Nemanduʼápa koʼã mbaʼére?

Katuete revyʼáneraʼe releévo umi rrevísta Ñemañaha ramoite osẽvaʼekue. Ehechamína ikatúpa nemanduʼa koʼã mbaʼére:

• Mboy profesía oĩva Escrituras Hebréaspepa oñekumpli Jesucristo rehe?

Pe Comentario bíblico histórico ojapóva Alfred Edersheim, omombeʼu umi hudío mboʼehára heʼi hague oĩha 456 téysto Escrituras Hebréaspe oñeʼẽva Mesías rehe. Péro ñahesaʼỹijo porãvo koʼã 456 téysto, jahechakuaa umíva apytégui oĩha ndojekuaaporãiva añetehápepa oñeʼẽ Jesús rehe. Ndajaikuaaporãiramo jepe mboy profesíapa oñekumpli pe Mesías rehe, umi oñekumplímava ñanepytyvõ jaikuaa hag̃ua Jesús haʼeha pe Mesías (15/8, páh. 17).

• Mbaʼérepa Jehová heʼi umi levítape “Che voi ningo ne [erénsia]”?

Umi levítape noñemeʼẽivaʼekue ijyvyrã, upéva rangue ohupyty hikuái peteĩ ‘erénsia’ ijojahaʼỹva: oservi saserdóteramo Jehovápe (Núm. 18:20, ÑÑB). Oservi rupi santuáriope, oikuaa porã hikuái Jehová oñangarekotaha hesekuéra. Ñande ndajaservíriramo jepe peteĩ santuáriope, jajeroviavaʼerã Jehová omeʼẽtaha ñandéve ñane remikotevẽ (1/9, páh. 7, 8 ha 13).

• Mbaʼéichapa pemboʼevaʼerã umi mitã?

1) Peiporu Ñandejára rembiapokue pemboʼe hag̃ua chupekuéra. 2) Pehendukuaákena Jesús ojapo haguéicha. 3) Pemboʼe pene ehémplo rupive. 4) Pemboʼe chupekuéra michĩ reheve (1/10, páh. 8 ha 9).

• Mbaʼéichapa kristianokuéra oikuaáta iporãpa umi vyʼarã oiporavóva?

Jaikuaa hag̃ua oguerohorýpa Jehová umi vyʼarã jaiporavóva, ñambohovaivaʼerã koʼã mbohapy porandu: “Mbaʼépa jaiporavóta?, mboy tiémpopa? ha mávandipa?” (15/10, páh. 9-12).

• Omombaʼépa Ñandejára peteĩ rrásape añónte?

Nahániri. La Biblia heʼi: ‘Ñandejára ningo nomboykéi avavépe, oguerohory guei umi hénte hekojoja ha okyhyjévape chugui’ (Hechos 10:34, 35, NM). Jehová nomañái ñande pire kolór ni ñane píntare, síno peteĩ mbaʼe iñimportantevévare: ñande pyʼapýre (1/10, páh. 31).

• Mbaʼéichapa Proverbios 7:6-23 ñanepytyvõ ñamboyke hag̃ua umi mbaʼe tieʼỹ?

Upépe oñeñeʼẽ peteĩ mitãrusu ohovaʼekuére oguata peteĩ tape oikuaahápe oĩha peteĩ kuña rekovai, ha haʼe ombojuruheʼẽ ko mitãrusúpe ha oity chupe iñuhãme. Koʼág̃a avei iporãta ñamboykete umi páhina oĩva Internétpe ha orekóva mbaʼe tieʼỹ. Upévare jaiporu mboyve Internet jajerurevaʼerã Jehovápe tañanepytyvõ ani hag̃ua jaʼa umívape (15/11, páh. 9 ha 10).

• Mbaʼéichapa solterokuéra oaprovechakuaa itiémpo?

Umi nomendáiva ikatu jepi ojapo hetave mbaʼe Jehová servísiope. Pór ehémplo, Páblogui oikovaʼekue “tetã ambuegua apóstol” (Rom. 11:13, ÑÑB). Haʼe oviaha ambue misionérondi, oho opredika umi lugár ojepredikaʼỹháme ha omoñepyrũ heta kongregasión. Upévare, opavave nomendáiva oñeporanduvaʼerã: “Ikatúpa aaprovecha che tiémpo ha ambaʼapove predikasiónpe?” (15/10, páh. 13-15).

• Mbaʼéichapa ñande kristiáno jaiporu ko múndo omeʼẽva?

Jaaprovecha heta mbaʼe ojapóva hikuái. Pór ehémplo, jaiporu teléfono, komputadóra, Internet ha ambue mbaʼe ñamog̃uahẽ hag̃ua heta ñeʼẽme ko yvy tuichakuére umi mbaʼe porã omboʼéva la Biblia. Avei jaiporu ko múndo omeʼẽva ñañangareko hag̃ua ñandejehe, ñambaʼapo ha jahupyty hag̃ua ñane remikotevẽ. Péro jaiporuvaʼerã hekópe ha jahecha hendápe porãnte umi mbaʼerepy ha opa mbaʼe ko múndo oikuaveʼẽva (15/11, páh. 18 ha 19).