“Jesucristo tapenemyenyhẽ mbaʼeporã ijojahaʼỹvagui peñehaʼã haguére iporãva rehehápe.” (FILI. 4:23, NM)

MBAʼÉPA JAJAPOVAʼERÃ ÑAIME PORÃMBA HAG̃UA KONGREGASIÓNPE...

... ñane ermanokuéra ndive?

... ñasẽ jave japredika?

... jaikuaávo oĩha hembiapo vaíva?

1. Mbaʼérepa ojeguerohorýraʼe umi ermáno Filipos ha Tiatirayguápe?

 UMI kristiáno Filiposgua imboriahuvaʼekue, upéicharõ jepe ipojera ha ohayhu iñermanokuéra kongregasionguápe (Fili. 1:3-5, 9; 4:15, 16). Upévare Pablo omohuʼãvo ikuatiañeʼẽ ohaivaʼekue espíritu sánto rupive, heʼi chupekuéra: “Jesucristo tapenemyenyhẽ mbaʼeporã ijojahaʼỹvagui peñehaʼã haguére iporãva rehehápe” (Fili. 4:23). Péicha avei, umi ermáno Tiatiraygua imbaʼeporã opavavéndi. Upévare Jesucristo oho rire yvágape, oguerohory chupekuéra ha heʼi: “Che aikuaa ne rembiapokue, ne mborayhu, nde jerovia, reporopytyvõ ha rehaʼarõkuaaha. Avei ahechakuaa koʼág̃a rembaʼapoveha yma guarégui” (Rev. 2:19, NM).

2. Mbaʼépa káda uno jajapovaʼerã opavave ikyreʼỹ ha ovyʼa hag̃ua kongregasiónpe?

² Oĩ kongregasión ojekuaáva umi ermáno horyeterei ha imbaʼeporã haguére, ambuépe katu oñesẽ heta hetágui predikasiónpe ha ojeguerohoryeterei umi oiporupaitévape itiémpo Jehová servísiope. Mbaʼépa jajapovaʼerã maymáva ñañopytyvõ hag̃ua kongregasiónpe ha ñamombarete hag̃ua oñondivepa ñande jerovia? Upearã káda uno jahechaukavaʼerã ñanekyreʼỹha (1 Cor. 1:10). Péro ñande voi nañañehaʼãiramo, ñamokangy ha ñambokaiguepáta ñane ermanokuérape ha ikatu noñepenavéi umi mbaʼe vai ojejapóvare (1 Cor. 5:1; Rev. 3:15, 16). Mbaʼépa ikatu jaʼe ñane kongregasión rehe? Mbaʼépa jajapokuaa ñañomokyreʼỹ ha javyʼa hag̃ua oñondivepa?

MBAʼÉICHAPA IKATU ÑAÑOMOKYREʼỸ

3, 4. Mbaʼéichapa ñamombaʼeguasu Jehovápe kongregasiónpe?

³ David opurahéi Jehovápe: “Maymáva rovake romombaʼeguasúta,  ha rogueropurahéita opavave apytépe” (Sal. 35:18). Jahechaháicha, haʼe ikyreʼỹvaʼekue omombaʼeguasu hag̃ua Jehovápe oĩ jave Ñandejára rembiguaikuéra ndive. Jajapópa avei ñande upéicha? Ñaime jave rreunionhápe ñane ermanokuérandi, pór ehémplo ñahesaʼỹijo jave Ñemañaha, ikatu jahechauka ñande jerovia ha ñamokyreʼỹ chupekuéra ñane komentário rupive. Upévare iporã ñañeporandu: Añehaʼãpa akomenta meme rreunionhápe aikuaágui tuicha mbaʼeha upéva? Ajeprepara porãpa ikatu hag̃uáicha aporomokyreʼỹ che komentário rupive? Ha oiméramo ñanefamília, ñaipytyvõpa umi mitãme okomenta hag̃ua rreunionhápe ha ani hag̃ua oleénte pe párrafope oĩhaichaite?

⁴ Ambue sálmope avei David ohechauka ñande purahéi rupive ikatuha ojekuaa jaservípa Jehovápe ñande pyʼaite guive. Haʼe heʼi: “Aime ajapo hag̃uáicha ne rembipota, che Jára, aime ajapo hag̃uáicha ne rembipota. Ambopu ha apurahéita ndéve g̃uarã” (Sal. 57:7, NM). Umi rreunionhápe, japurahéi lájare jahechauka jaserviha Jehovápe ñane korasõ mbytete guive. Oĩpa umi purahéi ndajaikuaaporãiva gueteri? Oiméramo upéicha, ikatu ñañensaja jajapo jave pe Aty Jastudia Hag̃ua Ñande Rogayguándi ha ñañehaʼã ñapensa David opensa haguéicha. Haʼe heʼivaʼekue: “Ñandejárape apurahéine aikove aja pukukue, [Jehovápe] aropurahéine aiko aja ko yvy ári” (Sal. 104:33).

5, 6. Mbaʼéichapa ikatu jahechauka ñanembaʼeporã ha ñandepojeraha, ha mbaʼépa ojehupytýta upéicha kongregasiónpe?

⁵ Jajoayhuve hag̃ua kongregasiónpe, tekotevẽ avei ñanembaʼeporã ñane ermanokuéra ndive. Apóstol Pablo oñemoñeʼẽ umi kristiáno evréope ha omohuʼãvo ikuatiañeʼẽ heʼi porã chupekuéra: “Pejoayhúkena oñopehẽnguéicha. Ani penderesarái pemog̃uahẽvaʼerãha mbohupa pende rógape” (Heb. 13:1, 2, JMP). Ikatu jajapo ko téysto heʼíva ñainvitávo okaru hag̃ua ñanendive umi superintendénte ha hembireko térã prekursorkuérape. Ñanemanduʼavaʼerã avei umi ermáno viúdo térã viúdare, umi ndaisýi térã ndaitúvaivare térã ambue ermánore. Ikatu ñainvita chupekuéra okaru hag̃ua térã ñanemoirũ hag̃ua jajapo jave pe Aty Jastudia Hag̃ua Ñande Rogayguándi.

 ⁶ Pablo ojerure Timotéope oñemoñeʼẽ hag̃ua ermanokuérape: ‘Ere chupekuéra tojapo iporãva, taimbaʼeta tembiapo porãme, ha toĩ ombojaʼo hag̃uáicha oguerekóva hapichápe’. Ojapóramo hikuái upéicha “ombyatýta heta mbaʼe omopyenda mbaretétava chupekuéra [tenonderãme g̃uarã], ha ohupytýta hikuái jeikove añeteguáva” (1 Tim. 6:17-19). Ojekuaa Pablo oipota hague umi ermáno imbaʼeporã oñondive. Mbaʼéichapa ñande ikatu jajapo upéva ivaíramo jepe pe situasión opárupi? Pór ehémplo, ikatu ñañekuaveʼẽ jagueraha hag̃ua rreunionhápe térã predikasiónpe umi ermáno oikotevẽvape. Péro oiméramo ñandéve ñanepytyvõhína hikuái, mbaʼéichapa ikatu ñamokyreʼỹ umi ermánope ha jahechauka jaagradeseha chupekuéra ojapóvare ñanderehehápe? Ñakontrivuíramo ikatuháicha hendivekuéra opaga hag̃ua pe kombustívle hepy hepyvéva koʼág̃a rupi. Avei jahechaukakuaa jahayhu ha ñamombaʼeha ñane ermanokuérape jahasavévo tiémpo hendivekuéra. Jajapóramo iporãva “umi ñanemoirũvape ñande jeroviápe”, avei ñañemotiémpo ha ñaipytyvõramo chupekuéra umi mbaʼe oikotevẽvape, jahupytýta mokõi mbaʼe iporãva. Primero, jahayhuvéta ñane ermanokuérape, ha segundo, ñamokyreʼỹ ha ñamomýita ambuépe ojapo hag̃ua umi mbaʼe porã kongregasiónpe (Gál. 6:10).

7. Mbaʼépa tekotevẽ avei jahechauka jajoayhuve hag̃ua kongregasiónpe?

⁷ Oĩ mokõi mbaʼe ñanepytyvõtava jajoayhuve hag̃ua kongregasiónpe: umi ermáno ñandeguerekovaʼerã iñamígoramo ha jahechauka ikatuha ojejerovia ñanderehe (elee Proverbios 18:24). Umi oñoamígo teéva ningo ojerovia ojuehe oikuaágui ndofallamoʼãiha ojupe. Upévare peteĩ ermáno omombeʼúramo ñandéve hemiandu ha oikuaávo nañamombeʼumoʼãiha avavépe, koʼýte ojerovia ha oñemoag̃uivéta ñanderehe. Upéicharõ, jahechaukákena ikatuha ojejerovia ñanderehe ha ñañopytyvõ jaiko hag̃ua kongregasiónpe peteĩ famíliaicha, ojoayhu ha oikóva peteĩ ñeʼẽme (Pro. 20:19).

ÑANEKYREʼỸKENA PREDIKASIÓNPE

8. Mbaʼépa heʼi Jesús umi ermáno Laodiceayguápe, ha mbaʼérepa oñemoñeʼẽ chupekuéra upéicha?

⁸ Jesús ohechakuaavaʼekue umi kristiáno ypykue Laodiceaygua naikyreʼỹiha. Ojogua hikuái y tíviope, nahoʼysãi ni ndahakúivape, ha ni ndaikatúiva ojeʼu (Rev. 3:15, 16). Umi ermáno kongregasión Laodiceaygua ikaiguevaʼekue opredika hag̃ua, ha oiméne upéicha rupi ndojoguerahaporãi avei hikuái oñondive. Upévare Jesús heʼi porãnte chupekuéra: ‘Che ajaʼo ha ahekomboʼe opa ahayhúvape. Aipórõ, nekyreʼỹkena ha ejevy Ñandejára gotyo’ (Rev. 3:19).

9. Mbaʼéichapa jaikóta ermanokuéra ndive ñasẽ meméramo predikasiónpe?

 ⁹ Ñasẽ meméramo predikasiónpe, ñaipytyvõta ñane ermanokuérape ikyreʼỹve ha oiko porã hag̃ua oñondivepa. Ñande ningo ñandeaty umi kongregasiónpe ikatu hag̃uáicha avei jaheka umi tapicha ipyʼaporãvape ha ñamboʼe chupekuéra Ñandejára Ñeʼẽ. Upévare tekotevẽ ñahaʼanga Jesúspe ha ñañehaʼãmbaite jajapo porã ko tembiapo (Mat. 28:19, 20; Luc. 4:43). Ñande avei ‘namoirũñaína Ñandejárape hembiapópe’, ha ñanekyreʼỹ meméramo, koʼýte ñaime porãmbáta oñondive (1 Cor. 3:9). Jahechávo mbaʼéichapa ñane ermanokuéra odefende ijerovia ha omotenonde Ñandejára oipotáva, jahayhu ha ñamombaʼeve chupekuéra. Añetehápe ñambaʼapóramo“peteĩ ñeʼẽme” ñane ermanokuéra ndive, ikatúta jaiko porãmba oñondive kongregasiónpe (elee Sofonías 3:9).

10. Mbaʼéichapa ñamokyreʼỹta ermanokuérape ñañehaʼãramo japredika porãve?

¹⁰ Ñamokyreʼỹ hag̃ua ñane ermanokuérape tekotevẽ avei ñañehaʼã japredika porãve. Jajepyʼapýramo ñande rapichakuérare ha jajapóvo ikatúva guive Ñandejára Ñeʼẽ opoko hag̃ua ikorasõre, ñande voi ñamombeʼusevéta pe marandu porã (Mat. 9:36, 37). Ha umi ermáno ñanemoirũva katu ikyreʼỹta avei ohendúvo mbaʼéichapa ñañeʼẽ. Ñapensamíntena: Mbaʼérepa Jesús omondovaʼekue hemimboʼekuérape mokõi mokõi opredika hag̃ua? (Luc. 10:1). Ndahaʼéi oñomombarete ha oaprende hag̃uánte ojuehegui, síno omombaʼeve hag̃ua hikuái pe predikasión. Ajépa javyʼa ñasẽ jave japredika umi ermáno ikyreʼỹetéva ndive! Upéicha ñande avei nañaneateʼỹmoʼãi ha jasegíta ñamyerakuã pe marandu porã (Rom. 1:12).

ANI JATAKY AVAVÉRE NI JAHEJA REI UMI TEMBIAPO VAI

11. Mbaʼépa ojapo umi isrraelíta Moisés tiémpope, ha mbaʼépepa opa?

¹¹ Umi isrraelítagui oiko riremi peteĩ tetã, haʼekuéra oñepyrũma ojeplagea oimeraẽ mbaʼére. Upéi katu opuʼãma Jehová ha umi haʼe omoĩvare omoakã hag̃ua chupekuéra (Éxo. 16:1, 2). Upéicha rupi, naentéroi umi osẽva Egíptogui oike pe Yvy Oñeprometevaʼekuépe. Moisés jepe ndoikéi upépe ojapógui peteĩ mbaʼe vai umi isrraelíta kúlpare (Deu. 32:48-52). Mbaʼépa jajapokuaa ani hag̃ua jajogua chupekuéra?

12. Mbaʼépa ñanepytyvõta ani hag̃ua jataky ñande rapichakuérare?

¹² Ndovaléi ningo jaiko jataky ñande rapichakuérare. Mbaʼépa ñanepytyvõta ani hag̃ua jajapo upéva? Tekotevẽ ñanderekomirĩ ha ñamombaʼe umi ñanemoakãvape, ha avei ñañatendevaʼerã mávarepa jajeheʼa. Jaiporavóramo umi vyʼarã naiporãiva térã jahasaitereírõ tiémpo ñane irũnguéra eskuelapegua, koléhio térã ñande travahohapegua ndive, katuete ñandegueraha vaíta hikuái. Upévare iporãiteve ndajajeheʼái umi oikóvare iñakãre ni umi otakývare hapicháre (Pro. 13:20).

13. Mbaʼeichaite pevépa ikatu ombyai kongregasión umi otakýva iñermanokuérare?

¹³ Umi ojepokuaáva otaky ojuhúvare, ikatu omokangy ermanokuéra jerovia. Oikóramo upéva, ndaiporimoʼãvéi pyʼaguapy kongregasiónpe ha hasýta jaiko porãmba hag̃ua oñondive. Jaikóramo ñañeʼẽ vai ñane ermanokuérare, japerhudikáta chupekuéra, ha ivaiveha katu japekáta Jehová renondépe, ñañeʼẽ rei rupi ambuére térã ñamongyʼágui ñande rapicha réra (Lev. 19:16; 1 Cor. 5:11). Síglo primérope oĩvaʼekue ermáno “nomombaʼéiva umi omoakãvape ha oiko otaky umi  Ñandejára oguerohorývare”, térã umi ansiáno kongregasionguáre (Jud. 8, 16). Ha upéva katuete ndogustáineraʼe Jehovápe.

14, 15. a) Mbaʼépa oikóta ojeheja reíramo umi tembiapo vai kongregasiónpe? b) Mbaʼépa jajapovaʼerã jaikuaáramo oĩha ojapóva peteĩ mbaʼe ivaietereíva ha nomombeʼúi?

¹⁴ Péro, mbaʼépa jajapóta jaikuaáramo oĩha ermáno ojapóva peteĩ mbaʼe ivaietereíva ha nomombeʼúi ansianokuérape, pór ehémplo hoʼu rasa vevída, ohecha pornografía térã hekovai? (Efe. 5:11, 12). Jaheja reíramo umi mbaʼe, Jehová espíritu ombaʼapo asýta kongregasiónpe, ha ermanokuéra ndoikomoʼãi pyʼaguapýpe (Gál. 5:19-23). Umi kristiáno Corintoygua oguenohẽvaʼekue kongregasióngui umi ikatúva ombyai ermanokuérape. Upéicha avei koʼág̃a, ikatu hag̃uáicha jaiko porã oñondivepa ha javyʼajoa, oñemosẽvaʼerã umi omongyʼa ha ombyaiséva kongregasión. Mbaʼépa ñande ikatu jajapo ojehupyty hag̃ua upéva?

¹⁵ Ojeʼéma haguéicha, peteĩ ermáno omombeʼúramo ñandéve mbaʼéichapa oñeñandu térã mbaʼépa opensa, ivaietereíta jaikóramo ñamosarambi umi mbaʼe heʼivaʼekue ñandéve. Péro jaikuaáramo oĩha ojapóva peteĩ mbaʼe ivaietereíva, ñanemanduʼavaʼerã Jehová omoĩha umi ansiánope oñangareko hag̃ua kongregasión rehe, ha upévare haʼekuéra oikuaavaʼerã katuete upe oikóva (elee Levítico 5:1). Upéicharõ, jaikuaávo peteĩ ermáno térã ermána ojapo hague ivaíva, jaʼevaʼerã chupe toñemboja umi ansiáno rendápe ikatu hag̃uáicha oñepytyvõ chupe (Sant. 5:13-15). Ha ohaʼarõitereíramo ojapo hag̃ua upéva, ñandete ñamombeʼuvaʼerã.

16. Mbaʼérepa ñamombeʼuvaʼerã umi ansiánope oĩramo hembiapo vaíva?

¹⁶ Jehová oñangareko ñanderehe kongregasión rupive, ha ñande avei tekotevẽ ñañangareko ojuehe ñamombeʼúvo ansianokuérape umi mbaʼe vai ojejapóva. Haʼekuéra oipytyvõta pe hembiapo vaívape ohechakuaa hag̃ua ojavy hague. Pe tapicha oñembyasýramo, ohendu umi konsého ha ohejáramo ojekorrehi chupe, nombyaimoʼãi pe kongregasión. Péro oñemohatã ha ndojaposéirõ ojeʼéva chupe, katuete oñemosẽvaʼerã. Upéicha “oñehundi” térã ojepeʼa ermanokuéra apytégui pe ikatúva ombyai kongregasión (elee 1 Corintios 5:5). Péicha jahecha sapyʼánte tekotevẽtaha ñañeʼẽ ñaipytyvõ hag̃ua umi ansiánope hembiapópe ha jajapo haʼekuéra heʼíva ikatu hag̃uáicha oñeime porãmba kongregasiónpe.

ÑAÑEHAʼÃKENA ‘JAIKO PETEĨ ÑEʼẼME’ OÑONDIVEPA

17, 18. Mbaʼépa jajapovaʼerã jaiko hag̃ua ‘peteĩ ñeʼẽme’ kongregasiónpe?

¹⁷ Umi kristiáno síglo primeropegua “oñehaʼãmbaite oikuaa porãve umi apóstol omboʼéva” ikatu hag̃uáicha oiko hikuái peteĩ ñeʼẽme kongregasiónpe (Hech. 2:42, NM). Jahechakuaa haʼekuéra omombaʼeterei hague umi konsého ha opa mbaʼe heʼíva umi ansiáno. Koʼág̃a rupi avei umi ermáno omoakãva kongregasión ombaʼapo meme pe tembiguái jeroviaha ha iñarandúva ndive. Upéicha oipytyvõ ha omokyreʼỹ opavave ermánope oiko porãmba hag̃ua oñondive (1 Cor. 1:10). Jasegíramo umi konsého oñemeʼẽva Jehová organisasión rupive ha jajapóramo umi ansiáno heʼíva, jahechaukáta ‘ñañehaʼãha jaiko peteĩ ñeʼẽme oñondive, [...] pyʼaguapýpe’ (Efe. 4:3, BNP).

¹⁸ Jajapókena ikatúva guive ñaime porãmba hag̃ua kongregasiónpe. Upéicharõmante oñekumplíta ñanderehe ko téysto heʼíva: “Jesucristo tapenemyenyhẽ mbaʼeporã ijojahaʼỹvagui peñehaʼã haguére iporãva rehehápe” (Fili. 4:23).

[Porandu ñahesaʼỹijóva]

[Nóta oĩva taʼanga ndive páhina 19]

Japrepara porãpa ñane komentário ñamokyreʼỹ hag̃uáicha ermanokuérape?

[Nóta oĩva taʼanga ndive páhina 20]

Ñañensajáramo japurahéi hag̃ua ikatu ñañomokyreʼỹ kongregasiónpe