“Jahayhu Ñandejárape heʼise jajapo haʼe heʼíva, ha upéva ndaipohýiri” (1 JUAN 5:3, NM)

¿MBAʼÉPA REMBOHOVÁITA?

¿Mbaʼépa Satanás ojapo oipotágui jaguerovia Ñandejára ojopyetereiha ñanendive?

¿Mbaʼérepa ñañatende porã vaʼerã jaiporavo hag̃ua ñane amigorã?

¿Mbaʼépa ñanepytyvõta ñaneñeʼẽrendu meme hag̃ua Ñandejára oporomosãsóvape?

1. ¿Mbaʼéichapa Jehová oiporu iliverta, ha mbaʼeichagua livertápa omeʼẽ Adán ha Évape?

 JEHOVÁ añoite oreko liverta ijapyraʼỹva. Upéicharõ jepe, haʼe ndoiporuvaíri upe liverta ni ndoikói okontrola opa mbaʼe ojapóva hembiguaikuéra. Upéva rangue, entérope omeʼẽ liverta ikatu hag̃uáicha odesidi ha ojapo hekoitépe umi mbaʼe ogustáva chupekuéra. Pór ehémplo, Ñandejára ohejavaʼekue Adán ha Eva odesidi heta mbaʼe, péro oproivi chuguikuéra peteĩ mbaʼénte: ndoʼuivaʼerã pe “yva oikuaaukáva iporã ha ivaíva” (Gén. 2:17). Haʼekuéra ningo ikatúkuri ojapo Ñandejára ojeruréva ha avei oreko pe liverta ijojahaʼỹva.

2. ¿Mbaʼérepa Adán ha Eva operde pe liverta Jehová omeʼẽvaʼekue chupekuéra?

² ¿Mbaʼérepa Jehová omeʼẽvaʼekue Adán ha Évape heta liverta? Ojapo rupi chupekuéra ijoguaháramo ha omeʼẽgui chupekuéra konsiénsia. Haʼe ohaʼarõ oiko hikuái hekópe porã ha upéicha ohechauka ohayhuha chupe (Gén. 1:27; Rom. 2:15) Péro haʼekuéra nomombaʼéi pe liverta Jehová omeʼẽva, ha oagradese rangue chupe, odesidi ojapo Satanás oipotáva ha oiporavo ijehegui reínte mbaʼépa iporã ha mbaʼépa ivai. Oimoʼã hikuái péicha isãsovetaha, péro tuicha ojavy. Ojapóvo upéva, haʼekuéra voi oñemoĩ pekádo poguýpe ha avei omoĩ opavave yvypórape. Upéicha rupi enterovéva jahasa asy ha ñamano (Rom. 5:12).

3, 4. ¿Mbaʼépa Satanás ogueroviaukase ñandéve?

³ Satanás oity mokõi yvypóra perféktope ha avei hetaiterei ánhelpe. Upéicharõ, koʼýte ñandéve ñanembotavykuaa avei. Ymaite guive haʼe oñehaʼã ogueroviauka Ñandejára ojopyetereiha ñanendive ha ndohejaiha voi javyʼa (1 Juan 5:3). Ñaimetereíramo umi  tapicha opensáva ndive upéicha, ikatu ñandegueraha vai. Peteĩ ermána orekóva 24 áño hoʼavaʼekue tekovaípe, ha haʼe omombeʼu mbaʼéicha rupípa oiko hese upéva: “Aju chejúnta vai ha nañemoĩvaiséi rupi che amigokuérandi haʼa tekovaípe”. Oimevaʼerã ñandéve avei ñane amigokuéra ñandejopýmava upéicha.

⁴ Ñambyasýramo jepe kongregasiónpe ikatu avei oĩ ñandegueraha vaíva. Peteĩ ermáno imitãva heʼi: “Che amigokuéra apytépe oĩvaʼekue ojegustáva umi ndahaʼéivare Testígo. Upéi ahechakuaa ajoguaveha chupekuéra ahasave rupi tiémpo hendivekuéra. Che jerovia oñepyrũ ikangy, upéicha rupi ndavyʼaguasuvéi rreunionhápe ha saʼi asẽ apredika. Upe rire ahechakuaa tekotevẽha amboyke chupekuéra. Ha upeichaite ajapo”. Jahechaháicha, ñane amigokuéra ikatu ñandegueraha porã térã ñandegueraha vai. Jahechamína peteĩ ehémplo oĩva la Bíbliape ohechaukáva upéva (Rom. 15:4).

‘OPA ISRAELGUA OHAYHUETEREI CHUPE’

5, 6. a) ¿Mbaʼéichapa Absalón ombotavy heta isrraelítape? b) ¿Osẽ porãpa Absalónpe ojapovaʼekue?

⁵ La Bíbliape oĩ heta ehémplo ohechaukáva ñane amigokuéra ikatuha ñandegueraha vai. Ñañeʼẽmi Absalón rehe, David raʼy. Haʼe ningo peteĩ kuimbaʼe neporãva. Péro Satanás ojapo haguéicha, ou itaryrýi ha oipeʼase itúvagui igoviérno omanda hag̃ua hendaguépe. a Upémarõ Absalón oñehaʼã oñemoĩ porã umi isrraelíta ndive ha heʼi chupekuéra pe rréi ndojepyʼapyiha hesekuéra. Ojapo haguéicha Satanás pe hardín de Edénpe, Absalón oiko guaʼu pe ipyʼaporãvaramo ha oñeʼẽ vai itúva rehe (2 Sam. 15:1-5).

⁶ ¿Osẽ porãpa Absalónpe upe ojapóva? Ikatu jaʼe ñepyrũrã osẽ porãha. La Biblia heʼi ‘opa Israelgua ohayhueterei hague chupe’ (2 Sam. 15:6). Upéicharamo jepe, oñembotuicha rupi, mombyry operde. Ha upéi haʼe ha umi kuimbaʼe ombotavyvaʼekue, omanombaite (2 Sam. 18:7, 14-17).

7. ¿Mbaʼépa ñaaprende Absalón ojapovaʼekuégui? (Ehecha pe taʼanga oĩva páhina 14-pe.)

⁷ ¿Mbaʼérepa ndahasyiete raʼe Absalónpe ombotavy hag̃ua umi isrraelítape? Oiméne oipota hikuái umi mbaʼe haʼe oikuaveʼẽva chupekuéra, térã oñemoĩ porãse hendive iñimportánte rupi. Tahaʼe haʼeháicha, ojekuaa porã koʼã hénte ndohayhuiha Jehovápe ni pe rréi Haʼe oiporavovaʼekuépe. Upéicha rupi ndahasyiete oñembotavy hag̃ua chupekuéra. Koʼág̃a rupi avei Satanás oiporu umi tapicha ojoguáva Absalónpe oity hag̃ua Ñandejára rembiguaikuérape. Pór ehémplo oĩ heʼíva: “Ñandejára léi ningo hasyeterei ñakumpli hag̃ua”, térã heʼi: “¡Umi ndoservíriva Jehovápemante ovyʼakuaa!”. ¿Jahechakuaápa koʼã mbaʼe japunteha ha akóinte ñaneñeʼẽrendu? ¿Jagueroviápa Cristo léi añoite haʼeha ‘pe léi ñanemosãsóva’? (Sant. 1:25.) Jahechaukákena ñamombaʼeha ko léi ha ani jaiporu vai ñande liverta (elee 1 Pedro 2:16).

8. ¿Mbaʼe ehémplopa ohechauka ñasẽ vaiha nañaneñeʼẽrendúiramo Jehovápe?

⁸ Satanás oityseterei mitãrusu ha mitãkuñanguérape. Peteĩ ermáno orekóva 30 áño heʼi: “Chemitãvépe ndahechakuaaivaʼekue Ñandejára léi oñangarekoha cherehe, síno apensa oipeʼaha chehegui liverta”. Ko ermáno ou hoʼa tekovaípe openságui upéicha. ¿Ovyʼavépa ojapo haguére upéva? Nahániri. Haʼe omombeʼu:  “Heta tiémpore añeñandu vai, ha che konsiénsia chemyangekói”. Peteĩ ermána imanduʼa ojapovaʼekuére imitãvépe, ha omombeʼu: “Haʼa rire tekovaípe, apyta ndavyʼavéi ha añandu ndavaleiha. Ohasáma 19 áño, péro ndacheresaráiri pe mbaʼe vai ajapovaʼekuégui”. Ótra ermána katu heʼi: “Ahechakuaárõ guare umi mbaʼe ajapóva tuicha operhudikaha umi cherayhúvape, añeñandu vaieterei ha avei añandu mombyry aĩha Jehovágui. Ndaigustoieterei Jehová nañandeguerohorýiramo”. Mitãrusu ha mitãkuña, aníkena reheja Satanás nembotavy. Epensa raẽ mbaʼépa nderupytýta nerembiapo vaíramo.

9. a) ¿Mbaʼépa ñañeporanduvaʼerã Jehová rehe ha umi léi ha konsého omeʼẽvare? b) ¿Mbaʼérepa tekotevẽte jaikuaa porã Jehovápe?

⁹ Jajapóramo ñande rete rembipota vai ndohoporãmoʼãi ñandéve. Péro ñambyasýramo jepe, hetaiterei ermáno imitãva, ha kakuaa avei, ojapo riréma umi mbaʼe vai, oaprende heta ñanembohasa asyha (Gál. 6:7, 8). Upévare ñañeporanduvaʼerã: “¿Ahechápa umi ñuhã Satanás oiporúva chereity hag̃ua? ¿Arekópa Jehovápe che amígoramo ha ajerovia haʼe nachembotavymoʼãiha, ha oipotaha iporãvante chéve g̃uarã? ¿Aikuaa porãpa haʼe arakaʼeve nonegamoʼãiha chehegui peteĩ mbaʼe ou porãtava chéve ha chembovyʼátava?” (Elee Isaías 48:17, 18.) ¿Ikatútapa ñambohovái porã koʼã porandu jaikuaa vai vaínteramo Jehovápe? Nahániri. Tekotevẽ jaikuaa porã chupe ha avei ñantendevaʼerã omoĩha umi léi ha konsého ñanderayhúgui, ndahaʼéi oipeʼaségui ñandehegui ñande liverta (Sal. 25:14).

 JAJERURE JEHOVÁPE TAÑANEPYTYVÕ ÑANEARANDU HA ÑANEÑEʼẼRENDU HAG̃UA

10. ¿Mbaʼérepa ñañehaʼãmbaitevaʼerã ñahaʼanga Salomónpe imitãrõ guare?

¹⁰ Imitãrõ guare, Salomón oñemboʼe Jehovápe ipyʼaite guive ha heʼi: “Chemitã gueteri, ha ndaikuaái mbaʼéichapa aisãmbyhyvaʼerã”. Ha upéi ojerure toipytyvõ chupe iñarandu ha iñeʼẽrendu hag̃ua (1 Rey. 3:7-9, 12, ÑÑB). Jehová ohendu chupe, ha péicha avei ikatu ombohovái ñane ñemboʼe, tahaʼe haʼéva ñande eda. Añetehápe ningo, haʼe nañanemoarandumoʼãi ni ndoikuaaukamoʼãi ñandéve opa mbaʼe peteĩ milágro rupive. Péro katuete ñanemoarandúta ñahesaʼỹijo porãramo la Biblia, jajeruréramo chupe espíritu sánto ha jaaprovecháramo opaite mbaʼe oñemeʼẽva ñandéve kongregasión rupive (Sant. 1:5). Ñanemanduʼavaʼerã Jehová ojevaleha koʼã mbaʼe rehe omboʼe hag̃ua hembiguaikuéra imitãvape. Péicha rupi iñaranduve hikuái entéro umi nopenáivagui Ñandejára konséhore, umíva apytépe “umi iñarandu ha iñakãporãva” oĩva ko múndope (Luc. 10:21, NM; elee Salmo 119:98-100).

11-13. a) ¿Mbaʼe mbaʼépa ñanemboʼe Salmo 26:4, Proverbios 13:20 ha 1 Corintios 15:33? b) ¿Mbaʼéichapa ikatu jasegi koʼã konsého?

¹¹ Jahechaháicha, jaikuaa porã hag̃ua Jehovápe, jastudiavaʼerã la Biblia ha jajepyʼamongeta hese. Ñantende hag̃ua upéva, jahechami umi konsého ñanepytyvõva jaiporavo hag̃ua ñane amigorã. Salmo 26:4 heʼi: “Ndaikói ijapúva ndive ha ndajeheʼái hovamokõiva rehe”. Proverbios 13:20-pe heʼi kóicha: “Nearanduséramo, eiko iñarandúva ndive; reñehundiséramo, ejoaju itavývare”. Ha 1 Corintios 15:33 heʼi avei: “Umi júnta vai, ñandegueraha vai katuete” (NM).

¹² Koʼã versíkulo omboʼéva, ideprovechoiterei ñandéve. Primero, Jehová oipota jaiporavo porã ñane amigokuerarã. Péicha haʼe oñangareko ñanderehe ani hag̃ua jaʼa tembiapo vaípe ha ñañemomombyry chugui. Segundo, umi ñane amígo ikatu ñandegueraha porã térã ñandegueraha vai. Koʼã téystore ojekuaa Jehová og̃uahẽseha ñande pyʼapýpe. ¿Mbaʼére jaʼe upéva? Haʼe ndeʼíri: “¡Aníke rejapo péva, térã amóva!”. Upéva rangue, ohechauka porã mbaʼérepa jajapo térã ndajajapoivaʼerã peteĩ mbaʼe. Haʼete ku heʼíva: “Péicha ningo hína. ¿Mbaʼépa rejapóta? ¿Mbaʼépa oĩ nde pyʼapýpe?”.

¹³ Avei jahecha koʼã versíkulo ojehaiha umi díchoicha ha upévare ikatu ojeporu heta hendáicha ha oimeraẽ tiémpope. Pór ehémplo, jalee rire pe téysto ikatu ñañeporandu: “¿Mbaʼépa ajapovaʼerã ani hag̃ua ajeheʼa umi ‘hovamokõiva rehe’? ¿Mbaʼe mbaʼépa ikatu chemoag̃ui hesekuéra? (Pro. 3:32; 6:12.) ¿Mávapa hína umi ‘iñarandúva’ Jehová oipotáva aiporavo che amigorã, ha mávapa umi ‘itavýva’? (Sal. 111:10; 112:1; Pro. 1:7.) ¿Mbaʼéichapa ikatu ‘ñandegueraha vai’ ñane amigokuéra? ¿Múndope añóntepa jatopa júnta vai? (2 Ped. 2:1-3.)”. Tekotevẽ jajepyʼamongeta porã koʼã mbaʼére.

14. ¿Mbaʼépa ikatu ñahesaʼỹijo jajapo jave pe Aty Jastudia Hag̃ua Ñande Rogayguándi?

¹⁴ Péicha avei ñahesaʼỹijovaʼerã hetave téysto ñanepytyvõtava ñantende hag̃ua mbaʼépa Jehová opensa, pór ehémplo umi mbaʼe ou porãtavare ñandéve ha ñande rogayguakuérape. b Tuvakuéra oñehaʼãmbaitevaʼerã ohesaʼỹijo koʼã mbaʼe ojapo jave pe Aty Jastudia Hag̃ua Ñande Rogayguándi. Ha avei imanduʼavaʼerã  tekotevẽha oipytyvõ peteĩteĩ ifamíliape ikatu hag̃uáicha ontende mbaʼeichaitépa Jehová ñanderayhu omeʼẽvo umi léi ha konsého (Sal. 119:72). Upéicha pe família oñemoag̃uivéta ojuehe ha Jehováre.

15. ¿Mbaʼéichapa jaikuaáta oimépa ñanearandu ha ñaneñeʼẽrendu jaikóvo?

¹⁵ ¿Mbaʼéichapa jaikuaáta oimépa ñanearandu ha ñaneñeʼẽrendu jaikóvo? Pór ehémplo, ikatu jajepyʼamongeta Ñandejára siervokuéra yma guare opensavaʼekuére ha ñambojoja ñande ñapensávare. Rréi David ohaivaʼekue: “Ajapose ne rembipota, upéva chembovyʼáta che Ruete, ha nde [léi] oĩ che pyʼapýpe” (Sal. 40:8, ÑÑB). Ha pe kuimbaʼe ohaivaʼekue Salmo 119 heʼi: ‘Ahayhuete ningo nde léi, umívare ajepyʼamongeta ára pukukue’ (Sal. 119:97, ÑÑB). Jahayhu hag̃ua peichaite peve Ñandejára léi, tekotevẽ ñahesaʼỹijo la Biblia, jajepyʼamongeta hese ha ñañemboʼe. Ha koʼýte ñamombaʼeve umi léi ha konsého, jahechakuaa rire mbaʼéichapa Jehová ñanevendesi ñaneñeʼẽrendu haguére chupe (Sal. 34:8).

ÑAÑEHAʼÃ MEMÉKENA ÑANDE LIVERTA REHEHÁPE

16. ¿Mbaʼe rehépa ñanemanduʼavaʼerã jahupyty hag̃ua pe liverta ijojahaʼỹva?

¹⁶ Ymaite guive, heta tetã oñorairõ oreko hag̃ua liverta. Ha ñande jaservíva Jehovápe katu koʼýte ñañehaʼãmbaitevaʼerã ñande liverta rehehápe. Ñanemanduʼákena ñambohovaivaʼerãha Satanáspe, umi mbaʼe ko múndo oikuaveʼẽva, ha umi hénte añáme. Ha ndahaʼéi upévante, ñande ñaneimperfékto ha ñane korasõ itraisionéro (Jer. 17:9; Efe. 2:3). Péro Jehová ñanepytyvõ rupi, ikatu jagueropuʼaka koʼã mbaʼe. Hiʼarive ñasẽ porã jave, jahupyty mokõi mbaʼe iporãva. Primero, ñambovyʼa Jehovápe (Pro. 27:11). Segundo, jahechakuaávo ‘pe léi hekoitepegua ha ñanemosãsóva’ omeʼẽha ñandéve tuicha liverta, nañasẽsemoʼãi pe tape oporoguerahávagui jeikove opaʼỹvape. Amo ipahápe, jahupytýta pe liverta ijojahaʼỹva Ñandejára opreparáva enterove hembiguái iñeʼẽrendúvape g̃uarã (Sant. 1:25; Mat. 7:13, 14).

17. ¿Mbaʼérepa nañapensaivaʼerã ndajavaleiha jajavy jave, ha mbaʼéichapa Jehová ñanepytyvõ?

¹⁷ Añetehápe ningo opavave jajavy jepi (Ecl. 7:20). Oiko jave ñanderehe upéva, ani ñanekangy ha ñaimoʼã ndajavaleiha. Jaʼáramo, ñapuʼã jey vaʼerã, tekotevẽramo jepe jajerure ansianokuérape tañanepytyvõ. Santiago heʼi: ‘Pe ñemboʼe ojejapóva jeroviápe omongueráta ikangýva térã hasývape, ha Ñandejára omopuʼãta chupe, ha oimérõ hembiapo vai, oñeperdonáta chupe’ (Sant. 5:15). Aníke ñanderesarái Jehová ñandeporiahuverekoha ha haʼe voi ñandegueru hague pe kongregasiónpe ohecha rupi ñandepyʼaporãha (elee Salmo 103:8, 9). Upéicharõ, ñañehaʼãramo ñande pyʼaite guive jaservi chupe, haʼe arakaʼeve nañanderejamoʼãi (1 Cró. 28:9).

18. ¿Mbaʼépa jajapovaʼerã Jehová oñangareko hag̃ua ñanderehe, heʼiháicha Juan 17:15?

¹⁸ Upe pyhare omano mboyve, Jesús oñemboʼe ijapostolkuéra rehehápe: ‘Ajerure ndéve [...] reñangareko hag̃ua hesekuéra oĩgui pe aña’ (Juan 17:15, NM). Koʼág̃a avei haʼe hakateʼỹ entéro kristiánore. Upévare jajeroviakuaa Ñandejára ohendutaha Jesús ñemboʼe ha oñangarekotaha ñanderehe koʼã ára ijetuʼuetévape. La Biblia heʼi porã: “Haʼe omoʼãhína umi hekoitépe oguatávape. [...] Haʼe oñangarekohína umi ojeroviáva rape rehe” (Pro. 2:7, 8, ÑÑB). Jaikuaa ningo hasyha jaiko hag̃ua hekopete, péro upéva añoite ñanepytyvõta jahupyty hag̃ua pe jeikove opaʼỹva ha pe liverta ijojahaʼỹva (Rom. 8:21). ¡Aníkena jaheja mbaʼeve ñaneguenohẽ upe tapégui!

[Nóta]

[Porandu ñahesaʼỹijóva]

[Nóta oĩva taʼanga ndive páhina 14]

¿Máva mávapa ojogua koʼág̃a rupi Absalónpe, ha mbaʼéichapa ñañeñangareko koʼãichagua tapichágui?