Ijetuʼueterei ningo jaʼe hag̃ua peteĩ karai tuicha omandávape ojavy hague ha tekotevẽha okambia. Ndépa rehóne reñemoñeʼẽ peichagua tapichápe reikuaáramo jepe haʼe oporojukáma hague omoʼã hag̃ua hembiapo vaikue?

Rréi David oñenovaʼekue Bat-seba ndive ha opyta hyeguasu, péicha oporomoakãratĩ hikuái. Omokañy hag̃ua upéva, David ojukauka Bat-seba ménape upe rire omenda hag̃ua hese. Heta tiémpore oiko upéicha ha osegi ojapo hembiapo jepiveguáicha. Péro Jehová ndohejareíri Davídpe hembiapo vaikue, upévare omondo proféta Natánpe okorrehi hag̃ua chupe.

Reñemoĩramo Natán lugárpe, rehechakuaáta ijetuʼuetereiha upe ojapovaʼerã. Péro haʼe iñeʼẽrendu Jehovápe ha ojepytaso mbarete ijykére, upéva ningo omomýi chupe omomanduʼa hag̃ua Davídpe hembiapo vaikue. Mbaʼéichapa ojapo upéva ha ontendeka rréi Davídpe oñembyasyvaʼerãha?

MBOʼEHÁRA OÑEMOÑEʼẼKUAÁVA

Eñemotiempoʼimína ha eleemi 2 Samuel 12:1-25. Koʼág̃a epensa nde haʼeha Natán ha remombeʼuha Davídpe ko istória: ‘Peteĩ távape ningo oiko mokõi kuimbaʼe, peteĩva ipláta heta ha pe ótro katu imboriahu. Pe ipláta hetáva heta ijovecha ha ivaka. Pe imboriahúva katu oguereko peteĩ ovecha kuñamínte, haʼe ojogua ha omongakuaavaʼekue itaʼyrakuéra ndive. Okaru hembiʼúgui ha hoyʼu haʼe hoyʼuhágui, oke ijyva ári ha oguereko chupe peteĩ  itajýraicha. Tiémpo rire og̃uahẽ peteĩ mbohupa pe ipláta hetáva rógape; ha haʼe ndojukaséi ijovecha ha ivaka upe og̃uahẽvape g̃uarã, upévare ojuka pe kuimbaʼe mboriahu ovecha omongaru hag̃ua imbohupápe’ (2 Sam. 12:1-4, ÑÑB).

David ningo ovecharerekuavaʼekue ha oiméne oimoʼã añetehápe oiko upe Natán omombeʼuvaʼekue chupe. Peteĩ karai arandu heʼi: “Oimevaʼerã Natán oho jepi voi David rendápe odefende hag̃ua umi oikotevẽvape oñepytyvõ, ha David oimoʼã upéva jeýma la oikóva”. Oiméramo jepe oiko upéva, Natán ohechauka ipyʼaguasu ha iñeʼẽrenduha Ñandejárape. Ohendúvo upe istória, David ipochyeterei ha heʼi: ‘Ñandejára rérape haʼe ndéve, pe kuimbaʼe ojapovaʼekue upéicha hapicháre ojejukavaʼerã!’. Upémarõ Natán heʼi chupe: ‘Nde hína upe kuimbaʼe!’ (2 Sam. 12:5-7).

Epensamíntena mbaʼérepa Natán oñemoñeʼẽ péicha Davídpe. Ijetuʼu ningo ñandéve jaʼe hag̃ua peteĩ jahayhúvape ojavyha. Ha enterovénte ñamoʼãse jepi jajapóramo peteĩ mbaʼe noĩporãmbáiva. Péro, pe istória omombeʼúva rupive, Natán oipytyvõ Davídpe ohechakuaa hag̃ua ivaietereiha hembiapokue. Pe rréi ohechakuaa pe kuimbaʼe ipláta hetáva ojapovaʼekue ivaietereiha ha upéva ombopochyeterei chupe. Upévare Natán heʼi Davídpe: ‘Nde hína upe kuimbaʼe!’. Péicha pe rréi ohechakuaa tuichaiterei ojavy hague, ha upéva oipytyvõ chupe oasepta hag̃ua ojekorrehírõ guare. Ohechakuaa omboyke hague Jehovápe upe mbaʼe vaiete ojapóva rupive ha oheja ojekorrehi chupe (2 Sam. 12:9-14; Sal. 51, iñepyrũmbýpe).

Mbaʼépa ñanemboʼe ko istória? Peteĩ omboʼéva la Biblia ningo ohaʼarõ umi ohendúva chupe ohechakuaa ijehegui ha ontende umi mbaʼe oĩva la Bíbliape. Natán ningo orrespetavaʼekue Davídpe, upévare oñeʼẽ ombopochyʼỹ hag̃uáicha chupe. Oikuaa voi pe rréi ohayhuha ipyʼaite guive pe tekojoja ha opa mbaʼe hekopeguáva, ha pe istória rupive omomýi chupe ohechauka hag̃ua umi kualida. Ñande avei ikatu ñaipytyvõ ñande rapichakuéra ipyʼaporãvape ontende hag̃ua mbaʼéichapa Jehová ohecha opa mbaʼe. Péro ndajajapoivaʼerã ku ñañemombaʼeguasu hag̃uáicha térã jaikuaaparõguáicha. Upe ñanepytyvõva jahechakuaa hag̃ua iporãva ha ivaíva ningo ndahaʼéi ñande ñapensávante, síno la Biblia.

Natán iñeʼẽrendu rupi Ñandejárape heʼivaʼekue pe karai tuichaite omandávape ojavyha (2 Sam. 12:1). Ñande ñaneñeʼẽrendúramo Jehovápe ñanepytyvõta ñadefende hag̃ua pyʼaguasúpe umi mbaʼe Jehová heʼíva.

ODEFENDE PE ADORASIÓN AÑETEGUA

Koʼã mokõi kuimbaʼe oiméne oñoamigoite rakaʼe. Upévare David ombohéra peteĩ itaʼýrape Natán. La Biblia oñeʼẽ ñepyrũvo Natán rehe omombeʼu oĩha David ndive. Mokõivéva ningo ohayhu Jehovápe. Añetehápe rréi David ojeroviavaʼekue Natán rehe, upévare omombeʼu chupe ojaposeha peteĩ témplo Jehovápe g̃uarã. David heʼi chupe: ‘“Emaʼẽmína, che aiko peteĩ óga ojejapóvape cédrogui ha Ñandejára árka katu oĩ peteĩ óga kárpa guýpe”. Upévo Natán heʼi pe rréipe: “Tereho katu ha ejapo opa mbaʼe oĩva nde pyʼapýpe, Ñandejára oĩ nendive”’ (2 Sam. 7:2, 3, ÑÑB).

Natán ningo peteĩ Jehová siérvo iñeʼẽrendúva, upévare ojepytaso mbarete David ykére omopuʼãsérõ guare peteĩ lugár oñemombaʼeguasu hag̃ua Ñandejárape ko yvy ape ári. Péro upérõ oiméne haʼe heʼi upe opensávante, noñeʼẽi Jehová rérape. Upe pyharépe Jehová heʼi chupe ogueraha hag̃ua pe rréipe peteĩ mensáhe: David nomopuʼãmoʼãi pe témplo, síno peteĩva itaʼýra apytégui. Ha heʼi avei chupe Ñandejára ojapoha hendive peteĩ kompromíso heʼihápe ‘opytataha iguapyhápe opa árare’ (2 Sam. 7:4-16).

Jahechaháicha, Natán opensáva pe témplo ñemopuʼã rehe idiferénte Ñandejára rembipotágui. Péro, ko proféta hekomirĩva ojekehaʼỹre oipytyvõ oiko hag̃ua Jehová rembipota.  Ñandejára ñandekorrehítaramo iporãta jasegi Natán ehémplo. Haʼe ningo osegivaʼekue oservi Ñandejárape profétaramo, upéva ohechauka Jehová akóinte oguerohory hague chupe. Ha oiméne Jehová voi ijespíritu rupive oipytyvõ chupe ha ‘Gádpe’ oiporavo hag̃ua cuatro mil músiko oservivaʼerã pe témplope David poguýpe (1 Cró. 23:1-5; 2 Cró. 29:25).

ODEFENDE PE RRÉIPE

Natán oikuaa oñemoĩvaʼerãha Salomónpe rréiramo David rendaguépe. Upévare, Adonías ojupisérõ guare rréiramo, Natán pyaʼe porã oavisa ojejoko hag̃ua upéva. Jepiveguáicha, ohechauka jey iñakãguapy ha ojepytasoha pe rréi ykére. Ñepyrũrã heʼi Bat-sébape omomanduʼa hag̃ua Davídpe opromete hague itaʼýra Salomón ojupitaha rréiramo. Upéi, haʼete voi oho pe rréi rendápe oporandu hag̃ua chupe heʼípa raʼe Adonías ojupitaha hendaguépe. Ohechakuaávo ijetuʼuha upe situasión, David heʼi Natánpe ha ambue hembiguái iñeʼẽrendúvape oiporavo hag̃ua Salomónpe ha omoĩ hag̃ua chupe rréiramo. Upéicha ndoikói Adonías ojaposevaʼekue (1 Rey. 1:5-53).

PETEĨ ISTORIADÓR HEKOMIRĨVA

Ojeʼe ningo Natán ha Gad ohai hague Primero de Samuel kapítulo 25 guive 31 peve ha Segundo de Samuel oñepyrũ guive opa peve. Umi istória ojehaívare espíritu sánto rupive koʼã lívrope, la Biblia heʼi: ‘David rekovekue, iñepyrũ guive opa peve, ohaivaʼekue Samuel, Natán ha Gad’ (1 Cró. 29:29). Ojeʼe avei Natán ohai hague “Salomón rembiapokue” (2 Cró. 9:29, ÑÑB). Upéva ohechauka oiméne hague osegi oservi pe rréi rógape David omano rire.

Umi mbaʼe jaikuaáva proféta Natángui oiméne haʼe voi ohairakaʼe. Péro ikatu avei ñaaprende chugui ndeʼíri rupi heta mbaʼe ijehe. Haʼe ningo ndoipotaivaʼekue oñemombaʼeguasu chupe. Peteĩ diksionário vívliko heʼi la Biblia “nomombeʼuiha mávapa ihentekuéra”. Ha ndajaikuaái avei hekovekuégui.

OPA MBAʼE OJAPO IÑEʼẼRENDU RUPI JEHOVÁPE

La Biblia ningo nomombeʼúi heta mbaʼe Natán rehe, péro jaikuaa porã haʼe iñumílde ha pyʼaguasúpe odefende hague Ñandejára rembipota, upévare Jehová omeʼẽ chupe heta tembiapo iñimportánteva. Natán iñeʼẽrenduvaʼekue Jehovápe ha ohayhu ipyʼaite guive iléi. Upévare iporãitéta jajepyʼamongetáramo koʼã mbaʼére ha ñañehaʼãmbaite jasegi iñehémplo.

Ñande ningo hasýta jakorrehi hag̃ua peteĩ rréipe térã jajoko oĩ jave oityséva peteĩ omandaguasúvape. Péro Jehová ñanepytyvõramo ikatúta ñaneñeʼẽrendu chupe ha jajapo haʼe heʼíva. Ikatúta avei ñamboʼe Iñeʼẽ ha ñadefende pyʼaguasúpe pe adorasión añeteguáva, péro avei pyʼaguapýpe.

[Nóta oĩva taʼanga ndive páhina 25]

Natán odefende pe rréipe oñeʼẽvo pyʼaguapýpe Bat-seba ndive