“Peẽ peikuaa mbaʼe árapepa jaiko ha og̃uahẽmaha [óra] japáyvo jakehágui.” (ROM. 13:11, JMP)

IKATÚPA REMYESAKÃ?

Mbaʼérepa tekotevẽte kristianokuéra akóinte oñatende porã ani hag̃ua oke?

Mbaʼérepa kristianokuéra ohendu ha ohechakuaavaʼerã mbaʼépa opensa umi hénte?

Mbaʼérepa ñanderoryvaʼerã japredika jave?

1, 2. Mbaʼérepa tekotevẽ opáy heta tapicha?

 KÁDA áño hetaiterei tapicha omano okevy térã okete haguére omaneha jave. Oĩ katu oñemosẽva itraváhogui opuʼã haguére tárde térã okégui ombaʼapohápe. Upéicha avei ndajajapóiramo Ñandejára rembipota haʼete ku jakéva, ha ikatuhína oiko ivaivéva ñanderehe. Upévare la Biblia heʼi: “Ovyʼaiténe opayhápe oikóva” (Rev. 16:14-16).

² Koʼág̃a hiʼag̃uimbaitémava Jehová ára guasu, jahecha hetaiterei tapicha ndojapoiha Ñandejára rembipota térã okehína. Heta omoakãva umi rrelihión heʼíva kristianoha ohechakuaa “ijovechakuéra” oketeha. Mbaʼérepa ojeʼe heta hénte oikoha okeháre? Mbaʼérepa umi kristiáno tee ndokeivaʼerã? Mbaʼéichapa ikatu ñaipytyvõ ñande rapichakuérape opáy hag̃ua?

MBAʼÉREPA OJEʼE HETA HÉNTE OIKOHA OKEHÁRE?

3. Mbaʼéichapa oiko umi ndojapóiva Ñandejára rembipota?

³ Jepive ningo umi okéva ndojapói mbaʼeve. Péro umi ndojapóiva Ñandejára rembipota térã oikóva okeháre, hembiapoiterei hikóni. Mbaʼérepa ojeʼe upéva? Haʼekuéra ojepyʼapyeterei ohupytységui opa mbaʼe oipotáva, térã oiko pláta ha vyʼarã rapykuéri ỹrõ oñemofamosose. Koʼãichagua hénte noñemotiempovéima oñemoag̃ui hag̃ua Ñandejárare. Péro umi kristiáno oñatende porãva ohechakuaa jaikoha umi “ára pahápe”, upévare opa ikatuháicha oiporu itiémpo ojapo hag̃ua Jehová rembipota (2 Ped. 3:3, 4; Luc. 21:34-36).

4. Mbaʼérepa ñahenduvaʼerã pe konsého heʼíva “Aníke japyta jakehápe umi ambue yvypóraicha”?

⁴ (Elee 1 Tesalonicenses 5:4-8.) Pablo heʼi umi kristiánope: “Aníke japyta jakehápe umi ambue yvypóraicha”. Mbaʼéichapa peteĩ kristiáno ikatu opyta oke?  Ikatu okehína ndoikóiramo Jehová ojerureháicha ha ndohechakuaáivo hiʼag̃uimbaitemaha pe ára Ñandejára ohunditaha umi heko añávape. Upéicharõ, ñañatendevaʼerã ani hag̃ua ñapensa térã jaiko umi tapicha naiñeʼẽrenduivaicha.

5. Mbaʼépa opensa umi tapicha oikóva okerõguáicha?

⁵ Heta tapicha opensa ndaiporiha Ñandejára ha ndojechamoʼãiha hendive hembiapokuére (Sal. 53:1). Ambue katu heʼi Ñandejára ndojepyʼapyiha yvypórare ha upévare natekotevẽiha oñemoag̃ui hese. Oĩ avei opensáva ikatunteha jaha oimeraẽ rrelihiónpe jaiko hag̃ua Ñandejára amígoramo. Umichagua hénte okehína ndojapói rupi Ñandejára rembipota ha tekotevẽ ñamombáy chupekuéra. Mbaʼéichapa ikatu ñaipytyvõ koʼãichaguápe?

ÑANDE VOI JAPÁY PORÃ VAʼERÃ

6. Mbaʼérepa peteĩ kristiáno oñehaʼãmbaitevaʼerã ani hag̃ua oke?

⁶ Ikatu hag̃uáicha ñamombáy umi héntepe, ñande voi japáy porã vaʼerã. La Biblia ohechauka umi okéva térã ndoikóiva Ñandejára oipotaháicha ojapoha umi mbaʼe ‘pytũmbypegua’. Umívape oike umi vyʼarã naiporãiva, ikaʼúva, hekovaíva, oñorairõséva, iselósova térã notĩriva hembiapo vai hag̃ua (elee Romanos 13:11-14). Jaikuaaháicha, koʼã mbaʼe ikatu ova ñanderehe, upévare tekotevẽ ñañatende porã. Pór ehémplo peteĩ omaneháva hopehýiramo ha osegínte omaneha upéicha, ikatu oñeaksidenta ha omano. Ajépa tekotevẽte opavave kristiáno ohechakuaa ndojapóiramo Jehová rembipota ikatuha oñehundi.

7. Mbaʼépa oikóta ñapensa vaíramo umi hénte ñande territoriopeguáre?

⁷ Pór ehémplo, peteĩ kristiáno ikatu opensa umi hénte iterritoriopegua nopenaiha pe marandu porãre (Pro. 6:10, 11). Ikatu voi heʼi: “Maʼerã rei piko añehaʼãta aipytyvõ chupekuéra ndaipóriramo ohendúva pe predikasión!”. Heta hénte ningo ndojapói Ñandejára rembipota, haʼete okevahína, péro ikatu okambia isituasión térã umi mbaʼe opensáva. Ha jaikuaaháicha oĩ gueteri heta opáyva ha ohendu porãva japredika jave. Umichaguápe ikatu ñaipytyvõ ñande voi japáy porãramo, pór ehémplo ñañehaʼãvo ñamombeʼu heta hendáicha pe marandu porã ogusta hag̃uáicha chupekuéra. Jaikóramo japáy porãháre jahechakuaáta avei mbaʼérepa tuichaite mbaʼe pe predikasión.

MBAʼÉREPA TUICHAITE MBAʼE PE PREDIKASIÓN?

8. Mbaʼérepa iñimportantete japredika?

⁸ Ñanemanduʼavaʼerã ñane rembiapo ombotuichaha Jehovápe ha tekotevẽha ojejapo oñekumpli hag̃ua hembipota, marãve ndoikói umi hénte nohenduséiramo pe predikasión. Koʼẽrõite Ñandejára okondenáta opavave ndojaposéivape hembipota. Mbaʼépa haʼe oiporúta ohusga hag̃ua chupekuéra? Ohecháta mbaʼépa ojapo hikuái ohendu rire pe marandu porã (2 Tes. 1:8, 9). La Biblia heʼíramo jepe “Ñandejára omoingove jeytaha umi hekojojáva ha hekojojaʼỹva”, ndovaléi ñapensa upe haguérente natekotevẽiha japredikaiterei (Hech. 24:15, NM). Ñandejára Ñeʼẽ heʼi umi hénte Jehová ombojojáva ‘kavaráre’ “oñehunditaha opa ára g̃uarã”. Péro Haʼe oiporiahuvereko yvyporakuérape ha predikasión rupive omeʼẽ oportunida opavavépe okambia hag̃ua ha “oikove opa ára g̃uarã” (Mat. 25:32, 41, 46, NM; Rom. 10:13-15). Ndajapredikáiramo, ñande rapichakuéra nohendumoʼãi pe marandu ikatúva osalva chupekuéra.

9. Mbaʼéichapa ñanepytyvõ ñandéve ha ambue tapichápe pe predikasión?

⁹ Ñandéve avei tuicha ñanepytyvõ japredika jave pe marandu porã (elee 1 Timoteo 4:16). Upéicha ñande jerovia imbareteve ha  jahayhuve Jehovápe ñañeʼẽvo hese ha Irréinore. Pe predikasión ñanepytyvõ jahechauka hag̃ua heta mbaʼe porã, umíva apytépe japorohayhuha kristiáno teéicha. Avei javyʼaiterei jaikuaávo ñamombaʼeguasuha Jehovápe ñamombeʼu jave pe marandu porã. Heta kristiáno omboʼéva la Biblia hapichakuérape, ovyʼaiterei ohechávo mbaʼéichapa Jehová espíritu oipytyvõ pe estudiántepe oiko porãve hag̃ua.

JAHECHAKUAAVAʼERÃ MBAʼÉPA OPENSA UMI ÑANERENDÚVA

10, 11. a) Mbaʼéichapa ojekuaa Jesús ha Pablo ohechakuaa hague umi hénte opensáva? b) Mbaʼépa jahechakuaavaʼerã japredika porãve hag̃ua?

¹⁰ Heta hendáicha ikatu ñamombeʼu pe marandu porã opoko hag̃ua ñande rapichakuéra korasõre. Upévare ñañehaʼãvaʼerã jahechakuaa mbaʼépa opensa umi ñanerendúva ha mbaʼépa og̃uahẽvéta chupekuéra. Jesús ohechauka mbaʼéichapa ikatu jajapo upéva. Haʼe ningo perfékto ha ohechakuaa pe ojapóva ndogustái hague peteĩ fariséope, ohechakuaa avei peteĩ kuña rekovai oñembyasyha ipyʼaite guive ha mbaʼeichaitépa ipojera peteĩ viúda imboriahumíva (Luc. 7:37-50; 21:1-4). Jesús oikuaágui umi hénte orekóva ipyʼapýpe, oipytyvõ chupekuéra oñemoag̃ui hag̃ua Ñandejárare. Péro natekotevẽi ñandeperfékto jahechakuaa hag̃ua mbaʼépa oikotevẽ umi hénte. Pór ehémplo, Pablo opredikavaʼekue opaichagua tapichápe ha oñeʼẽ umi mbaʼe ogustávare chupekuéra ikatu hag̃uáicha ojapysaka hese hikuái (Hech. 17:22, 23, 34; 1 Cor. 9:19-23).

¹¹ Jesús ha Pablo ojapo haguéicha, ñañehaʼãvaʼerã jahechakuaa mbaʼépa opensa umi ñanerendúva, upéicha jajuhúta peteĩ mbaʼe ohendusétava hikuái. Pór ehémplo, ñañeʼẽ jave peteĩ tapicha ndive, ñañatendevaʼerã jahechakuaa hag̃ua moõguápa, mbaʼépa oipyʼapy chupe, térã mbaʼéichapa oĩ ifamília. Avei ñañepyrũ hag̃ua ñañemongeta hendive, ikatu ñañatende mbaʼépa ojapohína ha jaguerohory chupe hembiapóre.

12. Mbaʼe mbaʼérepa ñañatendevaʼerã ñasẽ jave predikasiónpe?

¹² Peteĩ oñatende porãva oñehaʼãmbaite ani hag̃ua ojesareko ambue mbaʼére. Pór ehémplo, ñasẽ jave japredika, igústo jepi ñañemongeta ñane irũndi, péro ndovaléi peichahárupi ñanderesarái ñasẽha ñañeʼẽ hag̃ua umi héntendi (Ecl. 3:1, 7). Upévare ñañatendevaʼerã ani ñañeʼẽterei rupi ñane irũ ndive ñanembegue jahasa hag̃ua ótro ógape. Iporãvéta ñañemongeta mbaʼe rehépa ñañeʼẽse umi ñanerendu porãvape, upéva ñanepytyvõta jajesareko porã hag̃ua ñane rembiapóre. Avei pe teléfono ikatu ideprovécho predikasiónpe, péro ñañatendevaʼerã ani ipu ñañeʼẽ jave umi héntendi.

JAHECHAUKAVAʼERÃ JAJEPYʼAPYHA UMI HÉNTERE

13, 14. a) Mbaʼéichapa ikatu jaikuaa ñande rapichápe oipyʼapýva? b) Mbaʼépa jajapokuaa peteĩ tapicha oikuaaseve hag̃ua Ñandejárape?

¹³ Umi maranduhára oñatende porãva ohendukuaa umi héntepe. Mbaʼépa ikatu ñaporandu peteĩ tapichápe jaikuaa hag̃ua opensáva? Oipyʼapýpa chupe umi mbaʼe vaieta oikóva hóga jerére, umi goviérno nopenáiva hetãyguáre, térã oĩ haguére heta rrelihión? Mbaʼépa ikatu jaʼe chupe oikuaaseve hag̃ua Ñandejárape? Ikatúpa ñañeʼẽ Ñandejára rembiapokue porãita oikovévare, térã jahechauka chupe mbaʼéichapa la Biblia ñanepytyvõ? Heta tapicha, umi ndogueroviáiva oĩha Ñandejára jepe, oñeporandu heta mbaʼe pe ñemboʼégui ha oikuaase oĩnepa ohendúva chupekuéra. Ambue katu opensa ohendúnepa Ñandejára opaichagua ñemboʼe, térã mbaʼépa ojapovaʼerã ohendu hag̃ua chupe.

 ¹⁴ Mbaʼéichapa ikatu ñandevaleve ñañepyrũ hag̃ua ñañemongeta ñande rapicha ndive? Ñañatendevaʼerã mbaʼéichapa ambue ermáno ikatupyryvéva oñepyrũ opredika. Jajapysaka porã mbaʼéichapa ombaʼeporandu ani hag̃ua oporomoñeñandu vai, térã ani hag̃ua oñepensa iñentremetidoha. Ñañatende mbaʼéichapa ojekuaa hováre ha iñeʼẽre oikuaaseha mbaʼépa oipyʼapy umi héntepe (Pro. 15:13).

ÑANDERORY HA JAIKEKUAAVAʼERÃ

15. Mbaʼérepa ñanderoryvaʼerã japredika jave?

¹⁵ Ndegustánepa oĩramo nemombáyva reke porãve jave? Ndaipóri ipochyʼỹva oñemombáy vaipáramo chupe, upévare hetápe ogustave oñeatõi vevyimínterõ opáy hag̃ua. Umi hénte ndojapóiva Ñandejára rembipota haʼete okéva ha upévare mbeguekatumínte ñamombayvaʼerã chupekuéra. Pór ehémplo, mbaʼépa jajapovaʼerã oĩramo ipochýva ñag̃uahẽ haguére hógape japredika hag̃ua? Ñañehaʼãvaʼerã ñantende mbaʼérepa oñeñandu upéicha, jaagradese chupe heʼi haguére ñandéve opensáva ha pyʼaguapýpe porãnte jaha upégui (Pro. 15:1; 17:14; 2 Tim. 2:24). Jajapóramo upéicha, ág̃a ótrope ikatu oñatende porãma ambue Testígore.

16, 17. Mbaʼéichapa ikatu ñanembaʼerechakuaa japredika jave?

¹⁶ Sapyʼánte tekotevẽta jaikekuaa umi nañanerenduséivape. Oĩ jepi noñeʼẽséiva ñanendive ha heʼi: “No, grásiante, che areko voi che rrelihión”, térã: “No, ndaikuaaséi mbaʼeve upévagui”. Péro ñanderory ha ñandekatupyrýramo, ñaporandúta chupe umi mbaʼe oikuaasétava. Péicha jaikekuaáramo, saʼi saʼípe ohendusevétama pe marandu porã (elee Colosenses 4:6).

¹⁷ Oĩramo heʼíva hembiapoitereiha, sapyʼánte iporãvéta jahejánte chupe. Péro ikatu avei ñañeʼẽ mbykymi ha jaʼe peteĩ mbaʼe omopensátava pe óga járape. Oĩ ermáno, un minúto mboyve, oleémava peteĩ téysto ha oporandu pe óga járape peteĩ mbaʼe ombohovái hag̃ua ótro ohóvape. Sapyʼánte, pe óga jára ikyreʼỹve opyta hag̃ua ohendu chupe heʼi rupi umi mbaʼe hendaitépe. Jajapókena avei upéicha tekotevẽ jave.

18. Mbaʼéichapa japredika porãvéta jaikohárupi?

¹⁸ Káda día ñañeʼẽ jepi heta tapichándi pe jaikohárupi, upévare jajeprepara porãramo ikatúta japredika chupekuéra. Heta ermáno ogueraha ivolsíllo térã ikartérape umi puvlikasión, ha oikuaáma voi mbaʼe téystopa oleéta ija vove. Avei ñaporandukuaa pe superintendénte de servísio ha umi prekursórpe mbaʼépa iporãve jajapo ñañemongetakuaave hag̃ua ñande rapichakuérandi.

ÑAMOMBAYKUAÁKENA ÑANE HENTEKUÉRAPE

19. Mbaʼérepa nañanekaneʼõivaʼerã japredika hag̃ua ñane hentekuérape?

¹⁹ Katuete ningo jaipota ñane hentekuéra oguerohory avei pe marandu porã  (Jos. 2:13; Hech. 10:24, 48; 16:31, 32). Péro ikatu ñepyrũrã nañanerenduséi ha ndajapredikasevéima chupekuéra ñapenságui nokambiaveimaha hikuái. Péro ikatuhína ohasa peteĩ mbaʼe opokoitereíva hesekuéra ha okambia upe rire. Ikatu avei koʼág̃a ñanerendúma ñamyesakãkuaave rupi heta mbaʼe la Bíbliagui.

20. Mbaʼéichapa japredikavaʼerã ñane hentekuérape?

²⁰ Ñande ñañehaʼãvaʼerã ñantende ñane hentekuéra oñandúva (Rom. 2:4). Ñañeʼẽ chupekuéra torýpe jajapoháicha japredika jave ambue héntepe. Avei ñandepyʼaporã ha ñamombaʼevaʼerã chupekuéra. Jahechauka mbaʼeichaitépa Ñandejára Ñeʼẽ ñanepytyvõ, péro ani jadiskursea jajapo jave upéva (Efe. 4:23, 24). Tohechakuaa hikuái Jehová ñanerekomboʼe porãha, upéicha rupi jajehekyiha heta mbaʼe vaígui ha jaiko porãha jaservi rupi chupe (Isa. 48:17). Tojekuaa jaikoha kristiáno teéicha.

21, 22. Emombeʼu peteĩ ermána rembiasakue ohechaukáva nañanekaneʼõivaʼerãha japredika hag̃ua ñane hentekuérape.

²¹ Ndaʼaréi peteĩ ermána ohai: “Areko 13 ermáno ha akóinte añehaʼã apredika chupekuéra, tahaʼe umi mbaʼe ajapóva térã haʼéva rupive. Káda áño ahai jepi kárta enterovépe. Upéicharõ jepe, 30 áñore, che família apytépe che añoite aservi Jehovápe”.

²² Haʼe heʼi: “Peteĩ árape ahenói peteĩ che ermánape oikóva mombyry che aĩhágui, ha omombeʼu chéve ojerure hague ipastórpe omboʼe hag̃ua chupe la Biblia, péro nopenái hese. Upémarõ añekuãveʼẽ amboʼe hag̃ua chupe, ha heʼi chéve: ‘Oĩ porã, péro ani reimoʼã aiketaha ne rrelihiónpe’. Aguerahauka chupe lívro Mbaʼépa añetehápe omboʼe la Biblia?, péro haʼe ni nomañái hese. Upéicharõ jepe pyʼỹinte ahenói hógape roñemongeta hag̃ua. Upéi peteĩ árape ajerure chupe ogueru hag̃ua ilívro ha rohesaʼỹijo 15 minúto aja, avei rolee umi téysto oĩva pype. Péicha roho hese ha amo ipahápe arevéma rostudia. Upe rire haʼéma cherenói, sapyʼánte apuʼã mboyve voi, térã dos vése un díape rostudia hag̃ua. Pe ótro áño g̃uarã ojevautisáma ha un áño haguépe oiko chugui prekursóra”.

23. Mbaʼérepa japredika meme vaʼerã umi héntepe ikatu hag̃uáicha opáy?

²³ Jahecha haguéicha, tekotevẽ ñañehaʼã meme ñamombaykuaa hag̃ua umi héntepe ikatu hag̃uáicha ojapo Ñandejára rembipota. Oĩ gueteri heta tapicha ipyʼaporãva ha oguerohorýva pe marandu porã. Pór ehémplo, káda més 20.000 rasa oĩ ojevautisáva. Upévare ñahenduvaʼerã ko konsého Pablo omeʼẽvaʼekue peteĩ kristiánope, hérava Arquipo: “Eñehaʼã ejapo porã pe oñemeʼẽvaʼekue ndéve rejapo hag̃ua Ñandejára rérape” (Col. 4:17). Pe artíkulo oúva ñanepytyvõta ñantende porã hag̃ua mbaʼépa heʼise japredika japerdeʼỹre tiémpo.

[Porandu ñahesaʼỹijóva]

[Rrekuádro oĩva páhina 13-pe]

MBAʼÉPA ÑANEPYTYVÕTA ANI HAG̃UA JAKE

▪ Ñambaʼapo meme Jehová servísiope

▪ Jajehekýi umi mbaʼe ojejapóvagui ‘pytũmbýpe’

▪ Jahechakuaa nañañatendéirõ ikatuha ñande avei jake

▪ Ñapensa umi hénte ikatuha gueteri okambia

▪ Ñañehaʼã japredika heta hendáicha

▪ Ñanemanduʼa iñimportantetereiha pe predikasión