Oñeporandúva jepi

Mbaʼépa ajapovaʼerã oĩramo peteĩ mbaʼe nantendeporãiva la Bíbliape térã aikuaaséramo mbaʼéichapa asolusionáta peteĩ provléma?

Proverbios 2:1-5 ñanemokyreʼỹ jaheka meme hag̃ua ‘pláta yvyguýicha’ pe arandu ha akãporã. Upéva heʼise ñañehaʼãvaʼerãha ñambohovái hag̃ua umi mbaʼe jaikuaasevéva la Bíbliagui térã ñasolusiona hag̃ua ñane provlemakuéra. Mbaʼéichapa nde ikatu rejapo upéva?

Lívro Benefíciese de la Escuela del Ministerio Teocrático, páhina 33-38 heʼihápe “La investigación eficaz”, omyesakã mbaʼéichapa ojeporuvaʼerã umi mbaʼe omeʼẽva ‘tembiguái jeroviaha ha iñarandúva’ (Mat. 24:45, NM). Páhina 36-pe ohechauka mbaʼéichapa ikatu ojeporu porã pe Índice de las publicaciones Watch Tower, heʼíva moõpa retopáta informasión umi téma ha téystore. Upéva nepytyvõta reheka hag̃ua umi ñeʼẽ térã versíkulo rentende porãsevéva ha mbaʼe puvlikasiónpepa retopáta. Avei rrevísta Ñemañaháme osẽ jepi diciémbrepe káda áño pe párte heʼíva “Umi mbaʼe osẽvaʼekue Ñemañaháme”. Nepasiénsiakena reheka vove umi informasión térã peteĩ konsého nepytyvõtava. Nemanduʼákena rehekahareína “pláta yvyguy”, ha upearã reñemotiémpo ha reñehaʼãvaʼerã.

Jaikuaa ningo ñane puvlikasionkuérape noñemyesakãiha káda téysto ni opaichagua téma noñentendeporãiva. Avei ikatu oñemyesakã peteĩ téysto, péro noñehesaʼỹijói pe téma ñande jaikuaaséva. Ha sapyʼánte katu ñañeporandu peteĩ mbaʼe la Biblia nomyesakãporãiva. Umícha jave ani ñapensaiterei umi mbaʼe ndaikatúivare oñemyesakã koʼág̃a ha ani ñaimoʼã pyaʼeterei jatopataha umi mbaʼe jaikuaaséva. Mbaʼevépe nañasẽmoʼãi jajodiskutíramo ‘umi ñeʼẽreíre’ nañanepytyvõmoʼãiva jaikuaave hag̃ua Ñandejárape ni ñamombareteve hag̃ua ñande jerovia (1 Tim. 1:4; 2 Tim. 2:23; Tito 3:9). Umi ermáno oĩva séde mundiál térã sukursalkuérape ndaikatúi ohesaʼỹijo ha ombohovái umi porandu nosẽiva ñane puvlikasionkuérape. Javyʼamavaʼerã jaikuaa haguére Ñandejára Ñeʼẽ ikatuha ñanepytyvõ jaiko porãve hag̃ua. La Biblia nomombeʼupái rupi opa mbaʼe jaikuaaséva, ñanepytyvõ jajeroviave hag̃ua upe Ohaikavaʼekuére (ehecha mbaʼépa heʼive lívro Acerquémonos a Jehová páhina 185 ha 186).

Oiméramo rejapóma opa ikatúva retopa hag̃ua informasión, péro nahesakãi ndéve upe reikuaaséva ni neresolusionái gueteri ne provléma, mbaʼépa ikatu rejapove? Reporandukuaa peteĩ ansiáno ne kongregasionguápe térã ambue ermáno ijerovia mbaretévape. Koʼã ermáno oikuaa porã umi konsého oĩva la Bíbliape ha ohasáma heta mbaʼe oservívo Jehovápe. Haʼekuéra iñakãguapy ha ndekuaa porã, upévare tuicha nepytyvõta, koʼýte oiméramo ne provléma térã redesidivaʼerã peteĩ mbaʼe. Avei aníkena nderesarái remombeʼu hag̃ua Jehovápe mbaʼépa ndepyʼapy. Ejerure chupe tanepytyvõ ijespíritu sánto rupive, ‘Haʼe hína upe omeʼẽva arandu ha akãporã’ (Pro. 2:6; Luc. 11:13).