Ikatúpa peteĩ kristiáno oñemosẽ kongregasióngui ohecha meme haguére pornografía?

▪ Si, ikatu. Upéva ohechauka iñimportanteha ñamboykete oimehaichagua pornografía, tahaʼe ojehaíva térã taʼanga ojehecháva rrevístape, pelíkula, vidéo ha Internétpe.

Pe pornografía ningo isarambi opárupi ko yvy tuichakuére. Hetaiteve hénte ikatu ohecha koʼág̃a Internet rupive, ha peteĩ plágaicha hetaiterei héntepema ojagarra. Oĩ mitã térã kakuaa oimoʼãʼỹetére otopáva pornografía oiporu jave Internet. Ambue katu oike voi umi páhinape ohecha hag̃ua, tahaʼe hógape térã ofisínape, ikatuhápe olee térã ohecha pornografía ñemiháme. Ko mbaʼére ningo kristianokuéra ñañatende porã vaʼerã. Mbaʼérepa?

Jesús ohechauka mbaʼérepa heʼívo: ‘Che katu haʼe peẽme entéro osegíva omaña peteĩ kuñáre ha iñakãraku hese, upéva oikóma hendive ipyʼapýpe ha péicha oporomoakãratĩ’ (Mat. 5:28, NM). Añetehápe, ndaivaíri pe rrelasión sexual umi omendáva ovyʼa hag̃ua (Pro. 5:15-19; 1 Cor. 7:2-5). Péro pe pornografía ohechauka umi rrelasión sexual hekopeguaʼỹva oporomokyreʼỹva oñepensa hag̃ua umi mbaʼe Jesús heʼivaʼekuére ani hag̃ua ñapensa. Jaʼe porãsérõ g̃uarã,  umi olee térã ohecháva pornografía ndojapói ko téysto heʼíva: ‘Pejukákena pende rete rembipota vai, anítei avave oiko oñondive omendaʼỹre, hekokyʼa, térã oiko hembipota vai rapykuéri, térã heko taryrýi, upéva haʼete jeýnte taʼanga ñemombaʼeguasu’ (Col. 3:5, BNP).

Mbaʼépa oiko peteĩ kristiáno ohecháramo pornografía peteĩ térã dos vése? Upéicharõ ojechahína peteĩ situasión ipeligrósovape oiko haguéicha Asaf rehe, haʼe heʼi: “Che katu haimete añepysãnga, michĩ michĩ ha chepysyrỹimoʼã”. Oiméramo peteĩ kristiáno ohecha raʼe oikóvo taʼanga tieʼỹ ohechaukáva peteĩ kuimbaʼe ha kuña opívo térã peteĩ paréha orekóvo rrelasión sexual, ndaikatúi ikonsiénsia potĩ ni oiko pyʼaguapýpe Ñandejára ndive. Upéva rangue, oñeñandúta Asaf oñeñandu haguéicha: ‘Ára pukukue ahasa asy, ha pyharevekue ajekorrehi’ (Sal. 73:2, 14).

Peteĩ kristiáno hoʼáramo ko pekádope, ohechakuaavaʼerã oikotevẽha oñepytyvõ chupe. La Biblia ohechauka pe ñepytyvõ otopataha kongregasiónpe: ‘Pehecháramo peteĩ ojavýva, peẽ peipytyvõvaʼerã chupe oĩ porã jey hag̃ua. Pejapovaʼerã upéva pyʼaporãme ha peñeñangareko’ (Gál. 6:1). Upéicharõ peteĩ térã mokõi ansiáno ikatu oipytyvõ chupe, ikatu oñemboʼe hendive ojeroviávo Jehová ‘omonguerataha’ pe ojavývape ha ‘oheja reitaha’ chupe hembiapo vaikue (Sant. 5:13-15). Umi ohekavaʼekue oñepytyvõ chupe oheja hag̃ua pe pornografía koʼág̃a oñeñandu Asaf oñeñandu haguéicha, haʼe heʼi: ‘Chéve g̃uarã iporã añemoag̃ui Jehová rehe’ (Sal. 73:28, NM).

Apóstol Pablo omyesakã oĩ hague umi oikóva tekokyʼápe (inmundicia), oikóva oñondive omendaʼỹre, ha notĩriva hembiapo vai hag̃ua (conducta relajada [o desvergonzada]) ha noñembyasýi koʼã mbaʼégui (2 Cor. 12:21). a Peteĩ profesór hérava Marvin R. Vincent heʼi pe “tekokyʼa” (inmundicia) ojetradusíva griégo ñeʼẽgui koʼápe “heʼiseha pe mbaʼe ikyʼavéva ojejapóva”. Añetehápe oĩ pornografía ivaietereíva, ndahaʼéi ohechaukáva oĩva opívonte térã peteĩ kuimbaʼe ha kuña orekóvo rrelasión sexual. Oĩ voi umi ikyʼaiterei ha ñanembojeguarúva, umíva apytépe kuimbaʼe oikóva kuimbaʼéndi térã kuña kuñándi, orekóva sexo en grúpo, orekóva sexo mymbándi, pornografía infantil, violasión en grúpo, oñemboharáiva kuñáre ha oñemboharái vaipáva ojuehe oreko aja sexo (sadomasoquismo). Pablo ohechauka haguéicha, umi oĩvaʼekue pytũmbýpe ha notĩvéiva hembiapo vai hag̃ua (conducta relajada o desvergonzada), ojapo opaichagua tekokyʼa (inmundicia) (Efe. 4:18, 19).

Apóstol Pablo oñeʼẽ avei pe ‘inmundicia’ rehe Gálatas 5:19-pe. Peteĩ teólogo Inglaterraygua heʼi: “Koʼápe pe ñeʼẽ ‘inmundicia’ heʼise opa mbaʼe kyʼa ojejapóva hekopeʼỹ”. Añetehápe, opavave kristiáno ndaikatúi heʼi umi mbaʼe ñañeʼẽ hague ndaivairiha, koʼãichagua pornografía ningo ikyʼa ha ñanembojeguaru. Gálatas 5:19-21-pe Pablo heʼi porã ‘umi péicha oikóva’, térã hekokyʼáva ‘ndoikemoʼãiha Ñandejára rréinope’. Upéicharõ, mbaʼépa oikóta peteĩ kristiáno heta tiémporema ohecháramo pornografía ivaietereíva ha ñanembojeguarúva? Noñearrepentíri ha ndohejáiramo ko vísio, oñemosẽ mante vaʼerã ikatu hag̃uáicha ipotĩ pe kongregasión ha oĩ pyʼaguapy (1 Cor. 5:5, 11).

Oĩ ningo ohechavaʼekue koʼãichagua pornografía péro ñanembovyʼa jaikuaávo ojerure hague ansianokuérape oipytyvõ hag̃ua chupe ha pyaʼe okambia. Jesús heʼivaʼekue umi kristiáno Sardisguápe: ‘Emombarete umi opytáva gueteri ha oĩmava omano hag̃uáicha, nemanduʼáke pe mbaʼe rehupyty ha rehenduvaʼekuére, tereho hapykuéri, eñearrepenti ha ejevy Ñandejára gotyo. Nderepáyriramo, aháta ndéve rehaʼarõʼỹve jave’ (Rev. 3:2, 3). Añetehápe ikatu ñañearrepenti ha jajehekýi pe ‘tatágui’ térã pornografíagui (Jud. 22, 23).

Péro iporãitevéta ningo káda uno jajedesidi ñañeñangareko ani hag̃ua jaʼa ko mbaʼe vaietépe. Upéicharõ, jajapókena opa ikatúva ñañemomombyry hag̃ua oimehaichagua pornografíagui!

[Nóta]

[Komentário oĩva páhina 30-pe]

Peteĩ kristiáno hoʼáramo peteĩ pekádope, ohechakuaavaʼerã oikotevẽha oñepytyvõ