Jesús heʼivaʼekue hemimboʼekuérape: “Peñeñangareko umi fariséo levadúragui, upéva hína tovamokõi” (Luc. 12:1, NM). ¿Mbaʼépa Jesús heʼise upérõ? Mateo ohechauka Jesúspe g̃uarã ivaietereiha ‘umi fariséo omboʼéva’ (Mat. 16:12, NM).

La Bíbliape pe levadúra orrepresenta jepi umi mbaʼe oporombyaíva. Ha upeichaite ojapovaʼekue umi héntere umi fariséo opensáva ha omboʼéva. ¿Mbaʼérepa ipeligrosoite haʼekuéra omboʼéva?

1 Opensa hikuái ndojavyiha voi ha oapoʼi umi héntepe.

Peteĩ ehémplo rupive, Jesús ohechauka mbaʼeichaitépa oñemombaʼeguasu hikuái: “Pe fariséo oñemboʼy, ha oñemboʼévo heʼi ipyʼapýpe: ‘Aagradesete ningo ndéve Ñandejára ndajoguái haguére umi ótro kuimbaʼépe, haʼekuéra imonda, ndahekojojái ha oporomoakãratĩ, ha ndajoguái avei ko impuésto kovrahápe. Aajuna 2 vése káda semána, ha ameʼẽ pe diésmo opa mbaʼe arekóvagui’. Péro pe impuésto kovraha katu oñemboʼy mombyrymínte voi, ha ni noñanimái ojesaupi yvágare, upéva rangue ojepytiʼanupã ha heʼi: ‘Cheporiahuverekomína Ñandejára, che ningo ajapo heta mbaʼe ivaíva’” (Luc. 18:11-13, NM).

Péro Jesús oguerohory pe impuésto kovraha hekomirĩ haguére. Haʼe heʼi: “Oho rire hógape ko kuimbaʼe ohechauka hekojojaveha pe fariséogui. Upévare pe oñembotuicháva, ojeapoʼíta, ha pe oñemomirĩva katu oñembotuicháta” (Luc. 18:14, NM). Oñeñeʼẽ vaíramo jepe umi impuésto kovraháre, Jesús nopenái umi ñeʼẽnguére ha oipytyvõ umi ohendúvape chupe. Oĩ mokõi ijapyteguikuéra, Mateo ha Zaqueo, omoirũvaʼekue chupe.

Ikatu ñaimoʼã ñaneimportanteveha opavavégui ñandekatupyry rupi, ñanerembiapo hetágui kongregasiónpe, jahecha rupi ñande rapichakuéra mbaʼe avy térã ambue mbaʼére. Ñapensáramo upéicha tekotevẽ pyaʼe ñakambia. La Biblia omboʼe: “Pe mborayhu ipasiénsia ha imbaʼeporã, naiñenvidiósoi, ndaijejapói ha noñembotuichái. Pe mborayhu ningo ndojapói ivaíva, noñemohatãi haʼe heʼívapente, ndaipochyreíri ha ndaipyʼarói. Ndovyʼái umi mbaʼe vai ojejapóvare, ovyʼa guei añeteguáre” (1 Cor. 13:4-6, NM).

Ñapensavaʼerã Pablo opensa haguéicha. Haʼe omyesakã porã “Cristo Jesús ou hague yvy ári pekadorkuérape osalva hag̃ua”. Upéi heʼi: “Umi pekadór apytépe che pe ivaive vaʼekue” (1 Tim. 1:15, BNP).

Jajepyʼamongeta hag̃ua:

¿Ahechakuaápa che pekadorha avei ha aikotevẽha Jehová cheporiahuvereko ajesalva hag̃ua? ¿Térãpa apensa cheimportanteveha ótro ermánogui aréma aservi haguére Jehovápe, chepriviléhio heta térã chekatupyry rupi?

2 Ohechauka guaʼu irrelihiosoitereiha hikuái umi hénte oguerohory hag̃ua chupekuéra. Oĩse umi lugár iñimportantevehápe ha oipota oñembotuicha chupekuéra.

 Jesús heʼivaʼekue umi fariséore: “Opa mbaʼe ojapo hikuái ojechauka hag̃uánte. Upévare ombotuichave umi kahaʼi omoĩva isyváre ha ijyváre. Avei ombopuku pukuve umi fléko oĩva ijaóre. Oho jave karu guasuhápe oguapyse umi lugár iporãvévape. Ha umi sinagógape katu, oguapy tenondete. Oipota ojesaluda chupekuéra umi plasahárupi, ha enterove tohenói chupekuéra Mboʼehára” (Mat. 23:5-7, NM). ¡Ajépa idiferentete Jesús! Haʼe ningo Ñandejára Raʼy ha perfékto, upéicharamo jepe hekomirĩ. Peteĩ mitãkariaʼy ohenóirõ guare chupe “Mboʼehára Imbaʼeporãva”, haʼe ombohovái: “¿Mbaʼére piko ere chembaʼeporãha? Ñandejára añoite ningo pe imbaʼeporãva” (Mar. 10:17, 18, NM). Upe rire omboʼe hembiguaikuérape hekomirĩ hag̃ua, ha upearã ombojepyhéi chupekuéra (Juan 13:1-15).

Umi kristiáno tee ningo oservi iñermanokuérape ipyʼaite guive (Gál. 5:13). Koʼýte umi oserviséva ansiánoramo ojapovaʼerã upéva. Ndaivaíri peteĩ ermáno ‘oikose ansiánoramo’, péro oñehaʼãvaʼerã ohupyty upéva oipytyvõségui hapichápe. Ko priviléhio nomoĩri chupe peteĩ puésto iñimportantevévape. Opavave ansiáno ‘oñemomirĩvaʼerã ipyʼaite guive’, Jesús ojapo haguéicha (1 Tim. 3:1, 6; Mat. 11:29, NM).

Jajepyʼamongeta hag̃ua:

¿Atrata porãvépa umi orekóvape rresponsavilida kongregasiónpe aipotágui ojekuaa ajapóva térã oñemeʼẽve hag̃ua chéve priviléhio? ¿Añehaʼãvépa ajapo porã umi tembiapo ajechauka hag̃ua térã ikatu hag̃uáicha umi ótro cheguerochichĩ? ¿Añehaʼã memépa chevaleve ambue ermánogui?

3 Omoĩ hikuái heta mandáto ha kostúmbre, ha pe Léi ou ipohyieterei umi héntepe.

 Pe Léi oñemeʼẽvaʼekue Moisés rupive ohechauka mbaʼéichapa Israel omombaʼeguasuvaʼerã Jehovápe, péro noĩri pype heta detálle. Pór ehémplo oproivi oñembaʼapo sabadokue, péro ndeʼíri mbaʼépa ikatu ojejapo ha mbaʼépa ndaikatúi (Éxo. 20:10). Pe Léi ndeʼíri rupi heta detálle, haʼekuérantema omoĩ umi mandáto térã heʼi mbaʼe kostúmbrepa ojesegivaʼerã. Jesús katu okumpli porã pe Léi, péro arakaʼeve nopenái umi mandáto omoĩvare fariseokuéra (Mat. 5:17, 18; 23:23). Haʼe ontende mbaʼérepa Jehová omoĩvaʼekue pe Léi ha avei ohechakuaa iñimportanteha japoroporiahuvereko. Ha hemimboʼekuéra ofalla jave hendive, haʼe imbaʼerechakuaa. Pór ehémplo, pe pyhare ojejagarra mboyve chupe, ojerure mbohapy ijapóstolpe oñatende porã hag̃ua, péro haʼekuéra opyta oke. Upéicharõ jepe haʼe ontende chupekuéra ha heʼi: “Yvypórango ojapose iporãva, péro hete ikangy” (Mar. 14:34-42, NM).

Jajepyʼamongeta hag̃ua:

¿Aikópa amandase ermanokuérape ha haʼe chupekuéra mbaʼépa ojapovaʼerã? ¿Aipotápa ojejapo katuete umi mbaʼe haʼéva? ¿Ajopyetereípa che rapichakuéra ndive?

Káda uno jajepyʼamongetavaʼerã jahechakuaa hag̃ua mbaʼépepa idiferénte Jesús omboʼéva umi fariséo omboʼévagui, ha jahecha mbaʼépa ikatu jajapo porãve. Katuete upéva tuichaiterei ñanepytyvõta.

[Nóta oĩva taʼanga ndive páhina 28]

Umi fariséo oiporuvaʼekue kahaʼi oĩháme téysto oñeguenohẽva Ñandejára Ñeʼẽgui (Mat. 23:2, 5)

[Nóta oĩva taʼanga ndive páhina 29]

Ansianokuéra ndojoguái umi fariséope, hekomirĩ uvei oservívo hapichápe

[Nóta oĩva taʼanga ndive páhina 30]

¿Ñanembaʼerechakuaápa avei Jesús ojapo haguéicha?