“Haʼe hína umi ára apoha, haʼe ohupi ha omongúi umi mburuvicha guasu.” (DAN. 2:21)

¿MBAʼÉPA ÑAMBOHOVÁITA?

¿Mbaʼéichapa Ñandejára rembiapokue ha umi profesía oñekumplivaʼekue ohechauka Jehová haʼeha umi Ára Apoha?

¿Mbaʼépa jajapovaʼerã jaikuaágui Jehová haʼeha “umi ára apoha”?

¿Mbaʼérepa pe fécha Jehová omoĩva nodependéi umi mbaʼe oikóvare ko múndope ni yvyporakuéra ojaposévare?

1, 2. ¿Mbaʼérepa ikatu jaʼe Jehová oikuaa porãitereiha mbaʼépa pe tiémpo?

 GÉNESISPE oñemombeʼu mbaʼépa Jehová ojapo pe cuarto díape: ‘Toĩ umi mbaʼerendy ohesapéva arapýpe, ojei hag̃ua ojuehegui ára ha pyhare; ha ohechauka hag̃ua umi estasión, día ha áño’ (Gén. 1:14, 19, 26, ÑÑB). Jahechaháicha, yvypóra oĩ mboyvéma voi Jehová ojapopa oñekotevẽva guive ikatu hag̃uáicha ojekalkula pe tiémpo. Ha upeichaite oiko, Ñandejára oipota haguéicha.

² Péro koʼag̃aite peve umi sientífiko nontendéi mbaʼépa pe tiémpo. Peteĩ ensiklopédia heʼi: “Ndaipóri ko yvy ape ári ikatúva omyesakã ñandéve mbaʼépa heʼise pe tiémpo”. Péro Jehová, pe ‘ojapovaʼekue yvága [...] ha yvy’ oikuaa porãiterei. Haʼe ‘iñepyrũmby guive omombeʼúma umi mbaʼe ipahápe ojehútava, ha ymaiterei guive omyesakã umi mbaʼe neʼĩrava gueteri oiko’ (Isa. 45:18; 46:10, ÑÑB). Jahechamína koʼág̃a Jehová rembiapokue ha avei umi profesía oñekumplímava. Ñahesaʼỹijóvo koʼã mbaʼe katuete jajeroviavéta Jehováre, pe Ára Apoha, ha Iñeʼẽ la Bíbliare.

JEHOVÁ REMBIAPOKUE OMOMBARETE ÑANDE JEROVIA

3. ¿Mbaʼe ehémplopa ohechauka opa mbaʼe ombaʼapoha hendapepaite ha itiempoitépe?

³ Ko arapýpe opaite mbaʼe ombaʼapo porãiterei. Pór ehémplo, umi planéta ha estrellakuéra okuʼe hendápe porã ha itiempoitépe, upéicha rupi yvyporakuéra ikatu onavega ha oikuaa arakaʼépa oñepyrũta umi estasión. Añetehápe, pe ojapóva koʼã mbaʼe “tuicha ipuʼaka”, ha upévare ñamombaʼeguasuvaʼerã chupe (elee Isaías 40:26).

4. ¿Mbaʼe ehémplopa ohechauka Jehová iñaranduetereiha?

 ⁴ Umi oikovéva apytépe jahecha avei opa mbaʼe ombaʼapoha hendapete ha itiempoitépe. Pór ehémplo, heta mymba ha plánta haʼetévaicha voi orekóva peteĩ rrelój heʼíva mbaʼe tiémpopepa ojapovaʼerã opa mbaʼe. Oĩ heta guyra oikuaáva mbaʼe tiempoitépepa ovavaʼerã ótro lugárpe (Jer. 8:7). Ñande yvypórape katu ñande rete ñandeavisa avei jajapo hag̃ua umi mbaʼe ñaikotevẽva káda día. Upévare, pór ehémplo, javiaha mombyrýramo aviónpe ñande rete hasýpe ojepokuaa pe óra pyahúre. Jahechaháicha, oĩ heta mbaʼe ombaʼapóva hendaite ha itiempoitépe, ha upéva ohechauka Jehová, “umi ára apoha”, iñarandu ha ipoderosoitereiha, ndaipóri oñembojojáva hese (elee Salmo 104:24). Upévare ikatu jaʼe Jehová rembipota oñekumplitaha katuete.

UMI PROFESÍA OÑEKUMPLIVAʼEKUE OMOMBARETE ÑANDE JEROVIA

5. a) ¿Mbaʼéicha añoitépa ikatu jaikuaa ohaʼarõva yvyporakuérape? b) ¿Mbaʼérepa Jehová ikatu opredesi umi mbaʼe oikótava?

⁵ Ñandejára rembiapokuére ojekuaa “mbaʼeichaguápa haʼe”, péro umíva nomombeʼúi ñandéve heta mbaʼe iñimportánteva, pór ehémplo mbaʼépa ohaʼarõ yvyporakuérape (Rom. 1:20, NM). Ikatu hag̃uáicha jaikuaa upéva tekotevẽ ñahesaʼỹijo la Biblia. Upépe jatopa heta profesía oñekumplivaʼekue itiempoitépe. ¿Mbaʼérepa Jehová ikatu opredesi oikótava? Ñepyrũrã, chupe g̃uarã hesakã porãiterei oikótava tenonderã. Avei ikatu omaneha opa mbaʼe oiko hag̃ua hembipota hiʼoraitépe.

6. ¿Mbaʼérepa jaʼekuaa Jehová oipotaha ñantende umi profesía oñekumplivaʼekue?

⁶ Jehová oipota isiervokuéra ontende umi profesía ha oñevenefisia chugui. Jaikuaaháicha, ñande nañantendéi pe tiémpo Jehová ontendeháicha, upévare haʼe oikuaaukáta jave mbaʼépa oikóta, omombeʼu yvyporakuéra ontende porã hag̃uáicha (elee Salmo 90:4). Pór ehémplo, lívro de Revelación oñeʼẽ ‘irundy ánhel’ rehe ‘oñembosakoʼíva pe óra, día, més ha pe áñope g̃uarã’. Ñande ningo ñantende porãiterei mbaʼépa heʼise koʼã ñeʼẽ: óra, día, més ha áño (Rev. 9:14, 15, BNP). Jahechamína koʼág̃a umi profesía oñekumplivaʼekue Jehová heʼi hagueichaite ha itiempoitépe. Ñahesaʼỹijóvo koʼã mbaʼe, jajeroviavéta Jehováre, “umi ára apoha”, ha Iñeʼẽre.

7. ¿Mbaʼéichapa umi profesía Jeremías heʼivaʼekue ohechauka Jehová haʼeha umi ára apoha?

⁷ Ñepyrũrã ñanemanduʼami pe oikovaʼekuére síglo siétepe Jesús ou mboyve. La Biblia heʼi: “Áño irundyha oñepyrũ hague oisãmbyhy Judápe Jehoiaquim Josías raʼy, Ñandejára heʼi Jeremíaspe iñeʼẽ opa Judayguáre” (Jer. 25:1). Jehová, umi Ára Apoha, heʼi Jerusalén oñehunditaha ha umi hudíope ojeguerahataha Judágui Babilóniape, upépe oikóta “70 áño pukukue [...] Babilonia ruvicha guasu poguýpe”. Áño 607-pe Jesús ou mboyve, umi ehérsito Babiloniaygua ohundi Jerusalén, ha umi hudíope ojegueraha Babilóniape. ¿Mbaʼépa oikóta 70 áño rire? Jeremías heʼimavaʼekue: ‘Ñandejára heʼi: “Oñekumplívo Babilóniape umi 70 áño, ambaʼapóta peẽme g̃uarã ha ajapóta che ñeʼẽ pogueru jeývo koʼápe”’ (Jer. 25:11, 12; 29:10). Ko profesía oñekumpli itiempoitépe, áño 537-pe Jesús ou mboyve, umi Media ha Persiaygua omosãsórõ guare hudiokuérape Babilonia poguýgui.

8, 9. ¿Mbaʼéichapa ohechauka umi profesía oñeʼẽva Mesías ha pe Rréino rehe Jehová haʼeha “umi ára apoha”?

 ⁸ Ñahesaʼỹijomína ótra profesía oñeʼẽva avei Ñandejára puévlo yma guare rehe. Dos áño rupi umi hudío osẽ mboyve Babilóniagui, Ñandejára oikuaaukáma proféta Daniel rupive Mesías outaha 483 áño ojeʼe rire oñemopuʼã jey hag̃ua Jerusalén. Pe rréi medopérsa omanda upéva áño 455-pe Jesús ou mboyve. Ha 483 áño haguépe, áño 29-pe, Jehová oiporavo espíritu sánto rupive Jesús Nazaretguápe ha oiko chugui pe Mesías (Neh. 2:1, 5-8; Dan. 9:24, 25; Luc. 3:1, 2, 21, 22). a

⁹ Jahechamína avei koʼág̃a umi profesía oñeʼẽvapeRréinorehe. Ñandejára Ñeʼẽ ohechaukamavaʼekue Jesucristo oñepyrũtaha oisãmbyhy yvágape áño 1914-pe. Pór ehémplo, omombeʼu “mbaʼépa oikóta” ojepilla hag̃ua Jesús oĩmaha ha mbaʼeichaitépa ojehasa asýta ko yvy ape ári ág̃a Satanás oñemosẽ vove yvágagui (Mat. 24:3-14, NM; Rev. 12:9, 12). Oĩ avei ambue profesía ohechaukáva áño 1914-pe opa hague “pe tiémpo oñemeʼẽva umi tetãme” ha pe Rréino oñepyrũtaha oisãmbyhy yvágape (Luc. 21:24, NM; Dan. 4:10-17). b

10. ¿Mbaʼépa katuete oikóta tenonderãme?

¹⁰ ¿Mbaʼépa oikóta tenonderãme? Jesús heʼivaʼekue ñepyrũrã oikotaha peteĩ “jehasa asy guasu”. Upe rire haʼe oisãmbyhýta Mil áño pukukue. Koʼã mokõi mbaʼe katuete oikóta itiempoitépe. Ani ñanderesarái Jesús oĩrõ guare ko yvy ape ári, Jehová heʼíma hague ‘mbaʼe día ha mbaʼe órapa’ oikóta koʼã mbaʼe (Mat. 24:21, 36, NM; Rev. 20:6).

JAIPORUKUAÁKENA “PE TIÉMPO HEMBÝVA”

11. ¿Mbaʼépa jajapovaʼerã jaikuaágui jaikomaha umi ára pahápe?

¹¹ Pe Rréino oisãmbyhýma ha jaikóma ‘umi ára pahápe’. Upévare, ¿mbaʼépa jajapovaʼerã jaikuaágui koʼã mbaʼe? (Dan. 12:4.) Heta hénte ohecha ko múndo ivaiveha ohóvo, péro ndopillái la Biblia heʼíma hague péichante voi ojeikotaha umi ára pahápe. Oĩ oimoʼãva ko múndo naipohãveimaha ha oimeha órantema oikotaha sarambi, ótro katu opensa yvyporakuéra osolusionataha umi provléma ha ikatutaha oiko “pyʼaguapy ha kyhyjeʼỹme” (1 Tes. 5:3, JMP). Péro ñande jahechakuaa oñemohuʼãmbotaitemaha ko múndo aña oĩva Satanás poguýpe. Upéicharõ, ñañehaʼãmbaitevaʼerã jaiporu porã ñane tiémpo jaservi hag̃ua Ñandejárape, “umi ára apoha”, ha ñaipytyvõ ñande  rapichakuérape ikatu hag̃uáicha oikuaa chupe (2 Tim. 3:1). Opavave iporã ñañeporandu, ¿mbaʼéichapa aiporuʼaína che tiémpo? (Elee Efesios 5:15-17.)

12. ¿Mbaʼépa ñanemboʼe Jesús heʼivaʼekue Noé tiémpore?

¹² Ko múndope oĩ hetaiterei mbaʼe ikatúva ñanderesarea, upévare ijetuʼu jaiporukuaa hag̃ua “pe tiémpo hembýva”. Jesús heʼi: “Oiko haguéicha Noé tiémpope, upéichata avei pe yvypóra Raʼy oĩ vove”. ¿Mbaʼéichapa rakaʼe upe tiémpope? Ojeʼékuri pe múndo upe tiempopegua oñehunditaha, yvyporakuéra iñañáva ojahogapataha pe ama guasúpe. ‘Noé katu omombeʼu opavavépe mbaʼéichapa Ñandejára oipota ojeiko.’ (Mat. 24:37, NM; 2 Ped. 2:5.) Péro “umi hénte okaru ha omboyʼu; kuimbaʼe ha kuñanguéra omendajoa [...]. Haʼekuéra nopenái mbaʼevére ha upéi ou pe ama guasu ha ohundipaite chupekuéra”. Upévare Jesús heʼi: “Pehechaukáke pejepreparamaha, cháke peimoʼãʼỹve jave oúta pe yvypóra Raʼy” (Mat. 24:38, 39, 44, NM). Ñande ñahaʼangavaʼerã Noépe, ndahaʼéi umi hénte itiempopeguápe. ¿Mbaʼépa ñanepytyvõta jajeprepara hag̃ua?

13, 14. ¿Mbaʼe rehépa ñanemanduʼavaʼerã ñahaʼarõ aja og̃uahẽ pe yvypóra Raʼy?

¹³ Pe yvypóra Raʼy oúta oñeimoʼãʼỹve jave, upéicharamo jepe ñanemanduʼavaʼerã Jehová haʼeha umi Ára Apoha. Pe fécha haʼe omoĩva nodependéi umi mbaʼe oikóvare ko múndope ni yvyporakuéra ojaposévare. Okumpli hag̃ua hembipota, Jehová ikatu omaneha opa mbaʼe oikóva ha ojapo itiempoitépe (elee Daniel 2:21). Proverbios 21:1 heʼi: “Pe tetã ruvicha pyʼapy, oĩ [Ñandejára] pópe ku ysyrýicha, Haʼe oipotahápe omboguata ichupe” (ÑÑB).

¹⁴ Jehová ikatu omaneha umi mbaʼe oikóva okumpli hag̃ua hembipota itiempoitépe. Umi mbaʼe iñimportantevéva oikovaʼekue ko múndope oipytyvõ oñekumpli hag̃ua heta profesía oĩva la Bíbliape, pór ehémplo ojepredika hag̃ua pe marandu porã oñeʼẽva Ñandejára Rréinore. Ñanemanduʼamína mbaʼépa oikóraʼe pe Unión Soviética hoʼa rire. Upérõ ni noñeimoʼãi mbaʼeichaitépa okambiáta pe polítika sapyʼaitépe. Oiko rupi upéva, pe marandu porã oñemog̃uahẽ koʼág̃a hetave hendápe ymave ojeproivi haguépe ojepredika. Añetehápe tekotevẽterei ñamboyke tiémpo jaservi hag̃ua ñande pyʼaite guive Ñandejárape, ‘umi ára apoha’.

JAJEROVIÁKENA JEHOVÁ OKUMPLITAHA HEMBIPOTA HIʼORAITÉPE

15. ¿Mbaʼéichapa jahechauka jajeroviaha oĩ jave kámbio Jehová organisasiónpe?

¹⁵ Jasegi hag̃ua japredika pe marandu porã koʼã ára pahápe, tekotevẽ jajerovia Jehová okumplitaha hembipota itiempoitépe. Ko múndo okambia manterei, upévare pyʼỹinte tekotevẽta ñakambia japredika ha ñamboʼe lája ñande rapichakuérape la Biblia. Sapyʼánte oĩ kámbio Jehová organisasiónpe ñanepytyvõva japredika porãve hag̃ua pe marandu porã. ¿Mbaʼéichapa jahechauka jajeroviaha Jehováre, “umi ára apoha”? Jasegívo umi mbaʼe pyahu oñemoĩva iñorganisasión rupive ha ñaneñeʼẽrendúvo Itaʼýrape, ‘pe omoakãva kongregasión’ (Efe. 5:23).

16. ¿Mbaʼérepa jajerovia Jehová katuete ‘ñanepytyvõtaha ñaikotevẽ jave’?

¹⁶ Ñandejára oipota ñañemboʼe meme chupe ha jajerovia haʼe katuete ‘ñanepytyvõtaha ñaikotevẽ jave’ (Heb. 4:16). ¡Ajépa upéva ohechauka ñanderayhueterei ha ojepyʼapyha peteĩteĩre! (Mat. 6:8;  10:29-31.) Jahechaukákena jajeroviaha jajerure memévo Jehovápe ñanepytyvõ hag̃ua, ñañehaʼãvo jajapo umi mbaʼe jajeruréva ha jahejávo ñanesãmbyhy. Aníkena ñanderesarái ñañemboʼe hag̃ua avei ñane ermanokuérare.

17, 18. a) ¿Mbaʼépa ojapóta Jehová koʼẽrõite iñenemigokuérare? b) ¿Mbaʼépa jahechakuaavaʼerã?

¹⁷ Koʼág̃a tekotevẽ ñañembopyʼapeteĩ ani hag̃ua ñande ‘jerovia ou ikangy’, upévare ára ha ára jajapovaʼerã oñekotevẽva guive ñañemombarete hag̃ua (Rom. 4:20). Satanás ha umi oĩva ipoguýpe oñehaʼãmbaite ojoko pe tembiapo Jesús ohejavaʼekue ñandéve (Mat. 28:19, 20). Péro opuʼãramo jepe ñanderehe, jaikuaa porã ‘Ñandejára oikovéva ñandesalvaha, tenondete umi ojeroviávape hese’. Avei haʼe ‘oikuaa mbaʼéichapa osalváta umi ohayhúvape chupe’ (1 Tim. 4:10; 2 Ped. 2:9).

¹⁸ Koʼẽrõitéma Jehová ohundíta ko múndo aña. Cristo ohundietéta Ñandejára enemigokuérape, ha péicha ojehechaukáta Jehová oguerekoha derécho ñanesãmbyhy hag̃ua. Ndajaikuaái ningo arakaʼe ni mbaʼeichaitépa oikóta upéva, péro jaikuaa oikotaha itiempoitépe. Upéicharõ, jahechakuaákena ‘koʼã ára’ jaikoha iñimportantetereiha, ha ani ñaimoʼã umi mbaʼe oikóva koʼág̃a rupi ‘péichante voi oikoha oñepyrũ guive ko arapy’ (1 Tes. 5:1, ÑÑB; 2 Ped. 3:3, 4, JMP).

ÑAHAʼARÕKUAAVAʼERÃ

19, 20. ¿Mbaʼérepa jajeroviavaʼerã Ñandejárare?

¹⁹ Ñandejára ojapórõ guare yvyporakuérape, oipotavaʼekue oiko opa árare ha oaprende chugui ha hembiapokuégui. Eclesiastés 3:11 heʼi Jehová rehe: ‘Haʼe, hiʼárape ojapo opa mbaʼe iporãva; omoĩ avei yvypóra pyʼapýpe oikose hag̃ua opa árare ndaikatúiramo jepe oikuaapa Ñandejára ojapovaʼekue ha ojapovaʼerã’.

²⁰ ¡Ajépa javyʼaite Jehová rembipota yvyporakuérape g̃uarã nokambiái haguére arakaʼeve! (Mal. 3:6.) “Haʼe noñemoambuéi.” (Sant. 1:17, ÑÑB.) Jehová ningo pe ‘Mburuvicha Guasu tapiaite oikovéva’, ha ndokalkulái pe tiémpo yvyporakuéraicha (1 Tim. 1:17, JMP). Upévare, ‘jajeroviákena Ñandejára oporosalvávare’ (Miq. 7:7). Ha jasegi ko konsého: “Tapenekyreʼỹ ha tapendepyʼaguasúke opavave Ñandejára rehe pejeroviáva” (Sal. 31:25 [31:24, NM]).

[Nóta]

[Porandu ñahesaʼỹijóva]

[Nóta oĩva taʼanga ndive páhina 19]

Daniel ojeroviavaʼekue oñekumplitaha umi profesía

[Nóta oĩva taʼanga ndive páhina 21]

¿Reiporu porãpa ne tiémpo rejapo hag̃ua Jehová rembipota?