Mbaʼéichapa ikatu jajapo upéva ñaime jave ermanokuérandi?

Javyʼákena ermanokuérandi

Pablo ohaírõ guare ikárta umi Filiposguápe, oiméne oĩrakaʼe préso Rómape opredika haguére pe marandu porã (Fili. 1:7; 4:22). Péro oĩramo jepe kárselpe, haʼe naikangýi opredika hag̃ua. Ovyʼaiterei katu ojapo haguére opa ikatúva Jehová servísiope, upévare ‘oñekuaveʼẽ’ ha oñemeʼẽmbaite iservísiope (Fili. 2:17). Pablo ohasavaʼekue, ohechauka ñandéve nodependeiha ñane situasiónre javyʼa hag̃ua, haʼe ningo oĩramo jepe kárselpe heʼi: ‘Asegíta avyʼa’ (Fili. 1:18).

Pablo omoñepyrũvaʼekue pe kongregasión Filípospe ha ohayhueterei voi umi ermánope. Ha oikuaa porã omombeʼúramo mbaʼeichaitépa ovyʼa Jehová servísiope, omokyreʼỹtaha chupekuéra. Upévare ohai: ‘Che pehenguekuéra, aipota peikuaa umi mbaʼe chéve ojehúva iporãha pe marandu porã ojekuaave hag̃ua. Opa umi mburuvicha guasu ha ambuekuéra avei ohechakuaa aimeha kárselpe Jesucristo rayhupápe’ (Fili. 1:12, 13). Pablo omombeʼu koʼã mbaʼe ohasáva oipotágui umi Filiposgua ovyʼa hendive, ha ojaponerakaʼe hikuái upéicha. Haʼekuéra ombyasy rangue Páblope oĩ haguére upe situasión ijetuʼuetévape, oñehaʼã ojesareko iñehémplore (Fili. 1:14; 3:17). Upe aja oñemboʼe hikuái hese ha oguerahauka chupe ikatumíva guive (Fili. 1:19; 4:14-16).

Jajapópa avei ñande Pablo ojapo haguéicha? Jajesarekópa umi mbaʼe porã jahasávare ñande rekovépe ha predikasiónpe? Ñaime jave ermanokuérandi ñamombeʼuvaʼerã  chupekuéra umi mbaʼe porã jahasavaʼekue predikasiónpe, ndahaʼéiramo jepe tuichaiterei mbaʼe. Pór ehémplo, ñañemongeta porãiterei hague peteĩ ogajárandi térã mbaʼéichapa ñamopensáraʼe chupe. Ikatu avei ñamombeʼu ñañemongeta porã hague peteĩ téysto vívlikore, térã oĩ hague ohechakuaáva ñande testígo de Jehovaha ha upéicha oñemombaʼeguasuha Ñandejárape. Ñañeʼẽ jave koʼã mbaʼére, javyʼañaína oñondivepa.

Oĩ heta ermáno akóinte oñehaʼãva osẽ opredika. Umi prekursór, superintendénte de sirkuíto, betelita, misionéro ha siérvo internasionál ipyʼaite guive ombaʼapo Jehová servísiope, ha vyʼapópe ojapo upéva. Ha ñande, javyʼápa koʼã ‘ombaʼapóvandi Ñandejára rréinope g̃uarã’? (Col. 4:11.) Ikatu ningo jaagradese chupekuéra umi mbaʼe ojapóvare. Pór ehémplo, ñaime jave rreunión térã aty guasuhápe ikatu torýpe ñamokyreʼỹ chupekuéra. Iporãta avei jasegi umi ermáno ehémplo, ñainvita chupekuéra okaru hag̃ua ñanendive ha ñahendu umi mbaʼe porã ohasavaʼekue, péicha ñanemokyreʼỹta avei hikuái (Fili. 4:10).

Javyʼákena umi ohasa asývandi

Pablo ningo ogueropuʼaka heta mbaʼe ijetuʼúva ha ojepersegivaʼekue avei, péro umi mbaʼe omombarete chupe osegi hag̃ua iñeʼẽrendu Jehovápe (Col. 1:24; Sant. 1:2, 3). Avei ovyʼa oipytyvõ haguére iñehémplo rupive umi ermáno Filiposguápe ombohovaikuaa hag̃ua umi mbaʼe ijetuʼúva. Ha omombeʼu hag̃ua chupekuéra mbaʼépa ombovyʼa chupe, ohai: ‘Peẽme ojeʼe pejerovia hag̃ua Jesucristo rehe, ha avei pehasa asy hag̃ua hesehápe. Peẽ ha che ningo ñaimeñaína peteĩ ñorairõme, upéva pehechamavaʼekue ha koʼág̃a pehendu upéicha jey aimehaʼaína’ (Fili. 1:29, 30, ÑÑB).

Koʼág̃a rupi avei heta kristiáno ombohovái umi mbaʼe ijetuʼúva opredika haguére, sapyʼánte oñembyepoti chupekuéra térã oñemondo kárselpe. Péro heta vése oñepuʼã avei hesekuéra ambue hendáicha, pór ehémplo oñeʼẽrei hesekuéra umi apóstata térã iparientekuéra ỹrõ ikompañerokuéra koléhiope térã itravahohapegua oñembohory hesekuéra. Jesús heʼivaʼekue voi ndajahecharamói ni nañanekangyivaʼerãha oiko jave koʼã mbaʼe, upéva rangue javyʼavaʼerã. Haʼe heʼi: ‘Pevyʼa oĩramo otakýva penderehe, pendepersegíva ha oñeʼẽreíva penderehe penemoherakuã vai hag̃ua che réra rehehápe. Pevyʼaitereíkena péicha jave, ha penemanduʼa Ñandejára tuicha omyengoviataha peẽme yvágape’ (Mat. 5:11, 12, NM).

Jaikuaáramo ñane ermanokuérape ojepersegi mbareteha ambue tetãme, ndovaléi ñañeñandu vai ni jajepyʼapyeterei. Upéva rangue javyʼavaʼerã, osegi rupi ogueropuʼaka heta mbaʼe Ñandejára rapére. Avei jajerure Jehovápe toipytyvõmi chupekuéra oaguanta ha omombareteve hag̃ua ijerovia (Fili. 1:3, 4). Jaikuaa ndaikatumoʼãiha jajapo heta mbaʼe koʼã ermáno rehehápe, péro ikatu ñaipytyvõ umi oĩvape ñane kongregasiónpe ha ohasa asýva hína. Iporãta jajepyʼapy ha ñanembaʼerechakuaa hendivekuéra. Avei ikatu ñainvita ñane ermanokuérape javyʼami hag̃ua oñondivepa, upearã jaʼekuaa chupekuéra toho jepi jastudia jave ñane famíliandi, topredika ñanendive térã ñaimemi hag̃uánte jepe oñondivepa.

Añetehápe jareko heta mbaʼe javyʼa hag̃ua ñande rapichakuérandi. Upévare aníkena ñañemohaʼeño ko múndope ojejapoháicha, javyʼa guei ermanokuérandi. Péicha jajoayhu ha jaikóta peteĩ ñeʼẽme kongregasiónpe, ha javyʼavéta ñane ermanokuérandi (Fili. 2:1, 2). Aníkena ñanderesarái Pablo heʼivaʼekuégui: ‘Pevyʼa opa ára Ñandejára rehehápe. Haʼe jey voi peẽme: Pevyʼákena!’ (Fili. 4:4).

[Roagradese oĩva páhina 6-pe]

Globo terráqueo: omeʼẽva Replogle Globes