Ñaipytyvõ umi ermánope ombaʼapove hag̃ua kongregasiónpe

‘Oñehekomboʼe porãramo ohupytýne imboʼehárape’ (LUC. 6:40, NM)

1. Mbaʼéichapa Jesús omoñepyrũvaʼekue peteĩ kongregasión oho mboyve yvágape?

APÓSTOL Juan omohuʼãvo Ikuatiañeʼẽ heʼi: ‘Añetehápe, oĩ hetave mbaʼe Jesús ojapovaʼekue, péro peichahágui ojehaipátaramo umíva, chéverõ g̃uarã ko múndope ndaijapamoʼãi umi kuatiañeʼẽ’ (Juan 21:25, NM). Jesús oĩrõ guare ko yvy ape ári ombaʼapo kyreʼỹ vaʼekue oiporavo ha ombokatupyry hag̃ua umi kuimbaʼe osegítavape omoakã ko tembiapo haʼe oho rire yvágape. Péicha, oho mboyve yvágape áño 33-pe, omoñepyrũma peteĩ kongregasión ijojahaʼỹva okakuaáva ohóvo pyaʼeterei (Hech. 2:41, 42; 4:4; 6:7).

2, 3. a) Mbaʼérepa umi kuimbaʼe ojevautisámava oñehaʼãvaʼerã ikatupyryve? b) Mbaʼépa jahecháta ko artíkulope?

² Koʼág̃a oĩma siete millón rupi umi maranduhára oĩva cien mil rasa kongregasiónpe, upévare oñekotevẽterei hetave ansiáno omoakãvaʼerã koʼã kongregasión. Ha ojeguerohoryeterei umi ermáno oñehaʼãvape ojapo opa oñekotevẽva oiko hag̃ua chugui ansiáno, umíva ningo ‘mbaʼe porã ojaposehína’ (1 Tim. 3:1, BNP).

³ Jaikuaa ningo avave ndaikatuiha péicha péichante ohupyty umi mbaʼe oñehaʼarõva chugui oservi hag̃ua ansiáno térã siérvo ministeriálramo. Ndahaʼéi avei ijestúdio porã térã ohasáma rupi heta mbaʼe ohupytýtamava upéva, síno iñimportanteve hína ojapo umi mbaʼe ojejeruréva la Bíbliape ha ojerovia Jehováre. Upéicharõ, mbaʼéichapa ikatu oñepytyvõ kuimbaʼekuérape oñakãrapuʼãve hag̃ua kongregasiónpe? Jesús heʼivaʼekue: ‘Oñehekomboʼe porãramo ohupytýne imboʼehárape’  (Luc. 6:40, NM). Ko artíkulope jahecháta mbaʼéichapa pe Mboʼehára Guasu ombokatupyry hemimboʼekuérape ombaʼapove hag̃ua Jehová servísiope, ha avei mbaʼépa ikatu ñaaprende chugui.

‘Poguereko che amígoramo’

4. Mbaʼéichapa Jesús ohechauka hemimboʼekuéra iñamigoha?

⁴ Jesús ndoapoʼirivaʼekue hemimboʼekuérape, síno oiko iñamígoramo, oñemotiémpo chupekuéra g̃uarã ha ojerovia hesekuéra. Upévare heʼivaʼekue: ‘Aikuaauka peẽme opa mbaʼe che Ru heʼivaʼekue chéve’ (elee Juan 15:15). Ha katuete ovyʼáneraʼe hikuái Jesús ombohováirõ guare chupekuéra ko porandu: ‘Mbaʼépa oikóta ropilla hag̃ua nde reimemaha, ha ko múndo ára paha hiʼag̃uimaha?’ (Mat. 24:3, 4, NM). Avei Jesús oikuaauka chupekuéra opensáva ha oñandúva. Pór ehémplo, pe pyhare ojejagarra mboyve chupe ogueraha hendive Pedro, Santiago ha Juánpe hardín de Getsemanípe. Upépe ipyʼaite guive oñemboʼe Jehovápe umi mbaʼe oipyʼapývare chupe. Oiméne umi mbohapy apóstol nohendúi Jesús heʼíva iñemboʼépe, péro ohechakuaáne hese ijetuʼuha isituasión (Mar. 14:33-38). Ha ñapensamína avei mbaʼéichapa omombaʼéneraʼe hikuái ohechárõ guare Jesús rova ha ijao omimbipa (Mar. 9:2-8; 2 Ped. 1:16-18). Haʼekuéra ningo Jesús amigoite vaʼekue, upévare ojepytaso mbarete ijeroviápe ha oĩma ombaʼapove hag̃uáicha Jehová servísiope.

5. Mbaʼéichapa umi ansiáno ikatu ohechauka oipytyvõseha ermanokuérape?

⁵ Jesús ojapo haguéicha, umi ansiáno oipytyvõ ha oreko iñamígoramo ermanokuérape. Ohayhu ha ojepyʼapy hesekuéra, ha avei oñemotiémpo chupekuéra g̃uarã. Umi ansiáno ningo oikuaa ndaikatuiha omombeʼu heta mbaʼe ermanokuérape, upéicharõ jepe ndoikói oñomi opa mbaʼe oikuaáva. Síno ojerovia hesekuéra ha omombeʼu umi mbaʼe oikuaáva la Bíbliagui. Ha arakaʼeve ndoapoʼíri umi siérvo ministeriálpe, imitãramo jepe hikuái. Ohechakuaa katu hesekuéra ijerovia mbarete, ikatupyry ha oipytyvõha kongregasiónpe.

‘Che ahechauka peẽme mbaʼéichapa pejapovaʼerã’

6, 7. Mbaʼe ehémplopa Jesús oheja hemimboʼekuérape, ha mbaʼéichapa oipytyvõ chupekuéra upéva?

⁶ Jesús remimboʼekuéra ijerovia mbarete vaʼekue, péro heta mbaʼe ojapo oñehekomboʼe haguéicha chupekuéra hogapýpe (Mat. 19:9, 10; Luc. 9:46-48; Juan 4:27). Upéicharõ jepe, Jesús ndoikoivaʼekue oñemoñeʼẽ mante, oamenasa térã ojopy chupekuéra ojapo hag̃ua peteĩ mbaʼe ndogueropuʼakamoʼãiva. Ni ndeʼíri chupekuéra: “Pejapo che haʼéva ha ani che ajapóva”, omboʼe guei chupekuéra iñehémplo rupive (elee Juan 13:15).

⁷ Mbaʼe ehémplopa Jesús oheja hemimboʼekuérape? (1 Ped. 2:21.) Oñekontenta orekomívarente oservi porãve hag̃ua hapichakuérape (Luc. 9:58). Omboʼe umi mbaʼe oaprendevaʼekue Jehovágui, ndahaʼéi haʼe opensáva (Juan 5:19; 17:14, 17). Imbaʼeporã, opavavénte ikatu oñemboja hendápe ha ojapo opa mbaʼe oporohayhúgui (Mat. 19:13-15; Juan 15:12). Avei oipytyvõ hemimboʼekuérape iñehémplo rupive. Upéicha rupi Santiago ipyʼaguasu ojepersegíramo jepe chupe, ha oservi Ñandejárape ipyʼaite guive ojejukaha ára peve chupe (Hech. 12:1, 2). Ha upéicha avei apóstol Juan, osegi Imboʼehára ehémplo sesenta áño rasa rupi (Rev. 1:1, 2, 9).

8. Mbaʼéichapa umi ansiáno omoĩ ehémplo porã mitãrusukuéra ha ambue ermánope?

⁸ Umi ansiáno isakrifikádo, iñumílde ha oporohayhúva omoĩ ehémplo porã mitãrusukuérape (1 Ped. 5:2, 3). Avei ijerovia mbarete hikuái, oiko Ñandejára oipotaháicha, ikatupyry oporomboʼe ha opredika hag̃ua, péicha omoĩ ehémplo porã ikatúva osegi ermanokuéra (Heb. 13:7).

 ‘Jesús omondo koʼã doce kuimbaʼépe ha heʼi chupekuéra’

9. Mbaʼérepa jaʼekuaa Jesús ohekomboʼe hague hemimboʼekuérape opredika hag̃ua?

⁹ Dos áño Jesús opredika rire kyreʼỹme omondo umi doce apóstolpe opredika hag̃ua avei, péro upe mboyve heʼi chupekuéra mbaʼéichapa ojapovaʼerã (Mat. 10:5-14). Upéicha avei, omongarútarõ guare hetaitereípe peteĩ milágro rupive, heʼi raẽ hemimboʼekuérape mbaʼéichapa oipota omohenda umi héntepe oñemeʼẽ hag̃ua chupekuéra hembiʼurã (Luc. 9:12-17). Jahechaháicha, Jesús katuetei heʼivaʼekue hemimboʼekuérape mbaʼépa oipota ojapo ha mbaʼéichapa. Péicha ohekomboʼe rupi koʼã kuimbaʼépe ha oipytyvõgui chupekuéra pe espíritu sánto, ojapo hikuái hekoitépe pe tembiapo tuichaitéva oñepyrũvaʼekue áño 33-pe.

10, 11. Mbaʼéichapa oñehekomboʼevaʼerã umi ipyahúvape Jehová servísiope?

¹⁰ Koʼág̃a rupi, ñande ñañepyrũ ñahekomboʼe peteĩ kuimbaʼépe ostudia ypy guive la Biblia. Sapyʼánte tekotevẽta avei ñaipytyvõ chupe olee porãve hag̃ua. Péro tahaʼe haʼeháicha, ñaipytyvõvaʼerã chupe toñakãrapuʼãve ohóvo. Ha ojepokuaa vove oho káda semána rreunionhápe ñamokyreʼỹvaʼerã chupe oñeanota hag̃ua Eskuéla Jaiporukuaa Hag̃ua la Bíbliape ha upéi toiko chugui peteĩ maranduhára. Ojevautisa rire ikatu avei ñamokyreʼỹ chupe oipytyvõ hag̃ua oñemyatyrõ jave Salón. Ha amo gotyove jaʼevaʼerã chupe mbaʼépa tekotevẽ ojapo oiko hag̃ua chugui siérvo ministeriál.

¹¹ Oñemeʼẽ vove peteĩ kuimbaʼe ojevautisámavape hembiaporã, peteĩ ansiáno pyʼaguapýpe porã omyesakãta chupe mbaʼeichaitépa ojapovaʼerã ha mbaʼépa oñehaʼarõ chugui. Ha nosẽporãiramo chupe hembiapo, pe ansiáno ipyʼaporãva ndeʼimoʼãi hese ndoikoiha ojapo hag̃ua upéva. Omombeʼúta katu chupe mbaʼépa tekotevẽ ojapo porãve ha omyesakã jeýta mbaʼeichaitépa ojapovaʼerã. Ansianokuéra ningo ovyʼaiterei ikatúramo oipytyvõ peteĩ ermánope ombaʼapove hag̃ua kongregasiónpe (Hech. 20:35).

‘Iñarandúva ohendu ojeʼéva chupe’

12. Mbaʼérepa Jesús oñemoñeʼẽ jave hemimboʼekuérape tuichaiterei oipytyvõ chupekuéra?

¹² Jesús oñemoñeʼẽvaʼekue hemimboʼekuérape oikotevẽháicha hikuái. Pór ehémplo, omongavaju Santiago ha Juánpe ojerurérõ guare hoʼa hag̃ua tata yvágagui umi samaritáno ári nomog̃uahẽséi haguére chupekuéra (Luc. 9:52-55). Upe rire koʼã apóstol sy ohórõ guare ojerure Jesúspe omboguapy hag̃ua imembykuérape ijykére Irréinope, haʼe ohechakuaa koʼã mokõi oñemombaʼeguasuseha. Upévare oho oñeʼẽ hendivekueraite voi ha heʼi: ‘Che ndaikatúi haʼévo peẽme peguapytaha che deréchape térã che asu gotyo. Upéva ningo che Rúmante heʼivaʼerã mávapepa omeʼẽta’ (Mat. 20:20-23, NM). Jesús oñemoñeʼẽ jave ndahaʼéi heʼínteva mbaʼéicha ha mbaʼérepa ojejapovaʼerã peteĩ mbaʼe, síno oiporu Ñandejára Ñeʼẽ omopensa hag̃ua hemimboʼekuérape (Mat. 17:24-27). Haʼe ningo ojapo upéva ohayhuetereígui chupekuéra, avei imanduʼa haʼekuéra ndaikatuiha ojapo porã opa mbaʼe iñimperfékto rupi (Juan 13:1).

13, 14. a) Mávapepa tekotevẽ oñemeʼẽ konsého? b) Emombeʼu mbaʼépa ikatu ojapo umi ansiáno ohecháramo peteĩ ermáno noñakãrapuʼãiha.

¹³ Umi kuimbaʼe oñakãrapuʼãséva kongregasiónpe, ohendu ha ojapovaʼerã umi konsého oñemeʼẽva chupekuéra. Proverbios 12:15 heʼi voi: ‘Iñarandúva ohendu ojeʼéva chupe’. Péicha ojapo peteĩ mitãrusu, ha heʼi: “Che ningo ajapo porãseterei vaʼekue opa mbaʼe, upéva la che provléma. Péro peteĩ ansiáno oñemoñeʼẽ rire chéve ahechakuaa natekotevẽiha ajapo porã opaite mbaʼe aipytyvõ hag̃ua kongregasiónpe”.

¹⁴ Ansianokuéra ohecháramo peteĩ ermánope ojokoha umi mbaʼe ojapóva oñakãrapuʼã hag̃ua kongregasiónpe, oñembojavaʼerã hendápe ha oñemoñeʼẽ chupe pyʼaguapýpe  (Gál. 6:1). Omeʼẽvaʼerã avei konsého peteĩ ermánope ohechakuaáramo tekotevẽha okambiave. Pór ehémplo ohecháramo iñateʼỹ térã ikaigueha kongregasiónpe, ikatu ohechauka chupe mbaʼéichapa Jesús opredikavaʼekue kyreʼỹme, ha omanda hague hemimboʼekuérape ojapo hag̃ua avei upéicha (Mat. 28:19, 20; Luc. 8:1). Ha oĩramo peteĩ ermáno oñemombaʼeguasuséva kongregasiónpe, ansianokuéra ohesaʼỹijovaʼerã hendive mbaʼéichapa Jesús ohechaukavaʼekue hemimboʼekuérape noĩporãiha upéva (Luc. 22:24-27). Ikatu avei oĩ ermáno noperdonaséiva hapichápe, upéicha jave ansianokuéra ikatu ohesaʼỹijo hendive pe ehémplo oñeʼẽva pe tembiguái oñeperdona heta vaʼekuére, péro noperdonaséiva hapichápe vyroreíramo jepe upe odevéva chupe (Mat. 18:21-35). Ansianokuéra ohecháramo tekotevẽha oñemoñeʼẽ peteĩ ermánope, pyaʼe ojapovaʼerã (elee Proverbios 27:9).

‘Eñemombaretéke’

15. Mbaʼéichapa hogayguakuéra ikatu oipytyvõ peteĩ ermánope ombaʼapove hag̃ua kongregasiónpe?

¹⁵ Jaikuaa ningo umi ansiáno oipytyvõvaʼerãha peteĩ ermánope ombaʼapove hag̃ua kongregasiónpe, péro ndahaʼéi haʼekuérante ikatúva ojapo upéva. Pór ehémplo hogayguakuéra ikatu, ha tekotevẽ voi, oipytyvõ chupe oñakãrapuʼãve hag̃ua. Ha oiméramo ansiánoma voi, oikotevẽta katuete hembireko ha ifamiliakuéra oipytyvõ chupe. Añetehápe, arakaʼeve ndojapoporãmoʼãi hembiapo hogayguakuéra nomeʼẽirõ chupe tiémpo oipytyvõ hag̃ua ermanokuérape. Oipytyvõramo chupe ifamília, pe kongregasión oguerohoryetereíta chupekuéra; ha pe ermáno ojapóta vyʼápe hembiapo (Pro. 15:20; 31:10, 23).

16. a) Mávapa upe oñehaʼãvevaʼerã ohupyty hetave mbaʼe Jehová servísiope? b) Mbaʼépa ojapovaʼerã peteĩ ermáno oñakãrapuʼãséva?

¹⁶ Ikatu ningo oñepytyvõ peteĩ kuimbaʼépe oñakãrapuʼã hag̃ua, péro haʼe voi oñehaʼãvaʼerã ohupyty hetave mbaʼe Jehová servísiope (elee Gálatas 6:5). Natekotevẽi añete oiko chugui ansiáno térã siérvo ministeriál oipytyvõséramo ermanokuérape ha ombaʼapo kyreʼỹ hag̃ua predikasiónpe. Péro la Biblia ohechauka umi ermáno oñakãrapuʼãséva oñehaʼãvaʼerãha ojapo umi mbaʼe oñehaʼarõva chugui (1 Tim. 3:1-13; Tito 1:5-9; 1 Ped. 5:1-3). Avei ojapovaʼerã ambue mbaʼe omombaretétava ijerovia, pór ehémplo, tekotevẽ akóinte olee la Biblia, ostudia haʼeñohápe, ojepyʼamongeta, oñemboʼe ipyʼaite guive ha osẽ meme predikasiónpe. Péicha ojapotahína Pablo heʼivaʼekue Timotéope: ‘Eñemombaretéke teko marangatúpe Ñandejára ndive g̃uarã’ (1 Tim. 4:7, BNP).

17, 18. Mbaʼépa ikatu ojapo peteĩ ermáno noñakãrapuʼãiva kongregasiónpe okyhyje rupi, openságui ndovaleiha mbaʼeverã térã ndaipórigui mbaʼeve omomýiva chupe ojapo hag̃ua upéva?

 ¹⁷ Sapyʼánte oĩ ermáno noñehaʼãiva oservi ansiáno térã siérvo ministeriálramo okyhyje térã openságui ndovaleiha ojapo hag̃ua umi mbaʼe. Upéicha jave iporãta ojepyʼamongetáramo mbaʼeichaitépa Jehová ha Jesús ojapo heta mbaʼe ñanderehehápe. Ñande Ru yvagapegua ningo ‘opa ára ogueraha ijapére ñane mbaʼe pohýi’ (Sal. 68:19). Upévare jaʼekuaa Haʼe katuete oipytyvõtaha upe ermáno oñakãrapuʼãsévape. Pe ermáno ndahaʼéiva gueteri siérvo ministeriál térã ansiáno ikyreʼỹvéta opensáramo mbaʼeichaitépa oñekotevẽ kuimbaʼe ijerovia mbaretévare ojapo hag̃ua umi tembiapo kongregasionpegua. Ojepyʼamongeta rire koʼã mbaʼére ohechakuaáta ikatuha ojapo koʼã mbaʼe. Avei oñemboʼévo ojerurevaʼerã umi mbaʼe porã oúva espíritu sántogui, umíva apytépe pyʼaguapy ha jejokokuaa, oipytyvõtava chupe ani hag̃ua okyhyje ni opensa ndovaleiha mbaʼeverã (Luc. 11:13; Gál. 5:22, 23). Jehová ningo katuete ohovasáta umi oñehaʼãvape oñakãrapuʼã oporopytyvõse rupi.

¹⁸ Oĩ ermáno noñekuaveʼẽiva ombaʼapove hag̃ua kongregasiónpe, ndaipórigui mbaʼeve omomýiva chupe ojapo hag̃ua upéva. Mbaʼépa ikatu oipytyvõ chupe? Pablo heʼivaʼekue: ‘Ñandejára voi penepytyvõta pejapo hag̃ua haʼe oipotáva’ (Fili. 2:13, BNP). Jahechaháicha, Jehová hína upe ñanemomýiva ñaipytyvõ hag̃ua ñande rapichakuérape, ha ikatu voi omombarete oimeraẽ ermánope ombaʼapove hag̃ua iservísiope (Fili. 4:13). Opavavénte ikatu jajerure Jehovápe tañanepytyvõ jajapo hag̃ua pe iporãva (Sal. 25:4, 5).

19. Mbaʼépa ohechauka pe profesía heʼíva Ñandejára ‘omboutaha siete ovecharerekua ha ocho omoakãva’?

¹⁹ Jehová ohovasa umi ansiánope oñehaʼã haguére ohekomboʼe kuimbaʼekuérape oñakãrapuʼã hag̃ua. Ha oipytyvõ avei umi ermáno iñeʼẽrendu ha ombaʼaposevévape kongregasiónpe. La Biblia heʼi voi Ñandejára ‘omboutaha siete ovecharerekua ha ocho omoakãva’, umíva hína umi kuimbaʼe ikatupyrýva oñangarekóva kongregasiónre (Miq. 5:5). Ajépa javyʼaite oĩ haguére heta ermáno oñehekomboʼéva ha ojapóva opa ikatúva ombaʼapove hag̃ua kongregasiónpe ha péicha omombaʼeguasu Jehovápe.

Mbaʼépa rembohováita?

• Mbaʼéichapa Jesús ohekomboʼe hemimboʼekuérape ombaʼapove hag̃ua Jehová servísiope?

• Cristo ojapo haguéicha, mbaʼéichapa ansianokuéra oipytyvõkuaa umi ermánope oñakãrapuʼãve hag̃ua?

• Mbaʼéichapa hogayguakuéra ikatu oipytyvõ peteĩ ermánope oñakãrapuʼãve hag̃ua?

• Mbaʼépa ojapovaʼerã peteĩ ermáno oñakãrapuʼãséva kongregasiónpe?

[Porandu ñahesaʼỹijóva]

[Nóta oĩva taʼanga ndive páhina 31]

Mbaʼéichapa ikatu ñaipytyvõ peteĩ estudiánte oñakãrapuʼãsévape?

[Nóta oĩva taʼanga ndive páhina 32]

Mbaʼépa ojapovaʼerã umi ermáno oñakãrapuʼãsevéva kongregasiónpe?