Konsého iporãva omendáva ha omendaʼỹvape g̃uarã

‘Haʼe ningo peẽme koʼã mbaʼe [...] peiko hag̃ua hekopete Ñandejára rembiapópe pyʼapeteĩ reheve.’ (1 COR. 7:35, BNP)

1, 2. Mbaʼérepa ñahesaʼỹijovaʼerã umi konsého oĩva la Bíbliape omendáva ha omendaʼỹvape g̃uarã?

KUIMBAʼE ha kuñanguéra ikatu ojogueraha porã ha oiko vyʼápe, péro pyʼỹinte avei ojepyʼapy ha osẽ vai chupekuéra heta mbaʼe. Kristianokuéra katu oñemoag̃ui Jehováre oikuaa hag̃ua mbaʼéichapa oikovaʼerã hekópe porã. Péro ndahaʼéi upearãnte oñembojáva ñande Ru yvagapeguáre. Heta oĩ nomendáiva ha ovyʼánte avei, upéicharõ jepe, iñamígo ha ihentekuéra ojopy chupe oheka hag̃ua “ikostílla pehẽngue”. Ambue katu omendase, péro ndojuhúi gueteri iñirũrã. Avei umi oĩmava de nóvio oikotevẽ peteĩ oñemoñeʼẽva chupekuéra oikuaa hag̃ua mbaʼéichapa oikovaʼerã ha mbaʼépa oñehaʼarõ chuguikuéra omenda rire. Añetehápe, opavave ñambohovái heta mbaʼe ñanemoñuhãséva, upévare ñañatendevaʼerã akóinte ñanderekopotĩ hag̃ua, tahaʼe ñamendáva térã soltéro.

² Koʼãichagua desisión iñimportánte ikatu hag̃uáicha javyʼa ha ñaime porã Jehová renondépe. Primera a los Corintios kapítulo 7-pe, apóstol Pablo omeʼẽvaʼekue konsého oipytyvõtava omendáva ha omendaʼỹvape, upévare iporãta ñahesaʼỹijóramo. Haʼe ohaivaʼekue ko kuatiañeʼẽ ikatu hag̃uáicha jaiko “hekopete” ha ñanepytyvõ ñañemeʼẽmbaite hag̃ua “Ñandejára rembiapópe pyʼapeteĩ reheve” (1 Cor. 7:35). Ñahesaʼỹijóvo koʼã konsého, ñapensami mbaʼéichapa ikatu jaaprovecha jaservi porãve hag̃ua Jehovápe, jepe ñamenda térã nañamendái.

Káda uno odesidivaʼerã mbaʼépa ojapóta

3, 4. a) Mbaʼépa ikatu oiko oĩramo ojokupaitereíva peteĩ tapicháre nomendái haguére? b) Mbaʼéichapa ñanepytyvõ Pablo konsého jahecha hag̃ua hekopete pe ñemenda?

³ Síglo primérope, umi hudío heʼivaʼekue iporãveha oñemendáramo, ha ñane tiémpope heta hendápe oñepensa avei upéicha. Pór ehémplo, peteĩ soltéro naimitãvéimarõ, ihénte ha iñamigokuéra ojepyʼapy hese ha oimoʼã tekotevẽha oñemoñeʼẽ chupe ojeporekave hag̃ua iñirũrãre, térã ikatu voi heʼi: “Péva hoʼaitereíta nderehe”. Avei ijalkaguetéro ha ombohapepa voi chupe ojejuhu hag̃ua. Péro koʼã mbaʼe ikatu omoñeñandu vai upe tapichápe, opyta otĩ térã oiko vai iñamígo ndive.

⁴ Pablo ndojopyivaʼekue avavépe omenda hag̃ua ni opyta hag̃ua soltéro (1 Cor. 7:7). Haʼe oservi porã Jehovápe haʼeño, upéicharamo jepe oikuaa enterovéva ikatuha omenda omendaséramo, ha orrespeta upéva. Káda uno odesidivaʼerã mbaʼépa ojapóta ha avave ndojopyivaʼerã chupe.

Mbaʼéichapa solterokuéra oaprovechakuaa itiémpo

5, 6. Mbaʼérepa Pablo heʼi iporãha japyta soltéro?

⁵ Pablo ohaírõ guare ikuatiañeʼẽ umi Corintoyguápe, heʼi mbaʼéichapa peteĩ soltéro ikatu oaprovecha oservi porãve hag̃ua Ñandejárape (elee 1 Corintios 7:8). Haʼe nopensái iñimportanteveha hapichágui nomendái haguére, ojapoháicha  heta omotenondéva umi kristiáno guaʼúpe. Apóstol Pablo ohechaukasénte umi nomendáivape ijaveha ojapo hag̃ua hetave mbaʼe pe marandu porã rehehápe.

⁶ Umi nomendáiva sapyʼánte ikatu ojapo hetave mbaʼe Jehová servísiope, ndaikatumoʼãivakuri ohupyty omendárire. Pór ehémplo, Páblogui oikovaʼekue “tetã ambuegua apóstol” (Rom. 11:13, ÑÑB). Jaleévo Hechos kapítulo 13 guive 20 peve, jahecha haʼe ojapo hague heta mbaʼe Jehová servísiope: oviaha ambue misionéro ndive, oho opredika umi lugár ojepredikaʼỹháme gueteri ha omoñepyrũ heta kongregasión. Hiʼarive ohasa upérupi heta mbaʼe ijetuʼuetereíva, ñande ni ndajahasáiva (2 Cor. 11:23-27, 32, 33). Péro ovyʼaiterei oipytyvõ haguére hapichakuérape oservi hag̃ua Ñandejárape, upévare nopensaguasúi umi mbaʼe vai ohasávare (1 Tes. 1:2-7, 9; 2:19). Ikatúnepa ojapo koʼã mbaʼe hembireko térã ifamíliarire? Hasýtakuri chupe ojapo hag̃ua.

7. Mbaʼéichapa mokõi ermána soltéra oaprovecha opredikave hag̃ua?

⁷ Heta kristiáno nomendáiva oaprovecha omyerakuãve hag̃ua pe marandu porã. Pór ehémplo, mokõi prekursóra Boliviaygua, Sara ha Limbania, ova peteĩ tavaʼi heta tiémpoma ndojepredikaveihápe. Upépe ndaipóri elektrisida, péro haʼekuéra heʼi upéva ndahaʼeiha provléma: “Ndaipóri rupi rrádio ni téle, umi hénte itiempove olee hag̃ua”. Ivesinokuéra ohechauka chupekuéra ñane puvlikasión koʼág̃a ndojejapovéimava, upéicharamo jepe olee hikuái umíva. Koʼã mokõi ermána otopa hetaiterei hénte ohendu porãva chupekuéra, haimete káda ógape, upévare hasýpe opredikapa jepi hikuái upe lugár. Peteĩ kuñakarai ijedámava heʼi: “Testígo de Jehová og̃uahẽramo koʼa peve, heʼise oñehundi potaitemaha ko múndo”. Koʼã ermána ikyreʼỹ rupi, heta hénte oñepyrũma oho rreunionhápe.

8, 9. a) Mbaʼe rehépa Pablo opensa heʼírõ guare solterokuéra ikatuha ohupyty hetave mbaʼe? b) Mbaʼépa ikatu ojapove umi kristiáno nomendáiva?

⁸ Omendáva ningo ohupytykuaa avei heta mbaʼe omyerakuã jave pe marandu porã umi lugár ijetuʼuhápe. Péro umi prekursór  nomendáiva ikatu ojapo hetave tembiapo, umi omendáva térã ifamíliavape hasýtava ojapo hag̃ua. Apóstol Pablo heʼírõ guare solterokuéra ikatuha ohupyty heta mbaʼe, opensa pe tembiapo guasuete ojejapovaʼerãre. Haʼe oipota enterovéva ovyʼa oservívo Jehovápe haʼe ovyʼaháicha predikasiónpe.

⁹ Peteĩ prekursóra soltéra oikóva Estados Unídospe ohai: “Heta oĩ oimoʼãva tekotevẽha ñamenda javyʼa hag̃ua, péro che ahechakuaa ndaupeichaiha. Jaservíramo Jehovápe ha jareko chupe ñane amígoramo, opavave ikatu javyʼa. Sapyʼánte heta mbaʼe ijetuʼu nañamendáirõ, péro jaaprovecha porãramo ñane tiémpo ha ñanembaretekue, jahechakuaáta javyʼanteha avei”. Ko prekursóra omombeʼu: “Ñaneañóramo ikatu jajapo hetave mbaʼe ñanepytyvõva javyʼa hag̃ua. Jehová peteĩcha ñanderayhu opavavépe, ñamenda térã nañamendáiramo”. Ko ermána oservi koʼág̃a peteĩ lugár oñekotevẽhápe maranduhárare. Upéicharõ, opavave nomendáiva oñeporanduvaʼerã: “Ikatúpa aaprovecha che tiémpo ha ambaʼapove predikasiónpe?”. Oiméramo ikatu, rehechakuaáta Ñandejára omeʼẽha ndéve peteĩ jopói neporãva.

Solterokuéra omendaséva

10, 11. Mbaʼéichapa Jehová oipytyvõ umi omendase ha ndojuhúivape iñirũrã?

¹⁰ Heta kristiáno omendaséma oiko rire haʼeño heta tiémpo. Ha ikatu hag̃uáicha oiporavo porã iñirũrã, ojerure Jehovápe oipytyvõ hag̃ua chupekuéra (elee 1 Corintios 7:36).

¹¹ Oĩ ningo ermáno ha ermána otopaséva iñirũrã peteĩ oservíva Jehovápe ipyʼaite guive. Ndépa rehasareína ko situasión rehe? Oiméramo upéicha, eñemboʼe memékena (Fili. 4:6, 7). Anítei nekangy ohasáramo jepe heta tiémpo rehaʼarõ hague. Ejerovia Ñandejárare, haʼe nentende ha nepytyvõta reikotevẽháicha reñeñandu porã hag̃ua (Heb. 13:6).

12. Oĩramo omendaséva nderehe, mbaʼérepa repensa porã vaʼerã reñekompromete mboyve hendive?

¹² Sapyʼánte umi ermáno térã ermána ohekáva iñirũrã, ojuhu kristiáno noĩporãiva Jehová renondépe térã neʼĩrava voi ni ojevautisa. Ndaigústoiramo jepe ñaime ñaneaño, ñanemanduʼavaʼerã jahasa asyvetaha jaiporavo vaíramo. Upévare, ñapensa porãkena jadesidi mboyve, upe rire ndaikatumoʼãvéima jaguevi (1 Cor. 7:27). Aníkena jajedesesperágui reínte jajapo vyrorei; ikatuhína tuicha jajavy ha upe rire japyta ñambyasy (elee 1 Corintios 7:39).

Mbaʼéichapa jajepreparavaʼerã ñamenda hag̃ua

13-15. Mbaʼépa ojehechamavaʼerã oñeĩ aja de nóvio?

¹³ Jahecha haguéicha, Pablo omombeʼu umi mbaʼe porã ikatúva ohupyty solterokuéra Ñandejára servísiope, péro haʼe ndeʼíri oĩ vaiha ñamenda. Upévare, espíritu sánto rupive ohai konsého oipytyvõtava umi omendasévape ontende porãve hag̃ua mbaʼépa ohasa umi omendáva ha mbaʼéichapa ikatu ojoayhuve hikuái.

¹⁴ Umi kristiáno omendaséva tekotevẽ ojepyʼamongeta heta mbaʼére. Oĩ aja de nóvio ikatu opensa ndaiporiha haʼekuéraicha ojoayhúva, upéicha rupi oimoʼã osẽ porãtaha chupekuéra opa mbaʼe. Omendaha díape katu haʼekuérantema voi; oimoʼã hikuái ndaiporiha mbaʼeve ko múndope ojokovaʼerã chupekuéra ojoayhu ha ovyʼa hag̃ua opa árare. Péro opensa porãramo, ohechakuaáta oĩtanteha voi provléma, ha ndahaʼéi ojoayhu haguérente oñesolusionátamava koʼã mbaʼe (elee 1 Corintios 7:28). *

 ¹⁵ Heta omenda ramóva ni ndoroviaséi ojoavyha umi mbaʼe iñimportántevape. Pór ehémplo, oĩ noñontendéiva oñeʼẽ jave plátare, umi vyʼarãre, moõpa oikóta térã arakaʼépa ovisitáta ihentekuérape. Avei omenda mboyve oimoʼãkuri vyroreinteha imborayhu jára defékto térã ilája, péro koʼág̃a ikuerairo ha ndoikuaavéima mbaʼépa ojapóta. Opa umívare oñemongeta ha ohechamavaʼerã hikuái koʼã mbaʼe oĩ aja de nóvio.

16. Mbaʼérepa umi omendáva oñemoĩvaʼerã peteĩ ñeʼẽme osolusiona hag̃ua umi provléma?

¹⁶ Umi omendáva ombohovaivaʼerã oñondive opa mbaʼe ijetuʼúva, upéicharõmante ovyʼa ha osẽ porãta hikuái. Mokõivéva og̃uahẽvaʼerã peteĩ ñeʼẽme odesidi jave mbaʼéichapa ohekomboʼéta ifamília ha oñangarekóta ituvakuéra ijedávare. Avei ndohejaivaʼerã umi provléma ogapypegua omomombyry chupekuéra ojuehegui. Osegíramo hikuái la Biblia heʼíva ikatúta osolusiona térã ogueropuʼaka umi mbaʼe ijetuʼúva, ha oikóta vyʼapópe peteĩ ñeʼẽme (1 Cor. 7:10, 11).

17. Mbaʼépa heʼise kuimbaʼekuéra omendáva ‘ojepyʼapyha umi mbaʼe ko yvy arigua rehe’?

¹⁷ Pablo omombeʼuvaʼekue 1 Corintios 7:32-34-pe (elee) mbaʼépa ohasa umi omendáva. Heʼi umi kuimbaʼe omendáva ‘ojepyʼapyha umi mbaʼe ko yvy arigua rehe’ térã tembiʼu, ao, óga ha ambue mbaʼe oñekotevẽva rehe. Mbaʼérepa ojepyʼapy koʼã mbaʼére? Tekotevẽ rupi oñangareko hembirekóre ha omoñeñandu porã chupe. Omenda mboyve oiméne osẽvéraʼe opredika, péro koʼág̃a tekotevẽma avei oñemotiémpo hembirekópe g̃uarã, ha hembireko ojapovaʼerã avei upéicha. Ajépa javyʼaite ñande Ru iñaranduetéva ohechakuaa haguére koʼã mbaʼe! Jehová oikuaa umi omendáva oñemoag̃uivaʼerãha ojuehe, ha upearã tekotevẽha oiporu itiémpo  ha imbaretekue ymave oiporuvaʼekue iservísiope.

18. Mbaʼépa tekotevẽ okambia umi omenda ramóva?

¹⁸ Pablo heʼíva ñanemboʼe avei ambue mbaʼe. Umi omendáva omboykéramo itiémpo oiporúva Ñandejára servísiope oñangareko hag̃ua hembiayhúre, omboykevaʼerã avei pe tiémpo ohasáva iñamigokuéra ndive oĩve hag̃ua hembirekóndi. Ñañeporandumína: Mbaʼéichapa oñeñandúta peteĩ tembireko iména osegínteramo ohuga iñamigokuéra ndive isoltéro tiémpope guaréicha? Mbaʼépa opensáta peteĩ ména hembireko osegíramo ohasa heta óra iñamigakuéra ndive? Pyaʼeterei opensáta ndohayhuporãiha chupe, oñeñandúta haʼeño ha ndovyʼamoʼãi. Péro mokõivéva oñehaʼãmbaitéramo oñemoag̃ui ojuehe ndoikomoʼãi upéva (Efe. 5:31).

Jehová oipota opavave ñanderekopotĩ

19, 20. a) Ikatúpa jaʼe ñamenda haguére ndajaʼamoʼãiha tekokyʼápe? b) Mbaʼépa ikatu oiko umi omendáva nopenaguasuvéiramo ojuehe?

¹⁹ Kristianokuéra ohechakuaa tekotevẽtereiha oñemomombyry tekokyʼágui. Oĩ kristiáno omendáva ani hag̃ua hoʼa koʼã mbaʼépe. Péro ñamenda haguére ndeʼiséi ndajaʼamoʼãiha koʼãichagua mbaʼe vaípe. Ymave umi táva imurálla yvatéva omoʼã umi héntepe vandidokuéragui, péro osẽramo okápe ikatu oñemonda térã ojejuka chupekuéra. Upéicha avei ména ha tembireko ndahekokyʼamoʼãi nosẽima guive Jehová heʼívagui.

²⁰ Mbaʼépa heʼi Jehová? Pablo omyesakã porã 1 Corintios 7:2-5-pe. Upépe heʼi umi omendáva ‘omeʼẽvaʼerãha ojupe’ upe oikotevẽva. Ména ha tembireko añoite ikatu oreko rrelasión oñondive ha ndovaléi oñenega ojuehegui. Péro ñambyasýramo jepe oĩ nopenavéiva iména térã hembirekóre heta tiémpore, tahaʼe omotenonde rupi itraváho térã oñemovakasióngui haʼeño. Ñambyasyetéta ningo peteĩva ‘ndojejokokuaáigui’ hoʼáramo Satanás ñuhãme ha ou hekokyʼa oñemomombyry haguére ojuehegui. Jehová katuete ovendesíta umi ména oñehaʼãvape omeʼẽ hogayguakuérape opa mbaʼe oikotevẽva ha oñangareko porã hembirekóre (Sal. 37:25).

Mbaʼérepa iporã jajapo la Biblia heʼíva

21. a) Mbaʼérepa ijetuʼu jadesidi japytátapa soltéro térãpa ñamendáta? b) Mbaʼéichapa ñanepytyvõ 1 Corintios kapítulo 7?

²¹ Ijetuʼu ningo jadesidi japytátapa soltéro térãpa ñamendáta. Enterovéva ñaneimperfékto ha upéicha rupi ñaneprovléma jepi ñande rapichakuéra ndive. Umi kristiáno ohasánte avei umi mbaʼe ijetuʼúva, péro jajapóramo 1 Corintios kapítulo 7 heʼíva jajehekýita heta akãrasýgui, ha iñimportanteveha katu ‘jajapo porãta’ opa mbaʼe Ñandejára renondépe, ñamenda térã ñandesoltéroramo jepe (elee 1 Corintios 7:37, 38). Opavave jaipota Jehová ñandeguerohory ha ndaipóri mbaʼeve iporãvéva upévagui. Upéicha añoite ikatúta jaiko opa árare peteĩ múndo pyahúpe ha avavéma nañandejopymoʼãi síno opavavénte ovyʼáta, tahaʼe kuña térã kuimbaʼe.

[Nóta]

Ikatúpa rembohovái?

• Mbaʼérepa ndajajopyivaʼerã avavépe omenda hag̃ua?

• Mbaʼéichapa solterokuéra ikatu oiporu porãve itiémpo?

• Mbaʼéichapa ojepreparavaʼerã omenda hag̃ua umi oĩva de nóvio?

• Ikatúpa jaʼe umi omendáva ndoʼamoʼãiha tekokyʼápe?

[Porandu ñahesaʼỹijóva]

[Nóta oĩva taʼanga ndive páhina 14]

Umi kristiáno soltéro ovyʼave oiporúramo itiémpo Jehová servísiope

[Nóta oĩva taʼanga ndive páhina 16]

Mbaʼépa tekotevẽ ñakambia ñamenda rire?