Jaikovaʼerã espíritu oipotaháicha jahupyty hag̃ua jeikove ha pyʼaguapy

‘Ndajaikovéima ñande rete rembipotápe, jaikóma uvei pe espíritu oipotaháicha.’ (Rom. 8:4, JMP)

1, 2. a) Mbaʼépa oiko jepi peteĩ omaneháva ojesarekóramo ambue mbaʼére? b) Mbaʼépa ikatu oiko ndajajesarekóiramo ñande jeroviáre?

PE SEKRETÁRIO de Transporte Estados Unidosgua omombeʼu: “Káda áño heta hetave umi hénte noñatendéiva omaneha jave iveíkulo”. Oĩ oiporúva selulár ha ndojesarekói hapére ni omaneha lájare. Pór ehémplo, oñeporandúrõ guare heta tapichápe ko mbaʼére, oĩ omombeʼúva haimete oñeaksidenta hague térã oñeaksidenta voi. Heta katu oimoʼã ikatuha oaprovecha itiémpo omaneha jave ojapo hag̃ua ambue mbaʼe, péro upéva ikatu tuichaiterei operhudika chupe térã ótrope.

² Ñande jeroviáre ikatu avei oiko upéicha. Peteĩ tapicha omaneháva ha noñatendéiva, ndohechái moõpa oĩ pe pelígro. Péicha avei, peteĩ kristiáno noñangarekóiva ijeroviáre ndohechakuaavéima oho vaiha. Jahejáramo ambue mbaʼe ñanemboyke Ñandejára servísiogui ha ndajajapovéi Jehová ohaʼarõva  ñandehegui, ikatu jaju ndajajeroviavéi (1 Tim. 1:18, 19). Pablo heʼivaʼekue umi kristiáno Romayguápe mbaʼépa oikokuaa hesekuéra ndojesarekóiramo ijeroviáre: “Ñande rete rembipota ningo ogueru ñemano, pe espíritu katu omeʼẽ jeikove ha pyʼaguapy” (Rom. 8:6, JMP). Mbaʼépa heʼiséraʼe upérõ? Mbaʼépa jajapovaʼerã ani hag̃ua “ñande rete rembipota” ipuʼaka ñanderehe? Mbaʼéichapa jahechaukáta jaikoha “pe espíritu oipotaháicha”?

“Noñekondenavéima” chupekuéra

3, 4. a) Mbaʼépa tekotevẽ vaʼekue Pablo ogueropuʼaka? b) Mbaʼérepa iporã jaikuaa Pablo ohasavaʼekue?

³ Pablo ohaírõ guare umi ermáno Romayguápe, omombeʼu orekoha peteĩ provléma tekotevẽva ogueropuʼaka: hete ojapose peteĩ mbaʼe, ipyʼapy katu heʼi chupe noĩporãiha (elee Romanos 7:21-23). Upérõ Pablo ndeʼíri ndahaʼeiha ikúlpa umi mbaʼe vai ojapóva, ni naipohãveimaha ipekádo hetaitereígui. Jaikuaaháicha haʼe peteĩ kristiáno ijerovia mbaretéva ha ojeporavovaʼekue espíritu sánto rupi, avei oiko chugui “tetã ambuegua apóstol” (Rom. 1:1; 11:13, ÑÑB). Mbaʼére piko upéicharõ heʼi ogueropuʼakavaʼerãha upe provléma?

⁴ Pablo ontendekasénte ndaikatumoʼãiha okumpli porã Jehová rembipota ijehegui rei. Mbaʼérepa? Haʼete omyesakã: “Opavave niko hembiapo vai ha mombyry oĩ [Ñandejára] rekomimbipágui” (Rom. 3:23). Haʼe ningo Adán ñemoñare, upévare oĩ pekádo poguýpe. Ha ñande ñaneimperfékto avei, upéicha rupi koʼẽ koʼẽre jagueropuʼakavaʼerã umi mbaʼe oguerúva pe pekádo. Hiʼarive ko múndope ndahasyiete jajesareko hag̃ua ambue mbaʼére, ha sapyʼaitérõ g̃uarã ikatúma ñasẽ ‘pe tape oporoguerahávagui jeikove opaveʼỹvape’ (Mat. 7:14, NM). Péro Pablo ndojedesesperaivaʼekue, ombohovái porã uvei koʼã mbaʼe, upévare jaʼekuaa ñande avei ikatutaha ñambohovái porã.

5. Mbaʼépa oipytyvõ ha ombopyʼaguapy Páblope?

⁵ Pablo ohai: “Máva piko ikatúne chemosãso [...]? Ñandejára, Cristo Jesús rupi!” (Rom. 7:24, 25, JMP). Upéi oñeʼẽ umi kristiáno unhídope, “umi oñemopeteĩva Cristo Jesús ndive” (elee Romanos 8:1, 2). Omombeʼu Jehová oiporavoha chupekuéra espíritu sánto rupi oiko hag̃ua chuguikuéra itaʼýra ha avei ‘eredéro Cristo ndive’ (Rom. 8:14-17, BNP). Ñandejára espíritu rupive ha ojeroviágui Jesús sakrifísiore, koʼã unhído ogueropuʼaka umi mbaʼe oguerúva pe pekádo, ha upévare “noñekondenavéima” chupekuéra. Umi unhído isãsóma “pekádo ha ñemano rehegua léi poguýgui”.

6. Mbaʼérepa opavave oservíva Jehovápe oñehaʼãvaʼerã osegi umi konsého Pablo omeʼẽva?

⁶ Añetehápe Pablo oñeʼẽvaʼekue upérõ umi unhídope, péro umi mbaʼe heʼivaʼekue Ñandejára espíritu rehe ha Jesucristo sakrifísiore, ideprovécho avei entéro kristiánope. Jehová oiporuvaʼekue Páblope omeʼẽ hag̃ua koʼã konsého umi unhídope, upévare opavave jaservíva Jehovápe tekotevẽ ñantende mbaʼépa ñanemboʼese ha ñañehaʼã jajapo.

Ñandejára “okondena pe [...] pekádo”

7, 8. a) Mbaʼérepa ojeʼe pe Léi ‘ndaipuʼakái hague yvypóra pekádore’? b) Mbaʼépa Ñandejára ojapo espíritu sánto ha Jesús sakrifísio rupive?

⁷ Romanos kapítulo 7-pe Pablo ohechauka yvyporakuéra imperfékto oĩha pekádo poguýpe. Kapítulo 8-pe katu heʼi Ñandejára espíritu sánto tuicha ipuʼakaha. Avei omyesakã mbaʼéichapa pe espíritu sánto oipytyvõ kristianokuérape ogueropuʼaka hag̃ua pe pekádo, ikatu hag̃uáicha oiko hikuái Jehová oipotaháicha ha oĩ porã hendive. Pablo ohechauka porã Ñandejára oiporuha ijespíritu sánto ha Itaʼýra sakrifísio repykue ojapo hag̃ua peteĩ mbaʼe ndaikatuivaʼekue ojehupyty Moisés léi rupive.

⁸ Ko Léi, orekóramo jepe heta mandamiénto, okondenavaʼekue yvypórape hembiapo  vai haguére. Umi saserdóte guasu oikuaveʼẽva umi sakrifísio jepe iñimperfékto ha ndaikatúi ohepymeʼẽ ipekádore. Upévare ojeʼe Moisés léi ‘ndaipuʼakái hague yvyporakuéra pekádore’. Péro ‘Ñandejára ombouvaʼekue Itaʼýra teépe ñande yvypóra pekadór joguaháramo’ ha omeʼẽ sakrifísioramo Jesúspe, upéicha “okondena pe [...] pekádo” ha “ojapo [...] pe Léi ikatuʼỹvaʼekue ojapo”. Upévare umi kristiáno unhídope ojeguerekóma hekojojávaramo ojeroviágui Jesús sakrifísio repykuére, péro oikovaʼerã “pe espíritu oipotaháicha”, ndahaʼéi ‘hete rembipotápe’ (elee Romanos 8:3, 4). Ha oikovaʼerã hikuái upéicha oĩ aja pukukue ko yvy ape ári, ohupyty hag̃ua “pe tekovete rehegua prémio” (Rev. 2:10, BNP).

9. Mbaʼépa heʼise pe ñeʼẽ léi ojeporúva Romanos 8:2-pe?

⁹ Pablo imanduʼa Moisés léi rehe, péro oñeʼẽ avei “pe espíritu rehegua léi” ha “pekádo ha ñemano rehegua léi” rehe (Rom. 8:2, BNP). Mbaʼeichaguápa hína koʼãva? Pe ñeʼẽ léi ojeporúva ko téystope, ndahaʼéi umi oĩvaichagua Moisés léipe. Peteĩ lívro omombeʼu: “Pe ñeʼẽ koʼápe ojetradusíva léi, heʼise umi mbaʼe jarekóva ñande pyʼapýpe, tahaʼe iporãva térã ivaíva, ha jajapóva ñakumplirõguáicha peteĩ mandáto. Heʼise avei [...] umi mbaʼe peteĩ tapicha odesidíva osegi hekovépe”.

10. Mbaʼérepa ojeʼe opavave ñaimeha pekádo ha ñemano léi poguýpe?

¹⁰ Pablo ohaivaʼekue: “Pekádo oike [...] yvy ári peteĩ kuimbaʼe rupi, ha pekádo rupi oike pe ñemano, upéicha avei pe ñemano ohasa opavavépe opavave opekágui” (Rom. 5:12, BNP). Ñande ningo Adán ñemoñare, upévare ñaime pekádo ha ñemano léi poguýpe. Ha ñaneimperfékto rupi, manterei jajapo umi mbaʼe Ñandejárape ndogustáiva, ha upéva katuete ñandegueraha ñemanóme. Pablo ohaírõ guare umi Galasiayguápe, heʼi oĩha “umi ohóva tembipota vai rapykuéri” ha omombeʼu mbaʼépa ojapo ha opensa hikuái. Upéi heʼi “umi péicha oikóva ndohupytymoʼãiha [Ñandejára] sãmbyhy” (Gál. 5:19-21). Koʼãichagua tapicha ojapo hete rembipotánte (Rom. 8:4). Umi mbaʼe ‘orekóva ipyʼapýpe’ ha “odesidíva osegi hekovépe” ohechauka oikoha ojapo hag̃ua chupekuéra ogustávante. Péro ikatúpa jaʼe umi hekovaíva, omombaʼeguasúva taʼanga térã umi oiporúva espiritísmo añónte oikoha hete oipotaháicha? Nahániri. Oĩ oimoʼãva umi defékto jarekóva ndahaʼeiha ñande rete rembipota, péro  pe kuatiañeʼẽ ojehaivaʼekue umi Galasiayguápe heʼi umi iselóso, ipochy rei, iñenvidióso ha oñorairõséva ohoha avei hembipota vai rapykuéri. Upévare, nañañatendéiramo ñaimoʼãʼỹre ikatuhína jaiko ñande rete rembipota rapykuéri.

11, 12. Mbaʼépa ojapo Jehová ñandepeʼa hag̃ua “pekádo ha ñemano rehegua léi” poguýgui? Mbaʼépa jajapovaʼerã ñaime porã hag̃ua Ñandejára renondépe?

¹¹ Javyʼavaʼerã Jehová ojapo haguére oñekotevẽva ñanemosãso hag̃ua pekádo ha ñemano léi poguýgui. Jesús heʼi: ‘Ñandejára ohayhuetereígui yvyporakuérape omeʼẽ Itaʼýra peteĩete, opaite umi hese ojeroviáva ani hag̃ua oñehundi, ohupyty hag̃ua guei jeikove opaveʼỹva’. Ñamombaʼéramo Ñandejára mborayhu ha jajerovia Jesucristo sakrifísiore, ikatúta jajei ñemano poguýgui (Juan 3:16-18, NM). Upévare, jaʼékena vyʼapópe Pablo heʼi haguéicha: “Aguije Ñandejára, Cristo Jesús rupi!”.

¹² Ñande ñaime peteĩ situasión ijetuʼúvape, jajogua umi hasyetévape ha ikatu hag̃uáicha jakuera ha ñaime porã jey, tekotevẽ jajapo pe doktór heʼihaichaite. Ikatu jaguerovia Jesús sakrifísio ñandepeʼataha “pekádo ha ñemano rehegua léi” poguýgui; upéicharõ jepe, ñaneimperfékto gueteri ha jajapo ivaíva. Ikatu hag̃uáicha ñaime porã Ñandejára renondépe ha jahupyty umi mbaʼe porã oúva chugui, Pablo heʼi jaikovaʼerãha pe espíritu oipotaháicha.

Jaikovaʼerã pe espíritu oipotaháicha

13. Mbaʼépa heʼise jaiko espíritu oipotaháicha?

¹³ Jaguata jave, mbeguekatúpe ñañemoag̃uive jahávo peteĩ lugárpe. Upéicha avei jaikóvo pe espíritu oipotaháicha jahañaína tenonde gotyo Jehová servísiope, péro ndeʼiséi ndaikatuveimaha ikangy ñande jerovia (1 Tim. 4:15). Ñañehaʼãvaʼerã jajapo ára ha ára opa ikatúva jaiko hag̃ua pe espíritu oipotaháicha. Ñandejára ñandeguerohorýta jaikóramo akóinte “espíritu sánto poguýpe” (Gál. 5:16, ÑÑB).

14. Mbaʼépa ojapo umi “oikóva hete rembipotápe”?

¹⁴ Pablo ohaírõ guare umi Romayguápe, omombeʼu oĩha umi oikóva hete rembipota rapykuéri ha umi oikóva espíritu oipotaháicha (elee Romanos 8:5). Oiporúvo pe ñeʼẽ “hete”, haʼe noñeʼẽikuri ñande rete teére. La Bíbliape ojeporu jepi “hete” oñeñeʼẽ jave ñande yvypóra imperféktore, ñanekangy ha ndajahapukúiva jaʼa hag̃ua pekádope. Pablo oñeʼẽvaʼekue upéva  rehe heʼírõ guare orekoha peteĩ provléma ogueropuʼakáva: hete ojapose peteĩ mbaʼe ha ipyʼapy katu heʼi chupe noĩporãiha. Péro oĩ heta tapicha “oikóva hete rembipotápe” ha ni noñehaʼãiva ombohovái umi mbaʼe vai ojaposéva. Opensa rangue Ñandejára rembipotáre ha umi mbaʼe haʼe omeʼẽvare oipytyvõ hag̃ua chupekuéra, ‘opensa hikuái hete rembipotárente’ ha ojapo opa mbaʼe hete ojeruréva. Péro ‘umi oikóva espíritu oipotaháicha’ omotenonde umi mbaʼe “espíritu reheguánte”, térã opa mbaʼe oúva Jehovágui ha umi mbaʼe ojapóva iservísiope.

15, 16. a) Mbaʼéichapa umi mbaʼe ñapensáva ikatu ipuʼaka ñanderehe? b) Mbaʼépa ogustave umi héntepe koʼág̃a rupi?

¹⁵ (Elee Romanos 8:6). Jajapo hag̃ua oimeraẽ mbaʼe, tahaʼe iporãva térã ivaíva, katuete ñapensa raẽ hese. Pór ehémplo, umi tapicha opensa meméva hete rembipotáre, omotenonde haʼekuéra oipotávante ha ojekuaa umi mbaʼe ojapóvare. Opa mbaʼe ogustáva, oñandúva ha ohayhúva ohechauka oikoha hete rembipota rapykuérinte.

¹⁶ Mbaʼépa ogustave umi héntepe koʼág̃a rupi? Juan omombeʼu: ‘Opa mbaʼe ko mundopegua ndoúi Ñande Rúgui, ko múndo mbaʼénte. Umi mbaʼe vai pe máva ohayhúva, hesa oguerohorýva ha ohechaséva, ha ojechaukaséva umi mbaʼe orekóvare; opa umi mbaʼe ko múndo rehegua’ (1 Juan 2:16, BNP). Koʼág̃a rupi umi lívro, rrevísta, diário, téle, pelíkula ha Internet henyhẽ mbaʼe tieʼỹgui ha omoakãraku umi héntepe oiko hag̃ua mbaʼerepy rapykuéri ha oñemofamóso hag̃ua. Heta tapichápe koʼã mbaʼéntema ogusta ha opensaiterei hese. Péro jahecháma haguéicha, umi oikóva ‘hete rembipotápe’ katuete ohupytýta “ñemano”, koʼág̃ama voi ikatu ndojeroviavéi Ñandejárare ha amo gotyove katu oñehundíta. Mbaʼérepa? La Biblia heʼi: ‘Pe opensáva yvypóra rembipotáre ndohayhúi Ñandejárape, ndojaposéi ha ndaikatúi voi oiko iñeʼẽme. Upéva rehe umi oikóva yvypóra rembipotápe ndaikatúi ojapo Ñandejára rembipota’ (Rom. 8:7, 8, BNP).

17, 18. Mbaʼépa ikatu jajapo akóinte jaiko hag̃ua “espíritu oipotaháicha”, ha mbaʼépa jahupytýta jajapóramo upéva?

¹⁷ Oikóva guive “espíritu oipotaháicha” ohupytýta “jeikove ha pyʼaguapy”. Upéva heʼise oikovetaha opa ára g̃uarã, koʼág̃ama voi ipyʼaguapýta ha oĩ porãta Ñandejára renondépe. Mbaʼépa ikatu jajapo akóinte jaiko hag̃ua “espíritu oipotaháicha”? Jajepokuaavaʼerã jajepyʼamongeta umi mbaʼe Jehová omeʼẽvare pe espíritu rupive, ha jahejavaʼerã umíva ñanesãmbyhy opaite mbaʼépe. Upéicha jahechaukáta “Ñandejára rembipota” ipuʼakaha ñanderehe ha ñapensaha haʼe “oipotaháicha”. Ha oĩramo ñandepyʼaraʼãva, jaikuaa porãta mbaʼépa jajapóta. Katuete jadesidi porãta pe espíritu ñanesãmbyhy rupi.

¹⁸ Upéicharõ tekotevẽ akóinte jaiko Ñandejára espíritu oipotaháicha. Upearã ‘ñañembosakoʼivaʼerã’ térã ñañehaʼã ñamombarete ñande jerovia. Mbaʼéichapa jajapóta upéva? Ñañemboʼe meme vaʼerã, jalee ha ñahesaʼỹijo la Biblia, jaha rreuniónpe ha ñasẽ japredika (1 Ped. 1:13). Jaheja rangue ñande rete rembipota ñanemboyke Ñandejára servísiogui, jahejavaʼerã espíritu sánto ñanesãmbyhy. Péicharõmante jaikóta pe espíritu oipotaháicha ha jahupytýta heta mbaʼe porã. Jahecha haguéicha, umi oikóva espíritu oipotaháicha, ohupytýta jeikove ha pyʼaguapy (Gál. 6:7, 8).

Ikatúpa remyesakã?

• Mbaʼérepa ojeʼe Moisés léi ‘ndaipuʼakái hague yvyporakuéra pekádore’, ha mbaʼépa ojapo Ñandejára upévare?

• Mbaʼépa “pe pekádo ha ñemano rehegua léi”, ha mbaʼéichapa ikatu ñanesãso chugui?

• Mbaʼépa jajapovaʼerã akóinte jaiko hag̃ua “espíritu oipotaháicha”?

[Porandu ñahesaʼỹijóva]

[Nóta oĩva taʼanga ndive páhina 12 ha 13]

Jaikópa ñande rete rembipota rapykuéri, térãpa pe espíritu oipotaháicha?