Ojejerurémavapa ndéve konsého? Pór ehémplo, ojeʼémavapa ndéve: “Mbaʼe piko ikatu ajapomi?”, “Iporãta piko aháramo ko fiéstape?”, “Astudiavaʼerã piko universidápe?”, “Iporãta piko asẽramo ko kariaʼy térã mitãkuñándi?”.

Ikatuhína oĩ ojeruréva ndéve reipytyvõ hag̃ua chupe odesidi hag̃ua peteĩ mbaʼe, ikatúva omoĩ porã térã omoĩ vai chupe iñamígo, ihentekuéra térã Jehová renondépe. Mbaʼépa rejapóta umícha jave? Mbaʼéichapa reñemoñeʼẽ jepi nde rapichápe? Tahaʼe haʼéva upe mbaʼe oikuaaséva, rejapovaʼerã Proverbios 15:28 heʼíva: ‘Hekojojáva ojepyʼamongeta raẽ ombohovái hag̃ua’. Jahechamína cinco konsého omeʼẽva la Biblia ha ikatútava nepytyvõ reñemoñeʼẽta jave.

1 Reikuaa porã raẽ vaʼerã mbaʼépa la oikóva

“Upe ombohováiva ojapysaka porã mboyve itavy, ha katuete oñemotĩvaʼerã.” (PRO. 18:13, ÑÑB)

Reñemoñeʼẽ hag̃ua hekoitépe reikuaa porã raẽ vaʼerã mbaʼe situasiónpepa oĩ upe ojeruréva ndéve konsého ha mbaʼépa opensa. Epensamína ko ehémplore: ñamoĩ chupe peteĩ nde rapicha nerenoiha pór teléfono ha oporandu ndéve mbaʼe tapépa ojagarravaʼerã og̃uahẽ hag̃ua nde rógape. Mbaʼépa reikuaa raẽ vaʼerã reipytyvõ hag̃ua chupe? Ikatútapa ere chupe mbaʼe tapépa ou porãvéta chupe ndereikuaáiramo moõitépa oĩ? Ndaikatumoʼãi ningo. Upéicha avei, reñemoñeʼẽta jave nde rapichápe tekotevẽ reikuaa raẽ “moõitépa oĩ”, térã, mbaʼe situasiónpepa oĩ ha mbaʼépa opensa upévare. Odependehína umi mbaʼe heʼívare rembohovái hag̃ua chupe. Ndereikuaaporãiramo upe oikóva, ikatu rehesareave nde rapichápe, reipytyvõ rangue chupe (Luc. 6:39).

Reikuaavaʼerã mboy informasiónpa ohekámaraʼe. Rembohovái mboyve peteĩ ojerurévape ndéve konsého, ikatu reporandu chupe: “Mbaʼépa nde ere heʼiha la Biblia ko situasiónre?”, “Mbaʼérepa ou porãta térã ou vaíta ndéve redesidíramo ko mbaʼe?”, “Mboy informasiónpa rehekámaraʼe?”, “Mbaʼéichapa nepytyvõ umi ansiáno, nde tuvakuéra térã upe nembostudiáva la Biblia?”.

Umi mbaʼe ombohováiva ndéve ikatuhína nepytyvõ rehechakuaa hag̃ua oñehaʼãmapa osolusiona ko provléma, térã oñeñeʼẽmapa chupe upévare. Avei rehechakuaáta añetehápepa ohekahína peteĩ konsého, térãpa ohekánte peteĩ ombojuruheʼẽvaʼerã chupe (2 Tim. 4:3).

 2 Ani rejapura rembohovái hag̃ua.

‘Opa yvypóra ikyreʼỹvaʼerã ohendu hag̃ua, ha imbeguevaʼerã oñeʼẽ hag̃ua.’ (SANT. 1:19)

Sapyʼánte jajapuraiterei ñambohovái hag̃ua ñande rapichápe ñaipytyvõségui chupe. Péro naiporãmoʼãi rejapo upéicha oiméramo nderehekáiti informasión oñeʼẽva upe témare. Proverbios 29:20 heʼi: ‘Rehechámapa peteĩ tapicha oñeʼẽtereíva opensa porãʼỹre? Oho porãvéta peteĩ itavývape, chupe rangue’ [ÑÑB].

Eñemotiémpokena rehecha hag̃ua upe konsého remeʼẽtava oupahína Ñandejáragui. Upearã reñeporandukuaa: “Ojekuaápa upe konsého ameʼẽvare apensaha ko múndope oñepensaháicha?” (1 Cor. 2:12, 13). Ñanemanduʼavaʼerã ñanembaʼeporãséramo jepe, ikatuha jajavy. Pedro oikuaárõ guare oñemeʼẽha Jesúspe peteĩ tembiapo ijetuʼúva, heʼi: “Anivéna ere upéicha che Ruvicha, ejeporiahuverekomína avei. Ni mbaʼevéicharõ ndoikomoʼãi koʼã mbaʼe nderehe”. Péicha jahechakuaa peteĩ tapicha ipyʼaporãvéramo jepe ikatuha opensa yvypóraicha, opensa rangue “Ñandejára opensaháicha” (Mat. 16:21-23, NM). Ajépa iñimportánte ñapensa raẽ ñañeʼẽ mboyve! Ñanemanduʼavaʼerã saʼieterei jaikuaaha, ñañembojojáramo Ñandejárare (Job 38:1-4; Pro. 11:2).

3 Eñemomirĩkena ha ejapo la Biblia heʼiháicha.

“Ndajapói mbaʼevete chejehegui rei, amombeʼu guei koʼã mbaʼe pe Túva chemboʼe haguéicha.” (JUAN 8:28, NM)

Erétapa upe ojerurévape ndéve konsého: “Chéramo nde...”? Jaikuaa porãramo jepe mbaʼéichapa ikatu oñesolusiona upe provléma, iporãta ñañemomirĩramo ha ñahaʼanga Jesúspe. Haʼe iñarandueterei ha oikuaa hetaiteve mbaʼe yvyporakuéragui, upéicharamo jepe heʼi: “Che nañeʼẽi chejehegui rei, síno pe Túva [...] omanda chéve mbaʼépa haʼéta ha amboʼéta” (Juan 12:49, 50, NM). Umi mbaʼe Jesús omboʼéva ha umi konsého omeʼẽva, ohechauka akóinte ojapoha Itúva rembipota.

Pór ehémplo, Lucas 22:49 omombeʼu ojejagarrátarõ guare Jesúspe, hemimboʼekuéra oporandu hague chupe oñorairõvaʼerãpa pono ojegueraha chupe. Ha peteĩva katu oiporúma voi ijespáda. Mateo 26:52-54 oñeʼẽva avei ko mbaʼére, omombeʼu ko situasiónpe jepe Jesús oñemoñeʼẽ hague hemimboʼekuérape, ohechauka hag̃ua chupekuéra mbaʼépa Ñandejára rembipota. Jesús oikuaavaʼekue mbaʼépa heʼi Génesis 9:6 ha avei umi profesía oĩva Salmo 22 ha Isaías 53-pe. Upévare ikatuvaʼekue oñemoñeʼẽ Ñandejára oipotaháicha, ha péicha osalva hetaitereípe.

 4 Eiporu umi informasión omeʼẽva tembiguái.

“Mávapa hína pe tembiguái jeroviaha ha iñarandúva, pe Ijára omoĩvaʼekue oñangareko hag̃ua ambue tembiguaikuérare, omeʼẽ hag̃ua chupekuéra hiʼupy hiʼoraitépe?” (MAT. 24:45, NM)

Jesús oiporavo pe tembiguái jeroviahápe omeʼẽ hag̃ua hiʼoraitépe opa mbaʼe ñaikotevẽva ñaĩ porã hag̃ua Ñandejára renondépe. Upévare, reñemotiémpopa rehesaʼỹijo hag̃ua umi puvlikasión oñeguenohẽva la Bíbliagui reñemoñeʼẽta jave nde rapichápe peteĩ mbaʼe iñimportántevare?

Pe Índice de las publicaciones Watch Tower ha Watchtower Library-pe a rejuhúta heta informasión ikatútava nepytyvõ. Ha nahiʼãiete reheja rei koʼã mbaʼe. Upépe oñeñeʼẽ hetaiterei témare, ha oĩ heta artíkulo ikatúva nepytyvõ reñemoñeʼẽta jave nde rapichápe. Ikatúpa nde reipytyvõ ambuépe ohekakuaa hag̃ua informasión oñeguenohẽva Ñandejára Ñeʼẽgui ha oipytyvõtava chupe odesidi porã hag̃ua? Peteĩ mápa ikatu nepytyvõ reikuaa hag̃ua moõpa reĩ térã moõ gotyopa rehovaʼerã, upéicha avei pe tembiguái omeʼẽ heta erramiénta ikatúva nepytyvõ reikuaa hag̃ua reimepareína pe tape oporoguerahávape jeikove opaʼỹvape, ha avei mbaʼéichapa ikatu resegi upépe.

Heta ansiáno ohechauka umi maranduhárape mbaʼéichapa ojeporu pe Índice térã Watchtower Library, ha péicha oipytyvõ chupekuéra oiporu hag̃ua Ñandejára Ñeʼẽ odesidíta jave peteĩ mbaʼe. Upévare, umi ermáno ndahaʼéi oikuaánteva mbaʼéichapa ikatu otopa umi mbaʼe oikuaaséva, síno avei ojepokuaa oheka informasión ha ojeroviave opa mbaʼe Ñandejára omeʼẽvare. Upéicha rupi koʼã ermáno ‘ikatupyry ohecha hag̃ua mbaʼépa iporã ha mbaʼépa ivai’ (Heb. 5:14).

5 Ani redesidi ótrore.

“Peteĩteĩ oguerahavaʼerã imbaʼepohýi.” (GÁL. 6:5, BNP)

Amo ipahápe, káda uno odesidivaʼerã mbaʼépa ojapóta térã mávapepa ohendúta. Jehová oheja ñande kárgope ñaneñeʼẽrendútapa chupe térãpa nahániri (Deu. 30:19, 20). Sapyʼánte la Biblia omeʼẽ heta konsého oñesolusiona hag̃ua peteĩ provléma, péro káda uno odesidivaʼerã mbaʼépa ojapóta. Iporãta avei rehecháramo mboy áñopa oguereko upe ojeruréva ndéve konsého térã opyta porãtapa nde reñeʼẽ upe témare. Upévare reñeporanduvaʼerã: “Ikatu piko che añemoñeʼẽ che rapichápe ko témare?”. Sapyʼánte iporãvéta reheja umi ansiáno pópe osolusiona hag̃ua upe provléma, térã oiméramo imitã gueteri, ituvakuéra kárgope.

[Nóta]

[Taʼanga ha rrekuádro oĩva páhina 8-pe]

Ikatúva rejapo restudiávo nde rogayguándi

Restudia vove nde rogayguándi, ikatu reheka informasión umi mbaʼe oñeporanduvaʼekuére ndéve. Ikatúpa reheka peteĩ artíkulo térã peteĩ konsého oĩva la Bíbliape reipytyvõ hag̃ua nde rapichápe? Pór ehémplo, ñamoĩ chupe peteĩ ermáno térã ermána oporandu ndéve oĩ porãpa ojotopa haʼeñohápe peteĩ omendasévare. Ñepyrũrã ikatu reheka Índice térã Watchtower Library-pe, heʼihápe “Concertar citas” térã “Matrimonio”, ha upéi ehecha upépe umi artíkulo nepytyvõvétava. Ikatu avei rehechakuévo koʼã mbaʼe reheka heʼihápe “Véase también”, nepytyvõtava retopa hag̃ua ambue artíkulo oñeʼẽvéva upe témare.

[Rrekuádro oĩva páhina 9-pe]

Umi erramiénta Jehová omeʼẽva ñandéve iñorganisasión rupive ñanepytyvõ ñameʼẽ ha oñemeʼẽ hag̃ua ñandéve umi konsého iporãvéva. Eclesiastés 12:11 heʼi: ‘Umi iñarandúva ñeʼẽngue ojogua pikánape. Koʼã ñeʼẽ ou pe ovecharerekua iñaranduvévagui, upévare ojogua umi klávo oĩ hatã porãvape peteĩ yvyráre’. “Pikána” ningo peteĩ yvyra akua oiporúva umi mymbarerekua oikutu hag̃ua umi mymbápe oho hag̃ua tape porãre. Upéicha avei umi konsého iporãva, oipytyvõ umi ipyʼaporãvape oho hag̃ua tape porãre. Ha umi “klávo” ojeporuháicha oñemombarete ha oñemopuʼã hag̃ua hekoitépe peteĩ óga, umi konsého porã ikatu ñanemombarete jadesidi hag̃ua hekoitépe peteĩ mbaʼe. Umi iñarandúva ovyʼa osegívo umi konsého porãite omeʼẽva Jehová, pe “ovecharerekua iñaranduvéva”.

Ñameʼẽta jave konsého, ñañehaʼãvaʼerã jaiporu pe Ovecharerekua iñaranduvéva ñeʼẽngue añoite. Javyʼaiterei ikatu haguére ñahendu ñande rapichápe ha ñañemoñeʼẽ chupe, ikatúma guive. Ha koʼýte jaiporúramo la Biblia jajapo hag̃ua upéva, upe ñanerendúva ovyʼáta ha oiko porãta opa árare.