Koʼág̃a rupi tekotevẽterei ‘peñatende porã’!

PETEĨ jey Jesús remimboʼekuéra oporandu chupe: ‘Mbaʼépa oikóta ropilla hag̃ua nde reimemaha, ha ko múndo ára paha hiʼag̃uimaha?’ (Mat. 24:3, NM). Haʼe heʼi oikotaha heta mbaʼe ohechauka porãva upéva ha katuete opillataha hikuái. Umíva jatopa Mateo 24, Marcos 13 ha Lucas 21-pe. Upéi heʼive chupekuéra: ‘Peñatende porãke’ (Mat. 24:42, NM).

Oiméramo ojekuaáta voi umi señál Jesús heʼíva, mbaʼére piko heʼi oñatende porã vaʼerãha hikuái? Primero, Jesús oiméne oikuaa oĩha heta mbaʼe ohesareátava kristianokuérape, ha upévare noñatendevéi umi señál rehe, ijerovia kangy ha ndojesarekovéi pe iñimportantevévare. Segundo, Jesús oiméne oikuaa oĩtaha nopenaguasúiva umi señál rehe, noñekumplipái rupi upe lugár haʼekuéra oikohápe. Ha ikatu opensa hikuái natekotevẽiha oñatende porã, oimoʼãgui heta gueteri ofaltaha ou hag̃ua pe ‘jehasa asy guasu’ (Mat. 24:21).

‘Haʼekuéra nopenái’

Jesús oñeʼẽrõ guare hemimboʼekuérandi imanduʼa umi hénte oikovaʼekuére pe Dilúvio mboyvemi. Haʼe heʼi ‘haʼekuéra nopenái’ hague umi mbaʼe ojeʼévare oikotaha, hiʼarive ohecha hikuái ojejapoha pe árka guasu, Noé opredika hague oikóvo ha ojejapoha hetaiterei mbaʼe vai (Mat. 24:37-39). Ñane tiémpope avei heta hénte nopenái umi mbaʼe ojeʼévare. Pór ehémplo, umi omaneháva ohecháramo peteĩ letréro heʼíva oiko mbegueve vaʼerãha, oikuaa mbaʼépa ojapovaʼerã, péro heta oĩ nopenáiva hese. Upévare umi autorida omoĩmante lómo de vúrro ha ambue mbaʼe ojeiko mbegueve hag̃ua. Upéicha avei, heta kristiáno ohechakuaa umi señál ojeʼevaʼekue oñekumpliha ko ára pahápe, upéicharõ jepe ojapo heta mbaʼe ohesareáva chupekuéra ha ndoserviporãvéi Jehovápe. Upéva oikovaʼekue peteĩ mitãkuñáre hérava Arielle, oĩva África occidentálpe.

Chupe ningo ogustaiterei hámbol, ha katuete voi ohecha télepe ojehuga jave. Peteĩ jey oikuaa ikoléhiope ojejapotaha peteĩ ekípo. Haʼe iñakãrakuete ha oñeanota opyta hag̃ua árkope, péro ndohechakuaái upe ojaposéva ikatuha omomombyry chupe Jehovágui. Mbaʼépa oiko upe rire? Haʼe voi omombeʼu: “Che kompañerakuéra chíko opita, ojedroga ha oñembohory cherehe, che katu aimoʼã nachembyaimoʼãiha upéva. Upéi apilla sapyʼa pe hámbol chegueraha vaiha ha omokangyha che jerovia. Chetavyete ningo hese, ni rreunionhápe ndacheresaráiri chugui. Aime jave Salónpe, pe huégorente apensa. Tuichaiterei ningo akambia, ha ndahaʼéi ku ahugasénteva síno aganaseterei voi. Heta óra apraktika káda día ajokove hag̃ua ha  upéva chemokaneʼõ. Ha amo ipahápe oñemomombyry chehegui heta cheamígo.

”Peteĩ jey ojekovra peteĩ penál ore kóntrape, ha ajerure Ñandejárape tachepytyvõmi ajoko hag̃ua. Upépe ahechakuaa ahasamaha la rrája, ha naĩporãveimaha Jehová renondépe. Mbaʼépa chepytyvõ akambia hag̃ua?

”Chemanduʼa pe DVD Los jóvenes preguntan... ¿Qué haré con mi vida? * ikatuha chepytyvõ. Ahecháma voi kuri upéva, péro koʼág̃a añatende porãvéma hese. Che provléma ningo ojoguaiterei Andy ohasavaʼekuépe. Asegi pe konsého omeʼẽva chupe pe ansiáno ha ajepyʼamongeta Filipenses 3:8 heʼívare. Upéva chepytyvõ ajedesidi hag̃ua ha aheja pe ekípo.

”Upe guive okambiaite che rekove. Nacheakãrakuvéi rupi huégore ahechakuaa tuicha apytuʼuveha. Avyʼave, añemoag̃uive ermanokuérare ha igustove chéve Jehová servísiope. Avei añatendeve rupi rreunionhápe ideprovechove chéve ha apredika porãve. Avyʼaveha katu koʼág̃a ajapo che prekursorádo auxiliar káda més.”

Arielle rehe oiko haguéicha, umi mbaʼe jajapóva ñanderesareáramo ha ndajahechakuaái umi señál Jesús heʼivaʼekue, tekotevẽ ñakambia. Jahechavaʼerã pe Índice de las publicaciones Watch Tower, oñembojojáva peteĩ mápare oporogueraháva heta pláta yvyguy oĩháme. Ñanepytyvõta jajuhu hag̃ua konsého porã ha heta ermáno rembiasakue ombohováimava ñane provléma rehegua. Tekotevẽ avei jaha meme rreunionhápe, jajeprepara ha ñaanota umi mbaʼe ojeʼéva upépe. Ñañatende porãvéta avei jaguapýramo tenonde gotyo. Ha ñañehaʼãvaʼerã ñakomenta oñepyrũrema voi oñeporandu. Avei jalee térã ñahenduvaʼerã umi notísia, ha ñapensa mbaʼéichapa oñekumpli umi señál Jesús heʼivaʼekue oikotaha ‘ára pahápe’, péicha jahechaukatañaína akóinte ñañatende porãha (2 Tim. 3:1-5; 2 Ped. 3:3, 4; Rev. 6:1-8).

‘Pehechaukáke peñembosakoʼimaha’

Umi señál ohechaukáva jaikomaha ára pahápe oñekumpli ‘oparupiete ko yvy ape ári’ (Mat. 24:7, 14, NM). Jaikuaa heta hénte ohasa asyha oikógui umi tetã oĩháme heta mbaʼasy, ñembyahýi, yvyryrýi ha ambue mbaʼe vai heʼíva la Biblia oikotaha. Péro oĩ avei umi lugár ndoikoguasuihápe mbaʼeve ha saʼive ojehasa asy. Ñande jaikóramo upeichagua lugárpe, ndajahejaivaʼerã ñanembotavy ha ñapensa heta gueteri ofaltaha og̃uahẽ hag̃ua pe jehasa asy guasu.

Jesús heʼivaʼekue: ‘Ápe ha pépe oĩta mbaʼasy ha ñembyahýi’ (Luc. 21:11, NM). Haʼe ndeʼirivaʼekue oikotaha koʼã mbaʼe opárupi ha ojojapaite, síno heʼi “ápe ha pépe”. Upévare ndaikatúi ñahaʼarõ oiko ojojapaite ko múndo tuichakuére opa mbaʼe Jesús heʼivaʼekue. Ikatu oĩ lugár hetahápe iñembyahýiva ha ambue hendápe katu oĩ heta okarurasámava. Upévare Jesús heʼive: ‘Peñatendékena pendejehe ani hag̃ua pendepyʼahatã ha peiko pekarurasa’ (Luc. 21:34, NM). Upévare ndaikatúi jaʼe káda uno jahasavaʼerãha katuete opa mbaʼe ojeʼevaʼekue. Avei heʼive: ‘Pehecha vove koʼã mbaʼe oiko, peikuaáta hiʼag̃uimaha Ñandejára  rréino’ (Luc. 21:31, NM). Noñekumplipáiramo jepe ñande jaikohápe umi profesía, ikatu jahecha umi notísia rupive oñekumpliha ambue hendápe.

Jehová orekóma peteĩ fécha oñepyrũ hag̃ua pe jehasa asy guasu. Ha toiko la oikóva, haʼe nokambiamoʼãi upe ‘ára ha óra’ (Mat. 24:36, NM).

Jesús heʼivaʼekue hemimboʼekuérape ‘oñembosakoʼíma hag̃ua’ (Mat. 24:44). Jaikuaa ningo iñimportanteha akóinte ñañembosakoʼi. Péro upéva ndeʼiséi koʼẽ guive pytũ meve jaikotaha japredika térã jaha rreunionhápe. Ndajaikuaái voi arakaʼetépa oñepyrũta pe jehasa asy guasu, ikatu ñandejagarra ñambaʼapohápe, ñande rógape térã ambue hendápe (Mat. 24:40, 41). Upéicharõ, mbaʼépa jajapovaʼerã ñañembosakoʼi hag̃ua toiko la oikóva?

Jahechamína mbaʼépa ojapo Emmanuel ha hembireko Victorine. Haʼekuéra seis ifamília, kuña memete, ha oiko Áfricape peteĩ lugár itrankilohápe. Upévare noñandúi hikuái oñekumpliha opa mbaʼe Jesús heʼivaʼekue. Mbaʼéicha rupípa akóinte oñatende porã hikuái? Káda día ohesaʼỹijo oñondivepa Ñandejára Ñeʼẽ. Emmanuel omombeʼu: “Ñepyrũrã ijetuʼu romohenda ore tiémpo rostudia hag̃ua, péro upéi rodesidi rojapo pyharevete la seis guive, seis imédia peve. Rohesaʼỹijo pe téysto upe arapegua, ha rostudiaʼimi avei umi puvlikasión ojeporútava rreunionhápe”. Koʼã mbaʼe oipytyvõ chupekuéra oñatende porãve hag̃ua. Pór ehémplo, Emmanuel oservi ikongregasiónpe coordinador del cuerpo de ansiánoramo, Victorine pyʼỹi ojapo iprekursorádo auxiliar ha hetápema oipytyvõ oservi hag̃ua Jehovápe, umi mitãkuña katu oñakãrapuʼã ohóvo Jehová servísiope.

Jesús heʼivaʼekue voi: ‘Peñatende porãke’ (Mar. 13:33, NM). Upéicharõ, aníkena jaheja mbaʼeve ñanderesarea ha nañañatendevéi. Arielle ojapo haguéicha, ñahendu ha jasegíkena umi konsého oñemeʼẽva ñane puvlikasionkuérape ha rreunionhápe. Emmanuel ha ifamília ojapoháicha, ñamohendákena ñane tiémpo jastudia hag̃ua káda día la Biblia. Péicha jajapóramo akóinte ñañembosakoʼi ha ñañatende porãta.

[Nóta]

[Nóta oĩva taʼanga ndive páhina 4]

Emmanuel ha ifamília akóinte oñatende porã ohesaʼỹijo rupi Ñandejára Ñeʼẽ káda día