Omombeʼu Elva Gjerde

Ojapóma setenta áño, peteĩ kuimbaʼe orevisita hague ha che túvape omeʼẽ peteĩ konsého okambiáva che rekove. Upe ára guive heta tapicha chepytyvõ avei. Ha iporãveha akonsegi che amigorã amombaʼevéva opa mbaʼégui. Amombeʼumíta mbaʼérepa haʼe upéicha.

ÁÑO 1932-pe anase Sýdneype (Australia). Che tuvakuéra ogueroviavaʼekue oĩha Ñandejára, péro ndohóiva tupaópe. Che katu akyhyje Ñandejáragui, che sy heʼi rupi chéve: “Haʼe ohechapaitehína rejapóva, ha rejeporta vaíramo, ndekastigáta”. Upéicharõ jepe, chegustaiterei la Biblia. Sábado ha domingokue che tia oúmi ore rendápe ha omombeʼu chéve heta istória igústova oĩva la Bíbliape. Upévare vyʼápe ahaʼarõmi chupe.

Chemitãme, chemanduʼa che túva olee hague heta lívro, peteĩ kuñakarai testígo de Jehová ijedámava omeʼẽvaʼekue che sýpe. Omombaʼeterei rupi umi lívrope heʼíva, oñepyrũ ostudia la Biblia. Peteĩ pyharépe, che túva ostudia aja peteĩ Testígondi ohechakuaa ajapysaka ñemiha hesekuéra. Heʼíta jave chéve aha hag̃ua ake, pe Testígo heʼi chupe: “Ehejána Élvape tohendumi avei”. Upe guive okambia che rekove ha añepyrũ areko Jehovápe che amígoramo.

Upe riremínte, che túvandi rohóma rreunionhápe, ha haʼe oñepyrũma okambia heta mbaʼépe ha ndahaʼevéima ijarheletereíva. Che sy ha che ermáno Frank ohechávo mbaʼéichapa la Biblia oporopytyvõ, oñepyrũ avei oho rreunionhápe. a Enterovéva roñakãrapuʼã ha rojevautisa testígo de Jehováramo. Upe tiémpo guive añepyrũ aguereko heta amígo ha amíga ijedámava, haʼekuéra chepytyvõ adesidi porã hag̃ua ha ahasa jave heta mbaʼe ijetuʼúva.

AIPORAVO PE TEMBIAPO IPORÃVÉVA

Kongregasiónpe avyʼaiterei aimévo umi ijedavéva ndive. Pór ehémplo, ermána Alice Place ningo opredika ñepyrũvaʼekue ore famíliape ha chupe ahecha che avuélaramo. Haʼe chepytyvõvaʼekue apredikakuaa hag̃ua ha avei chemokyreʼỹ ajevautisa hag̃ua, upéicha rupi arekópe 15 áño ajevautisa.

Che amigoite vaʼekue avei peteĩ matrimónio ijedámava, Percy ha Madge (Margaret) Dunham, haʼekuéra ojepyʼapy cherehe ha chepytyvõ aiporavo hag̃ua pe tembiapo iporãvéva. Chéve ningo chegustaiterei matemática ha upévare astudiasevaʼekue amboʼe hag̃ua. Péro koʼã ermáno ehémplo chepytyvõ akambia hag̃ua. Áño 1930 rupi haʼekuéra oservi misionéroramo Letóniape. Upéi  oñepyrũrõ guare pe Segunda Guerra Mundial oñeinvita chupekuéra oho hag̃ua oservi Betélpe, oĩva Austráliape. Haʼekuéra omombeʼúmi chéve umi mbaʼe ohasavaʼekue misionéroramo. Upe guive ahechakuaa iporãveha amboʼe la Biblia che rapichápe amboʼe rangue matemática. Upévare haʼe ág̃ante aservitaha avei misionéraramo.

Percy ha Madge Dunham chemokyreʼỹ ajapo hag̃ua che prekursorádo, upéva chepytyvõtagui ahupyty hag̃ua pe ajaposéva. Upéicha rupi 1948-pe, arekórõ guare 16 áño añepyrũ ajapo che prekursorádo ha upéicha amoirũ umi diez prekursór vyʼápe oservívape kongregasión Húrstvillepe (Sydney).

Cuatro áño pukukuére apredika avei cuatro puévlope, oĩva Nueva Gales del Sur ha Queensland-pe. Betty Law (koʼág̃a, Remnant) ostudia ypy vaʼekue chendive la Biblia. Haʼe dos áño ijedave chehegui ha horyeterei. Tiémpo rire, rojapo oñondive ore prekursorádo táva Cówrape, opytáva 230 kilómetro oéste gotyo Sýdneygui. Sapyʼamínte roservíramo jepe oñondive, koʼág̃a peve oñoamigaite gueteri.

Tiémpo rire añenombra prekursóra espesiál ha añemondo aservi hag̃ua Narrandérape, peteĩ puévlo opytáva 220 kilómetro suroéste gotyo Cówragui. Upépe aservi Joy Lennox ndive (koʼág̃a, Hunter), peteĩ prekursóra ikyreʼỹ ha ijedavéva avei chehegui dos áño. Upépe ore añoiténte roĩ, ndaipóri ótro Testígo. Ropyta Ray ha Esther Irons rógape, peteĩ matrimónio imbaʼeporãitereíva, haʼekuéra cuatro ifamília, peteĩ kuimbaʼe ha mbohapy kuña, ha enterovete oñepyrũ ostudia la Biblia. Éntre semanakue karai Ray ha itaʼýra oñangareko ovechakuérare ha oñotỹ trígo peteĩ kokue opytávape puévlo orílla gotyo. Esther ha imembykuñanguéra katu oñangareko peteĩ pensión rehe. Upépe opyta doce tapicha ombaʼapóva ferrokarrílpe. Domingokue, Joy ndive rojapo asádo chupekuéra ha upe famíliape g̃uarã. Upéva orepytyvõ ropagaʼimi hag̃ua ore alkilér. Upe rire romopotĩ pe mesa ha rohesaʼỹijo Ñemañaha Ray ha ifamiliakuéra ndive. Upéi oiko chuguikuéra testígo de Jehová. Haʼekuéra hína umi oĩ ypy vaʼekue kongregasión Narrandérape.

Áño 1951-pe aha peteĩ asambléa ojapóvape umi testígo de Jehová Sýdneype. Upérõ ojejapo avei peteĩ rreunión kárpa guýpe umi prekursór oservisévape g̃uarã misionéroramo ha 300 ári roime upe rreuniónpe. Nathan Knorr, oĩva Betel de Brooklynpe, heʼi tekotevẽtereiha ojegueraha pe marandu porã oparupiete ko yvy ape ári. Opavavénte rohendu porã chupe. Tiémpo rire, umi prekursór apytégui heta oĩ omoñepyrũvaʼekue predikasión Pacífico sur ha ambue hendápe. Che katu aime umi 17 prekursór Australiaygua apytépe, oñeinvitáva 1952-pe oho hag̃ua Escuela de Galaad kláse 19-pe. Avyʼaiterei arekópe 20 áño ahupytýma haguére pe aipotaitevaʼekue, aservíma misionéraramo.

TEKOTEVẼVAʼEKUE AKAMBIA HETA MBAʼÉPE

Escuela de Galaad chepytyvõ aikuaa hag̃ua heta mbaʼe ha omombarete che jerovia, ha ndahaʼéi upéva añónte, chepytyvõ avei akambia hag̃ua che lája. Chepyahúpe, opa mbaʼépe ajopyeterei che rapichakuéra ndive ha koʼýte ahaʼarõiterei chehegui ajapo porã opaite mbaʼe. Avei heta mbaʼépe chesanturronaiterei, pór ehémplo, peteĩ árape naimoʼãiete ahechávo ermáno Knorr ohuga béisbol umi mitãrusu Betelpegua ndive.

Umi ermáno omboʼéva Galaádpe ikatupyry ha ohasáma heta mbaʼe. Haʼekuéra oiméne ohechakuaáraʼe che lája ha mbaʼéichapa añeñandu. Upévare ojepyʼapy cherehe hikuái ha chepytyvõ ahecha  hag̃ua opa mbaʼe hekópe porã. Mbeguekatúpe ahechakuaa Jehová ohayhuha isiérvope ha omombaʼeha ojapóva, ndojopýi avavéndi ha ndojeruréi peteĩ mbaʼe ikatuʼỹva ojejapo. Umi che kompañéro Galaadpegua heta chepytyvõ avei. Umíva apytégui, peteĩ ermána heʼi chéve: “Elva, Jehová ningo ndoikói tukumbo ipópe. ¡Anína rejopyeterei nendive!”. Upéva opokoiterei cherehe ha tuicha chepytyvõ.

Romohuʼã rire Escuela de Galaad, cinco roñemondo Namíbiape (África). Sapyʼaitépe oñondivepa ochenta estúdioma roreko. Chegustaiterei upe tetã ha avyʼa aservi haguére misionéraramo. Péro ajegusta peteĩ che irũnguére Galaádpe, chupe oñemondovaʼekue Suízape ha oservi superintendénte de sirkuítoramo. Un áño haguépe ava upe tetãme ha romenda. Upéi amoirũ chupe iservísiope.

AHASA PETEĨ MBAʼE IJETUʼUETEREÍVA

Rovyʼaitereivaʼekue ore asignasiónpe ha cinco áño rovisita haguépe umi kongregasión, roñeinvita roho hag̃ua Betélpe, oĩva Suízape. Orepyʼarory roservi haguére peteĩ família oĩhápe umi ermáno ha ermána ijedáva ha ijerovia mbaretéva.

Péro upe riremínte oiko cherehe peteĩ mbaʼe ivaietereíva, che ména chetraisiona chéve ha Jehovápe. Upéi chereja ha apyta vaieterei, ndaikuaái voi mbaʼépa oikovaʼerãmoʼã chehegui umi ermáno ha ermána ijedavéva Betelpegua nachepytyvõirire. Añeʼẽse jave, haʼekuéra cherendu ha aimese jave cheaño, cherejánte hikuái. Koʼã ermáno heʼíva chéve tuicha chembopyʼaguapy ha imbaʼeporãgui chendive, ikatuvaʼekue agueropuʼaka upe mbaʼe ijetuʼuetéva ahasavaʼekue. Avei chepytyvõ añemoag̃uive hag̃ua Jehováre.

Chemanduʼa umi konsého iporãva omeʼẽvaʼekuére chéve umi ermáno ijedáva ha heta mbaʼéma ohasáva. Pór ehémplo, Madge Dunham heʼivaʼekue chéve: “Elva, reservi aja Jehovápe rehasáta heta mbaʼe ikatúva omokangy nde jerovia, ha pe ijetuʼuvéva ouvaʼerã umi rehayhúvagui. Upéva oiko vove eñakãrama hatã vaʼerã Jehováre, chupe ningo reservi, ndahaʼéi peteĩ yvypóra imperféktope”. Upe konsého tuichaiterei chepytyvõ ahasárõ guare pe mbaʼe ijetuʼuetéva. Upévare adesidi arakaʼeve ndahejamoʼãiha umi mbaʼe vai ojapóva che ména chemomombyry Jehovágui.

Upe rire aha jey Austráliape aiko hag̃ua ag̃uive che hentekuéragui ha ajapo jey che prekursorádo. Aviaha aja peteĩ várkope, añemongeta la Biblia heʼívare umi tapicha oĩvandi upépe. Umíva apytépe oĩ peteĩ kuimbaʼe Noruegaygua hérava Arne Gjerde ha ogustaiterei chupe upe ohendúva la Bíbliagui. Tiémpo rire orevisita Sýdneype. Pyaʼe voi oñakãrapuʼã Jehová servísiope ha ojevautisa. Romenda 1963-pe ha dos áño haguépe onase Gary.

AHASA JEY PETEĨ MBAʼE IJETUʼUETEREÍVA

Arne, Gary ha che roikovaʼekue vyʼápe. Upe riremínte Arne ombotuichamie ore róga ou hag̃ua oiko orendive che ru ha che sy ijedámava. Péro seis áño romenda haguépe, rohasa peteĩ mbaʼe ijetuʼuetereíva: Peteĩ doktór heʼi oréve Arne orekoha kánser serevrál. Are osegi tratamiénto, ojapouka radioterapia ha káda día añangareko hese ospitálpe. Ñepyrũrã ojapo porã hese upe tratamiénto, péro upéi ojagarra jey chupe peteĩ atáke serevrál. Umi doktór heʼi chéve mbykymíntema oikovetaha,  upéicharõ jepe Arne oñeñandu porã jey, roho ógape ha mbeguekatúpe aipytyvõ chupe ojerrekupera hag̃ua. Haʼe ningo oservi ansiánoramo ha tiémpo riremi oguata ha ojapo jey umi tembiapo kongregasionpegua. Haʼe ndahovasýi voi ha horyeterei, upéva tuicha oipytyvõ chupe ha chéve avei añangareko hag̃ua hese.

Áño 1986-pe Arne hasykatuete jey. Upe tiémpope che sy ha che ru omanóma ha upévare rosẽ Sýdneygui ha rova peteĩ lugár iporãitereívape, hérava Montañas Azules, roiko hag̃ua ag̃uive ore amigokuéragui. Upe rire Gary omenda Karin rehe, peteĩ kuñataĩ ijuky ha ohayhúva Jehovápe. Tiémpo rire, heʼi oréve hikuái rova hag̃ua hendivekuéra peteĩ óga opytávape ag̃uiete yma roiko haguégui Arne ndive, ha rojapo upéicha.

Dieciocho mése pukukue Arne oiko tupápe, nopuʼãvéi ha akóinte oikotevẽ oñeñangareko hese, upéicha rupi che apytámante hendive. Káda día astudia rupi dos óra la Biblia ha umi puvlikasión, ajuhu heta konsého chepytyvõva agueropuʼaka hag̃ua upe situasión. Umi ermáno ijedáva oĩva kongregasiónpe, umíva apytépe umi ohasavaʼekue che ahasáva, chemokyreʼỹeterei che visitávo hikuái. Arne omano abril 2003-pe, haʼe omanoite peve ojerovia Jehová omoingove jeytaha umi omanovaʼekuépe.

PE CHEPYTYVÕVEVAʼEKUE

Chepyahúpe, aipotavaʼekue osẽ opa mbaʼe che aipotahaichaite, péro upéi aaprende heta mbaʼe nosẽiha pe ñahaʼarõháicha. Ahasa heta mbaʼe chembovyʼáva, péro avei heta mbaʼe ijetuʼúva: Chemoakãratĩ che ména ha chereja, upéi amenda jey, péro upéva ou ikánser ha omano. Koʼã tiémpope, heta tapicha chepytyvõ ha chembopyʼaguapy. Péro hetave chepytyvõvaʼekue Jehová, pe ‘ikaraietéva [...], iñakãrague morotĩva ovecha rague ñemopotĩmbyréicha’ (Dan. 7:9). Iñeʼẽ rupive, haʼe chepytyvõ akambia hag̃ua ha aaprende heta mbaʼe porã aservi rupi misionéraramo. Ahasa jave umi mbaʼe ijetuʼúva, Ñandejára “mborayhu chemombarete” ha “chembovyʼa” (Sal. 94:18, 19). Avei akóinte chemokyreʼỹ ha ohechauka chéve cherayhuha che família ha ermanokuéra, umíva apytépe umi ijedáva. Káda uno ohechauka haʼeha peteĩ ‘ermáno jajejopy vai jave’ (Pro. 17:17).

Job heʼi: “Iñarandu umi itujáva, oikove puku hague omoarandu chupekuéra” (Job 12:12). Ajepyʼamongetávo che rembiasakuére, haʼekuaa añeteha Job heʼivaʼekue. Umi ermáno ha ermána ijedámava konsého heta chepytyvõvaʼekue, chembopyʼaguapy ha aaprende chuguikuéra hetaiterei mbaʼe. Tuicha mbaʼe chéve g̃uarã areko chupekuéra che amígoramo.

Koʼág̃a arekóma 80 áño, ha chehaitéma pe ijedavéva. Umi mbaʼe ahasavaʼekue chepytyvõ ahechakuaa hag̃ua mbaʼépa oikotevẽ umi che rapicha cheavegua. Avyʼaiterei ikatu haguére avisita ha aipytyvõ chupekuéra. Añeñandu porã avei ahasávo tiémpo mitãrusu ha mitãkuñanguéra ndive, haʼekuéra chemokyreʼỹ ha chemombarete. Ha ojerure jave chéve hikuái aipytyvõ térã añemoñeʼẽ hag̃ua chupekuéra, avyʼaiterei ikatu haguére ajapo upéva.

[Nóta]

[Nóta oĩva taʼanga ndive páhina 14]

Joy Lennox ndive, roservírõ guare prekursóraramo

[Nóta oĩva taʼanga ndive páhina 15]

Elva, umi ermáno Betelpegua ndive Suízape (1960)

[Nóta oĩva taʼanga ndive páhina 16]

Añangarekórõ guare Arne rehe