Mbaʼéichapa ikatu javyʼave jastudiávo la Biblia? Mbaʼépa ikatu jajapo ideprovechove hag̃ua ñandéve? Jahechami mbohapy mbaʼe ñanepytyvõtava upearã.

1 ÑAÑEMBOʼE. Ñepyrũrã ñañemboʼevaʼerã Jehovápe (Sal. 42:8). Mbaʼérepa? Jastudiávo la Biblia ñamombaʼeguasuñaína chupe. Upévare jajerurevaʼerã tomeʼẽ ñandéve ijespíritu ha jaheja tañanepytyvõ (Luc. 11:13). Barbara heta áñorema oservíva misionéraramo, heʼi: “Katuete añemboʼe alee térã astudia mboyve la Biblia. Upéi añandu Jehová chepytyvõ ha oguerohoryha ajapóva”. Ñañemboʼéramo ñanepytyvõta ideprovechove hag̃ua ñandéve umi tembiʼu Jehová omeʼẽva.

2 JAJEPYʼAMONGETA. Heta ningo oĩ naitiémpoigui vai vaínte oleéva Ñandejára Ñeʼẽ, upéicha rupi ndaideprovechoguasúi chupe. Carlos, oservíva Jehovápe 50 áño rasáma, ohechakuaa iñimportanteha ñañemotiémpo jajepyʼamongeta hag̃ua umi mbaʼe jaleévare, haʼe heʼi: “Koʼág̃a saʼivénte alee la Biblia, dos páhina rupi káda día. Kóva chepytyvõ antende porãve hag̃ua upe aleéva ha ahechakuaa hag̃ua mbaʼépa chemboʼe” (Sal. 77:12). Ñañemotiémporamo jajepyʼamongeta hag̃ua, jaikuaa ha ñantende porãvéta Ñandejára rembipota (Col. 1:9-11).

3 JAJAPO ÑAAPRENDÉVA. Jahechakuaávo mbaʼéichapa ideprovécho peteĩ mbaʼe jajapóva, ñanepytyvõve. Upéicha avei oiko jastudiávo la Biblia. Peteĩ ermáno imitãva hérava Gabriel heʼi péicha: “Astudiávo la Biblia ajeprepara porãve ambohovái hag̃ua umi provléma ha aipytyvõ porãve hag̃ua che rapichakuérape. Añetehápe, añehaʼãmbaite ajapo umi mbaʼe aaprendéva” (Deu. 11:18; Jos. 1:8). Upeichaite, Jehová ningo omeʼẽ ñandéve hetaiterei informasión, upévare ñañehaʼãvaʼerã ñaikumby ha jajapo umi mbaʼe ñaaprendéva (Pro. 2:1-5).

RREPÁSO. Ajépa tuichaite mbaʼe ikatu haguére jaikuaa porã Ñandejára arandu! (Rom. 11:33) Mbaʼépa jajapovaʼerã ideprovécho hag̃ua ñandéve umi mbaʼe jastudiáva la Bíbliape? Ñepyrũrã, ñañemboʼevaʼerã Jehovápe ha jajerure chupe tomeʼẽ ñandéve ijespíritu sánto ha jaheja tañanepytyvõ. Upe rire, ñañemotiempovaʼerã jajepyʼamongeta hag̃ua umi mbaʼe jaleévare ha ipahápe ñañehaʼãvaʼerã jajapo ñaaprendéva. Péicha jajapóramo, umi jastudiáva ñanepytyvõta ha ñanembovyʼáta.