‘Che raʼy, ehayhúke nde ru Járape ha ejapo haʼe heʼíva nde pyʼaite guive.’ (1 CRÓ. 28:9)

ÑAMBOHOVAIMI KOʼÃ PORANDU

¿Mbaʼépa orrepresenta ñane korasõ?

¿Mbaʼépa ñanepytyvõta jaikuaa hag̃ua mbaʼéichapa oĩ ñande pyʼapy?

¿Mbaʼéichapa ikatu jaservi Jehovápe ñande pyʼaite guive?

1, 2. a) ¿Mbaʼe rehépa oñeñeʼẽ hetaiterei vése Ñandejára Ñeʼẽme? b) ¿Mbaʼérepa tekotevẽ ñantende mbaʼépa heʼise ñane korasõ?

 HETA vése la Bíbliape oñeñeʼẽ ñande retére ha pyʼỹinte oñemboʼe hag̃ua ambue mbaʼe iñimportánteva. Pór ehémplo, Job heʼivaʼekue: ‘Che pópe ndaipóri mbaʼe vai’. Rréi Salomón ohai: “Peteĩ notísia porã [...] omombarete ñane [kangue]”. Proféta Ezequiélpe katu Jehová heʼi: “Amohatãta [nde syva] diamánteicha, hatãvéva itágui”. Ha Lucas omombeʼu: “Ko oikovaʼekue og̃uahẽ umi ermáno Jerusalengua apysápe” (Job 16:17, NM; Pro. 15:30, ÑÑB; Eze. 3:9; Hech. 11:22, NM).

² La Biblia ningo oñeʼẽ heta pártepe ñande retére, péro hetaiteve hendápe oñeʼẽ ñane korasõre. Ñepyrũrã ñanemanduʼami Ánare. Ko kuñakarai ojeroviaitereivaʼekue Jehováre ha oñemboʼe kóicha: “Che korasõite guive aguerohory Jehovápe” (1 Sam. 2:1, NM). Ñandejára Ñeʼẽme jajuhu mil vése rupi pe ñeʼẽ korasõ, ha haimete enterove hendápe oñeʼẽhína ñande pyʼapýre. Ñande jaservíva Jehovápe tekotevẽterei ñantende porã mbaʼépa orrepresenta ñane korasõ. ¿Mbaʼérepa? La Biblia heʼi rupi tekotevẽha ñañangareko hese (elee Proverbios 4:23).

¿MBAʼÉPA ORREPRESENTA ÑANE KORASÕ?

3. ¿Mbaʼépa jajapovaʼerã ñantende porã hag̃ua mbaʼépa heʼise la Bíbliape pe ñeʼẽ korasõ, ha mbaʼe ehémplopa ohechauka tekotevẽha jajapo upéva?

³ Ñandejára Ñeʼẽme noñemombeʼúi mbaʼépa heʼise pe ñeʼẽ “korasõ”, upéicharamo jepe ñanepytyvõ ñantende hag̃ua mbaʼépa orrepresenta. Pór ehémplo, ñapensamína peteĩ modísta ojapotaha peteĩ sái. Haʼe oikytĩmbáma pe téla, péro tekotevẽ ombovyvy ikatu  hag̃uáicha oiko chugui peteĩ ao. Péicha avei, tekotevẽ jaheka ha ñambojoapy umi téysto oñeʼẽva pe korasõ rehe, ñantende porã hag̃ua mbaʼépa heʼise.

4. a) ¿Mbaʼépa heʼise hína korasõ? b) ¿Mbaʼépa Jesús omboʼe Mateo 22:37-pe?

⁴ La Bíbliape ojeporu korasõ térã ñande pyʼapy, oñeñeʼẽ hag̃ua umi mbaʼe jarekóvare ñande pype, tahaʼe ñapensáva, ñande lája, jaipotáva, jahupytyséva, mbaʼépepa ñandekatupyry térã mbaʼépa ñanemomýi jajapo hag̃ua opa mbaʼe (elee Deuteronomio 15:7; Proverbios 16:9 ha Hechos 2:26). Peteĩ ensiklopédia heʼi ñande pyʼapy ohechaukaha “mbaʼeichagua tapichápa hína ñande”. Péro sapyʼánte ndeʼiséi opa koʼã mbaʼe. Pór ehémplo, Jesús heʼi: “Rehayhuvaʼerã Jehová nde Járape nde pyʼaite guive, ne ánga rugua guive, ha opa ne arandukue reheve” (Mat. 22:37, NM). Ko téystope, nde pyʼaite guive heʼise ñañandu ha jaipotáva ñane korasõ mbytete guive. Oiporúvo umi ñeʼẽ “nde pyʼaite guive”, “ne ánga” ha “ne arandukue”, Jesús ohechauka ojekuaataha jahayhuha Jehovápe umi mbaʼe ñañandúvare, ñapensávare ha opa mbaʼe jajapóvare (Juan 17:3; Efe. 6:6). Péro la Bíbliape jatopa jave haʼeñónte pe ñeʼẽ korasõ, heʼise opa mbaʼe oĩva ñande pyʼapýpe.

MBAʼÉREPA ÑAÑANGAREKOVAʼERÃ ÑANE KORASÕRE

5. ¿Mbaʼérepa ñañehaʼãmbaitevaʼerã jaservi Jehovápe ñande pyʼaite guive?

⁵ Rréi David oñemoñeʼẽvaʼekue kóicha itaʼýra Salomónpe: ‘Che raʼy, ehayhúke nde ru Járape ha ejapo haʼe heʼíva nde pyʼaite guive, cháke Jehová oikuaa opa mbaʼe jarekóva ñande pyʼapýpe ha nokañýi chugui mbaʼeve’ (1 Cró. 28:9). Upeichaite, Ñandejára ohesaʼỹijohína opavave pyʼapy (Pro. 17:3; 21:2). Ha umi mbaʼe oĩva ñande pyʼapýpe ohechaukáta mbaʼéichapa ñaime henondépe ha mbaʼépa jahupytýta ñane renonderãme. Upévare tekotevẽ jajapo David heʼivaʼekue itaʼýrape ha ñañehaʼãmbaite jaservi Jehovápe ñande pyʼaite guive.

6. ¿Mbaʼépa ikatu oiko ñanderehe jaservi porãséramo jepe Jehovápe?

⁶ ¿Mbaʼéichapa jahechauka jaserviseha Jehovápe ñande pyʼaite guive? Upéva ojekuaáta ñanekyreʼỹvo japredika hag̃ua, ndajafaltáivo rreunionhápe ha jastudia memévo Ñandejára Ñeʼẽ. Péro ikatu sapyʼánte jaju ñanekangyse. Ko múndo aña oĩva Satanás poguýpe ñandejopy ha hiʼarive ndahasyiete jajavy hag̃ua ñaneimperfékto rupi (Jer. 17:9; Efe. 2:2). Upévare, ikatu hag̃uáicha ñañemombarete jey ha jaservi porã Ñandejárape, tekotevẽ pyʼỹinte jajepyʼamongeta jahechakuaa hag̃ua mbaʼéichapa oĩ ñane korasõ. ¿Mbaʼéichapa jajapóta upéva?

7. ¿Mbaʼéichapa ojekuaáta umi mbaʼe oĩva ñane korasõme?

⁷ Ñapensamína ko ehémplore: ñamaña jave peteĩ yvyramátare ndojekuaái ijapytere, péicha avei ndaikatúi ojehecha mbaʼépa oĩ ñane korasõme. Péro pe Sermón del Móntepe Jesús heʼivaʼekue umi mbaʼe jajapóva ohechaukaha mbaʼépa jareko ñande pyʼapýpe, peteĩ yva ohechaukaháicha mbaʼéichapa oĩ imáta (Mat. 7:17-20). Jahechamína mbaʼéichapa ñane rembiapo rupive jahechauka mbaʼépa oĩ ñane korasõme.

JAHECHÁKENA MBAʼÉPA OĨ ÑANE KORASÕME

8. Heʼiháicha Mateo 6:33, ¿mbaʼéichapa jahechauka jarekóva ñane korasõme?

⁸ Pe Sermón del Móntepe, Jesús heʼi umi ohendúvape chupe mbaʼépa ikatu ojapo ohechauka hag̃ua oserviseha Ñandejárape ipyʼaite guive. Haʼe heʼi: “Pemotenonde meméke Ñandejára Rréino ha ihustísia, ha opa koʼã mbaʼe oñemeʼẽta avei peẽme”  (Mat. 6:33, NM). Upeichaite, umi mbaʼe ñamotenondéva, ohechauka mbaʼépa añetehápe jaipota, ñapensa ha mbaʼépa ñanemomýi jajapo hag̃ua peteĩ mbaʼe. Upéicharõ, jajepyʼamongetáramo jaikuaa hag̃ua mbaʼépa ñamotenondeve, jahechakuaáta oimépa jaservi Ñandejárape ñande pyʼaite guive.

9. ¿Mbaʼépa Jesús heʼivaʼekue mokõi kuimbaʼépe, ha mbaʼépa ojehecha haʼekuéra heʼíva rupive?

⁹ Peteĩ jey Jesús omokyreʼỹ hemimboʼekuérape ‘omotenonde meme hag̃ua Ñandejára Rréino’. Upe riremi oiko peteĩ mbaʼe ohechaukáva hemimboʼekuérape umi mbaʼe omotenondévare ojekuaataha mbaʼépa oĩ ipyʼapýpe. Lucas kuatiañeʼẽ omombeʼu Jesús ‘oñemopyʼapeteĩ hague oho hag̃ua Jerusalénpe’. Haʼe oikuaa porã iprovlemataha upépe, upéicharõ jepe odesidi oho. Ha “ohokuévo” ijapostolkuéra ndive, ojotopa hikuái peteĩ kuimbaʼéndi, ha Jesús heʼi chupe: “Eju chemoirũ”. Ohoséramo jepe hendive, ojapose raẽ ambue mbaʼe ha heʼi: “Cherejána taha raẽ tañotỹmi che ru”. Upe rire otopa jey hikuái ótro kuimbaʼépe ha Jesús heʼi avei chupe: “Eju chemoirũ”. Pe kuimbaʼe osẽ ombohovái: “Romoirũta Karai; péro cherejána taha raẽ tajedespedi che hentekuéragui” (Luc. 9:51, 57-61, NM). ¡Ajépa idiferentete hikuái Jesúsgui! Haʼe odesidi ojapotaha peteĩ mbaʼe ha oñemeʼẽmbaite upe tembiapópe. Umi mokõi kuimbaʼe katu ojapose raẽ ambue mbaʼe. Haʼekuéra omotenondévo ojaposevévante ha ombotapykuévo Ñandejára Rréino, ohechauka ndoserviseiha Jehovápe ipyʼaite guive.

10. a) ¿Mbaʼéichapa ñambohováiraʼe pe invitasión Jesús ojapovaʼekue ñandéve? b) ¿Mbaʼépa heʼi Jesús Lucas 9:62-pe?

¹⁰ Umi kuimbaʼe ñañeʼẽ hague ndoaprovechái pe oportunidad omoirũ hag̃ua Jesúspe. Ñande katu ndahaʼeiete upéicha, upéva rangue jaservi Jehovápe koʼẽ koʼẽre ha upéicha jahechauka ñañandúva Ñandejárare. Péro jajapo porãramo jepe ñane rembiapo kongregasiónpe, tekotevẽ ñañangareko ñane korasõre. ¿Mbaʼérepa iñimportánte jajapo upéva? Oĩ peteĩ pelígro ikatúva ñandeperhudika. Lucas kuatiañeʼẽme jatopa Jesús heʼi hague: “Pe arádo ojagarráva ha upéi omañáva hapykue gotyo, ndaikatúi oike Ñandejára rréinope” (Luc. 9:62, NM). ¿Mbaʼépa ñaaprendekuaa ko ehémplogui?

“PEJAPO UVEI MBAʼE PORÃ HA HEKOPEGUÁVA”

11. ¿Mbaʼépa oiko pe chokokue rembiapokuégui, ha mbaʼére?

¹¹ Ñantende porãve hag̃ua Lucas 9:62, ikatu ñapensa pe chokokue rehe oñeñeʼẽha ko téystope. Epensamína ku rehecharõguáicha chupe oarávo pe yvy. Ombaʼapóramo jepe, haʼe imanduʼa meme hógare. Upépe, peteĩ kuarahyʼãme, ifamília ha iñamigokuéra okaruhína, ohendu músika ha opuka joa. ¡Haʼe oĩseterei hendivekuéra! Ombaʼapo are rire, ko chokokue noñaguantavéi ha ‘omaña umi mbaʼe ohejávare hapykue gotyo’, upévare ojevy. Oĩrõ jepe heta mbaʼe gueteri ojapo hag̃ua, pe chokokue ojesareko ambue mbaʼére ha ndojapoporãi itraváho. Ha ivaiveha katu, ndojapói ipatrón ohaʼarõva chugui.

12. ¿Mbaʼépepa ojojogua pe chokokue oñeñeʼẽha Lucas 9:62-pe ha peteĩ kristiáno ndaipyʼapeteĩriva?

¹² Koʼág̃a ñambojojami pe ehémplo peteĩ mbaʼe ikatúvare oiko ko tiémpope. Pe chokokue orrepresenta peteĩ kristiáno haʼetévaicha oĩ porãva kongregasiónpe, péro ndaipyʼapeteĩri. Haʼe opredika ha oho meméramo jepe rreunionhápe, akóinte opensa heta mbaʼe oĩvare ko múndope ha ogusta chupe. Ha amo ipahápe, heta áño oservi rire Jehovápe, ‘omaña umi mbaʼe ohejávare hapykue gotyo’ ha ojevy  ohayhúgui ko múndo oikuaveʼẽva. Oĩramo jepe heta mbaʼe gueteri ojapo hag̃ua Ñandejárape g̃uarã, ‘noñakãramahatãvéima pe marandu omeʼẽvare jeikove’, ha ndojapovéima heta mbaʼe Jehová servísiope (Fili. 2:16). Katuete ningo Jehová, pe ‘kóga Jára’, ombyasyetereíta ndajajapomeméiramo haʼe ohaʼarõva ñandehegui (Luc. 10:2, NM).

13. ¿Mbaʼépa heʼise jaservi Jehovápe ñande pyʼaite guive?

¹³ ¡Ajépa hesakã porãite Jesús omboʼevaʼekue! Iporãiterei ningo jaha rreunionhápe, japredika meme ha jajapo hetave mbaʼe Jehovápe g̃uarã. Péro oĩ ambue mbaʼe jajapovaʼerã jaservi hag̃ua Jehovápe ñande pyʼaite guive (2 Cró. 25:1, 2, 27). Peteĩ kristiáno ohayhúramo gueteri umi mbaʼe ohejavaʼekue “hapykue gotyo”, térã ko múndo aña ha opa mbaʼe oĩva ipype, ikatu hína Ñandejára ipochy ha omboyke chupe (Luc. 17:32). ‘Jaike hag̃ua Ñandejára Rréinope’ tekotevẽterei ñakumpli ko mandáto oĩva Ñandejára Ñeʼẽme: ‘Pejeguaru umi mbaʼe vaígui, pejapo uvei mbaʼe porã ha hekopeguáva’ (Luc. 9:62, NM; Rom. 12:9, ÑÑB). Ikatu ñaimoʼã heta mbaʼe oĩva ko múndope ideprovécho ha iporãtaha ñandéve g̃uarã. Péro opavave tekotevẽ ñañeñangareko ha ani jaheja koʼã mbaʼe ñandejoko jaservi hag̃ua Jehovápe ñande pyʼaite guive (2 Cor. 11:14; elee Filipenses 3:13, 14).

ÑAÑATENDE PORÃKENA

14, 15. a) ¿Mbaʼe rehépa ojevale Satanás ombyai hag̃ua ñane korasõ? b) ¿Mbaʼéichapa pe ehémplo rupive jahechakuaa ipeligrosoha pe ñuhã oiporúva Satanás?

¹⁴ Ñande ningo jahayhueterei Jehovápe ha upévare ñañemeʼẽ jaservi hag̃ua chupe. Heta ermáno oĩva ñande apytépe ohechauka are guivéma oservi memeha Ñandejárape ipyʼaite guive. Upéicharõ jepe, Satanás naikaneʼõi ha akóinte omaña ñanderehe ohecha hag̃ua mbaʼéichapa ikatu ombyai ñane korasõ (Efe. 6:12). Haʼe ohechakuaa ndajahejamoʼãiha Jehovápe sapyʼaitépe, péro ikatu omokangy ñande jerovia saʼi saʼípe ha upearã ojevale umi mbaʼe ‘ko múndo’ oikuaveʼẽvare (elee Marcos 4:18, 19). ¿Mbaʼéicha rupípa osẽ porã jepi chupe upe ñuhã?

 ¹⁵ Ikatu hag̃uáicha hesakã porã upéva, epensamína reñemoĩha relee pyharekue peteĩ kotýpe ohesapehápe peteĩ fóko de 80. Upéi katu okái pe fóko ha repyta pytũmbýpe. Upémarõ rekambia peteĩ ipyahúvare ha hesakã porã jey nde koty. Péro reikuaaʼỹre, oĩ okambiáva pe fóko de 80 ha omoĩ peteĩ de 70. ¿Rehechakuaánepa ohesapeʼiveha remyendy jey vove? Ikatu nderepillái. Upe koʼẽme oñekambia jeýramo pe fóko ha oñemoĩ peteĩ de 60, ikatu hína nderehechakuaái avei. ¿Mbaʼérepa? Pe lús ningo ikangyve ohóvo saʼi saʼípe. Péicha avei ko múndo ikatu mbeguekatúpe ñanemokangy ha nañanekyreʼỹvéi jaservi hag̃ua Jehovápe ñande pyʼaite guive. Peteĩ kristiáno noñatendeporãiva ndohechakuaamoʼãi Satanás saʼi saʼípe omokangyveha ohóvo chupe (Mat. 24:42; 1 Ped. 5:8).

TEKOTEVẼTEREI ÑAÑEMBOʼE

16. ¿Mbaʼépa ñanepytyvõta ani hag̃ua jaʼa umi ñuhã Satanás oiporukuaaitévape?

¹⁶ Upéicharõ, ¿mbaʼépa ñanepytyvõta jaservi hag̃ua Jehovápe ñande pyʼaite guive ha ani hag̃ua jaʼa umi ñuhã Satanás oiporukuaaitévape? (2 Cor. 2:11.) Upearã tekotevẽterei ñañemboʼe meme. Apóstol Pablo omokyreʼỹvaʼekue kristianokuérape “ogueropuʼaka hag̃ua umi ñuhã Satanás omoĩva”. Upe riremínte heʼi jey: “Peñemboʼe memékena Ñandejárape” (Efe. 6:11, 18, NM; 1 Ped. 4:7).

17. ¿Mbaʼépa ñaaprende Jesús ñemboʼégui?

¹⁷ Ikatu hag̃uáicha jagueropuʼaka umi ñuhã Satanás omoĩva, tekotevẽ ñahaʼanga Jesúspe. Haʼe oñemboʼe meme vaʼekue Itúvape ha péicha ohechauka oserviseha chupe ipyʼaite guive. Jahechamína mbaʼéichapa oñemboʼe pe pyhare omano mboyve. Lucas ohai: “Ojopyeterei Jesúspe pe ohasavahína, péro haʼe koʼýte upépe oñemboʼe ipyʼaite guive” (Luc. 22:44, NM). Jesús ningo oñemboʼémava voi péicha Itúvape, péro koʼág̃a ohasavaʼerã peteĩ mbaʼe ijetuʼuetereíva arakaʼeve ndohasáiva gueteri ko yvy ape ári. Upévare ‘koʼýte oñemboʼe ipyʼaite guive’, ha Itúva ohendu chupe. Jesús ehémplo ohechauka sapyʼánte tekotevẽtaha jajerure asyve Ñandejárape ñanepytyvõ hag̃ua. Upéicha rupi, jahasa jave umi mbaʼe ijetuʼuvéva ha Satanás ñandejopyve jave ‘koʼýte ñañemboʼevaʼerã ñande pyʼaite guive’ ha jajerure Jehovápe tañanepytyvõ ha toñangareko ñanderehe.

18. a) ¿Mbaʼépa ñañeporanduvaʼerã, ha mbaʼérepa? b) ¿Mbaʼe mbaʼépa ikatu ojapo porã ñane korasõre, ha mbaʼéichapa? (Ehecha pe rrekuádro oĩva páhina 16-pe.)

¹⁸ ¿Mbaʼéichapa ñanepytyvõta umi ñemboʼe? Apóstol Pablo heʼivaʼekue: ‘Pemoĩ opa mbaʼe Ñandejára pópe peñemboʼévo. Pejerure ha peagradese avei chupe, ha Ñandejára omeʼẽne peẽme ipyʼaguapy, oñangarekótava pende pyʼapy rehe’ (Fili. 4:6, 7). Upeichaite, ikatu hag̃uáicha jaservi Jehovápe ñande pyʼaite guive, tekotevẽ ñañemboʼe meme jeroviapópe (Luc. 6:12). Upévare iporã enterove ñañeporandu: “¿Añemboʼe memépa ha ojekuaápa che ñemboʼére ajeroviaha Ñandejárare?” (Mat. 7:7; Rom. 12:12). Ñambohováivo ko porandu jahechakuaáta mbaʼeichaite pevépa jaservise Jehovápe.

19. ¿Mbaʼépa nde rejapóta akóinte remombaʼeguasu hag̃ua Jehovápe nde pyʼaite guive?

¹⁹ Jahecha haguéicha, tekotevẽ jajepyʼamongeta jaikuaa hag̃ua mbaʼépa ñamotenonde, ha upéva ohechaukáta mbaʼéichapa oĩ ñane korasõ. Ñañatende porã vaʼerã ani hag̃ua umi mbaʼe jahejavaʼekue térã umi ñuhã oiporúva Satanás omokangy ñande jerovia ha ndajaservivéi Jehovápe ñande pyʼaite guive (elee Lucas 21:19, 34-36). Upévare, David ojapo haguéicha, jajerure meme vaʼerã Jehovápe ‘tañanembopyʼapeteĩ’ (Sal. 86:11).

[Porandu ñahesaʼỹijóva]

[Rrekuádro oĩva páhina 16-pe]

MBAʼÉPA IKATU JAJAPO ÑAÑANGAREKO HAG̃UA ÑANE KORASÕRE

Oĩ ningo heta mbaʼe jajapovaʼerã ombaʼapo porã hag̃ua ñane korasõ ha ikatu hag̃uáicha ñaneresãi. Upéicha avei oĩ heta mbaʼe ñanepytyvõva ñañangareko hag̃ua ñande pyʼapýre. Jahechamína mbohapy.

1 Ñañealimenta porã. Ñane korasõ hesãi hag̃ua tekotevẽ ñañealimenta porã. Upéicha avei, peteĩ kristiáno omombaretevaʼerã ijerovia opa mbaʼe Jehová omeʼẽva rupive. Pór ehémplo, ostudiavaʼerã la Biblia haʼeñohápe, ojepyʼamongeta ha oho meme rreunionhápe (Sal. 1:1, 2; Pro. 15:28; Heb. 10:24, 25).

2 Jajapovaʼerã ehersísio. Ñane korasõ hesãi hag̃ua jajapovaʼerã ehersísio, upéicha ikatúta ombaʼapo pyaʼeve. Upéicha avei, ñanekyreʼỹ ha ñambaʼapo meme vaʼerã predikasiónpe, jepe sapyʼánte tekotevẽta jajesakrifikave (Luc. 13:24; Fili. 3:12).

3 Ani jajepyʼapyeterei. Ko múndope oiko heta mbaʼe ikatúva ñandepyʼapy, tahaʼe jaikohárupi térã ñambaʼapohápe. ¿Mbaʼépa ñanepytyvõta ani hag̃ua umíva ojapo vai ñanderehe? Tekotevẽ jajeheʼa meme ñane ermanokuérare. Haʼekuéra ningo ñanderayhu ha oservi Jehovápe ipyʼaite guive (Sal. 119:63; Pro. 13:20).