Mbaʼérepa tekotevẽ espíritu sánto ñanesãmbyhy?
Mbaʼérepa tekotevẽ espíritu sánto ñanesãmbyhy?
“Nde haʼégui che Jára, nde espíritu sánto tachemboguata tape porãme.” (SAL. 143:10, ÑÑB)
1. Mbaʼe ehémplopa ohechauka tekotevẽha jareko peteĩ ohechaukáva ñandéve pe tape?
EPENSAMÍNA rehotaha peteĩ táva reikuaaʼỹháme. Iporãta regueraháramo nendive peteĩ tapicha ivakeánova, oikuaa porãva upe lugár. Katuete haʼe ohechaukáta ndéve mbaʼe tape rupípa rehovaʼerã reg̃uahẽ hag̃ua upe távape. Rehendúma guive haʼe heʼíva, nerekañymoʼãi.
2, 3. a) Mbaʼépa oiporuvaʼekue Jehová ojapo hag̃ua opa mbaʼe? b) Mbaʼérepa tekotevẽ ñanesãmbyhy pe espíritu sánto?
2 Jaikove aja pukukue maymáva ñaikotevẽ avei peteĩ ohechaukáva ñandéve ñande raperã. Oñepyrũmírente la Bíbliape heʼíma mbaʼépa ñanepytyvõta upearã. Oñeʼẽ peteĩ mbaʼe Jehová oiporúvare ymaiterei guivéma. Génesis heʼi: ‘Iñepyrũme Jehová ojapovaʼekue yvága ha yvy’. Upéi omombeʼu oiporu hague ‘ipuʼaka’ ojapo hag̃ua opa mbaʼe (Gén. 1:1, 2). Upéva hína pe espíritu sánto, Jehová oiporuvaʼekue ojapo hag̃ua yvága, yvy ha opa mbaʼe oikovéva. Ajépa javyʼaite Haʼe oiporu haguére avei ijespíritu ojapo hag̃ua yvyporakuérape! (Job 33:4; Sal. 104:30.)
3 Péro Jehová ndoiporúi ijespíritu sánto ojapo hag̃ua umi mbaʼénte. Haʼe oiporu avei ipuʼaka ñanesãmbyhy hag̃ua. Ñandejára Raʼy heʼivaʼekue hemimboʼekuérape: ‘Pe espíritu sánto [...] penepytyvõta pentende porã hag̃ua pe añetegua’ (Juan 16:13, NM). Péro mbaʼépa hína pe espíritu sánto, ha mbaʼéichapa ñanepytyvõkuaa jahejáramo ñanesãmbyhy?
Mbaʼépa pe espíritu sánto
4, 5. a) Mbaʼépa heʼi espíritu sántore umi ogueroviáva pe Trinidad? b) Mbaʼépa hína pe espíritu sánto?
4 Japredika jave jajuhu heta kuimbaʼe ha kuña ogueroviáva pe Trinidad. Opensa hikuái pe espíritu sánto haʼeha Ñandejára ha ojoguaha Túva ha Taʼýrape (1 Cor. 8:6). Oĩ rupi omboʼéva Trinidad, heta Bíbliape ojehai majúskulape Espíritu Sánto. Péro áño 2006-pe peteĩ mboʼehára katupyry omboʼéva griégo hérava Joan F. Mira, oguenohẽ Espáñape umi kuatiañeʼẽ otradusivaʼekue: Mateo, Marcos, Lucas, Juan, Hechos ha Apocalipsis. Koʼãvape haʼe ohai minúskulape espíritu sánto ha omombeʼu porã ni peteĩ hendápe la Biblia noñeʼẽiha espíritu sántore haʼerõguáicha peteĩ tekove. *
5 Mbaʼépa upéicharõ pe espíritu sánto? Génesis 1:2-pe, pe ñeʼẽ evréo ojetradusíva ‘espíritu’ heʼise avei ‘yvytu’ (embojoja Génesis 3:8 ha 8:1 rehe). Oipeju jave pe yvytu ningo ndajahechái, péro ojekuaa umi mbaʼe ojapóva. Upéicha avei pe espíritu sánto ndaikatúi jahecha ni japoko, péro ojekuaa ojapoha heta mbaʼe. Pe espíritu sánto haʼehína Ñandejára puʼaka ha oiporúva yvypóra térã ambue mbaʼe rehe ohupyty hag̃ua hembipota. Hasýpa jaguerovia hag̃ua ko puʼaka ijojahaʼỹva ouha Ñandejára imarangatu ha ipuʼakapávagui? Nahaniriete voi (elee Isaías 40:12, 13).
6. Mbaʼépa David ojerure asy Jehovápe?
6 Jehová ikatu avei oiporu ijespíritu sánto ohechauka hag̃ua ñandéve ñande raperã. Haʼe oprometevaʼekue Davídpe: “Che rohekomboʼéta. Ahechaukáta ndéve moõ rupípa rehovaʼerã” (Sal. 32:8). Péro oipotáparaʼe David oisãmbyhy chupe Jehová? Oipota, haʼe voi ojerure asy vaʼekue chupe: “Chemboʼéna tajapo ne rembipota, nde haʼégui che Jára, nde espíritu sánto tachemboguata tape porãme yvy ape ári” (Sal. 143:10, ÑÑB). Ñande avei jahechaukavaʼerã jaipotaha pe espíritu sánto ñanesãmbyhy. Mbaʼérepa ñaikotevẽte upéva? Jahechamína irundy mbaʼe.
Ñande ndaikatúi jadesidi porã ñandejehegui reínte
7, 8. a) Mbaʼérepa ñaikotevẽ Jehová ñanesãmbyhy? b) Mbaʼe ehémplopa ohechauka ñandevyroitereitaha jaikoséramo ñande jaikuaaháichante ko múndo añáme?
7 Primero, jaʼekuaa ñaikotevẽha Ñandejára espíritu ñanesãmbyhy ndaikatúigui jajapo porãmba opa mbaʼe ñandejehegui reínte. Peteĩ diksionário heʼi sãmbyhy heʼiseha “ojehechauka pe tape” ha avei “ñemoñeʼẽ térã ñemotenonde” (Diccionario Anaya de la Lengua). Yvypóra ndojejapói voi oiko hag̃ua iñakãre ha koʼýte opeka rire oikotevẽvéntema ojehechauka chupe haperã. Ndareíri Jeremías ohai: “Che Jára! Aikuaa yvypóra ndahaʼeiha hekove jára, ndoikuaaiha mbaʼépa oikóta chugui” (Jer. 10:23). Jehová omombeʼu Jeremíaspe oĩha peteĩ mbaʼe ojokóva yvypórape: “Kuimbaʼe ha kuñanguéra pyʼapy [itraisionéro] ha iñañaite, máva piko ikatu oikuaa porã chupe?” (Jer. 17:9, ÑÑB; Mat. 15:19).
8 Ñapensamínte peteĩ tapicha ohótavare oguata kaʼaguýre. Ohóramo haʼeño rei ikatuhína okañy, koʼýte ivaíta hendive ndoikokuaáiramo umichagua lugár rehe ha ndoikuaáirõ mbaʼéichapa ojuhúta hembiʼurã. Ikatu voi omano umichahárupi. Upeichaite avei oiko koʼág̃a heta tapicha rehe, oimoʼã ikatuha oiko oikuaaháichante ko múndo añáme ha noikotevẽiha Ñandejára ohechauka chupekuéra haperã. Péro ñande jaikuaa porã Jehová ñanerekomboʼéramo añoite nañamanomoʼãiha. Upévare jajerure chupe David ojapo haguéicha: “Che jokomína [...] aguata porã hag̃ua nde rape poʼi rupi, ani hag̃ua chepysyrỹi” (Sal. 17:5, ÑÑB; 23:3). Péro, mbaʼépa jajapovaʼerã Jehová ñanesãmbyhy hag̃ua?
9. Ojehechaukaháicha páhina 17-pe, mbaʼéichapa pe espíritu sánto ikatu ñanesãmbyhy?
9 Jajeroviáramo Jehováre ha ñañemomirĩ, haʼe omeʼẽta ñandéve ijespíritu sánto ñanemboguata hag̃ua tape porãre. Jesús heʼivaʼekue hemimboʼekuérape: ‘Pe Túva omboúta che rérape pe pytyvõhára, pe espíritu sánto, upéva penemboʼéta opa mbaʼe ha penemomanduʼáta opaite mbaʼe haʼevaʼekue peẽme’ (Juan 14:26, NM). Ñahesaʼỹijo meme vaʼerã la Biblia, upépe ningo oĩ opa mbaʼe Jesús omboʼevaʼekue, ha koʼẽ koʼẽre jajerure Jehovápe tañanderesapeʼa. Pe espíritu sánto ñanepytyvõta ñantende porã hag̃ua Jehová arandu ipypukuetéva ha upéicha ikatúta jaservi porã chupe (1 Cor. 2:10). Sapyʼánte oikóramo peteĩ mbaʼe ñahaʼarõʼỹva ha ndajaikuaái moõ gotyopa jaháta térã mbaʼéichapa ñambohováita peteĩ mbaʼe, Ñandejára espíritu ohechaukáta ñandéve pe tape. Ñanemomanduʼáta umi mbaʼe jaleevaʼekuére la Bíbliape ha omyesakãta ñandéve jaiporukuaa hag̃ua umi situasión ijetuʼúvape.
Espíritu sánto oisãmbyhyvaʼekue Jesúspe
10, 11. Mbaʼépa oipotavaʼekue Ñandejára Raʼy, ha mbaʼéichapa oipytyvõ chupe pe espíritu sánto?
10 Segundo, Jehová oisãmbyhy itaʼýra peteĩetépe espíritu sánto rupive ha ñande ñaikotevẽ avei upéva. Ou mboyve ko yvy ape ári Jesús oikuaa porãma vaʼekue ko profesía: ‘Jehová espíritu hiʼári opytáta, arandu ha akã porã espíritu, ñemoñeʼẽkuaa ha mbarete espíritu, mbaʼekuaa ha Ñandejáragui jekyhyje espíritu’ (Isa. 11:2). Oiméne Jesús oipotaitereiraʼe pe espíritu sánto oipytyvõ chupe ombohovái hag̃ua umi mbaʼe ijetuʼuetéva ohaʼarõva chupe ko yvy ape ári.
11 Jesús ohecha Jehová okumpliha ipromésa. La Biblia omombeʼu mbaʼépa oiko haʼe ojevautisapávo: ‘Jesús henyhẽ espíritu sántogui ha oho pe Jordángui, ha pe espíritu oraha chupe desiértore’ (Luc. 4:1, NM). Upépe oho oajuna, oñemboʼe ha ojepyʼamongeta, avei oiméne Jehová heʼi ha omyesakã chupe heta mbaʼe ha mbaʼéichapa ojapovaʼerã oñehaʼarõva chugui. Pe espíritu sánto oisãmbyhy Jesús opensa ha oñandúva ha oipytyvõ chupe odesidi porã hag̃ua. Upéicha rupi oikuaavaʼekue mbaʼépa ojapóta ohasa jave peteĩ situasión ijetuʼúva, haʼe ojapo opa mbaʼe Itúva oipotahaichaite.
12. Mbaʼérepa tekotevẽ jajerure Jehovápe tañanesãmbyhy ijespíritu rupive?
12 Jesús oikuaa porã mbaʼéichapa pe espíritu sánto ikatu oporopytyvõ, upévare heʼi hemimboʼekuérape ojerure meme hag̃ua Ñandejárape ha oheja hag̃ua upe espíritu oisãmbyhy chupekuéra (elee Lucas 11:9-13). Mbaʼérepa jajapovaʼerã upéicha? Ñandejára puʼaka ikatúgui ñanepytyvõ ñakambia hag̃ua tekotevẽhápe ha upéicha jajoguáta Crístope (Rom. 12:2; 1 Cor. 2:16). Jahejáramo espíritu sánto ñanesãmbyhy, ñapensáta Jesús opensaháicha ha ñañehaʼãta jaiko haʼéicha (1 Ped. 2:21).
Ko múndo aña ikatu ñandegueraha vai
13. Mbaʼeichagua espíritupa oisãmbyhy umi héntepe, ha mbaʼépa ojapouka chupekuéra?
13 Tercero, ñaikotevẽ espíritu sánto ani hag̃ua ipuʼaka ñanderehe ko múndo aña ogueraha vaíva heta tapichápe. Umi héntepe oisãmbyhy ko múndo oĩva Satanás poguýpe, upéicha rupi ojapo hikuái umi mbaʼe ndogustáiva Jehovápe. Haʼekuéra nopensái Cristo opensaháicha, upévare ko múndo ruvicha ojapouka chupekuéra ivaíva. Upéicha jahechakuaa Ñandejára espíritu noisãmbyhyiha chupekuéra (elee Efesios 2:1-3 ha Tito 3:3). Umi ohejáva ko mundopegua espíritu ipuʼaka hese ha ojapouka chupe hete rembipota, ndohupytymoʼãi umi mbaʼe porã oguerútava Ñandejára rréino (Gál. 5:19-21).
14, 15. Mbaʼéichapa jagueropuʼakáta ko múndo espíritu?
14 Ñandejára Jehová omeʼẽmbaite ñandéve ñaikotevẽva guive ñambohovái hag̃ua ko múndo espíritu. Upévare apóstol Pablo heʼivaʼekue: ‘Peñemokyreʼỹ Ñandejára puʼaka guasu rupi, peẽ penembarete hag̃ua [...] ikatu hag̃uáicha pegueropuʼakapa og̃uahẽramo pe ára ivaietéva’ (Efe. 6:10, 13, ÑÑB). Ijespíritu sánto rupive Jehová ñanemombarete jagueropuʼaka hag̃ua Satanás ñandereityse jave (Rev. 12:9). Jaikuaaháicha ko múndo espíritu imbareteterei ha ndaikatúi jajehekyiete chugui, upéicharõ jepe ndajahejaivaʼerã ñandegueraha vai. Espíritu sánto imbareteve chugui ha oĩ ñanendive.
15 Síglo primérope oĩvaʼekue heta kristiáno ohejáva ijerovia. Hesekuéra Pedro heʼi: “Umíva niko opia tape porãgui ha okañy” (2 Ped. 2:15). Ñandéve ningo noñemeʼẽi ‘ko yvy arigua espíritu, oñemeʼẽ uvei ñandéve Ñandejára espíritu’. Ajépa javyʼaite upe haguére! (1 Cor. 2:12, ÑÑB.) Jaaprovechákena opa mbaʼe Jehová omeʼẽva ñandéve ha jaheja pe espíritu sánto tañanesãmbyhy. Upéicharõmante akóinte jaguatáta tape porãre ha ñandepuʼakáta ko múndo añáre (Gál. 5:16).
Espíritu sántogui ou heta mbaʼe porã
16. Mbaʼéichapa ikatu ñanepytyvõ pe espíritu sánto?
16 Cuarto, ñaikotevẽ Ñandejára espíritu ñanesãmbyhy ñamoheñói hag̃ua ñandepype heta mbaʼe porã (elee Gálatas 5:22, 23). Opavave kristiánope hiʼã ára ha ára ohechauka porãve oporohayhu, ovyʼa ha ndaipochyreiriha. Máva piko heʼíta natekotevẽiha ipasiénsia, ipyʼaporã ha imbaʼeporãve? Térã mávapa noikotevẽi ojeroviave, ivuéno ha ojejokokuaave? Koʼã mbaʼe porã oúva espíritu sántogui tuicha ñanepytyvõ ñandéve, ñande rogayguápe ha ñane ermanokuérape. Péro ani ñanderesarái akóinte ñañehaʼãvaʼerãha jahechauka porãve ñande rekovépe koʼã mbaʼe.
17. Mbaʼépa jajapovaʼerã jahechauka porãve hag̃ua ñande rekovépe umi mbaʼe porã oúva espíritu sántogui?
17 Iporã ñañeporandu: “Ojekuaápa haʼe ha ajapóvare ahejaha pe espíritu sánto chesãmbyhy ha amoheñoiha che rekovépe umi mbaʼe porã oúva chugui?” (2 Cor. 13:5a; Gál. 5:25). Mbaʼépa jajapóta jahecháramo tekotevẽha jahechaukave ñande rekovépe umi mbaʼe porã oúva Ñandejára espíritugui? Ñahesaʼỹijovaʼerã upe téma la Biblia ha ñane puvlikasionkuérape ha jahecha mbaʼéichapa ikatu jajapo umi mbaʼe ñaaprendéva. Avei ñañehaʼã koʼẽ koʼẽre tojekuaave ñanderehe umi mbaʼe porã oúva espíritugui. * Jahechávo mbaʼéichapa pe espíritu sánto ñanepytyvõ ñandéve ha ñane ermanokuérape, ñantendeve mbaʼérepa tekotevẽte ñanesãmbyhy.
Jahejápa Ñandejára espíritu ñanepytyvõ?
18. Mbaʼéichapa Jesús ohejavaʼekue Ñandejára espíritu oisãmbyhy chupe?
18 Jehová ojapórõ guare yvága ha yvy, oiporuvaʼekue Jesúspe “ipytyvõháraramo” (Pro. 8:30; Juan 1:3). Ha Ñandejára Ñeʼẽ heʼi Jesús oikove aja ko yvy ape ári oheja hague pe puʼaka oisãmbyhy chupe. Haʼe ojapo opaite mbaʼe espíritu sánto ohechaukaháicha chupe (Mar. 1:12, 13; Luc. 4:14). Ha ñande, jahejápa avei pe espíritu sánto ñanesãmbyhy?
19. Mbaʼépa jajapovaʼerã pe espíritu sánto ñanemboguata hag̃ua tape porãre?
19 Ñane tiémpope, tuicha ñanepytyvõta avei jahejáramo pe espíritu sánto ñanesãmbyhy. Mbaʼépa jajapovaʼerã ñanemboguata hag̃ua tape porãre? Jajerure meme Jehovápe tomeʼẽ ñandéve pe puʼaka ha tañanepytyvõ ñañemoĩ hag̃ua ipoguýpe (elee Efesios 3:14-16). Upéi jajapovaʼerã jajerurehaichaite chupe ha jaheka umi konsého oĩva Iñeʼẽme, ojehaivaʼekue ijespíritu sánto rupive (2 Tim. 3:16, 17). Jajapókena Ñandejára Ñeʼẽ heʼiháicha ha jaheja pe espíritu ñanesãmbyhy. Jahechaukákena koʼẽ koʼẽre jajeroviaha ñande pyʼaite guive Jehováre, haʼe ningo katuete ñanepytyvõta ñambohovái hag̃ua opa mbaʼe ko múndo añáme.
[Nóta]
^ párr. 4 Pe kuatiañeʼẽ heʼi iñepyrũmbýpe: “Síglo segundo ha tercérope umi hénte ni nopensaivaʼekue [...] pe espíritu sánto haʼeha peteĩ tekove Túva ha Taʼyraichagua. Upéva ndaikatumoʼãi voi ni oñentende, upe tiémpope noñemboʼéi rupi pe Trinidad”.
^ párr. 17 Rehesaʼỹijo hag̃ua peteĩteĩ umi mbaʼe porã oúva espíritu sántogui, ikatu rehecha Índice de las publicaciones Watch Tower heʼihápe “Fruto del espíritu de Dios” ha “Lista por aspecto”.
Ikatúpa rembohovái?
• Mbaʼéichapa pe espíritu sánto ikatu ñanepytyvõ?
• Emombeʼu irundy mbaʼe ohechaukáva tekotevẽha espíritu sánto ñanesãmbyhy.
• Mbaʼépa jajapovaʼerã ikatu hag̃uáicha pe espíritu sánto ñanesãmbyhy?
[Porandu ñahesaʼỹijóva]
[Nóta oĩva taʼanga ndive páhina 15]
Pe espíritu sánto oipytyvõ Jesúspe ojapo hag̃ua opa mbaʼe
[Nóta oĩva taʼanga ndive páhina 17]
Jahejáramo espíritu sánto ñanesãmbyhy, ipuʼakáta umi mbaʼe ñapensáva ha ñañandúvare
