Aníkena rejerovia “ndejehe añónte”

“Ejerovia Ñandejárare nde pyʼaite guive, ha ani ndejehe añónte.” (PRO. 3:5)

1, 2. a) Mbaʼe mbaʼépa ikatu ñambohovaiñaína? b) Mávarepa jajeroviavaʼerã jahasa jave umi mbaʼe ijetuʼúva, ha mbaʼérepa?

CLAUDIA * patrón omomichĩve ohóvo iñemprésa ha omosẽma heta empleádope. Haʼe opensa ohupytytaha avei chupe. Mbaʼépa ojapóta opytáramo travahoʼỹre? Mbaʼéichapa oñemantenéta? Peteĩ ermána hérava Pamela katu ovase ambue lugár oñekotevẽhápe maranduhárare. Péro iporãpa oho? Samuel, orekóva 20 áño, ojepyʼapy peteĩ mbaʼére. Michĩ guive ohechavaʼekue pornografía ha koʼág̃a ohechaseterei jey. Mbaʼépa ojapovaʼerã ani hag̃ua hoʼa jey upe vísiope?

² Mbaʼépa jajapo jepi jahasa jave umi mbaʼe ñandepyʼapýva, jadesidítaramo peteĩ mbaʼe iñimportánteva, térã oĩrõ peteĩ mbaʼe ñandepyʼaraʼãva? Jajeroviápa ñambohovaitaha koʼã mbaʼe ñandejehegui reínte, térãpa jajerure Jehovápe ñanepytyvõ hag̃ua? (Sal. 55:22.) La Biblia heʼi: “Ñandejára oñangareko umi ijoheipyréva rehe, ha ohendu umíva ñemboʼe” (Sal. 34:16 [34:15, NM]). Upéicharõ, jajerovia rangue ñandejehénte, iporãve jajerovia Jehováre ñande pyʼaite guive (Pro. 3:5).

3. a) Mbaʼépa heʼise jajerovia Jehováre? b) Mbaʼérepa heta tapicha ojerovia ‘ijehénte’?

³ Mbaʼépa heʼise jajerovia Jehováre? Heʼise jajapoha opa mbaʼe haʼe oipotahaichaite. Upearã tekotevẽ ñañemboʼe meme ha jajerure chupe tañanesãmbyhy. Péro heta kristiánope hasy jepi ojerovia hag̃ua Jehováre ipyʼaite guive. Pór ehémplo, peteĩ ermána hérava Linda omombeʼu: “Chéve ningo hasyeterei vaʼekue ajerovia hag̃ua Jehováre che pyʼaite guive”. Mbaʼérepa? Haʼe heʼi: “Che ru ndoikói orendive ha che sy katu ndojepyʼapyiete voi cherehe, upéicha rupi chemichĩ guive aiko chejeheve”. Umi mbaʼe ohasavaʼekuére, Líndape hasyeterei ojerovia hag̃ua ótrore. Sapyʼánte ikatu avei ñandekatupyryeterei térã jahupyty haguére heta mbaʼe jajerovia ñandejehéntema. Peteĩ ansiánore jepe ikatu oiko upéva ha oñepyrũ ojapo umi tembiapo kongregasionpegua oñemboʼeʼỹre Jehovápe.

4. Mbaʼépa ñahesaʼỹijóta ko artíkulope?

⁴ Jehová oipota ñañemboʼe chupe ha ñañehaʼãmbaite jajapo hembipota; ndoipotái ñañemboʼe ha jajapo jey ñandegustávante. Péro mbaʼéicha javépa jahejavaʼerã Jehová pópe umi mbaʼe ñandepyʼapýva, ha mbaʼéicha javépa tekotevẽ ñañehaʼã ñandete ñasolusiona? Mbaʼe rehépa ñañatendevaʼerã jadesidíta jave peteĩ mbaʼe? Mbaʼérepa tekotevẽ ñañemboʼe oĩramo peteĩ mbaʼe ñandepyʼaraʼãva? Ñambohovái hag̃ua koʼã porandu ñahesaʼỹijóta koʼág̃a umi ehémplo oĩva la Bíbliape.

Jajepyʼapyeterei jave

5, 6. Mbaʼépa ojapo Ezequías oamenasárõ guare chupe pe rréi Asiriaygua?

⁵ La Biblia oñeʼẽvo Ezequías rehe, peteĩ rréi oisãmbyhyvaʼekue Judá, heʼi: “Oiko Ñandejára ndive ha ndojeíri chugui arakaʼeve, ojapo uvei umi tembiapoukapy Ñandejára ohejavaʼekue Moisés rupi”. Upeichaite ningo,  “Ezequías ojerovia [Jehová] Israel Jára rehe” (2 Rey. 18:5, 6). Pór ehémplo, umi Asiriaygua ojagarra rire heta táva imurallapáva oĩva Judápe, ojagarrase avei Jerusalén. Upévare rréi Senaquerib omondo Rabsaqué ha ambue kuimbaʼekuéra iñimportánteva peteĩ ehérsito reheve Jerusalénpe. Mbaʼépa ojapo Ezequías? Haʼe oho Jehová témplope ha oñemboʼe kóicha: “Koʼág̃a, ore Ruete, ore Jára, orepeʼa ipoguikuéra, ajerure ndéve, ha mayma yvy ape arigua toikuaa, nde añoiteha [Jehová] ore Ruete, ore Jára tee” (2 Rey. 19:14-19, ÑÑB).

⁶ Ezequías oñemboʼe Jehovápe ha oheja haʼe oisãmbyhy chupe. Pór ehémplo, oho mboyve voi oñemboʼe témplope, omanda hetãyguakuérape ani hag̃ua ombohovái Rabsaqué heʼívape. Avei omondo proféta Isaías rendápe heta kuimbaʼe oikuaa hag̃ua mbaʼépa ojapóta (2 Rey. 18:36; 19:1, 2). Ezequías ndojeruréi Egíptope ni umi tetã oĩvape ijerére oipytyvõ hag̃ua chupekuéra, oikuaágui Jehovápe ndogustamoʼãiha upéva. Haʼe ndojeroviái ijehénte, síno Ñandejárare. Upéi Jehová omondo hiʼánhel ha ojuka 185.000 soldádo asíriope, ha Senaquerib ohopa jey hese Nínivepe (2 Rey. 19:35, 36).

7. Mbaʼéichapa ñanekonsola Ana ha Jonás ñemboʼe?

⁷ Ana, peteĩ levíta rembireko hérava Elqaná, oñeñandu vaieterei vaʼekue avei ndorekói haguére mitã, péro oheja Jehová pópe pe oipyʼapýva chupe (1 Sam. 1:9-11, 18). Proféta Jonáspe katu omokõ peteĩ pira guasu, ha upépe ojerure Jehovápe oipytyvõmi hag̃ua chupe, ha osẽ rire pe pira ryepýgui heʼi: “Ajejopy vai jave rohenói Ñandejára, ha nde cherendu. Omanóva ohoha ruguágui asapukái, ha nde rehendu che ñeʼẽ” (Jon. 2:1, 2, 10). Ijetuʼúramo jepe umi mbaʼe jahasáva, tuichaiterei ñandepyʼaguapy jaikuaávo Jehová ‘nomboykeiha ñane mbaʼejerure asy’ (elee Salmo 55:1, 16).

8, 9. Mbaʼépa ojekuaa oipyʼapyve hague Ezequías, Ana ha Jonáspe? Ha mbaʼépa ñanemboʼe upéva?

⁸ Ezequías, Ana ha Jonás rembiasakue ñanemboʼe mbaʼéguipa ndovaléi ñanderesarái ñañemboʼe jave peteĩ mbaʼe ñandepyʼapývare. Mbohapyvéva ohasa asy; upéicharõ jepe, iñemboʼe rupive ohechauka hikuái ndojepyʼapyiha ijehénte térã iprovlémarente. Upéva rangue, oipyʼapyve chupekuéra Ñandejára réra, mbaʼéichapa omombaʼeguasúta chupe ha mbaʼéichapa oñekumplíta hembipota. Pór ehémplo, Ezequías ohecha oñemongyʼaha Jehová réra ha hasy chupe upéva. Ana opromete imembýramo omeʼẽtaha Jehovápe pe mitã oservi hag̃ua chupe tavernákulope oĩva Silópe. Ha Jonás katu heʼi: “Che ñeʼẽ ameʼẽvaʼekue ndéve ajapóta” (Jon. 2:10 [2:9, NM]).

⁹ Jajerure jave Jehovápe ñandepeʼa hag̃ua peteĩ situasión ñandejopývagui, jahechavaʼerã mbaʼépa ñanemomýi jajapo hag̃ua upéva. Iporã ñañeporandu: “Chépa asolusionasénte che provléma térãpa apensa avei Jehová ha hembipota rehe?”. Ijetuʼuetereíramo ñandéve umi mbaʼe jahasáva, ndahasýi ñañepyrũ hag̃ua ñambotapykue Jehová servísio. Péro jajerurévo Ñandejárape ñanepytyvõ hag̃ua, ndovaléi jajepyʼapy ñandejehénte; ñapensavaʼerã avei hese, jajerure chupe oñemopotĩ hag̃ua héra ha tohechauka haʼe añoite orekoha derécho ñanesãmbyhývo. Jajapóramo péicha tuicha ñanekyreʼỹvéta, jepe noñesolusionái umi provléma ñande ñahaʼarõháicha. Sapyʼánte Jehová ombohovái ñane ñemboʼe ñanemombaretévo jagueropuʼaka hag̃ua umi mbaʼe ipohýiva (elee Isaías 40:29 ha Filipenses 4:13).

Jadesidíta jave

10, 11. Mbaʼépa ojapovaʼekue Jehosafat ohasárõ guare peteĩ mbaʼe ijetuʼúva?

¹⁰ Mbaʼéichapa nde redesidi umi mbaʼe iñimportánteva? Redesidi raẽpa ha upe rire ae ejerure Ñandejárape tanevendesi?  Jahechamína mbaʼépa ojapo rréi Jehosafat oisãmbyhyvaʼekue Judá. Opuʼã hesekuéra oñorairõ hag̃ua peteĩ ehérsito tuicháva oĩháme moavíta ha amoníta, péro umi Judaygua noĩri oñorairõ hag̃uáicha hendivekuéra. Mbaʼépa ojapo pe rréi?

¹¹ La Biblia heʼi: ‘Jehosafat okyhyjeterei ha oho ombaʼeporandu Ñandejárape’. Upe rire pe rréi heʼi umi Judayguápe oajuna hag̃ua, ha ombyaty ipuévlope ‘ojerure hag̃ua Ñandejárape toipytyvõ’ chupekuéra. Upéi Jehosafat oñemboʼy umi Judá ha Jerusalengua renondépe ha oñemboʼe: “Ore Jára, [nderekastigamoʼãi piko] chupekuéra? Ore ningo orembovyeterei rombohovái hag̃ua chupekuéra, oúva oréve hetaiterei ñorairõhára reheve. Ndoroikuaái mbaʼépa rojapóta! Nderehe añoite rojerovia”. Ñandejára ohendu ko rréi ñemboʼe ha oipytyvõ chupekuéra peteĩ milágro rupive (2 Cró. 20:3-12, 17). Upéicha avei, jadesidíta jave ndajajeroviaivaʼerã ñandejehénte síno Jehováre, koʼýte oĩramo peteĩ mbaʼe ikatúva ñandestorva térã ñanepytyvõ jaservi porã hag̃ua chupe.

12, 13. Mbaʼépa ojapo David odesidi mboyve?

¹² Mbaʼépa jajapovaʼerã oñepresentáramo peteĩ provléma ymave jahasamavaʼekue ha haʼetévaicha ñandéve ndahasymoʼãiva ñasolusiona? Jahechamína rréi David ohasavaʼekue jaikuaa hag̃ua mbaʼépa jajapóta. Umi amalekíta ojagarrárõ guare táva Ziqlag, ogueraha David rembirekokuéra ha ifamíliape ha avei umi kuimbaʼe oĩva hendive rembireko ha itaʼyrakuéra. Upémarõ David oñemboʼe Jehovápe ha heʼi: “Amuñátapa umi mondaha atýrape?”. Jehová heʼi chupe: “Emuña katu. Rehupytýta ha regueru jeýta opa umi ojeguerahavaʼekue”. David oho hapykuerikuéra ha ogueru jey “opa mbaʼe omondavaʼekue hikuái” (1 Sam. 30:7-9, 18-20).

¹³ Tiémpo rire umi Filisteaygua opuʼã Israel rehe. David oñemboʼe jey oikuaa hag̃ua mbaʼépa ojapóta ha Jehová heʼi chupe: “[Tereho] katu, roipytyvõta ha ndepuʼakáta hesekuéra” (2 Sam. 5:18, 19). Péro upe rire umi Filisteaygua oñemoĩ jey hesekuéra. Mbaʼépa ojapo David? Haʼe ikatúkuri opensa: “Ahasáma voi ningo dos vése koichagua situasión, añorairõtantema hendivekuéra”. Péro odesidíntemapa haʼe, térãpa oporandu jeýta Jehovápe mbaʼépa ojapóta? Haʼe ndojeroviái ijehénte ha oñemboʼe jey Ñandejárape. Ha haʼetépe ojapo upéva; Jehová koʼág̃a omanda chupe ani hag̃ua oñorairõ (2 Sam. 5:22, 23). Upéicha avei, ñañatendevaʼerã ani jajeroviaiterei ñandejehe jahasáma rupi upeichagua provlémare (elee Jeremías 10:23).

14. Mbaʼépa ñanemboʼe Josué ha umi ansiáno ojapovaʼekue oúrõ guare hendapekuéra umi gavaoníta?

¹⁴ Opavave ñaneimperfékto, upévare jahechavaʼerã mbaʼépa heʼi Jehová jadesidi mboyve peteĩ mbaʼe. Umi ansiáno ikatupyrýva jepe ojapovaʼerã upéicha. Ñanemanduʼamína Josué ha umi ansiáno Israelgua ojapovaʼekuére umi gavaoníta oúrõ guare ojerure chupekuéra ani hag̃ua oñorairõ hetãyguakuérandi. Koʼã kuimbaʼe omonde ao ha sandália tuja ogueroviauka hag̃ua chupekuéra ouha mombyrýgui. Josué ha umi ansiáno oporanduʼỹre Jehovápe oprometéntema noñorairõmoʼãiha hendivekuéra. Jaikuaaháicha, Ñandejára oheja chupekuéra okumpli heʼivaʼekue, péro omoĩka avei la Bíbliape Josué ha umi ansiáno ojapovaʼekue jahechakuaa hag̃ua ojavy hague hikuái noporandúivo Jehovápe mbaʼépa ojapóta (Jos. 9:3-6, 14, 15).

Oĩ jave peteĩ mbaʼe ñandepyʼaraʼãva

15. Mbaʼérepa tekotevẽ ñañemboʼe ñambohovái hag̃ua umi mbaʼe ñandepyʼaraʼãva?

¹⁵ Pe ‘léi pekádo rehegua’ ningo ñagueronase voi, upévare tekotevẽ ñañehaʼãmbaite ani hag̃ua jajapo umi mbaʼe vai ñande  rete ojaposéva (Rom. 7:21-25, BNP). Péro, mbaʼéichapa ñambohováita pe pekádo? Jesús heʼivaʼekue hemimboʼekuérape tekotevẽha oñemboʼe ikatu hag̃uáicha ipuʼaka umi mbaʼe oipyʼaraʼãvare chupekuéra (elee Lucas 22:40). Ha ñañemboʼe rire jepe nosẽiramo ñane akãgui umi mbaʼe vai, tekotevẽ ‘jajerure meme Ñandejárape’ tañanemoarandu ñambohovái hag̃ua pe ñandepyʼaraʼãva. Santiago heʼivaʼekue Jehová omoaranduha “pyʼaporã reheve opavavépe, ohekyiʼỹ rehe mbaʼeve avavépe” (Sant. 1:5, BNP). Ha upéi heʼi avei: “Oiméramo pende apytépe peteĩ ikangýva térã hasýva, tohenói ansianokuérape ha haʼekuéra toñemboʼe hese, ha tomona hese aséite [Jehová] rérape, ha pe ñemboʼe jerovia reheguáva osalváta pe ikangývape térã hasývape” (Sant. 5:14, 15, ÑÑB).

16, 17. Mbaʼe tiémpopepa ñañemboʼevaʼerã jaipotáramo Jehová ñanepytyvõ oĩramo umi mbaʼe ñandepyʼaraʼãva?

¹⁶ Ñambohovái hag̃ua umi mbaʼe ñandepyʼaraʼãva tekotevẽ ñañemboʼe, péro jajapovaʼerã itiémpope. Jahechamína peteĩ ehémplo oĩva Proverbios 7:6-23-pe. Peteĩ mitãrusu osẽ oguata kaʼaru pytũ kállere haʼe oikuaahápe oĩha peteĩ kuña rekovai. Pe kuña iñeʼẽkuaaiterei ha ombojuruheʼẽ pe mitãrusúpe. Haʼe osegi chupe ha oho hapykuéri peteĩ tóroicha ojegueraháva ojejuka hag̃ua. Mbaʼéicha rupi piko ojapo upéva? Ko mitãkariaʼy ‘ivýro’ térã itavyeterei ha oiméne ipuʼaka hese hete rembipota vai (Prov. 7:7). Ñapensamína: Mbaʼe tiémpopepa oñemboʼevaʼerã kuri? Ikatu jaʼe iporãtaha kuri oñemboʼe pe kuña oñeʼẽrõ guare chupe. Péro ñapensa porãramo jahechakuaáta iporãvéta hague oñemboʼérire opensárõ guare oike pe kálle oĩháme upe kuña.

¹⁷ Koʼág̃a avei ikatu peteĩ kuimbaʼe oñehaʼã oikóvo ani hag̃ua ohecha mbaʼe tieʼỹ. Péro ñamoĩ chupe oiporuha Internet ha otopa peteĩ páhina haʼe oikuaáva ikatuha oreko fóto térã vidéo itieʼỹva. Ajépa ojoguaite pe mitãrusu oñeñeʼẽha Provérbiospe. Oikéramo upe páhinape, haʼe voi oñembojahína oĩháme pe ñuhã. Upévare peteĩ oñehaʼãva ani hag̃ua hoʼa upe mbaʼe oipyʼaraʼãvape chupe, tekotevẽ oñemboʼe Jehovápe oiporu mboyve Internet ani hag̃ua oike umi mbaʼe iñakãme.

18, 19. a) Mbaʼérepa ijetuʼu jepi ñambohovái umi mbaʼe ñandepyʼaraʼãva, péro mbaʼépa ñanepytyvõta? b) Mbaʼépa jajedesidivaʼerã jajapo?

¹⁸ Heta vése ijetuʼu ñambohovái hag̃ua umi mbaʼe ñandepyʼaraʼãva térã umi vísio. Pablo heʼi: “Ñande rete oipotáva niko mombyry oĩ pe [...] espíritu oipotávagui, ha pe espíritu oipotáva oĩ mombyry ñande rete oipotávagui. [...] Ha péicha peẽ ndaikatúi  pejapo mbaʼeve pendejeheguínte peipotaháicha” (Gál. 5:17, JMP). Ikatu hag̃uáicha ñambohovái porã umi mbaʼe vai ñapensáva térã ñandepyʼaraʼãva, ñañemboʼevaʼerã ñande pyʼaite guive ha jajapo jajerurehaichaite Jehovápe. La Biblia heʼi: “Umi jepyʼaraʼã oúva pende ári ou avei opavave yvypóra ári”. Ha Jehová ñanepytyvõ rupi ikatúta ñambohovái oimeraẽ mbaʼe (1 Cor. 10:13, BNP).

¹⁹ Jehová ningo omeʼẽ ñandéve peteĩ jopói ijojahaʼỹva. Mbaʼépa hína upéva? Ñande ikatu ñañemboʼe chupe jahasa jave peteĩ situasión ijetuʼúvare, jadesidítarõ peteĩ mbaʼe iñimportánteva térã ñandepyʼaraʼã jave peteĩ mbaʼe. Jajerurévo chupe ñanepytyvõ hag̃ua jahechaukañaína jajeroviaha hese. Upéicharõ akóinte jajerurevaʼerã Jehovápe ijespíritu sánto ñanesãmbyhy ha ñanemombarete hag̃ua (Lucas 11: 9-13). Ha opa mbaʼe ári jajerovia hese, ani ‘ñandejehénte’.

[Nóta]

Nemanduʼápa?

• Mbaʼéichapa Ezequías, Ana ha Jonás ohechauka ojeroviaha Jehováre?

• Mbaʼéichapa David ha Josué rembiasakue ohechauka tekotevẽha ñapensa porã jadesidi mboyve?

• Mbaʼe tiémpopepa ñañemboʼevaʼerã oĩramo umi mbaʼe ñandepyʼaraʼãva?

[Porandu ñahesaʼỹijóva]

[Nóta oĩva taʼanga ndive páhina 9]

Mbaʼe tiémpopepa ñañemboʼevaʼerã oĩramo peteĩ mbaʼe ñandepyʼaraʼãva?