“Ndaguatái, péro ndahaʼemoʼãi opa árare!”

Omombeʼu Sara van der Monde

Heta hénte heʼi jepi chéve: “Sara, repuka ha nderoryháre ningo reiko. Mbaʼére piko akóinte upéicha?”. Che ambohovái chupekuéra arekoha peteĩ esperánsa ijojahaʼỹva: “Koʼág̃a ndaguatái, péro ndahaʼemoʼãi opa árare!”.

ÁÑO 1974-pe anase Paríspe (Francia). Heta che sy iprovléma anasétarõ guare, upe riremi ojekuaáma arekoha parálisis cerebral. Apenaite amonguʼe che retyma, ha noñentendeporãi umi mbaʼe haʼéva. Cheatakeparei (epilepsia) ha pyʼỹinte cherasy.

Arekórõ guare dos áño, rova Melbournepe, peteĩ táva oĩva Austráliape. Tiémpo rire, papa orereja rei chéve ha che sýpe. Upérõ chemanduʼa añemoag̃ui ñepyrũ hague Ñandejárare. Che sy testígo de Jehová ha cheguerahámi rreunionhápe, upépe aaprende Ñandejára cherayhu ha ojepyʼapyha cherehe. Aikuaa rupi upéva ha pe kyreʼỹ ha mborayhu omeʼẽva chéve che sy, chemoñeñandu porã pe situasión ndahaʼevéimaramo jepe yma guaréicha.

Che sy avei chemboʼe mbaʼéichapa añemboʼevaʼerã Jehovápe. Añetehápe upéva ndahasyive chéve ajapo hag̃ua, ndaikói rupi añehaʼã añeʼẽ hag̃ua, síno che pyʼapýpente añemboʼe. Chembopyʼaguapy aikuaávo Jehová ontendepaiteha umi mbaʼe haʼéva, tahaʼe che pyʼapýpe térã añehaʼãramo añeʼẽ vai vai (Sal. 65:2).

Ambohovái umi mbaʼe ijetuʼúva

Arekópe 5 áño pe parálisis ivaive, upéicha rupi aikotevẽ peteĩ aparáto ortopédico aguata hag̃ua. Añetehápe ningo aguata, péro avavahápe. Arekópe 11 áño ndaikatuvéima aguata, upévare aikotevẽma peteĩ grúa eléktrika apuʼã hag̃ua che rupágui ha aguapy hag̃ua peteĩ sílla de rruéda imotórvape ha amaneháva peteĩ palánka rupive.

Añetehápe ningo sapyʼánte añeñandu vai ha ndavyʼái. Upéicha jave chemanduʼa pe roʼémivare che rógape: “Ani rejepyʼapy umi mbaʼe ndaikatúivare rejapo. Ejapo uvei upe ikatumíva”. Upéicha rupi chekyreʼỹ ajapo hag̃ua heta mbaʼe, pór ehémplo, aiko kavaju ári, aha kanóape ha amaneha voi áuto peteĩ lugár ndaiporihápe ambue omaneháva. Avyʼa avei ikatu haguére apinta, amboyvy, avorda, ajapo edredón ha ambue mbaʼe serámikagui.

Ndaguatái ha hetave mbaʼe ndaikatúigui ajapo, oĩ heʼíva ndaikatumoʼãiha aservi porã Ñandejárape. Arekórõ guare 18 áño, peteĩ che profesóra chemokyreʼỹ aha hag̃ua che rógagui, “asẽ” hag̃ua che sy rrelihióngui.  Heʼi voi chéve chepytyvõtaha atopa hag̃ua moõpa aikóta. Péro haʼe chupe ndahejamoʼãiha che jerovia ha ahataha che rógagui ág̃a aime vove aiko hag̃uáicha cheaño.

Tiempo riremi ajevautisa ha oiko chehegui testígo de Jehová. Dos áño haguépe, ava peteĩ apartaméntope, upépe añeñandu porã ha nadependeguasuvéima avavére.

Peteĩ mbaʼe ahaʼarõʼỹva

Umi áño ohasavaʼekuépe ambohovái avei ambue mbaʼe ijetuʼúva. Peteĩ árape, peteĩ che kompañéro de kláse, orekóva avei pe provléma che arekóva, oporandu chéve namendaséipa hese. Ñepyrurã chemoñeñandu porã upéva, heta kuñataĩ ningo orekose iñirũrãmi, ha che aipota avei. Péro ndaikatúi ningo jaʼe oho porãtaha oréve romendárõ, mokõivéva ningo diskapasitádo. Koʼýte haʼe ótra rrelihionpegua, ha umi mbaʼe roguerovia, rojapo ha rohupytyséva tuicha ojoavy. Upéicharõ, mbaʼéicha piko ikatúta rovyʼa oñondive? Che ningo adesidíma cheñeʼẽrendutaha la Biblia heʼívape amendávo peteĩ oservívare Jehovápe (1 Cor. 7:39). Upévare, pyʼaporãmente haʼe pe kariaʼýpe ndaikatumoʼãiha amenda hese.

Nambyasýi adesidi haguére upéicha. Ha aikuaa porãiterei Ñandejára múndo pyahúpe avyʼaitereitaha (Sal. 145:16; 2 Ped. 3:13). Ahaʼarõ aja upéva, ajedesidíma cheñeʼẽrendutaha Jehovápe ha agueropuʼakataha ko situasión ahasáva.

Hiʼãitereíma chéve og̃uahẽ pe ára ikatutahápe apuʼã che sílla de rruédagui ha ku guasúicha añani. Upépe ikatúta haʼe: “Yma ningo ndaguatái, péro koʼág̃a aime porãma, ha aime porãta opa ára g̃uarã!”.