Áño 1886-pe, Casa Bíblica oĩva Alleghénype (Pensilvania, Estados Unidos) oguerahauka Chicago gotyo (Illinois) 100 lívro hérava La Aurora del Milenio, volúmen I. Charles Taze Russell oipotákuri umi lívro oñevende umi livreriaháre. Peteĩ livrería tuichavéva ha ovendéva umi lívro oñeʼẽva Ñandejárare, oheja La Aurora del Milenio. Péro dos semána haguépe oguerahakapaite jey umi lívro Casa Bíblicape. ¿Mbaʼérepa?

Peteĩ pastór ipochyeterei ohechávo ilívro ykére pe livreríape umi lívro La Aurora. Ha heʼi: “Ndapeipeʼáiramo pe estántegui umi lívro, che ha che irũnguéra rogueraháta ore livrokuéra ótro hendápe oñevende hag̃ua”. Pe livrería jára ndoperdeséigui, oguerahakapaite jey umi lívro La Aurora. Péro ndahaʼéi upéva añónte ojapóva, umi oñemoĩva hesekuéra oikuaa avei oñeguenohẽkaha jepi diáriope informasión oñeʼẽva upe lívrore ha oproivi avei hikuái upéva. ¿Mbaʼéichapa ko lívro pyahu ikatúta oñemog̃uahẽ umi hénte oikuaasévape Ñandejárape?

Upéva ojejapo umi kolportór rupive, upéicha oñehenoivaʼekue umi oiporupaitévape itiémpo Jehová servísiope. a Áño 1881-pe, rrevísta Zionʼs Watch Tower (La Torre del Vigía de Sión) heʼi oñekotevẽha 1.000 tapicha ikatútava oiporupaite itiémpo opredika ha omog̃uahẽ hag̃ua opavavépe umi puvlikasión oñeʼẽva la Bíbliare. Ndohupytýiramo jepe hikuái 1.000, heta oĩ ojapovaʼekue upéva ha omog̃uahẽ oparupiete Ñandejára marandu pe lívro La Aurora del Milenio rupive. Áño 1897-pe g̃uarã, umi kolportór rupive oñemeʼẽma un millón rupi upe lívro. Haʼekuéra oñemantene hag̃ua oiporu michĩmi pe pláta omeʼẽva umi ohejáva pe lívro térã ojesuskrivíva orresivi hag̃ua rrevísta Zionʼs Watch Tower.

¿Mávapa rakaʼe umi kolportór térã prekursór? Umíva apytépe oĩvaʼekue imitãva, ijedáva, soltéro, omendáva ha naifamíliaiva, péro oĩ avei ifamíliandi ojapóva. Umi kolportór rregulár opredika káda día pyhareve guive kaʼaru peve ha umi auxiliár katu dos óra káda día. Jaikuaaháicha, naentéroi ikatuvaʼekue ojapo ikolportorádo, tahaʼe hasykatu térã ambue mbaʼégui. Péro áño 1906-pe, umi ikatútavape ojapo ikolportorádo, peteĩ asambléape ojeʼe: Avave natekotevẽi “ijestúdio porã, iñarandueterei ha iñeʼẽkuaa” ojapo hag̃ua upéva.

Ñandeichaguánte avei umi tapicha ojapovaʼekue ko tembiapo ijojahaʼỹva haimete ko yvy tuichakuére.  Pór ehémplo peteĩ ermáno omombeʼu siete áñope 15 mil lívro rupi omeʼẽ hague. Haʼe heʼi: “Ndoikoivaʼekue chehegui kolportór avende hag̃ua lívro, síno añeʼẽ hag̃ua Jehováre ha amboʼe hag̃ua pe añetegua che rapichápe”. Umi kolportór ohohápente oñehendu porã chupekuéra omboʼévo la Biblia ha heta hetave umi oservíva Jehovápe.

Umi rrelihión omoakãva oapoʼi chupekuéra ha heʼi oikoha ovende lívro kállere. Pe rrevísta Zionʼs Watch Tower osẽvaʼekue 1892-pe heʼi: “Heta oĩ ndogueroviáiva haʼekuéra oñeʼẽha Jesús rérape ha nomombaʼéiva chupekuéra iñumílde ha ojesakrifika haguére, Jesús ojapoháicha”. Peteĩ kolportóra heʼi heta mbaʼe ijetuʼúva ohasa hague. Chupekuéra g̃uarã tuichaiterei mbaʼe oguereko peteĩ visikléta ha sapatu ijy porãva oho hag̃ua opredika heta hendápe. Ha isogue jave katu okambia lívro tembiʼúre. Heta opredika rire, oho jey hóga kárpape térã pe koty oalkilahápe, ikaneʼõramo jepe, ovyʼaiterei hikuái ha oke porã. Upéi oĩma pe “karréta umi kolportórpe g̃uarã” ojoguáva peteĩ kása rrodántepe, haʼekuéra voi ojapovaʼekue. Upéicha rupi, ndoperdeguasuvéima hikuái itiémpo ha saʼive ogasta. b

Áño 1893-pe ojejapo peteĩ asambléa Chicágope. Upépe ojejapo ñepyrũ umi diskúrso kolportorkuérape g̃uarãite. Umívape oñemombeʼu tembiasakue, mbaʼéichapa ikatu ojepredika porãve ha heta konsého oipytyvõtava chupekuéra. Peteĩ jey, ermáno Russell heʼi koʼã maranduhárape orambosa porã hag̃ua, pyhareve asaje hoʼu hag̃ua un váso kamby ha hakueterei jave hoʼu hag̃ua húgo roʼysã porã.

Peteĩ kolportór ohekáva asambleahápe iñirũrã opredika hag̃ua, ogueraha peteĩ sínta saʼyju. Umi kolportór ipyahuvéva osẽ umi ikatupyryvévandi oaprende hag̃ua chuguikuéra. Tekotevẽvaʼekue upéva ojehechágui peteĩ kolportóra ipyahúva ochuchuha ha heʼi peteĩ kuñakaraípe: “Nde, ndereipotái koʼã lívro, ¿ajépa?”. Haʼetépe upe kuñakarai heʼi oipotaha ha upéi oiko chugui Testígo.

Peteĩ ermáno oporandu: “¿Mbaʼépa iporãve ajapo: Asegínte ambaʼapo porã ha ameʼẽ mil dólar káda áño, térãpa iporãvéta oiko chehegui kolportór?”. Upérõ ojeʼe chupe: “Ñandejára oguerohorýta mokõive mbaʼe, péro hetave mbaʼe porã rehupytýta reiporúramo ne tiémpo iservísiope”. Peteĩ kolportóra hérava Mary Hinds heʼi: “Ko tembiapo rupive ikatu aipytyvõ hetave che rapichápe ha ndaipóri ambue mbaʼe iporãvéva upévagui”. Ha peteĩ ermána hiʼotĩetereivaʼekue hérava Alberta Crosby heʼi: “Koʼẽ koʼẽre amombaʼeve pe kolportorádo”.

Koʼág̃a umi kolportór katupyry familiare térã iñestudiantekue, ojapo avei iprekursorádo, upéicha osegi pe ehémplo porã oñemoĩvaʼekue chupekuéra. Oiméramo nde rógape ndaipóri peteĩ kolportór térã prekursór, ¿mbaʼérepa nde neremoñepyrũi ha upéicha remoĩ ehémplo ne famíliape? Rejapóramo upéicha, katuete haʼekuéra káda día ohayhuvéta avei pe prekursorádo.

[Nóta]

[Komentário oĩva páhina 32-pe]

Avave natekotevẽi “ijestúdio porã, iñarandueterei ha iñeʼẽkuaa”

[Nóta oĩva taʼanga ndive páhina 31]

Áño 1930 rupi, Alfred W. Osei oĩrõ guare Ghánape

[Nóta oĩva taʼanga ndive páhina 32]

Yvate: Edith Keen ha Gertrude Morris, Inglatérrape áño 1918 rupi. Iguýpe: Stanley Cossaboom ha Henry Nonkes Estados Unídospe, umi lívro ryrukue ypýpe