Espíritu sánto oporosãmbyhy síglo primérope ha ñane tiémpope

“Opa koʼã mbaʼe peteĩ espíritu añónte ojapo.” (1 COR. 12:11, ÑÑB)

1. Mbaʼépa ñahesaʼỹijóta ko artíkulope?

PENTECOSTÉS. Mbaʼe rehépa nemanduʼa rehendúvo ko ñeʼẽ? (Hech. 2:1-4.) Katuete nemanduʼáne pe mbaʼe guasuete oikovaʼekuére síglo primérope, Ñandejára omeʼẽrõ guare ijespíritu heta kristiánope. Upe guive Jehová oisãmbyhy hembiguaikuérape peteĩ tape pyahúre. Pe ótro artíkulope jahechákuri Ñandejára espíritu sánto oipytyvõ hague heta hendáicha umi hembiguái iñeʼẽrendúvape, ikatu hag̃uáicha omohuʼã hikuái umi tembiapo ijetuʼúva omeʼẽva chupekuéra. Síglo primero guive katu Jehová oiporúma ijespíritu ambue hendáicha. Mbaʼérepa jaʼe upéva? Mbaʼéichapa ikatu pe espíritu sánto ñanepytyvõ koʼág̃a rupi? Ko artíkulope ñambohováita koʼã porandu.

‘Che hína Jehová rembiguái!’

2. Mbaʼéichapa María ohecha Ñandejára oiporuha ijespíritu?

² María oĩvaʼekue avei Jerusalénpe umi  kristiáno ndive pe koty guasu yvateguápe Ñandejára omeʼẽrõ guare chupekuéra espíritu sánto opromete haguéicha (Hech. 1:13, 14). Haʼe heta vésema ohechákuri umi mbaʼe ijojahaʼỹva Ñandejára espíritu ojapóva. Pór ehémplo, ohasáma 30 áño ‘hyeguasu hague espíritu sánto rupive’. Ha upérõ María ndoikói gueteri kuimbaʼéndi ha Jehová omoĩ hetepýpe Itaʼýra rekove onase hag̃ua ko yvy ape ári yvypóraicha (Mat. 1:20, NM).

3, 4. Mbaʼérepa Maríape oñemeʼẽ pe priviléhio ijojahaʼỹva, ha mbaʼépa ñaaprende chugui?

³ Mbaʼérepa Maríape oñemeʼẽ upe priviléhio ijojahaʼỹva? Jaikuaa hag̃ua jahechami mbaʼéichapa haʼe ombohovái Ñandejára ánhel omombeʼúrõ guare mbaʼe tembiapópa Jehová oreko chupe g̃uarã. Haʼe heʼi: ‘Che hína Jehová rembiguái! Toiko katu ere haguéicha’ (Luc. 1:38, NM). Heʼívo péicha, ohechauka oserviha Jehovápe ipyʼaite guive, ha Ñandejára oikuaa María oĩha ojapo hag̃uáicha opa mbaʼe ojeruréva chupe. Haʼe noñemoĩri opensa mbaʼépa heʼíta hese umi vesíno ohechávo hyeguasuha térã ndaipochymoʼãipa hendive imenarã. Ko kuñataĩ heʼi ijehe Ñandejára rembiguainteha, ha upéicha ohechauka ojeroviaha Ijárare opaite mbaʼépe.

⁴ Ñande avei ikatu jahasa peteĩ mbaʼe ijetuʼúva, térã jareko rresposavilida tuicháva Ñandejára servísiope ha sapyʼánte ñapensa nañameʼẽveimaha. Upéicha jave iporã ñañeporandu: “Ajeroviápa Jehová chepytyvõtaha ijespíritu rupive osẽ hag̃ua opa mbaʼe haʼe oipotaháicha? Ahechaukápa aimeha ajapo hag̃uáicha opa mbaʼe ojeruréva chéve?”. Aníkena ñanderesarái Jehová omeʼẽtaha ñandéve ijespíritu jajeroviáramo hese ñande pyʼaite guive, jahechakuaárõ haʼe añoiteha pe ipuʼakapáva ha jajapóramo hembipota (Hech. 5:32).

Espíritu sánto oipytyvõ Pédrope

5. Mbaʼéichapa espíritu sánto oipytyvõvaʼekue Pédrope Pentecostés áño 33 mboyve?

⁵ Pentecostés áño 33 mboyve Pedro ohecháma mbaʼépa ikatu ojejapo Ñandejára espíritu rupive. Pór ehémplo, Jesús omeʼẽvaʼekue chupe ha ambue apóstolpe puʼaka omosẽ hag̃ua umi demónio (Mar. 3:14-16). La Biblia nomombeʼúiramo jepe, oiméne Pedro oiporurakaʼe upe puʼaka oñemeʼẽva chupe. Avei oĩrõ guare Már de Galiléape, ojekuaa espíritu sánto oipytyvõ hague Pédrope oguata hag̃ua pe y apére Jesús heʼírõ guare chupe oho hag̃ua hendápe (elee Mateo 14:25-29). Péicha jahechakuaa Pedro ojapo hague heta milágro espíritu sánto rupive. Péro Pentecostés áño 33 guive Ñandejára puʼaka oipytyvõ chupe ha iñermanokuérape ambue hendáicha.

6. Mbaʼépa ojapo Pedro espíritu sánto rupive Pentecostéspe ha upe rire avei?

⁶ Pentecostés áño 33-pe Ñandejára espíritu ombokatupyry Pedro ha ambue kristiánope opredika hag̃ua umi tetã ambueguápe iñeʼẽtépe umi oúvape Jerusalénpe fiestarã. Upe rire Pedro opuʼã ha oñepyrũ oñeʼẽ umi hénte ijatývape upépe (Hech. 2:14-36). Ymave, Pedro ipyʼajumivaʼekue térã heʼi ha ojapo heta mbaʼe opensaʼỹre, péro Ñandejára espíritu ombopyʼaguasu chupe omombeʼu hag̃ua pe marandu porã, oñeamenasa ha oñepuʼãramo jepe hese (Hech. 4:18-20, 31). Avei pe espíritu sánto omyesakã Pédrope umi mbaʼe ndoikuaáiva (Hech. 5:8, 9). Ha omeʼẽ chupe pokatu omoingove jey hag̃ua peteĩ omanovaʼekuépe (Hech. 9:40).

7. Mbaʼépa hesakã vaʼekue Pédrope ojevautisa rire espíritu sánto rupive?

⁷ Pentecostés mboyve, Pedro ontendéma heta mbaʼe Jesús omboʼevaʼekue (Mat. 16:16, 17; Juan 6:68). Péro oĩ heta mbaʼe nahesakãporãiva chupe. Pór ehémplo, nontendéi mbaʼéichapa tres día omano haguépe oñemoingove jey Jesúspe peteĩ espírituicha ha mbaʼérepa oisãmbyhýta yvága guive (Juan 20:6-10; Hech. 1:6). Avei ndaijái chupe iñakãme mbaʼéichapa yvypóra oñemoingove jeýta oho hag̃ua yvágape oisãmbyhy. Arakaʼépa ontende porã koʼã mbaʼe? Pentecostéspe,  ojevautisárõ guare espíritu sánto rupive ha ojeporavo chupe oho hag̃ua yvágape.

8. Mbaʼépa oreko ohesaʼỹijo hag̃ua umi unhído ha ‘ambue ovechakuéra’?

⁸ Heta mbaʼe hesakãve umi Jesús remimboʼépe oñemeʼẽ rire chupekuéra espíritu sánto. Avei ohai hikuái Escrituras Griegas, oñemombeʼuhápe heta mbaʼe porã Jehová ojapótava (Efe. 3:8-11, 18). Ajépa tuicha ñanepytyvõ umi kuatiañeʼẽ! Koʼág̃a umi kristiáno ohótava yvágape ha ‘ambue ovechakuéra’ ohesaʼỹijo ha ontende umi mbaʼe omombaretéva ijerovia (Juan 10:16, NM). Ñamombaʼepañaína pe espíritu sánto ojapóva omyesakã hag̃ua ñandéve Ñandejára Ñeʼẽ?

Pablo henyhẽ espíritu sántogui

9. Mbaʼépa ojapo Pablo espíritu sánto rupive?

⁹ Un áño rupi Pentecostés rire, oñemeʼẽ avei Sáulope espíritu sánto, chupe oñehenói upe rireve apóstol Pablo. Ñandejára espíritu ombokatupyry ko kuimbaʼépe ojapo hag̃ua heta mbaʼe ha umíva ideprovécho gueteri ñandéve koʼág̃a peve. Pór ehémplo, omomýi chupe ohai hag̃ua catorce kuatiañeʼẽ oĩva la Bíbliape. Avei ojapo haguéicha Pedro rehe, pe espíritu oipytyvõ Páblope ontende hag̃ua oĩtaha tapicha oñemoingove jeýva oho hag̃ua yvágape. Koʼãvape Ñandejára omeʼẽta jeikove opaveʼỹva ha ikatuʼỹva oñehundi. Upe rire katu Pablo ohai koʼã mbaʼe hesakã porã hag̃uáicha ñandéve. Espíritu sánto rupive haʼe omonguera avei hasývape, omosẽ demónio, ha omoingove jey omanovaʼekuépe. Avei omombarete chupe ojapo hag̃ua peteĩ tembiapo iñimportantevéva, ha koʼág̃a rupi ñandéve avei ñanepytyvõ upearã, ndahaʼéiramo jepe Páblope oipytyvõ haguéicha.

10. Mbaʼéichapa Ñandejára espíritu oipytyvõ Páblope oñeʼẽ hag̃ua?

¹⁰ Oĩrõ guare Chíprepe Pablo henyhẽ espíritu sántogui ha upéicha rupi pyʼaguasúpe ombohovái peteĩ pajesérope. Pe mburuvicha oisãmbyhýva upe lugár ojapysaka porã Pablo rehe ha ‘oponderaiterei umi mbaʼe oaprendéva Jehovágui’, upévare oiko chugui kristiáno (Hech. 13:8-12, NM). Jahechakuaa ko apóstol ontende hague ñaikotevẽtereiha espíritu sántore ikatu hag̃uáicha ñamombeʼu pe marandu porã (Mat. 10:20). Upévare, ojerure umi kristiáno Efesoyguápe oñemboʼe hag̃ua Ñandejárape hese, ikatu hag̃uáicha ‘omeʼẽ chupe umi mbaʼe heʼivaʼerã’ (Efe. 6:18-20).

11. Mbaʼéichapa oisãmbyhy Páblope Ñandejára espíritu?

¹¹ Pe espíritu sánto omondo Páblope omombeʼu hag̃ua pe marandu porã heta táva rupi, ha ambue távape katu ojoko chupe ani hag̃ua oñeʼẽ. Oservírõ guare misionéroramo Ñandejára espíritu oisãmbyhy chupe opa ohohápe (Hech. 13:2; elee Hechos 16:6-10). Ñane tiémpope Jehová oiporu gueteri ipuʼaka omotenonde hag̃ua pe predikasión. Ha Pablo ojapo haguéicha, ñande ñañehaʼãmbaite pyʼaguasu ha kyreʼỹme ñamombeʼu pe marandu porã. Koʼág̃a ningo espíritu sánto nañanepytyvõi jajapo hag̃ua milágro umi apóstol tiémpope ojejapo haguéicha, péro jaikuaa ñanesãmbyhyha ñamog̃uahẽ hag̃ua Ñandejára marandu umi ipyʼaporãvape (Juan 6:44).

 “Heta oĩ tembiaporã”

12-14. Mbaʼéichapa ombaʼapo pe espíritu sánto Ñandejára rembiguaikuérare? Emyesakã.

¹² Katuete ningo ñanemombarete jahechávo mbaʼéichapa Jehová ovendesivaʼekue umi unhídope síglo primérope. Jahechamína mbaʼépa Pablo heʼi espíritu sánto rehe ohaírõ guare ikuatiañeʼẽ umi Corintoyguápe: ‘Oĩ opaichagua espíritu sánto remimeʼẽ, ha katu pe espíritu peteĩnte; oĩ opaichagua servísio, ha katu peteĩnte Ñandejára. Heta oĩ tembiaporã, ha peteĩnte Ñandejára ojapóva opaite mbaʼe’ (1 Cor. 12:4-6, 11, JMP). Jahechakuaa upéicharõ pe espíritu ikatuha ombaʼapo heta hendáicha oipytyvõ hag̃ua Ñandejára siervokuérape, tahaʼe haʼéva upe ojehupytyséva. Oipytyvõ umi ‘ovechakuéra mbovymíme’ ha avei ‘ambue ovechakuérape’ (Luc. 12:32, NM; Juan 10:16, NM). Péro upéva ndeʼiséi oipytyvõha entéro ermánope peteĩchapa.

¹³ Pór ehémplo, entéro umi ansiánope oñenombra espíritu sánto rupive (Hech. 20:28). Péro upéva ndeʼiséi oservitaha ansiánoramo opavave unhído. Péicha jahecha Ñandejára puʼaka ikatuha ombaʼapo heta hendáicha ermanokuérare kongregasiónpe.

¹⁴ La Biblia heʼi umi unhídope: “Pe espíritu ojapo pendehegui [Ñandejára] raʼy”. Upéva heʼise espíritu sánto rupive umi kristiáno ohótava yvágape ohechakuaaha Jehová oiporavo hague chupekuéra itaʼyrarã. Jehová oiporu avei ko puʼaka omoingove jey hag̃ua Itaʼýra peteĩetépe ha omeʼẽ chupe jeikove opaveʼỹva yvágape (elee Romanos 8:11, 15). Espíritu sánto rupive Ñandejára ojapo ko arapy tuichakue (Gén. 1:1-3). Oipytyvõ Bezalélpe ojapo hag̃ua pe tavernákulo, omombarete Sansónpe ha omboguata Pédrope y apére. Jahechaháicha, pe espíritu ikatu oisãmbyhy peteĩ tapichápe, péro ndahaʼéi katuete oiporavóva chupe oho hag̃ua yvágape. Aníkena ñanderesarái Jehová haʼeha pe oiporavóva heta kristiánope itaʼyrarã. Añetehápe, pe espíritu sánto ikatu ombaʼapo heta hendáicha.

15. Osegítapa Ñandejára oporovautisa espíritu sánto rupive? Emyesakã.

¹⁵ Jahechaháicha, ymaite guive Jehová oiporu ijespíritu sánto heta hendáicha oipytyvõ hag̃ua hembiguaikuérape. Pentecostés áño 33 guive katu ojevautisa heta kuña ha kuimbaʼépe upe espíritu rupive, péro og̃uahẽta peteĩ tiémpo ndojapomoʼãveimaha upéva. Upéicharamo jepe, akóinte omeʼẽta ijespíritu hembiguaikuérape ikatu hag̃uáicha ojapo hembipota opa árare.

16. Mbaʼépa ohupyty Ñandejára rembiguaikuéra espíritu sánto rupive?

¹⁶ Mbaʼépa ohupyty Ñandejára rembiguaikuéra espíritu sánto rupive? Revelación 22:17 omombeʼu: ‘Pe espíritu sánto ha pe nóvia akóinte heʼi: “Eju!”. Ha pe ohendúva teʼi avei: “Eju!”. Ha pe ijuhéiva, tou ha toyʼu pe jeikove rehegua ýgui, opagaʼỹre mbaʼeve’. Espíritu sánto rupive, kristianokuéra oinvita ‘opavave ijuhéivape’ hoyʼu hag̃ua pe y Jehová oikuaveʼẽvagui. Unhidokuéra omoakã ko tembiapo ha ambue ovechakuéra omoirũ chupekuéra. Koʼã mokõi ovecha aty kyreʼỹme ombaʼapo oñondive Ñandejára espíritu oisãmbyhy rupi chupekuéra. Ohótaramo jepe yvágape térã oikótarõ ko yvy ape ári, ohechauka hikuái oñemeʼẽmaha Jehovápe ojevautisávo ‘Túva, Taʼýra ha espíritu sánto rérape’ (Mat. 28:19, NM). Haʼekuéra oheja ko puʼaka oisãmbyhy chupekuéra ha ohechauka hekovépe umi mbaʼe porã oúva chugui (Gál. 5:22, 23). Koʼã kristiáno oñehaʼãmbaite hekomarangatu, ha upearã oheja espíritu sánto oipytyvõ chupekuéra (2 Cor. 7:1; Rev. 7:9, 14).

Jajerure memékena espíritu sánto

17. Mbaʼéichapa jahechauka ñanesãmbyhyha Ñandejára espíritu?

¹⁷ Jahátaramo jepe yvágape térã jaikótarõ opa ára g̃uarã ko yvy ape ári, Jehová omeʼẽta ñandéve pe “puʼaka guasuete” ñaneñeʼẽrendu hag̃ua chupe ha jahupyty umi mbaʼe porã ñahaʼarõva (2 Cor. 4:7, BNP). Sapyʼánte umi hénte oñembohory ñanderehe  ñamombeʼu meme haguére pe marandu porã. Upéicha jave ñanemanduʼavaʼerã ‘jajejaʼoha Jesucristo réra rehehápe’. Péro jasegíramo japredika, javyʼáta ha jahechaukáta ‘Ñandejára espíritu oĩha ñande ári’ (1 Ped. 4:14, ÑÑB).

18, 19. Mbaʼéichapa Jehová ñanepytyvõta ijespíritu rupive, ha mbaʼépa jajedesidivaʼerã jajapo?

¹⁸ Jehová katuete omeʼẽta ñandéve ijespíritu jajeruréramo chupe. Upéva ñanemokyreʼỹ ha ñanembokatupyrýta ñambaʼapo hag̃ua ñande pyʼaite guive iservísiope. La Biblia heʼi: “[Ñandejára] voi ningo pendeporiahuverekógui penepytyvõ peipota hag̃ua pe iporãva, ha penepytyvõtava pemog̃uahẽ hag̃ua huʼãme”. Tekotevẽ avei ‘ñambaʼapo ñande pyʼaite guive jajesalva hag̃ua’. Mbaʼéichapa jajapokuaa upéva? Jahejavaʼerã pe espíritu ñanepytyvõ ha ‘ñañakãrama hatã pe marandu omeʼẽvare jeikove’, ha ñañehaʼãmbaite ani japoi chugui arakaʼeve (Fili. 2:12, 13, 16).

¹⁹ Jajerovia añetéramo Ñandejára espíriture, jajapóta opa mbaʼe Jehová ojeruréva ñandéve ha ñañehaʼãta koʼẽ koʼẽre jajapo porãve. Avei akóinte jajeruréta chupe tañanepytyvõ (Sant. 1:5). Haʼe omeʼẽta ñandéve ñaikotevẽva ñantende porãve hag̃ua Iñeʼẽ, ñambohovái hag̃ua ñane provlemakuéra ha ikatu hag̃uáicha ñamombeʼu opárupi pe marandu porã. Jajeruréta jave Ñandejárape ijespíritu, ñanemanduʼavaʼerã Jesús heʼivaʼekuére: ‘Pejerure jey jeýkena, ha oñemeʼẽta peẽme; peheka meme, ha petopáta; pesegi pembota pe okẽ, ha ojeavríta peẽme’ (Luc. 11:9, 13, NM). Upéicharõ, akóintekena jajerure Jehovápe tomeʼẽ ñandéve ijespíritu ñanesãmbyhy hag̃ua, omeʼẽ haguéicha hembiguaikuérape heta tiémpore.

Remyesakãkuaápa

• Mbaʼéichapa ñahaʼangakuaa Maríape?

• Mbaʼéichapa Ñandejára espíritu oisãmbyhy Páblope?

• Mbaʼéichapa ñanesãmbyhy koʼág̃a pe espíritu sánto?

[Porandu ñahesaʼỹijóva]

[Nóta oĩva taʼanga ndive páhina 24]

Espíritu sánto rupive Pablo ipuʼaka umi demóniore

[Nóta oĩva taʼanga ndive páhina 26]

Ñandejára omeʼẽ ijespíritu opavavépe, jaikótaramo jepe yvágape térã ko yvy ape ári