Omombeʼu Leonard Smith

Arekópe 13 áño rupi, mokõi téysto vívliko tuicha chepytyvõvaʼekue. Ñepyrũrã Zacarías 8:23. Koʼág̃a setenta áño haguépe chemanduʼa gueteri antende ypýrõ guare ko téysto, upépe oñeʼẽ ‘diez kuimbaʼe’ rehe, oñakãramáva ‘peteĩ hudío ao ruguáire’ ha heʼi chupe: ‘Ore rohóta penendive, rohendúgui Ñandejára oĩha penendive’.

UPE hudío orrepresenta umi kristiáno unhídope, ha umi ‘diez kuimbaʼe’, “ambue ovechakuérape”, upérõ oñehenóiva umi “Jonadab” (Juan 10:16, NM). a Antendévo ko mbaʼe, ahechakuaa aikove hag̃ua opa árare ko yvy ape ári, tekotevẽha cheñeʼẽrendu ha aipytyvõ umi unhídope.

Pe segundo téysto chepytyvõvaʼekue haʼe Mateo 25:31-46. Upépe Jesús oñeʼẽ “umi ovecha” ha “umi kavara” rehe. “Umi ovecha” orrepresenta umi tapicha ojehusga porãva oipytyvõ rupi Cristo ermanokuérape, oĩva gueteri ko yvy ape ári. Chemitãrõ jepe, apensa: “Aipotáramo Cristo cherecha peteĩ ovecháicha, tekotevẽ aipytyvõ umi iñermáno unhídope ha ajapo haʼekuéra heʼíva, Ñandejára ningo oĩ hendivekuéra”. Ko mbaʼe agueroviáva setenta áño rasáma oisãmbyhy che rekove.

“¿MBAʼÉPA CHE AJAPÓTA KONGREGASIÓNPE?”

Áño 1925-pe che sy ojevautisa peteĩ Salón oĩvape Betel de Inglatérrape, upérõ oñehenóiva Tabernáculo de Londres ha upépe oñembyatými umi ermáno uperupigua. Che katu anase 15 de octubre 1926-pe ha ajevautisa marzo 1940-pe, peteĩ asambléa ojejapóvape Dóverpe. Upéi ahayhu hayhuve ahávo la Biblia heʼíva. Che sy ningo unhída vaʼekue, upéicha rupi haʼekuaa ambaʼapo guive che sy ndive Jehová servísiope, añakãrama ypy hague ‘peteĩ hudío ao ruguáire’. Upe tiémpope che túva ha che ermána ypykue ndoservíri Jehovápe. Upérõ roime kongregasión Gíllinghampe, opytáva suréste gotyo Inglatérrape, ha heta ermáno unhído oĩvaʼekue upépe. Che sy akóinte omoĩva ehémplo porã ikyreʼỹvo predikasiónpe.

Septiembre áño 1941-pe oiko peteĩ asambléa Leicester-pe. Upépe ahendu peteĩ diskúrso hérava “Integridad”, oñemyesakãhápe mávapa oguereko derécho oisãmbyhývo. Upe diskúrso chepytyvõ antende hag̃ua pe provléma Jehová oguerekovaʼekue Satanás ndive, ha tekotevẽha jajepytaso mbarete Jehová ykére ha ñaneñeʼẽrendu chupe jahechauka hag̃ua haʼe añoiteha pe Mburuvicha Guasu Ijojahaʼỹva.

Upe asambléape ojeʼe iñimportantetereiha pe prekursorádo ha oñemokyreʼỹ mitãrusukuérape ojapo hag̃ua. Ahendu rire pe diskúrso hérava “Prekursorkuéra rembiapo kongregasiónpe”, añeporandu:  “¿Mbaʼépa che ajapóta kongregasiónpe?”. Upe aty guasu rupive ahechakuaa ajapovaʼerãha opa ikatúva aipytyvõ hag̃ua umi unhídope predikasiónpe. Upévare, upepete voi amyenyhẽ pe solisitu ajapo hag̃ua che prekursorádo.

AJAPO CHE PREKURSORÁDO GÉRRA AJA

Arekórõ guare 15 áño añenombra prekursór espesiál, 1 de diciembre 1941-pe. Ñepyrũrã che sy chemoirũvaʼekue che servísiope, péro upéi haʼe ou hasy ha un áño haguépe oheja iprekursorádo. Upémarõ, sukursál Londrespegua ombou ermáno Ron Párkinpe chemoirũ hag̃ua. Ko ermáno oservi koʼág̃a komité de Sukursálpe Puerto Rícope.

Roñemondo Broadstairs ha Ramsgate-pe, opytáva Kéntpe, upépe roalkila peteĩ koty ropyta hag̃ua. Pe pláta oñemeʼẽva umi prekursór espesiálpe ningo ndahetái, upérõ káda més oñemeʼẽ oréve 40 chelines, ojapóva 36.000 guaraníes rupi. Ropaga rire ore alkilér saʼietereíma hemby oréve, upéicha rupi ni ndoroikuaái jepi mbaʼéichapa rohupytýta ore rembiʼurã. Péro Jehová arakaʼeve nombofaltái oréve mbaʼeve.

Roiko meme vaʼekue visikléta ári, ore kárga pohýi ha oipeju hatãramo jepe pe yvytu Nórteguio, oúva pe márgui. Ohasa avei karapete upérupi umi avión ohóva Londres gotyo, ojapóva irrekorrído ha opoíva vómba. Peteĩ jey ajeity che visikléta árigui kunétape ohasávo che akã ariete peteĩ vómba ha oho okapu ag̃uiete che aimehágui. Ahasáramo jepe koʼã mbaʼe, heta avyʼavaʼekue ajapóvo che prekursorádo Kéntpe.

OIKO CHEHEGUI BETELÍTA

Che sy akóinte oñeʼẽ porãva Betel rehe. Haʼe heʼímiva chéve: “Hiʼãite ningo chéve oiko ndehegui betelíta”. Upéicha rupi avyʼaiterei ha ni ndagueroviaséi añeinvitárõ guare enero 1946-pe aha hag̃ua aservi tres semána Betélpe, oĩva Lóndrespe. Ohasa rire umi tres semána, ermáno Pryce Hughes, superintendénte upe sukursalpegua, heʼi chéve apytave hag̃ua. Umi mbaʼe aaprendevaʼekue upépe chepytyvõ aiporu porã hag̃ua che rekove.

Upérõ Lóndrespe oĩ treinta betelíta rupi, umíva apytépe hetave mitãrusu soltérova. Péro oĩ avei heta unhído, pór ehémplo, Pryce Hughes, Edgar Clay ha Jack Barr. Koʼã ermáno oservivaʼekue upe rire Cuerpo Gobernánteramo. Tuichaiterei mbaʼe chéve g̃uarã ikatu haguére aipytyvõ Jesús ermanokuérape chemitã guive, haʼekuéra ningo ‘omoakã Jesucristo kongregasión’ (Gál. 2:9, ÑÑB).

Peteĩ árape Betélpe ojeʼe chéve oĩha okẽme peteĩ ermána oñeʼẽséva chendive. Aha ahecha ha atopa che sýpe, ogueru peteĩ rregálo ijyva guýpe. Heʼi chéve ndoikemoʼãiha ndoipotáigui aheja are che rembiapo, upévare oheja chéve pe oguerúva ha oho. Upe rire aavri ha atopa pype peteĩ sáko iporãitereíva roʼy tiémpope g̃uarã. Upéva chemomanduʼa Ana rehe, haʼe oguerahavaʼekue ijaorã imemby Samuélpe, oservírõ guare tavernákulope (1 Sam. 2:18, 19).

GALAAD: PETEĨ MBAʼE IJOJAHAʼỸVA

Áño 1947-pe cinco betelítape roñeinvita roho hag̃ua Escuela de Galaad kláse 11-pe, Estados Unídospe. Rog̃uahẽrõ guare Nueva Yórkpe roʼyeterei ha aagradeseterei che sýpe pe sáko orregalavaʼekuére chéve.

Arakaʼeve ndacheresaraimoʼãi umi seis mése ahasavaʼekuégui Galaádpe. Upérõ oĩ  ermáno dieciséis tetãygua ha heta mbaʼe aikuaa haʼekuéra rupive. Upépe heta mbaʼe aaprende Ñandejára Ñeʼẽgui, ha umi ermáno ikatupyrývagui. Umíva hína Lloyd Barry, che irũngue Galaádpe; Albert Schroeder, oremboʼevaʼekue ha John Booth superintendénte Granja del Reinopegua, upéva oĩ pe kúrso roreko haguépe. Haʼekuéra upe rire oservi Cuerpo Gobernánteramo. Chemanduʼa gueteri umi konsého porãite omeʼẽvaʼekuére chéve koʼã ermáno ha mbaʼeichaitépa iñeʼẽrendu hikuái Jehovápe ha iñorganisasiónpe.

ASERVI SUPERINTENDÉNTERAMO HA UPÉI AHA JEY BETÉLPE

Atermina rire Galaad, chemondo hikuái aservi hag̃ua superintendénte de sirkuítoramo Ohio, Estados Unídospe. Upérõ 21 áño ramo areko, upéicharõ jepe umi ermáno cheguerohory ha omombaʼénte che rembiapo. Upe sirkuítope, heta mbaʼe aaprende ambaʼapóvo umi ermáno ikatupyrýva ndive ha heta áñorema oservíva Jehovápe.

Tiémpo riremínte, añeinvita aha hag̃ua Betel oĩva Brooklynpe añembokatupyryve hag̃ua. Upépe aikuaa umi ‘omoakãvape’ Jehová organisasión, umíva apytépe, Milton Henschel, Karl Klein, Nathan Knorr, Lyman Swingle ha Thomas J.  Sullivan (iñamigokuéra ohenói chupe Bud), haʼekuéra oservivaʼekue Cuerpo Gobernánteramo. Hetaite mbaʼe porã ningo aaprende chuguikuéra ahechávo mbaʼéichapa ombaʼapo ha oiko Jehová heʼihaichaite. Upéva tuichaiterei omombareteve che jerovia Jehová organisasión rehe. Upéi añemondo jey Európape asegi hag̃ua ambaʼapo Jehovápe g̃uarã.

Febrero 1950-pe, che sy omano. Upe rire añemongeta porã papa ha che ermána Dora ndive. Aporandu chupekuéra mbaʼépa ojapóta koʼág̃a mama omano rire ha che naĩmevéivo ógape, oservítapa Jehovápe térãpa nahániri. Haʼekuéra oikuaavaʼekue peteĩ ermáno unhído ijedávape, hérava Harry Browning, orrespetaiterei chupe hikuái ha heʼi ostudiataha hendive la Biblia. Un áño haguépe che ru ha che ermána Dora ojevautisáma. Upe rire che túvape oñenombra siérvo ministeriál kongregasión Gíllighanpe, ha haʼe omano rire, Dora omenda Roy Moreton rehe, peteĩ superintendénte ikatupyry ha iñeʼẽrendúva Jehovápe. Che ermána Dora oservivaʼekue ipyʼaite guive Jehovápe omano meve áño 2010-pe.

ASERVI FRÁNCIAPE

Aha tiémpope eskuélape, astudia francés, alemán ha latín. Upérõ francés ijetuʼuvevaʼekue chéve aaprende hag̃ua. Upéicha rupi haʼete avyʼa ha ndavyʼáiva ojejerurerõ guare chéve aha hag̃ua Fránciape, aservi Betélpe. Upépe ambaʼapo peteĩ unhído ndive, hérava Henri Geiger, haʼe ijedáma ha oservi siérvo de sukursálramo. Heta mbaʼe ijetuʼuvaʼekue chéve ajapo hag̃ua ha ajavy mimiete voi, péro aaprende mbaʼéichapa ajogueraha porã vaʼerã che rapichakuéra ndive.

Avyʼa ikatu haguére aipytyvõ oñeorganisa hag̃ua peteĩ asambléa internasionál Paríspe áño 1951-pe, opa rire pe gérra. Betélpe ou peteĩ mitãrusu superintendénte hérava Léopold Jontès chepytyvõ hag̃ua. Tiémpo rire ko ermánogui oiko superintendénte de sukursál. Pe aty guasu oiko Palacio de los depórtespe (Palais des sports), ag̃uiete oĩhágui Torre Eiffel. Upe asambléape oĩ umi ermáno oúva 28 tetãgui. Pe último diápe, umi 6.000 testígo de Jehová Franciaygua ovyʼaiterei oñemombeʼúvo oĩ hague 10.456 tapicha upe asambléape.

 Ag̃uahẽrõ guare Fránciape, saʼieterei añeʼẽ francéspe. Ivaiveha katu, añeʼẽ aikuaa porãramo añoite oĩ porãha pe haʼétava. Péro ndajajavýiramo ndaikatumoʼãi arakaʼeve jajekorrehi ha nañaaprendemoʼãi mbaʼeve.

Aaprendeve hag̃ua, aha peteĩ eskuéla oñemboʼehápe francés umi tetã ambueguápe. Aha káda pyhare umi día ndarekoihápe rreunión. Upéi mbeguekatúpe chegusta ohóvo upe idióma ha aaprende porã. Upéicha rupi ikatuvaʼekue aipytyvõ traduksiónpe Betélpe ha tiémpo rire atradusíma umi puvlikasión inglésgui francéspe. Tuichaiterei mbaʼe chéve g̃uarã ikatu haguére aipytyvõ umi ermáno Franciayguápe ohupyty hag̃ua umi hiʼupy omeʼẽva tembiguái jeroviaha ha iñarandúva (Mat. 24:45-47).

AMENDA HA AHUPYTY AVEI AMBUE PRIVILÉHIO

Áño 1956-pe amenda Esther rehe, peteĩ prekursóra Suizaygua heta áñorema aikuaáva. Romenda Lóndrespe, peteĩ Salón del Reino Betelpeguápe, yma oñehenoivaʼekue Tabernáculo de Londres, upe che sy ojevautisa haguépe. Romendárõ guare, ermáno Hughes ojapo oréve diskúrso, upérõ oĩ avei Esther sy haʼéva unhída. Jehová omeʼẽ chéve che irũrã iguápa ha ikyreʼỹva, péro ndahaʼéi upéva añónte, heta mbaʼe avei aaprende che suégragui roñemongetávo Jehováre. Haʼe omohuʼã iservísio ko yvy ape ári áño 2000-pe.

Romenda rire rosẽ Betélgui ha roho roiko ótro hendápe. Upéicharõ jepe che asegi atradusi umi puvlikasión ha Esther katu ojapo iprekursorádo espesiál ha opredika umi lugár oĩvare París jerére. Upéicha rupi oipytyvõ heta tapichápe oservi hag̃ua Jehovápe. Áño 1964-pe roñeinvita jey roiko hag̃ua Betélpe ha 1976-pe oñepyrũ oñenombra umi oservítavape komité de sukursálpe. Upérõ che añenombra aservi hag̃ua Fránciape. Esther heta chepytyvõ ha akóinte oĩ che ykére opa mbaʼépe.

“CHE NAIMEMOʼÃI PENENDIVE OPA ÁRARE”

Sapyʼánte aha jey jepi Betélpe Nueva Yórkpe. Upéicha jave avyʼaiterei umi konsého porã omeʼẽvare chéve umi ermáno Cuerpo Gobernantepegua. Pór ehémplo, peteĩ jey amombeʼu ermáno Knórrpe chepyʼapyha ndajapopáirõ g̃uarã che traváho itiémpope, haʼe opukavy ha heʼi chéve: “Embaʼapónte ha ani rejepyʼapy”. Upe guive, ojoʼapa jave chehegui che travahokuéra, ndajepyʼapyvéima ha añepyrũ ajapo peteĩteĩ. Opavave ningo ojapo ikatúva, ha katuete oñemohuʼã itiémpope umi traváho.

Omano mboyvemi, Jesús heʼi hemimboʼekuérape: “Che naimemoʼãi penendive opa árare” (Mat. 26:11, NM). Upéicha avei ñande ñaiméva ambue ovechakuéra apytépe ndajarekomoʼãi opa árare ñanendive ko yvy ape ári Cristo ermanokuérape, umi unhídope. Upévare tuichaiterei mbaʼe chéve g̃uarã ikatu haguére aipytyvõ setenta áño pukukue umi unhídope, péicha rupi haʼekuaa añakãrama hatã hague ‘peteĩ hudío ao ruguáire’.

[Nóta]

[Komentário oĩva páhina 21-pe]

Ermáno Knorr opukavy ha heʼi chéve: “Embaʼapónte ha ani rejepyʼapy”

[Nóta oĩva taʼanga ndive páhina 19]

(Izquierda) Che sy ha che ru

(Derecha) Escuela de Galaad korapýpe, che sáko mama cherregalavaʼekue reheve (1948)

[Nóta oĩva taʼanga ndive páhina 20]

Atradusihápe ermáno Lloyd Barry diskúrso ojededikárõ guare sukursál Franciapegua (1997)

[Nóta oĩva taʼanga ndive páhina 21]

(Izquierda) Esther ndive romendaha díape

(Derecha) Ropredika jave oñondive