“Pe arádo ojagarráva ha upéi omañáva hapykue gotyo, ndaikatúi oike Ñandejára Rréinope.” (LUC. 9:62, NM)

MBAʼÉPA REMBOHOVÁITA?

Mbaʼérepa ñanemanduʼavaʼerã Lot rembireko rehe?

Emombeʼu mbohapy mbaʼe tekotevẽva ñanderesarái.

Mbaʼéichapa jajapo opa mbaʼe Jehová organisasión heʼiháicha?

1. Mbaʼe konséhopa omeʼẽvaʼekue Jesús, ha mbaʼépa omboʼeséraʼe upérõ?

 “PENEMANDUʼÁKE Lot rembirekóre.” (Luc. 17:32, NM.) Ojapóma haimete 2000 áño Jesucristo omeʼẽ hague ko konsého, péro umi mbaʼe heʼivaʼekue iñimportantevéntema koʼág̃a rupi. Mbaʼe rehépa haʼe oñeʼẽraʼe upérõ? Umi hudío ohendúva chupe ontende porã vaʼekue mbaʼépa omboʼese. Haʼekuéra oikuaa Sodóma oñehundítarõ guare, ko kuñakarai osẽ hague iména ha umi mokõi imembykuña ndive upe távagui. Péro haʼe naiñeʼẽrendúigui omaña hapykue gotyo ha oiko chugui peteĩ estátua jukyguigua (elee Génesis 19:17, 26).

2. Mbaʼérepa Lot rembireko ojeréraʼe omaña hapykue gotyo, ha mbaʼépa oiko hese upévare?

² Mbaʼérepa Lot rembireko ojeréraʼe omaña hapykue gotyo? Ikatu oime ohechaségui reínte pe oikóva, ijerovia kangýgui, térã ombyasy rupi umi mbaʼe ohejavaʼekue upe távape (Luc. 17:31). Tahaʼe haʼeháicha, omano naiñeʼẽrendúi haguére. Epensamíntena!, haʼe omano umi Sodoma ha Gomorraygua oñehundiha árape avei! Ndareíri ningo Jesús heʼi: “Penemanduʼáke Lot rembirekóre.”

3. Mbaʼéichapa Jesús omboʼe ndovaleiha ñamaña umi mbaʼe jahejávare tapykue gotyo?

³ Ko tiémpope avei kristianokuéra nomañaivaʼerã umi mbaʼe ohejávare tapykuépe. Jesús omboʼékuri upéva peteĩ kuimbaʼe oporandúrõ guare chupe ikatúpa oho ojedespedi raẽ ihentekuéragui ha upéi omoirũ hag̃ua chupe. Haʼe ombohovái: “Pe arádo ojagarráva ha upéi omañáva hapykue gotyo, ndaikatúi oike Ñandejára Rréinope” (Luc. 9:62). Ikatúpa jaʼe Jesús ijarhél ha ojopyetereimaha hendive? Nahániri. Haʼe oikuaa porã pe kuimbaʼe ndojaposéinte hague oñehaʼarõva chugui  ha heʼi guaʼu ohoseha ojedespedi raẽ hogayguakuéragui. Upévare Jesús ombojoja chupe peteĩ chokokue rehe “omañáva hapykue gotyo”. Mbaʼépa oikóne peteĩ oaráva omañáramo hapykue gotyo, térã opoíramo ijarádogui sapyʼaitemi jepe ojere hag̃ua ojesareko ambue mbaʼére? Ojapóramo upéicha, ojekuaáta noñatendeiha hembiapóre ha ikatu ombyaipaite itravahokue.

4. Mbaʼe rehépa jajesarekovaʼerã?

⁴ Jaiko rangue ñapensaiterei umi mbaʼe jahejavaʼekuére, iporãve hína jajesareko umi mbaʼe oĩvare tenonderãme. Ñandejára Ñeʼẽ heʼi porã voi: “Umi nde resa omaña porã vaʼerã tenonde gotyo, nde resa ojesarekovaʼerã oĩvare ne renondépe” (Pro. 4:25, NM).

5. Mbaʼérepa ndovaléi ñamaña umi mbaʼe jahejávare tapykuépe?

⁵ Mbaʼérepa kristianokuéra ndovaléi ñamaña umi mbaʼe jahejavaʼekuére? Jaiko rupi “umi ára pahápe” (2 Tim. 3:1, NM). Jaikuaaháicha, Ñandejára nohundimoʼãi koʼág̃a mokõi távante, ojapo haguéicha yma, síno ohundipaitéta ko múndo aña. Mbaʼépa jajapovaʼerã ani hag̃ua oiko ñanderehe Lot rembirekóre oikovaʼekue? Ñepyrũrã jahechakuaavaʼerã mbaʼe mbaʼépa umi jahejavaʼekue apytégui ikatu ñandepyʼaraʼã ñamaña jey hag̃ua tapykue gotyo (2 Cor. 2:11). Ñahesaʼỹijomína mbohapy mbaʼe ikatúva ñambyasy ha mbaʼépa jajapokuaa ani hag̃ua ñamaña jey hese.

JAHECHAGAʼU YMA GUARE

6. Mbaʼérepa ojapo vaíta ñanderehe ñapensaitereíramo umi mbaʼe jahejavaʼekuére?

⁶ Jaikórõ ñapensaiterei umi mbaʼe jahejavaʼekuére, ojapo vaíta ñanderehe. Mbaʼérepa? Ikatu ñaimoʼã vyroreínte hague umi provléma jahasavaʼekue ha ñambotuichaiterei umi mbaʼe porã. Avei jaikóramo ñambojere ñaneakãme koʼã mbaʼe jahejavaʼekue, katuete jahechagaʼu jeýta. Péro Ñandejára Ñeʼẽ heʼi porã ñandéve: “Arakaʼeve ani reporandu: ‘Mbaʼéicha rupípa umi ára yma guare iporãve koʼag̃aguágui?’. Koʼãichagua porandu naheñóiri peteĩ iñarandúva pyʼapýgui” (Ecl. 7:10, ÑÑB). Mbaʼérepa naiporãi jahechagaʼueterei umi mbaʼe yma guare?

7-9. a) Mbaʼépa ohasavaʼekue umi isrraelíta Egíptope? b) Mbaʼépa ombovyʼavaʼerãkuri chupekuéra? c) Mbaʼérepa ojeplagea umi isrraelíta?

⁷ Ñapensamína mbaʼépa oikorakaʼe umi isrraelítare Moisés tiémpope. Ñepyrũrã umi Egiptoygua otrata porã chupekuéra mbohupáicha. Péro upéi José omano rire, umi ehípsio ‘omoĩ héfe Israelgua ári, ojopy hag̃ua hendivekuéra opaichagua tembiapo pohýipe’ (Éxo. 1:11). Avei faraón ojukauka hetaiterei mitã ani hag̃ua umi isrraelíta heta hetave (Éxo. 1:15, 16, 22). Ohasa asyetereígui hikuái upépe, Jehová heʼi Moiséspe: “Ahecha oiko asyha che retãyguakuéra Egíptope. Ahendu ipyahẽ júgo pohýi guýpe, ahechapaite hembiasa asy” (Éxo. 3:7).

⁸ Ñapensamíntena mbaʼeichaitépa oiméne ovyʼajoa hikuái oñemosãsórõ guare chupekuéra Egipto poguýgui. Ñepyrũrã Jehová ohechauka mbaʼeichaitépa ipuʼaka omboúvo umi diez plága pe faraón ñañaite ha hetãyguakuéra ári (elee Éxodo 6:1, 6, 7). Upéi katu umi ehípsio ojerure voi chupekuéra osẽ hag̃ua hetãgui, ha hiʼarive omeʼẽ umi isrraelítape hetaiterei óro ha pláta. Ñandejára Ñeʼẽ heʼi haʼekuéra ‘omoperõ hague umi Egiptoyguápe’ (Éxo. 12:33-36). Upe rire tuicha  ipyʼaguapy hikuái ohechávo mbaʼéichapa faraón ha isoldadokuéra omanomba pe már Rójope (Éxo. 14:30, 31). Katuete koʼã mbaʼe ohechavaʼekue oipytyvõ chupekuéra omombarete hag̃ua ijerovia.

⁹ Upévare ni ndajagueroviaséi mbaʼéichapa ohecha riremi hikuái umi milágro oñepyrũ jeýma ojeplagea tembiʼúre. Noñekontentái Jehová omeʼẽvare chupekuéra, upéicha rupi heʼi: ‘Jahechagaʼuetéma piko pe Egipto! Pépe jaʼuvaʼekue pira jaʼuseháicha, avei pepíno, sandía, puérro, sevói ha áho. Koʼápe katu ñamanóta ñembyahýigui ha ndaipóri mbaʼeve jaʼu hag̃ua ndahaʼéiramo pe maná’ (Núm. 11:5, 6). Haʼekuéra ndohechái pe orekóva henondépe, upévare ohose jey upe lugár ohasa asyete haguépe hikuái tembiguáiramo (Núm. 14:2-4). Ha opensaitereígui umi mbaʼe ohejavaʼekuére, Jehová omboyke chupekuéra (Núm. 11:10).

10. Mbaʼépa ñaaprende umi isrraelíta rembiasakuégui?

¹⁰ Mbaʼépa ñaaprende koʼã isrraelíta rembiasakuégui? Jahasa jave umi provlémare, ndovaléi ñapensa ymave ñaime porãve hague, koʼýte oimérire upérõ ndajaikuaái gueteri Jehovápe. Ndaivaíri ningo jajepyʼamongeta umi mbaʼe jajavyvaʼekuére ani hag̃ua jaʼa jey pype. Avei ndaivaíri ñanemanduʼa opa mbaʼe porã jahasavaʼekuére. Péro ñañehaʼãvaʼerã jahecha hendápe porãnte koʼã mbaʼe. Ndajajapóiramo upéicha, jaikose jeýta ymave guaréicha ha ndajavyʼamoʼãi umi mbaʼe jahasáva térã jarekóvare koʼág̃a (elee 2 Pedro 2:20-22).

UMI MBAʼE JAHEJAVAʼEKUE

11. Mbaʼépa opensa heta ermáno umi mbaʼe ohejavaʼekuére?

¹¹ Ñambyasýramo jepe, oĩ ermáno ha ermána opensáva oheja reiete hague heta mbaʼe ojaposéva térã orekóva. Oĩvaʼekue ikatúva osegi umi estúdio ijyvatevéva, ohupyty puésto iñimportánteva térã ombaʼapo porã ha ogana heta, péro odesidi ohejánte koʼã mbaʼe. Oĩ avei heta omboykevaʼekue umi mbaʼe ombopláta hetátava chupe, pór ehémplo depórte, negósio, profesión térã ikatúkuri oñemofamóso. Péro ohechávo ohasamaha heta tiémpo ha noñehundíri gueteri ko múndo aña, oñepyrũ opensa hikuái umi mbaʼe ohejavaʼekuére ha oñeporandu: “Mbaʼépa oikomavaʼerãmoʼã chehegui ndahejái rire koʼã mbaʼe?”.

12. Mbaʼéichapa ohecha Pablo umi mbaʼe ohejavaʼekue?

¹² Oiméne ñanemanduʼa apóstol Pablo oheja hague heta mbaʼe omoirũ hag̃ua Crístope (Fili. 3:4-6). Opytápa haʼe oñembyasy ojapo haguére upéva? Haʼete ombohovái: ‘Opa koʼã mbaʼe ambotuichavaʼekue yma, koʼág̃a ndajapói mbaʼevéramo Cristo mborayhu rehehápe. Ha oimeraẽ mbaʼe [...] ndajapói mbaʼevetéramo ambojojátarõ umi mbaʼe tuichaitére ajúva aikuaa Cristo Jesúsgui. Hesehápe ahejapa opa umi mbaʼe ha areko ytýramo a aime porãma guive Cristo ndive’ (Fili. 3:7, 8, BNP). Jaikuaaháicha, avave nañambyasymoʼãi peteĩ yty vosa ñamombomavaʼekue. Péicha avei Pablo nombyasyiete omboyke haguére umi mbaʼe  ko múndo oikuaveʼẽva. Chupe g̃uarã umíva ndovaléi mbaʼeverã.

13, 14. Mbaʼéichapa ikatu ñahaʼanga pe apóstol Páblope?

¹³ Jahechakuaáramo ñañepyrũha ñapensaiterei umi mbaʼe “jahejavaʼekuére”, jasegivaʼerã apóstol Pablo ehémplo. Mbaʼéichapa jajapóta upéva? Ñamombaʼevaʼerã umi mbaʼe jarekóva koʼág̃a. Tuichaiterei mbaʼe ningo ñaneñeʼẽrendu Jehovápe ha akóinte ñaime porã hendive (Heb. 6:10). Hiʼarive ndaipóri mbaʼeve ko múndope ikatúva oñembojoja umi mbaʼe porãita koʼág̃a jahupytývare jaservi haguére Jehovápe ha umi jahupytýtava amo gotyove (elee Marcos 10:28-30).

¹⁴ Mbaʼépa ñanepytyvõta akóinte jaservi hag̃ua Jehovápe hekopete? Umi versíkulo oĩvape upe rire, Pablo heʼi mbaʼépa oipytyvõvaʼekue chupe: “Añembyesarái pe tapykuépe opytávagui ha añehaʼã ahupyty pe che renondépe oĩva” (Fili. 3:13). Ko apóstol ohechauka mokõi mbaʼe tekotevẽtereíva jajapo. Primero, ñañembyesarái umi mbaʼe jahejávagui tapykuépe, jaiko rangue japerde tiémpo ha japyta ñanekangy ñapensaitereígui ymave guarére. Segundo, ‘ñañehaʼã’ umi mbaʼe jahupytysévare, ku ñaimerõguáicha peteĩ karrérape ha jajepysopaite jahasa hag̃ua pe línea oĩva huʼãme.

15. Mbaʼéichapa ñanepytyvõ jajepyʼamongetáramo Jehová rembiguaikuéra iñeʼẽrendúva ehémplore?

¹⁵ Umi mbaʼe ohasavaʼekue Ñandejára rembiguaikuéra, tahaʼe yma guare térã koʼag̃agua, ikatu ñanepytyvõ ani hag̃ua ñamaña umi mbaʼe jahejavaʼekuére. Ñanemanduʼamína Abrahán ha Sara rehe. Haʼekuéra oiko porãiterei vaʼekue táva Úrpe ha oheja heta mbaʼe. La Biblia heʼi: ‘Imanduʼánterire hikuái upe hetãre ikatuvaʼerãmoʼã ojevy’ (Heb. 11:13-15, BNP). Péro haʼekuéra ndojapói upéva. Ñanemanduʼakuaa avei Moisés rehe. Haʼe osẽrõ guare Egíptogui primera vés, ohejavaʼekue hetaiteve mbaʼe oimeraẽ isrraelíta ikatuvaʼerãgui oheja upéi. Péro la Biblia ni peteĩ hendápe ndeʼíri haʼe ombyasy hague umíva. Haʼe “omombaʼeve opa mbaʼe ijetuʼúva ohasáva Ñandejára rembiporavo, oguereko rangue umi mbaʼeta Egiptopegua”. Mbaʼéicha rupípa upéva? “Ojesareko porãgui pe prémiore” (Heb. 11:26, NM).

UMI MBAʼE ÑANEMBOHASA ASY VAʼEKUE

16. Mbaʼéichapa ikatu ñañeñandu ñapensaitereíramo umi mbaʼe jahasavaʼekuére?

¹⁶ Jaikuaaháicha, opavave jahasa heta mbaʼe porã, péro upéicha avei oĩ heta mbaʼe ni nañanemanduʼasevéimava. Pór ehémplo, ikatu oime ñandestorva peteĩ mbaʼe vai jajapovaʼekue yma (Sal. 51:3). Térã ñandepochy oĩgui ñandekorrehíva (Heb. 12:11). Ikatu avei ñapensa ojejapo hague ñanderehe peteĩ mbaʼe hendapeʼỹ ha nañanderesaráiri upévagui (Sal. 55:2). Tahaʼe haʼeháicha, mbaʼépa jajapovaʼerã ani hag̃ua ñanemanduʼaiterei umi mbaʼére? Jahechamína mbohapy mbaʼe ikatuvaʼekue oiko ñanderehe.

17. a) Mbaʼérepa Pablo heʼi ‘michĩveha umi imichĩvéva apytégui’? b) Mbaʼépa oipytyvõ Páblope ani hag̃ua oiko oñembyasy umi mbaʼe vai ojapovaʼekuére?

¹⁷ Jajapo vai vaʼekue. Apóstol Pablo heʼi: “Che niko chemichĩve umi imichĩvéva apytégui, opa umi [Ñandejára] rehe ojeroviávagui” (Efe. 3:8). Mbaʼérepa heʼi upéicha? Haʼe omombeʼu: ‘Apersegi haguére Ñandejára  kongregasión’ (1 Cor. 15:9). Ñapensamíntena mbaʼeichaitépa oiméne oñeñandurakaʼe ojotopa jave peteĩ ermáno omaltratavaʼekue ndive. Upéicharõ jepe haʼe ndohejái koʼã mbaʼe omoñembyasy térã omoñeñandu vai chupe. Upéva rangue opensa meme mbaʼeichaitépa Ñandejára imbaʼeporã hendive (1 Tim. 1:12-16). Ha ojapóvo kyreʼỹme pe tembiapo oñemeʼẽva chupe, ohechauka oagradeseha Jehovápe upévare. Haʼe oñehaʼãmbaite hesarái umi mbaʼe vai ojapovaʼekuégui. Ñañehaʼãkena avei ñande jajapo upéicha! Heta mbaʼe jajapovaʼekue ndaikatuvéima ñakambia, péro ñapensavaʼerã Ñandejára imbaʼeporãha ñanendive ha ani jaheja umi mbaʼe vai jajapovaʼekue ñanembohasa asy. Upéicharõmante avei ikatúta ñañemeʼẽmbaite Jehová servísiope.

18. a) Mbaʼépa oikóta ñanderehe ñandepochýramo umi konsého oñemeʼẽvare ñandéve? b) Mbaʼéichapa jajapóta Salomón heʼivaʼekue?

¹⁸ Oĩ jave ñandekorrehíva. Sapyʼánte ikatu ñandepochy oĩ haguére oñemoñeʼẽ mbaretéva ñandéve ha ndaikatúi ñanderesarái upévagui. Péro jaikóramo ñapensaiterei hese, katuete hasýta ñandéve, ‘ñanemokangýta’ ha ikatu ñaimoʼã ndajavaleiha (Heb. 12:5). Nañahenduséiramo pe konsého, térã ñahendu ñepyrũrã ha upéi ‘ñanekangýgui’ ndajajapovéiramo ojeʼéva ñandéve, nañanepytyvõmoʼãi mbaʼevetépe. Upévare iporãve jajapo Salomón heʼivaʼekue: “Aníke repiátei che [konséhogui], aníke umíva reheja reítei; ejapopa uvei hekoitépe, upéva rupi reikovereína” (Pro. 4:13,ÑÑB). Jajapovaʼerã umi chofér ikatupyrýva ojapoháicha ohechávo umi señál oĩva tapére: Ohechakuaa oĩ porãha, ojapo upépe heʼiháicha ha osegi hape (Pro. 4:26, 27; elee Hebreos 12:12, 13).

19. Mbaʼéichapa ikatu ñahaʼanga Habacuc ha Jeremíaspe?

¹⁹ Ojejapo ñanderehe peteĩ mbaʼe hendapeʼỹ. Oiméramo oiko upéva ñanderehe, térã ñapensa upeichaha, ikatu ñañeñandu Habacuc oñeñandu haguéicha. Haʼe ojeplagea Jehovápe nontendéi rupi mbaʼérepa oheja oiko hetaite mbaʼe vai (Hab. 1:2, 3). Ha ñande, mbaʼépa jajapovaʼerã upéicha jave? Tekotevẽ jajerovia ko profétaicha. Haʼe omombeʼu mbaʼéichapa oñeñandu upéi: “Avyʼaitereíta aĩ rupi Jehovándi. Vyʼágui cherenyhẽta Ñandejára chesalváta haguére” (Hab. 3:18, NM). Avei jajapovaʼerã proféta Jeremías ojapo haguéicha. Haʼe ningo ojeroviavaʼekue Jehováre ha ‘ohaʼarõkuaa’. Jaikuaaháicha Ñandejára hekojoja ha katuete osolusionáta hekopete ha hiʼoraitépe opa mbaʼe. Upévare, jajeroviákena hese ñande pyʼaite guive (Lam. 3:19-24, ÑÑB).

20. Mbaʼéichapa jasegíta pe konsého Jesús omeʼẽvaʼekue?

²⁰ Koʼág̃a ñaimeñaína peteĩ tiémpo iñimportántevape. Oiko hína heta mbaʼe ndojehecháiva gueteri arakaʼeve ha hetave mbaʼe ñaneraʼarõ. Upévare tekotevẽterei jajapo opa mbaʼe Jehová organisasión heʼihaichaite. Mbaʼéichapa jajapokuaa upéva? Nañamañaivaʼerã umi mbaʼe jahejávare tapykuépe, upéva rangue ñahenduvaʼerã umi konsého oĩva la Bíbliape ha akóinte jajesareko tenonderã gotyo. Péicha jasegíta pe konsého iñimportantetéva Jesús omeʼẽvaʼekue: “Penemanduʼáke Lot rembirekóre”.

[Nóta]

[Porandu ñahesaʼỹijóva]