“Jahechauka Jehová rekomimbipa peteĩ espéhoicha.” (2 COR. 3:18, NM)

¿MBAʼÉPA REMBOHOVÁITA?

¿Mbaʼérepa ikatu jahechauka Ñandejára rekomimbipa ñaneimperféktoramo jepe?

¿Mbaʼéichapa ñanepytyvõ ñane ñemboʼe ha umi rreunión jahechauka hag̃ua Ñandejára rekomimbipa?

¿Mbaʼépa ñanepytyvõta akóinte ñamombaʼeguasu hag̃ua Jehovápe?

1, 2. ¿Mbaʼérepa ikatu jahechauka Jehová rekomimbipa?

 ENTÉRO jajogua ñande tuvakuérape, michĩmi jepe raʼe. Upévare pyʼỹinte ojeʼe umi mitãʼípe: “¡Rejoguaite piko nde túvape!”. Térã peteĩ mitãkuñaʼípe: “¡Ajépa rejogua nde sýpe!”. Hiʼarive umi mitã ojapo jepi ituvakuéra ojapóva. Ha ñande, ¿ikatúpa ñahaʼanga ñande Ru yvagayguápe? Ndajahecháiramo jepe chupe, jahechakuaa mbaʼeichaguápa haʼe ñamañávo hembiapokuére, jastudiávo Iñeʼẽ ha jajepyʼamongeta hese, ha koʼýte jaikuaave chupe jajesarekóvo Jesús ehémplore ha umi mbaʼe omboʼevaʼekuére (Juan 1:18; Rom. 1:20). Upéicharõ ikatuhína ñahaʼanga Jehovápe térã jahechauka hekomimbipa.

² Ñandejára ojapo mboyve Adán ha Évape, oikuaamavaʼekue yvypóra ikatutaha ojapo hembipota, ohaʼanga ha ombotuicha chupe (elee Génesis 1:26, 27). Kristianokuéra ohaʼangávo Ijapoharépe, ohechauka Jehová rekomimbipa. Ha enterovéva ikatu jajapo upéva tahaʼe haʼéva ñande pire kolór, ñane retã, ñande estúdio porã térã ñande eskuelaʼíramo jepe. ¿Mbaʼérepa? La Biblia heʼi: “Ñandejára nomboykéi avavépe, oguerohory guei umi hénte hekojoja ha okyhyjéva chugui, tahaʼe haʼéva tetãygua” (Hech. 10:34, 35, NM).

3. ¿Mbaʼéichapa ñañeñandu jaservívo Jehovápe?

³ Umi unhído ohechauka Jehová rekomimbipa. Pór ehémplo, Pablo ohai: “Opavave ñande, oñemoʼãʼỹre ñande rova jahechauka Jehová rekomimbipa peteĩ espéhoicha ha ñakambia jahávo jajoguave hag̃ua chupe” (2 Cor. 3:18, NM). Moisés oguejýrõ guare mónte Sinaígui umi Diez Mandamiénto reheve, hova omimbipa oñeʼẽ rupi Ñandejárandi (Éxo. 34:29, 30). Jaikuaaháicha, ñande ndajahasái koʼã  mbaʼe ni ñande rova nomimbipái haʼéicha. Péro ikatu ñande rova ojajái javyʼaiterei rupi ñañeʼẽ jave ñande rapichándi Jehováre, ñamombeʼúvo mbaʼeichaguápa haʼe ha opa mbaʼe porã ojapótava yvypóra rehehápe. Peteĩ espéhoicha, umi unhído ha opavave kristiáno ohechauka Ñandejára rekomimbipa hekovépe ha opredika jave (2 Cor. 4:1). Upévare iporã ñañeporandu: “¿Ahechaukápa Jehová rekomimbipa aiko lájare ha apredika meme rupi pe marandu porã?”.

JAHECHAUKÁKENA JEHOVÁ REKOMIMBIPA

4, 5. a) ¿Mbaʼépa ñambohovaivaʼerã opavave yvypóra Pablo ojapo haguéicha? b) ¿Mbaʼépa ojapo ñanderehe pe pekádo?

⁴ Enterove kristiáno ñamombaʼeguasuse ñande Apoharépe opa mbaʼépe. Péro heta vése ndaikatúi jahupyty upéva. Pablo ohasavaʼekue avei ko mbaʼére (elee Romanos 7:21-25). Haʼe omombeʼu mbaʼérepa hasy jepi yvyporakuérape ombotuicha hag̃ua Jehovápe hekoitépe: ‘Opavave niko opeka ha mombyry oĩ Ñandejára rekomimbipágui’ (Rom. 3:23). Entéro yvypóra ningo Adán ñemoñare, upévare opavave ñaime pekádo poguýpe (Rom. 5:12; 6:12).

⁵ Péro, ¿mbaʼépa pe pekádo? Upéva hína opa mbaʼe ivaíva Jehovápe g̃uarã, oñemoĩva iléi ha hembipotáre. Pe pekádo ñandereja vai Ñandejára renondépe ha ndaikatúi jahechauka hekomimbipa. Ñambojojakuaa umi opoívare flécha ha ojavýva pe ohaʼãva. Ikatu japeka jajaposégui voi pe ivaíva térã jahechakuaaʼỹetére (Núm. 15:27-31). Pe pekádo ñandestira ha ñanemomombyry ñande Apoharégui (Sal. 51:5; Isa. 59:2; Col. 1:21). Upévare hetaiteve hénte ndoikuaái Jehovápe ha ndaikatúi ohechauka Ñandejára rekomimbipa. Upéicharõ, jaʼekuaa ndaiporiha ambue mbaʼe ombyaivéva yvyporakuérape pekádogui.

6. ¿Mbaʼérepa ikatu jahechauka Ñandejára rekomimbipa japekáramo jepe?

⁶ Japekáramo jepe, Ñandejára ‘omeʼẽ ñandéve esperánsa’ (Rom. 15:13, ÑÑB). Ojapo tekotevéva ñandepeʼa hag̃ua pekádo poguýgui: omeʼẽ sakrifísioramo itaʼýra Jesucristo. Jajeroviávo upe sakrifísiore, ndajaikovéima ‘pekádo rembiguáiramo’ ha ikatúma jahechauka Jehová rekomimbipa (Rom. 5:19; 6:6, ÑÑB; Juan 3:16). Ñaĩ porãramo Jehová renondépe, haʼe katuete ñandeguerohorýta koʼág̃a, ha amo gotyove ñandeperféktota ha jaikovéta opa ára g̃uarã. ¡Ajépa imbaʼeporãite Ñandejára ohejávo jahechauka hekomimbipa japekáramo jepe!

MBAʼÉICHAPA JAHECHAUKA ÑANDEJÁRA REKOMIMBIPA

7. ¿Mbaʼépa tekotevẽ jajapo jahechaukaséramo Ñandejára rekomimbipa?

⁷ Ikatu hag̃uáicha jahechauka Jehová rekomimbipa, tekotevẽ ñarrekonose ñandestiraha umi mbaʼe vai (2 Cró. 6:36). Jahechakuaa rire upéva, ñañehaʼãmbaitevaʼerã jajejokokuaa. Péicha añoite ikatúta ñambotuicha Ñandejárape. Pór ehémplo, ¿mbaʼépa jajapóta oiméramo jahecha jaikóvo pornografía? Jahechakuaavaʼerã ñaikotevẽha ñanepytyvõva ha ñañemboja umi ansiáno rendápe ñañemoĩ porã jey hag̃ua Jehovándi (Sant. 5:14, 15). Upéva raẽvete tekotevẽ jajapo ñambotuicha hag̃ua Jehovápe opa mbaʼépe. Upéicharõ, opavave jaservíva Jehovápe tekotevẽ jajepyʼamongeta meme jahechakuaa hag̃ua jaikopañaína haʼe oipotaháicha (Pro. 28:18; 1 Cor. 10:12). Jahechaukaséramo Ñandejára rekomimbipa ñañehaʼãmbaitevaʼerã ani hag̃ua ipuʼaka ñanderehe umi mbaʼe vai ñandestiráva.

8. ¿Mbaʼépa jajapokuaa ñaneimperféktorõ jepe?

 ⁸ Jesús añoite ohechaukavaʼekue hekoitépe Jehová rekomimbipa ha ombotuicha chupe opa mbaʼe ojapóvape. Ndaipóri ambue yvypóra ojapo porãvéva chugui upéva. Ñaneimperféktoramo jepe ikatu ñahaʼanga Jesúspe, péro ñañehaʼãmbaitevaʼerã upearã (1 Ped. 2:21). Jehová ohechakuaa ñañehaʼã jave ñambotuicha chupe ha ñanevendesi upévare.

9. ¿Mbaʼérepa la Biblia iñimportantete kristianokuérape g̃uarã?

⁹ Ñandejára Ñeʼẽ omyesakã ñandéve ñande rape ha ñanepytyvõ ñakambia hag̃ua. Upévare iñimportanteterei jalee, jajepyʼamongeta hese ha jastudia porã umi mbaʼe oĩva pype (Sal. 1:1-3). Jaleéramo káda día, tuichaiterei ñanepytyvõta (elee Santiago 1:22-25). Jaikuaavévo la Biblia, imbaretevéta ñande jerovia, ñamboykéta pe pekádo ha ñanekyreʼỹta jajapo hag̃ua opa mbaʼe Jehová oipotaháicha (Sal. 119:11, 47, 48).

10. ¿Mbaʼéichapa pe ñemboʼe ñanepytyvõ jaservi porã hag̃ua Jehovápe?

¹⁰ Jahechauka hag̃ua Ñandejára rekomimbipa, tekotevẽ avei jasegi ko konsého: “Peñemboʼe tapiákena” (Rom. 12:12, BNP). Upéicharõ, tekotevẽ jajerure Jehovápe tañanepytyvõ ñamombaʼeguasu hag̃ua chupe haʼe oipotaháicha. Iporã avei jajerure chupe tomeʼẽ ñandéve espíritu sánto, taimbareteve ñande jerovia, tañanepytyvõ jagueropuʼaka hag̃ua umi mbaʼe ñandepyʼaraʼãva ha jaiporu hag̃ua “hekoitépe pe ñeʼẽ añetegua” (2 Tim. 2:15, BNP; Mat. 6:13; Luc. 11:13; 17:5). Jajeroviavaʼerã ñande Ru yvagayguáre peteĩ mitã ojeroviaháicha itúvare. Jajeruréramo Ñandejárape tañanepytyvõ jaservi porãve hag̃ua chupe, jajeroviavaʼerã avei ñanerendutaha ha ani ñaimoʼã ñane ñemboʼe ostorvataha chupe. Ikatu ñañemboʼe jaagradese ha ñamombaʼe hag̃ua chupe. Jajerure tohechauka ñandéve mbaʼéichapa ñambohováita umi mbaʼe ijetuʼúva. Avei tañanepytyvõ ñamombaʼeguasu hag̃ua héra porãite ñande servísio rupive (Sal. 86:12; Sant. 1:5-7).

11. ¿Mbaʼéichapa ñanepytyvõ umi rreunión jahechauka hag̃ua Ñandejára rekomimbipa?

¹¹ Ñandejára oenkarga pe “tembiguái jeroviaha ha iñarandúvape” oñangareko hag̃ua ijovechakuéra ohayhuetévare (Mat. 24:45-47, NM; Sal. 100:3). Ko “tembiguái” oipota jahechauka Jehová rekomimbipa. Umi rreunión ñanepytyvõ ñamoĩ porã hag̃ua ñande rekove, peteĩ sástre oarreglaháicha peteĩ tráhe (Heb. 10:24, 25). Upévare iñimportanteterei ñag̃uahẽ voimi umi rreunionrã. Jajepokuaáramo ñag̃uahẽ tárde, jajavýta peteĩ párte ñanemombaretéva jaservi porãve hag̃ua Jehovápe.

ÑAHAʼANGÁKENA ÑANDEJÁRAPE

12. ¿Mbaʼéichapa ñahaʼanga Jehovápe?

¹² Ikatu hag̃uáicha jahechauka Jehová rekomimbipa tekotevẽ ñahaʼanga chupe (Efe. 5:1). Upearã jahechavaʼerã opa mbaʼe haʼe ohechaháicha. Ndajajapóiramo upéva, ñamotĩta chupe ha jajeperhudikáta. Ko múndo vaiete oĩ Satanás poguýpe, upévare ndajachaʼeivaʼerã umi mbaʼe Ñandejára ndaijaʼéivare ha jahayhuvaʼerã ñandepyʼaite guive umi mbaʼe haʼe ohayhúva (Sal. 97:10; 1 Juan 5:19). Jahechakuaavaʼerã tekotevẽha ñamombaʼeguasu Jehovápe opa mbaʼe jajapóvape, péicha añoite jaservi porãta chupe (elee 1 Corintios 10:31).

13. ¿Mbaʼérepa ndajachaʼeivaʼerã pe pekádore, ha mbaʼépa jajapovaʼerã?

¹³ Jehová ndaijaʼéi pe pekádore, ha ñande avei upéicha vaʼerã. Upévare ñañemomombyryvaʼerã pe pekádogui, jaiko  rangue ñapensa moõite pevépa ikatu ñag̃uahẽ jaʼa mboyve. Pór ehémplo, ñamboyketevaʼerã umi tapicha oñemoĩvape Ñandejárare térã apóstata. ¿Mbaʼérepa? Jajeheʼáramo umichaguáre ndaikatumoʼãi ni mbaʼevéicharõ jahechauka Jehová rekomimbipa (Deu. 13:6-9). Upéicharõ, jajehekýikena oimeraẽ opuʼãvagui Ñandejárare térã umi heʼívagui ijehe kristianoha péro ojapo Jehovápe ndogustáiva, tahaʼe jepe raʼe ñane hénte (1 Cor. 5:11). Mbaʼevete ndajahupytymoʼãi jaikóramo ñambohovaise apostatakuérape térã oimeraẽ oñeʼẽ vaívape Jehová organisasión rehe. Avei naiporãmoʼãi jaikuaaségui rei jahecháramo umi mbaʼe haʼekuéra omboʼéva, tahaʼe lívro, rrevísta, térã Internétpe. Koʼã mbaʼe ñandeperhudika ha omokangýta ñande jerovia (elee Isaías 5:20 ha Mateo 7:6).

14. ¿Mbaʼépepa ñahaʼangavaʼerã Ñandejárape, ha mbaʼérepa?

¹⁴ Ñahaʼanga hag̃ua Ñandejárape tekotevẽ avei jahayhu ñande rapichakuérape (1 Juan 4:16-19). Jajoayhúramo jahechaukañaína ñande haʼeha Jesús remimboʼe ha Jehová rembiguái (Juan 13:34, 35). Ñaneimperféktoramo jepe ñañehaʼãmbaitevaʼerã ha jahechauka japorohayhuha. Jajapóramo upéva ha hetave mbaʼe porã, japororrespetáta ha ndajaʼamoʼãi umi pekádo ivaietévape (2 Ped. 1:5-7).

15. ¿Mbaʼéichapa ñanepytyvõ pe mborayhu?

¹⁵ Pe mborayhu ñanemomýi jatrata porã hag̃ua opavavépe (Rom. 13:8-10). Jahayhúrõ ñane ména térã ñane rembirekópe, arakaʼeve nañambotavymoʼãi chupe. Jahayhúramo ansianokuérape ha ñamombaʼe ojapóva, ñaneñeʼẽrendúta ha ñañemoĩta ipoguýpe. Umi imitãva ohayhúrõ ituvakuérape, omombaʼe ha iñeʼẽrendúta chupekuéra, ha noñeʼẽvaimoʼãi hesekuéra. Jahayhúramo ñande rapichakuérape, japororrespetáta ha ndajaʼapoʼimoʼãi avavépe (Sant. 3:9). Ha umi ansiáno ohayhúramo ermanokuérape, katuete otrata porãta chupekuéra (Hech. 20:28, 29).

16. ¿Mbaʼérepa iñimportánte japorohayhu japredika hag̃ua?

¹⁶ Jahechaukavaʼerã avei japorohayhuha ñamombeʼúvo pe marandu porã. Jahayhu rupi Jehovápe ñande pyʼaite guive, akóinte japredika, jepe heta nañanerenduséi térã ijarhél ñandéve. Upéicha avei jajeprepara porã ha ñañehaʼãmbaite ñandekatupyry japredika hag̃ua. Añetehápe jahayhúrõ Jehovápe ha ñande rapichakuérape, ñamombaʼetereíta ko tembiapo ha jajapóta vyʼapópe. Ha nañapensamoʼãi ipohyiha térã ñakumplivaʼerãha oĩgui ñandejopýva (Mat. 10:7).

AKÓINTE JAHECHAUKA JEHOVÁ REKOMIMBIPA

17. ¿Mbaʼéichapa ñanepytyvõ jahechakuaáramo ivaiha pe pekádo?

¹⁷ Hetaiterei tapicha ndohechakuaái mbaʼeichaitépa ivai pe pekádo, péro ñande jaikuaa porã ivaiha. Upévare jahechakuaa tekotevẽha ñañehaʼãmbaite ani hag̃ua jajapo ivaíva, upéicha jahechaukáta Ñandejára rekomimbipa. Ñarrekonoséramo ñaneimperfektoha, ñane konsiénsia ombaʼapo porãta ha ñanepytyvõta jajehekýi hag̃ua umi mbaʼe vai ñandestirávagui (Rom. 7:22, 23). Ha ñanekangýramo jepe, Jehová ñanepytyvõta ñaneñeʼẽrendu hag̃ua chupe tahaʼe haʼéva ñane situasión (2 Cor. 12:10).

18, 19. a) ¿Mbaʼéichapa ikatu ñandepuʼaka Satanás ha idemoniokuérare? b) ¿Mbaʼépa jajedesidivaʼerã jajapo?

¹⁸ Jahechauka hag̃ua Ñandejára rekomimbipa tekotevẽ avei ñandepuʼaka Satanás ha idemoniokuérare, ha upearã ñanepytyvõta  pe ‘armadúra Jehová omeʼẽva ñañorairõ hag̃ua’ (Efe. 6:11-13). Satanás koʼag̃aite peve oipota oñemombaʼeguasu chupe Ñandejárape rangue. Avei oiporu opaichagua ñuhã ñanemomombyry hag̃ua Jehovágui. Upévare, peteĩ kuimbaʼe, kuña térã mitã iñeʼẽrendu ha omombaʼeguasúramo Ñandejárape, iñimperféktoramo jepe, ohechauka Satanás ijapuetereiha. ¡Ha ñaime hetaiterei jajapóva upéva! Opáichavo, akóintekena ñamombaʼeguasu Jehovápe ojejapoháicha yvágape. Umi ánhel heʼi: ‘Ore Jára, ndéve añoite ija opavave nembotuicha, nemombaʼeguasu ha nembopuʼakapa, nde rejapopa haguére opa mbaʼe, ha ne rembipota rupi oiko ha oñemoingovaʼekue opa mbaʼe oĩva’ (Rev. 4:11, BNP).

¹⁹ Jahechaukákena akóinte Ñandejára rekomimbipa, toiko la oikóva. Jehová ipyʼarory ohechávo mbaʼeichaitépa heta yvypóra oñehaʼãmbaite ojapo ikatúva guive ohaʼanga hag̃ua chupe ha ohechauka hekomimbipa (Pro. 27:11). David heʼi haguéicha, ñande avei jaʼe: “Che pyʼaite guive romombaʼeguasúta, nde che Ruete, che Jára tee, ha [ambotuicháta] nde réra opa peve che arakuéra” (Sal. 86:12, ÑÑB). Opavave oservíva Ñandejárape ipyʼaite guive ohechaukáta hekopete Jehová rekomimbipa ha omombaʼeguasúta chupe opa árare. ¡Ajépa iporãitéta upéva! Ha nde, ¿rehechaukasépa avei Jehová rekomimbipa opa árare? Oiméramo upéicha, ¿rehechaukámapa reikóvo opa mbaʼe rejapóvape?

[Porandu ñahesaʼỹijóva]

[Nóta oĩva taʼanga ndive páhina 27]

¿Rehechaukápa Jehová rekomimbipa rejapóvo koʼã mbaʼe?