Jaiko “mbohupa ha tetã ambueguáramo” ko múndope
Jaiko “mbohupa ha tetã ambueguáramo” ko múndope
“Koʼãva [...] oiko mbohupa ha tetã ambueguáramo ko yvy apére.” (HEB. 11:13, ÑÑB)
1. Mbaʼéichapa Jesús heʼi oikovaʼerãha hemimboʼekuéra ko múndope?
JESÚS heʼi hemimboʼekuérare: ‘Haʼekuéra oĩ gueteri ko múndope’. Péro upéi omyesakã: ‘Haʼekuéra ndojeheʼái ko múndore, che ndajeheʼaiháicha avei ko múndore’ (Juan 17:11, 14, NM). Péicha ohechauka mbaʼéichapa umi omoirũva chupe oikovaʼerã ‘ko múndope’ oĩva Satanás poguýpe (2 Cor. 4:4). Añetehápe kristianokuéra oiko ko múndo añáme, péro nomoirũi chupekuéra mbaʼevetépe. Upévare ojeʼe hesekuéra oikoha “tetã ambuegua ha mbohupáramo” (1 Ped. 2:11, ÑÑB).
Oiko hikuái “tetã ambueguáramo”
2, 3. Mbaʼérepa ojeʼe Enoc, Noé, Abrahán ha Sara oiko hague “mbohupa ha tetã ambueguáramo”?
2 Ymaite guive Jehová rembiguaikuéra tuicha idiferénte umi hénte añágui. Pór ehémplo Enoc ha Noé. Haʼekuéra oiko pe Dilúvio mboyve ha ‘ojapovaʼekue Ñandejára rembipota’ (Gén. 5:22-24; 6:9). Mokõivéva pyʼaguasúpe omomarandu ojekastigataha opa hembiapo vaíva ha oñehunditaha pe múndo aña (elee 2 Pedro 2:5 ha Judas 14, 15). Haʼekuéra oikóramo jepe umi tekove ñaña apytépe, akóinte ojapo Jehová rembipota. Upévare Enoc rehe ojeʼe “ombopyʼarory hague [...] Ñandejárape”; Noé rehe katu ojeʼe ‘hekopotĩ hague hapichakuéra apytépe’ (Heb. 11:5, BNP; Gén. 6:9, ÑÑB).
3 Avei Abrahán ha Sara iñeʼẽrendu rupi Ñandejárape ohejavaʼekue umi mbaʼeta orekóva táva Úrpe ha oho oiko tetã ambuére (Gén. 11:27, 28; 12:1). Pablo heʼi: ‘Ojerovia rupi Abrahán iñeʼẽrenduvaʼekue Ñandejára ohenóirõ guare chupe oho hag̃ua pe yvy omeʼẽtavaʼekuépe chupe, ha osẽ hetãgui oikuaaʼỹre mamópa ohóta. Ha ojeroviágui Abrahán oikovaʼekue tetã ambueguáicha, kárpa guýpe, pe yvy Ñandejára heʼivaʼekuépe omeʼẽtaha chupe, ha Isaac ha Jacóbpe imbaʼekuéragui avei upe promésa’ (Heb. 11:8, 9, BNP). Koʼã tapicha iñeʼẽrenduetévare Pablo heʼi: “Koʼãva omanomba ohupytyʼỹre opaite mbaʼe [Ñandejára] oprometevaʼekue, opáichavo ijerovia rupi ohechavaʼekue mombyry guive umi mbaʼe, ha jeroviapópe oñemomirĩ ha oiko mbohupa ha tetã ambueguáramo ko yvy apére” (Heb. 11:13, ÑÑB).
Oñemomarandu umi isrraelítape
4. Mbaʼépa ojeʼe umi isrraelítape oike mboyve pe Yvy Oñeprometevaʼekuépe?
4 Ohasávo pe tiémpo Abrahán ñemoñare heta hetave ohóvo ha oiko chuguikuéra tetã Israel, avei orekóma hikuái Léi ha ijyvy tee (Gén. 48:4; Deu. 6:1). Péro umi isrraelíta ndahesarairivaʼerã Jehová haʼeha hetã Jára (Lev. 25:23). Jaʼekuaa hesekuéra oikoha Jehová yvýpe ha upévare orrespetavaʼerã hikuái hembipota. Avei akóinte tekotevẽ imanduʼa yvypóra ndoikoveiha ‘hiʼupýre añónte’, ndohejaivaʼerã umi mbaʼeta ohupytýva ombyesarái chupekuéra Jehovágui (Deu. 8:1-3). Oike mboyve pe Yvy Oñeprometevaʼekuépe, oñemomarandu umi isrraelítape: “Pende Jára heʼi haguéicha omeʼẽvo iñeʼẽ pende rukuéra ypykuépe Abrahán, Isaac ha Jacob, haʼe omeʼẽta peẽme peteĩ tetã oguerekóva táva tuicha ha iporãva peẽ napemopuʼãivaʼekue. Ogakuéra henyhẽta opa mbaʼe porãgui peẽ napembyatyivaʼekue, oguerekóta ykua peẽ ndapejoʼoivaʼekue, parrál ha olivoty peẽ napeñotỹivaʼekue. Peʼu rire ha peneryg̃uatã rire, ani penderesarái Ñandejára [Jehovágui]” (Deu. 6:10-12).
5. Mbaʼérepa Jehová omboykete umi isrraelítape ha mávapepa oiporavo upe rire?
5 Ha ndojeʼereíri chupekuéra umi mbaʼe. Nehemías tiémpope, heta levíta otĩ imanduʼávo ojapovaʼekuére umi isrraelíta oike rire pe Yvy Oñeprometevaʼekuépe. Orekómarõ óga porã, heta hiʼupy ha víno, upévantema iñimportánte chupekuéra g̃uarã ha oñepyrũ “ikyra hikuái hoʼúgui hoʼuséva”. Upe rire katu haʼekuéra opuʼã Jehováre ha ojuka umi proféta haʼe omondóvape oñemoñeʼẽ hag̃ua chupekuéra. Upévare Ñandejára oheja umi isrraelítape iñenemígo pópe (elee Nehemías 9:25-27; Ose. 13:6-9). Tiémpo rire, oĩrõ guare Roma poguýpe, umi hudío ojapo peteĩ mbaʼe ivaietereíva: ndojeroviái hikuái pe Mesías oñeprometevaʼekuére ha ojuka chupe. Upévare Jehová omboykete chupekuéra ha oiporavo peteĩ tetã pyahu: Israel Ñandejára mbaʼéva (Mat. 21:43; Hech. 7:51, 52; Gál. 6:16).
‘Peẽ ndapejeheʼái ko múndore’
6, 7. a) Mbaʼépa heʼi Jesús umi omoirũvare chupe? b) Mbaʼérepa jaʼekuaa kristianokuéra ndojeheʼaivaʼerãha ko múndore oĩva Satanás poguýpe?
6 Jahecháma haguéicha, Jesucristo, pe omoakãva kongregasión heʼi porã umi omoirũva chupe ndojeheʼamoʼãiha ko múndore oĩva Satanás poguýpe. Omano mboyvemi heʼi hemimboʼekuérape: ‘Peẽ peikórire ko múndoicha, haʼekuéra penderayhuvaʼerãmoʼã. Péro peẽ ndapejeheʼái ko múndore, che poiporavóma rupi ko múndogui, upévare haʼekuéra ndaijaʼéi penderehe’ (Juan 15:19, NM).
7 Hetave ohóvo umi heʼíva ijehe kristianoha, ikatúpa upe haguére umi oservíva Ñandejárape oikóntema avei ko múndope ojeikoháicha ha ojapo haʼekuéra ojapóva? Nahániri. Toĩ oĩháme, ojekuaavaʼerã idiferenteha hikuái umi hénte oikóvagui Satanás poguýpe. Amo treinta áño rupi Jesús omano rire, Pedro ohai umi kristiáno oikóvape umi táva oĩva Roma poguýpe: ‘Che ermanokuéra peikóva tetã ambuegua ha mbohupáramo, che poñatõi ani hag̃ua pejapo pende rete rembipota vai, oñemoĩvahína pende rekovére. Peiko porãkena ha hekoitépe ambue tetãyguakuéra ojeroviaʼỹva apytépe’ (1 Ped. 1:1; 2:11, 12, ÑÑB).
8. Mbaʼépa heʼi peteĩ istoriadór umi kristiáno ypykuére?
8 Peteĩ istoriadór ohechauka umi kristiáno ypykue oiko hague “mbohupa ha tetã ambueguáramo” rromanokuéra apytépe: “Oñemombeʼu jave umi kristiáno rembiasakue [...] ojeʼe jepi ombohovái hague hikuái 300 áñore heta mbaʼe ijetuʼúva, [...] pyʼỹinte ojepersegi mbarete ha oñemaltrata chupekuéra [...]. Avei oñemboja hesekuéra ojapoha heta mbaʼe vai. Ha nomoirũi haguére umi héntepe omombaʼeguasu hag̃ua umi ñandejára guaʼúpe, ojeʼe umi kristiánore ndojeroviaiha Ñandejárare. Ndofesteháigui hendivekuéra umi fiésta ndogustáiva Ñandejárape oĩháme vyʼarã ivai ha itieʼỹva, umi hénte oñembohory hesekuéra ha heʼi ndochaʼeiha hapicha yvypórare” (Historia del cristianismo, ohaivaʼekue Kenneth Scott Latourette).
Jaiporu hendápe porãnte ko múndo omeʼẽva
9. Mbaʼéichapa jahechauka tuicha ojavyha umi opensáva ‘ndajachaʼeiha ñande rapicha yvypórare’?
9 Mbaʼéichapa jaikovaʼerã ko ‘múndo vaietépe’? Umi kristiáno ypykuéicha ñande ndajajeheʼái avei ko múndore (Gál. 1:4, BNP). Upéicha rupi sapyʼánte oĩ opensa vaíva ñanderehe ha nañanderayhúiva. Péro tuicha ojavy hikuái heʼívo ‘ndajachaʼeiha ñande rapicha yvypórare’. Jahayhúgui enterovépe katu jaha hogaitépe ñamog̃uahẽ chupekuéra pe ‘marandu porã oñeʼẽva Ñandejára rréinore’ (Mat. 22:39; 24:14, NM). Kyreʼỹme jajapo ko tembiapo jaikuaa porãgui Jehová rréino, oisãmbyhýva Jesucristo, koʼẽrõitéma ohunditaha yvypóra imperfékto goviérno ha omoĩta peteĩ múndo pyahu oĩtahápe tekojoja (Dan. 2:44; 2 Ped. 3:13).
10, 11. a) Mbaʼéichapa jaiporu umi mbaʼe ko múndo omeʼẽva? b) Mbaʼéichapa kristianokuéra ohechauka oñatende porãha ha oiporuha hendápe porãnte ko múndo?
10 Koʼẽrõitéma oñehundíta ko múndo aña! Upévare ñande jaservíva Jehovápe jaikuaa porã ndajaikoivaʼerãha ñande rogapeguáicha ko múndope. Tekotevẽ akóinte ñanemanduʼa Pablo heʼivaʼekuére: ‘Che ermanokuéra, kóva che haʼese peẽme: Mbykýma pe tiémpo hembýva, upévare [...] umi ombaʼejoguáva toiko oguerokoʼỹramoguáicha, ha umi oiporúva ko múndo omeʼẽva, toiko oiporuʼỹramoguáicha; ko múndo ohasa rupi ohóvo’ (1 Cor. 7:29-31, NM). Péro mbaʼéichapa ñande kristiáno jaiporuñaína ko múndo omeʼẽva? Jaaprovecha heta mbaʼe ojapóva hikuái. Pór ehémplo jaiporu teléfono, komputadóra, Internet ha ambue mbaʼe ñamog̃uahẽ hag̃ua heta ñeʼẽme ko yvy tuichakuére umi mbaʼe porã omboʼéva la Biblia. Avei jaiporu ko múndo omeʼẽva ñañangareko hag̃ua ñandejehe, ñambaʼapo ha jahupyty hag̃ua ñane remikotevẽ. Péro jaiporuvaʼerã hekópe ha jahecha hendápe porãnte umi mbaʼerepy ha opa mbaʼe ko múndo oikuaveʼẽva (elee 1 Timoteo 6:9, 10).
11 Ñandejára rembiguái oñatende porãva, nomotenondéi umi estúdio ijyvatevéva. Heta oĩ opensáva umi mbaʼe iñimportantetereiha ikatu hag̃uáicha jaiko porã ha jajekuaa opárupi. Péro ñande jaiko tetã ambueguáicha ko múndope ha ndajaikói umi mbaʼe rapykuéri ‘ñañembotuichaségui’ (Rom. 12:16; Jer. 45:5). Ñande ningo Jesús remimboʼe ha upévare jajapo haʼe heʼíva: ‘Peñatende porãke ha ani pendetaryrýi mbaʼevére. Peguerekóramo jepe heta mbaʼe, pende rekove nodependeihína umi mbaʼe peguerekóva rehe’ (Luc. 12:15, NM). Oiméramo nde peteĩ mitãrusu térã mitãkuña, ehechavaʼerã mbaʼépa rehupytyse Ñandejára servísiope. Natekotevẽi resegi umi estúdio ipukúva, síno umi ideprovéchotava ndéve rehupyty hag̃ua ne remikotevẽnte. Iñimportanteve rejesareko umi mbaʼe nepytyvõtavare reservi hag̃ua Jehovápe ‘nde pyʼaite guive, ne ánga rugua guive ha opa ne arandu ha ne mbaretekue reheve’ (Luc. 10:27, NM). Upéicha rejapóramo ‘nanemboriahumoʼãi Ñandejára renondépe’ (Luc. 12:21, NM; elee Mateo 6:19-21).
Aníkena jajepyʼapy rasa ñane remikotevẽre
12, 13. Mbaʼérepa idiferénte ambue hapichágui umi kristiáno ojapóva Mateo 6:31-33 heʼíva?
12 Oĩ heta ñande rapicha oikóva umi mbaʼeta rapykuéri. Ñande jaservíva Jehovápe katu ndaupéichai. Mbaʼérepa? Ñahendu rupi Jesús heʼíva: ‘Ani pejepyʼapy ha peje: “Mbaʼe piko roʼumíta?”, térã “mbaʼépa romboyʼúta?”, térã “mbaʼépa romondéta?”. Koʼã mbaʼe rapykuéri ningo oiko tarovaite umi hénte oĩva ko múndope. Péro pende Ru yvagapegua oikuaa voi peẽ peikotevẽha koʼã mbaʼe. Pemotenonde meméke Ñandejára rréino ha hembipota, ha koʼã mbaʼe peikotevẽva oñemeʼẽta avei peẽme’ (Mat. 6:31-33, NM). Ñande jaikuaa porã ñande Ru yvagapegua arakaʼeve nombofaltaiha ñandéve ñaikotevẽva.
13 ‘Pe jerovia añeteguáva tuicha mbaʼe [...] ovyʼávape umi mbaʼe oguerekóva rehe’ (1 Tim. 6:6, ÑÑB). Péro heta tapicha oikóva ko múndope nopensái upéicha. Pór ehémplo, heta kuimbaʼe ha kuña omendáre oipotáma umi óga iporã ha orekopaitéva opa mbaʼe, umi aparáto osẽ pyahu pyahuvéva ha áuto. Péro umi kristiáno oikóva tetã ambueguáicha ko múndope opensa umi mbaʼe oikotevẽmívarente. Oĩ omboykéva umi komodida ikatu hag̃uáicha oiporuve itiémpo ha imbaretekue omombeʼu hag̃ua pe marandu porã oñeʼẽva Ñandejára rréinore. Ambue katu oservi prekursór, vetelíta, superintendénte térã misionéroramo. Ajépa jaguerohoryete koʼã mbaʼe ojapóva ñane ermanokuéra!
14. Mbaʼépa ontendeka Jesús omoĩvo ehémploramo peteĩ karai oñemitỹva?
14 Jesús omoĩ ehémploramo peteĩ karai oñemitỹva ha ontendeka ‘jajepyʼapyetereíramo ñane remikotevẽre ha jaikóramo pláta rapykuéri’, koʼã mbaʼe ikatuha ñandejoko ani hag̃ua jaservi porã Jehovápe (Mat. 13:22, NM). Mbaʼépa ñanepytyvõta ani hag̃ua jaʼa ko ñuhãme? Upearã tekotevẽ ñañekontenta pe jarekóvare ha jaiko tetã ambueguáicha ko múndo añáme. Upéicharõmante avei ‘ñande resaomañátapeteĩmbaʼérente’, akóinte jajesarekóta Ñandejára rréinore ha ñamotenondéta hembipota opa mbaʼe ári (Mat. 6:22, NM).
‘Ko múndo oñehundivaʼerã’
15. Mbaʼépa apóstol Juan heʼivaʼekue iñermanokuérape, ha mbaʼéichapa ñanepytyvõ upéva?
15 Mbaʼérepa ñande kristiáno jaiko “tetã ambuegua ha mbohupáramo”? Jaikuaa porã rupi ko múndo oñehundi potaitemaha (1 Ped. 2:11; 2 Ped. 3:7). Jaikuaávo koʼã mbaʼe ñanepytyvõ jadesidi porã hag̃ua umi mbaʼe jajaposéva, jahupytyséva ha jaipotáva. Juan oñemoñeʼẽ iñermanokuérape ani hag̃ua ohayhu ko múndo ha opa mbaʼe oĩva pype. Mbaʼérepa? ‘Ko múndo kóva oñehundivaʼerã hembipota vai reheve, upe ojapóva Ñandejára rembipota katu oikovéta tapia g̃uarã’ (1 Juan 2:15-17, ÑÑB).
16. Mbaʼéichapa jahechauka ñanediferenteha umi oikóvagui Satanás múndope?
16 Jehová oprometevaʼekue umi Israelguápe: “Peẽ peneñeʼẽrendúramo [...] peikóta che retã teéramo ku mbaʼe repyetéicha mayma tetãnguéra apytépe” (Éxo. 19:5, ÑÑB). Umi isrraelíta iñeʼẽrendu aja entéro idiferentevaʼekue umi ambue tetãgui. Omombaʼeguasu hikuái Ñandejárape hekopete ha oiko haʼe oipotaháicha. Koʼág̃a avei ojekuaa Jehová organisasión tuichaiterei idiferenteha Satanás múndogui. Ñande jahechauka ‘jaheja reiha pe ivaíva ha yvyporakuéra rembipota, jaiko hag̃ua ko múndope akãguapýpe, tekojoja ha Ñandejára rembijokuáiramo. Ha javyʼa ñahaʼarõvo pe ára porãite ojehechaukataha ijajaipápe Ñandejára mbaʼeguasuete ha Cristo Jesús ñande salvadór. Haʼe hetaite ohasa asy vaʼekue ñande rehehápe, ñanemosãso hag̃ua opa pekádo ñandepykua ha ñandepokuávagui; ha upéicha ñanemopotĩ hag̃ua imbaʼe teerã, jajapo hag̃ua tapiaite mbaʼe porã’ (Tito 2:11-14, JMP). Ñandejára puévlope oĩhína umi kristiáno ojeporavovaʼekue oho hag̃ua yvágape ha avei ‘ambue ovechakuéra’ omoirũ ha oipytyvõvahína chupekuéra (Juan 10:16, NM).
17. Mbaʼérepa jaʼe umi unhído ha ambue ovechakuéra nombyasymoʼãiha oiko haguére tetã ambueguáicha ko múndo añáme?
17 Umi unhído ‘vyʼápe’ ohaʼarõ og̃uahẽ pe ára ogoverna hag̃ua Jesús ndive yvágape (Rev. 5:10). Ambue ovechakuéra katu ohaʼarõitereíma og̃uahẽ pe ára ikatutahápe oikove opa árare ko yvy ape ári, upépe ndoikomoʼãvéima hikuái tetã ambueguáicha ko múndope, síno hóga teépe peteĩ lugár neporãvape ha oĩháme heta hiʼupy (Sal. 37:10, 11; Isa. 25:6; 65:21, 22). Haʼekuéra arakaʼeve ndahesaraimoʼãi koʼã mbaʼe porã ouha Jehovágui, upe “opa mbaʼe Jára” ha ndojapomoʼãi umi isrraelíta ojapo haguéicha (Isa. 54:5). Umi unhído ha ambue ovechakuéra ni mbaʼevéicharõ nombyasymoʼãi oiko haguére tetã ambueguáicha ko múndo añáme.
Mbaʼépa ñambohováita?
• Mbaʼérepa jaʼe Ñandejára rembiguaikuéra yma guare oiko hague tetã ambueguáicha ko múndope?
• Mbaʼéichapa umi kristiáno ypykue oikovaʼekue ko múndope?
• Mbaʼéichapa kristianokuéra oiporu umi mbaʼe omeʼẽva ko múndo?
• Mbaʼérepa arakaʼeve nañambyasymoʼãi jaiko haguére tetã ambueguáicha ko múndo añáme?
[Porandu ñahesaʼỹijóva]
[Nóta oĩva taʼanga ndive páhina 18]
Umi kristiáno ypykue omboykevaʼekue umi vyʼarã itieʼỹ ha ivioléntova
