Peteĩ prekursóra hérava Charlotte White og̃uahẽrõ guare Louisvíllepe (Kentucky, Estados Unidos) ogueraha peteĩ valíha irruédava ha opavave ohecharamo upéva.

Áño 1908-pe, entéronte hesaho ohechávo pe “auroramóvil” ogueraháva pe ermána White, upérõ ndaipóri upeichagua. Haʼe omombeʼu: “Umi hénte upévarente oñeʼẽ, ha opavave omañajoa cherehe”.

Umi Estudiantes de la Biblia (upéicha ymave oñehenói umi testígo de Jehovápe) ohechakuaavaʼekue tekotevẽha omombeʼu hapichakuérape umi mbaʼe porã oaprendéva ostudiávo la Biblia. Umi lívro hérava La Aurora del Milenio (upe rire oñehenoivaʼekue Estudios de las Escrituras) tuicha oipytyvõ chupekuéra upearã. Upévare umi ikatúva guive oñepyrũ oviaha umi siudáre, puévlo ha kampañaháre oikuaveʼẽ hag̃ua koʼã lívro, ikatu hag̃uáicha ideprovécho avei umi hénte ontendesévape la Biblia.

Koʼã lívro ou seis volúmenpe, ijape ojejapo télagui, ha ovale 1,65 dólar. Áño 1908-pe ermána White ha ambue maranduhára ikyreʼỹva oikuaveʼẽ koʼã lívro. Haʼekuéra oanota raẽ mboýpa oipota umi hénte ha ogueraha chupekuéra okovraha díape. Koʼã lívro ndahepyietevaʼekue, peteĩ karai ndoikuaaséiva chuguikuéra mbaʼeve jepe ojeplagea ivaratoiterei haguére.

Ermána Malinda Keefer imanduʼavaʼekue oanota hague 200 térã 300 pedído voi peteĩ semánape. Péro oĩvaʼekue peteĩ provléma: koʼã lívro ipohyieterei. Pór ehémplo pe volúmen seis  orekovaʼekue 740 páhina voi. Peteĩ jey, pe rrevísta hérava The Watch Tower (koʼág̃a hína Ñemañaha) heʼi 50 lívro opesaha 18 kílo, ha upéva hetáma umi maranduhárape g̃uarã, koʼýte umi ermánape.

Mbaʼépa ojejapo upémarõ? Ermáno James Cole ohecha mbaʼéichapa ikatu oñemoĩ rruéda umi valíhape, upéicha ojegueraha porãvéta umi livrokuéra. Ko ermáno voi heʼi: “Ndaikomoʼãvéima che lómo rasypa!”. Áño 1908-pe peteĩ asambléape, oikóva Cincinnatipe (Ohio, Estados Unidos), ermáno Cole opresenta ko mbaʼe pyahu ojapóva ha umi ermáno ovyʼaiterei. Ko valíhape ojegueraha umi lívro La Aurora del Milenio, upévare ikostádope ojehai ingléspe Dawn-Mobile heʼiséva auroramóvil. Tiémpo rire umi ermáno ivakeánoma ha peteĩ ipópentema ogueraha umi valíha henyhẽtéva lívrogui. Ko auroramóvil ikatu ojehupive térã oñemboguejyve, ha ojeiporu opaichagua tapére. Umi ermáno opredikapa rire ikatu ohupi umi rruéda oguera hag̃ua hógape, tahaʼe yvýrupi térã trénpe.

Umi ermáno ikatu ojogua ko auroramóvil 2,50 dólar rehe, umi prekursórape katu oñemeʼẽnte. Ermána Keefer, osẽva ko fótope, oiporukuaaiterei vaʼekue ko valíha irruédava ha upéicha rupi peteĩ ipópe ogueraha pe auroramóvil ha ambuépe katu ikartéra, ha mokõivéva henyhẽ lívrogui. Peteĩ táva oĩva Pensilvániape haʼe otopavaʼekue hetaiterei tapicha oipotáva koʼã lívro, upévare sapyʼánte tres térã cuatro viáhe voi ojapo oguerahapa hag̃ua umi lívro ojejerurevaʼekue chupe, ha upearã ohasavaʼerã peteĩ puéntere.

Amo áño 1987 rupi peteĩ pilóto de avión oñepyrũ ojapo umi valíha irruedapáva, ojehechaitéva koʼág̃a rupi aeropuértope ha siudaháre. Péro upéva ndahaʼevéima peteĩ mbaʼe pyahu umi Estudiantes de la Bíbliape g̃uarã. Heta áño upe mboyve haʼekuéra oiporumavaʼekue pe auroramóvil omoherakuã hag̃ua pe marandu porã.

[Komentário oĩva páhina 32-pe]

Ermána Keefer sapyʼánte tres térã cuatro viáhe voi ojapo oguerahapa hag̃ua umi lívro

[Komentário oĩva páhina 32-pe]

Ohecha mbaʼéichapa ojegueraha porãvéta umi lívro