GEORGE ha Manon ningo testígo de Jehová oikóva Países Bájospe, haʼekuéra opredikávo peteĩ kuñakarai ijedámavape osẽ otrata vai chupekuéra. George ha Manon oikuaa pe kuñakarai dos vésema opyta hague viúda, omano hague peteĩ imemby ha orekoha artritis. Oñemongeta aja hikuái hendive ipochypoimie, péro ndahoryiete voi chupekuéra.

George ohechakuaa pe kuñakarai oikoha haʼeño ha oñamargaha, upévare heʼi Mánonpe oho jeývo hendápe ogueraha hag̃ua chupe yvoty. Upéicha ojapo hikuái, ha upe kuñakarai hérava Rie ohecharamoiterei upéva. Upérõ haʼe ndaikatúi oñemongeta hendivekuéra, ha heʼi chupekuéra ou hag̃ua ótro día. Oho jeýrõ guare ovisita chupe pe óra heʼivaʼekuépe, avave noñatendéi hesekuéra. Heta vése oho jeýramo jepe hikuái, ndojuhuvéi hese hógape. Upévare George ha Manon opensa noñeʼẽseinteha hendivekuéra.

Peteĩ jey, George ojuhu sapyʼa Rie rehe hógape. Upe kuñakarai ojediskulpa noĩri haguére hógape heʼi hague órape chupekuéra ha omombeʼu upérõ oĩ hague ospitálpe. Upe rire, Rie heʼi Georgepe: “Ni nereimoʼãmoʼãi mbaʼépa ajapo peẽ peho rire. ¡Añepyrũ alee la Biblia!”. Upéi heta oñemongeta kyreʼỹ rire hikuái, Rie heʼi ostudiataha la Biblia.

Rie ostudiavévo la Biblia okambia, haʼe oñamargavaʼekue, péro koʼág̃a oiko chugui peteĩ kuñakarai ipyʼaporã ha ovyʼáva. Ndaikatúiramo jepe osẽ hógagui, pyaʼe voi oñepyrũma oñeʼẽ umi mbaʼe oaprendévare la Bíbliagui umi ovisitávape chupe. Haʼe ningo hasy rupi ndaikatúi oho meme rreunionhápe, ha ovyʼaiterei umi ermáno oho jave ovisita chupe. Okumpliha árape 82 áño oho peteĩ Aty guasu dos diaguápe ha ojevautisa ohechauka hag̃ua oñemeʼẽma hague Jehovápe.

Rie omano riréma ojetopa peteĩ poesía haʼe ojapovaʼekue. Upépe ohai mbaʼeichaitépa ijetuʼu ñañeñandu ñaneaño ñande eda rire ha iñimportanteha ñandepyʼaporã. Manon heʼi: “Pe poesía opokoiterei cherehe ha avyʼaiterei Jehová orepytyvõ haguére rotrata hag̃ua chupe pyʼaporãme”.

Jehová ehémplo ñanemokyreʼỹ jatrata hag̃ua mborayhu ha pyʼaporãme ñande rapichakuérape (Efe. 5:1, 2). Predikasiónpe katuete oho porãta ñandéve, ‘jahechaukáramo ñande haʼeha Ñandejára rembiguái [...] ñandepyʼaporã rupi’ (2 Cor. 6:4, 6).