Omombeʼu Max Lloyd

Peteĩ pyhare, áño 1955-pe, ropredika jave ótro misionéro ndive Paraguáipe, ijaty sapyʼa heta hénte ha omongora pe óga roimeha. Haʼekuéra oñepyrũ osapukái ha heʼi: “¡Ore jára oipota tuguy, ha oipota gríngo ruguy!”. ¡Ha umi “gríngo” ningo che ha pe ermáno oĩva chendive! Péro, ¿mbaʼéicha rupípa roime upépe?

ANASEVAʼEKUE Austráliape, ha chemitãme Jehová chemboʼe ajapo hag̃ua hembipota. Áño 1938-pe, peteĩ Testígo omeʼẽ che túvape peteĩ lívro hérava Enemigos oĩva ingléspe. Aréma chupe ha che sýpe ndogustavéi pe pastór omboʼéva, pór ehémplo heʼi heta mbaʼe oĩva la Bíbliape kuénto reinteha. Un áño haguépe, che túva ha che sy oñemeʼẽ Jehovápe ha ojevautisa. Upe guive roñehaʼãmbaite ore rogapýpe rojapo Ñandejára rembipota. Che ermána Lesley, cinco áño ijedavéva chehegui, ojevautisa upe rire. Che katu ajevautisa áño 1940-pe, arekórõ guare nueve áño.

Oñepyrũmíre pe segunda gérra mundiál, Austráliape ojeproivi ojejapo ha ojeporu umi testígo de Jehová puvlikasión. Upévare, che mitãʼi guive ajepokuaa aiporu la Biblia añoite adefende hag̃ua umi mbaʼe agueroviáva. Agueraha eskuélape amyesakã hag̃ua mbaʼérepa namombaʼéi pe vandéra ha mbaʼérepa testígo de Jehová noñentremetéi gerrakuérape (Éxo. 20:4, 5; Mat. 4:10; Juan 17:16; 1 Juan 5:21).

Che kompañerokuéra eskuelapegua ndojeheʼái cherehe heʼígui umi alemán cheporuha akontrola hag̃ua chupekuéra. Upe tiémpope, ore eskuélape ojehechauka jepi pelíkula, péro ojehecha mboyve roñemboʼyvaʼerã ropurahéi hag̃ua ímno nasionál. Che katu apytánte aguapyhápe, ha mokõi térã mbohapy mitãʼi che akãraguégui chemopuʼãse. Ipahápe, añemosẽ pe eskuélagui idiferénte rupi che rrelihión, péro asegi astudia pór korréo.

AHUPYTY AJAPOSEVAʼEKUE

Che apensa ajapo che prekursorádo ambotývo 14 áño, péro che túva ha che sy heʼi chéve ajuhu raẽ vaʼerãha che travahorã. ¡Nachembovyʼaiete ningo upéva! Hiʼarive oipota hikuái apaga chupekuéra che kotýre, péro opromete chéve ohejataha ajapo che prekursorádo areko vove 18 áño. Heta vése roñemongeta pe pláta aganávare. Che haʼe chupekuéra añongatuseha aiporu hag̃ua che prekursorádope, upéicharamo jepe, haʼekuéra oipeʼapa chehegui.

 Añepyrũre che prekursorádo, che túva ha che sy oguapy oñemongeta porã chendive ha omombeʼu chéve oñongatu hague oikóvo peteĩ vánkope pe pláta aganavaʼekue. Upe rire omeʼẽ chéve ajogua hag̃ua che aorã ha ambue mbaʼe aikotevẽtava predikasionrã. Upéicha chemboʼe hikuái añangareko hag̃ua chejehe. ¡Tuichaite ningo chepytyvõ pe chemboʼevaʼekue hikuái!

Che tuvakuéra pyʼỹinte oinvita umi prekursórpe opyta hag̃ua ógape. Lesley ha che katu rohoseterei voi hendivekuéra predikasiónpe. Katuete rosẽ jepi umi fín de semána ropredika ogahárupi, kállere ha rojapo estúdio vívliko. Upe tiémpope, umi maranduhára oñehaʼã opredika 60 óra káda més, ha mama katuete lénto ohupyty upéva. Péicha omoĩ oréve ehémplo neporãva.

ASERVI TASMÁNIAPE

Oiko rire chehegui prekursór, añemondo aservi hag̃ua Tasmániape, peteĩ ísla oĩva avei Austráliape. Upépe oĩ che ermána ha iména. Upe riremínte oñeinvita chupekuéra oho hag̃ua Eskuéla de Galaádpe, kláse 15-pe. Che ningo cheotĩeterei ha nasẽiva ógagui, upévare oĩ oimoʼãva ni tres mése ndachearemoʼãiha upépe. Péro un áño mboyve, 1950-pe, oiko chehegui siérvo de compañía, hérava koʼág̃a ansianokuéra koordinadór. Upéi añepyrũ aservi prekursór espesiálramo peteĩ ermáno imitãva ndive.

Roñemondo mombyry peteĩ táva oñembaʼapohápe mína de kóvrepe ha upépe ndaipóri ni peteĩ testígo. Roviaha peteĩ kolektívope ha rog̃uahẽ kaʼaru, ha upe pyhare ropyta peteĩ otélpe. Upe koʼẽme, ropredika aja, roporandu vesinokuérape ndoikuaáipa moõ ikatu rojuhu ropyta hag̃ua. Kaʼaruete, peteĩ karai omombeʼu oréve pe omoakãva iglésia presviteriána orekoha peteĩ óga oĩva tupao ykére, ha avave ndoikoiha upépe. Roho roñeʼẽ pe diákono ndive, ha torypápe omeʼẽ oréve upe óga ropyta hag̃ua. Péro añetehápe, ndaigustoiete oréve rosẽ peteĩ diákono rógagui ropredika hag̃ua.

Umi hénte upepegua ningo orerendu porãiterei, oñemongeta voi orendive ha oĩ heta oñepyrũva ostudia la Biblia. Upe rire umi saserdóte kapitalpegua oikuaa roimeha upe puévlope ha heʼi pe diákonope pyaʼe oremosẽ hag̃ua hógagui. ¡Ropyta jey kállepe!

Pe ótro día rosẽ ropredika kaʼaru mbyte peve ha upéi roñepyrũ jey roheka ropyta hag̃ua, péro ndorotopái mbaʼeve. Upémarõ roñongatu ore valíha peteĩ estádio deportívope, umi grádape ha rosẽ jey ropredika. Pytũmarõ jepe rog̃uahẽ umi ógape. Peteĩvape, pe karai oikuaveʼẽ oréve peteĩ ogaʼi oĩva hóga kupépe ha orekóva mokõi koty.

ASERVI SUPERINTENDÉNTERAMO HA AHA ESKUÉLA DE GALAÁDPE

Cheare ocho mése upe puévlope, ha upéi pe sukursál Australiaygua cheinvita aservi hag̃ua superintendénteramo. Naimoʼãiete ningo upéva,  chemitãiterei gueteri, 20 áñonte areko. Chemboʼe raẽ hikuái peteĩ tiémpore ha upéi añepyrũ avisita umi kongregasión amokyreʼỹ hag̃ua ermanokuérape. Opavave lénto ijedave chehegui, péro avave ndacheapoʼíri, upéva rangue omombaʼe hikuái che rembiapo.

Avisita hag̃ua umi kongregasión, aviaha opáicha rei: una semána aha kolektívope, ótra semána tranvíape, upéi áutope ha sapyʼánte móto ári ótro apýri; peteĩ che pópe araha che valíha ha ótro che pópe katu che kartéra aiporúva predikasiónpe. Avyʼaiterei ningo umi ermáno ndive apytávo hogakuérape. Chemanduʼa peteĩ vuéltape, peteĩ ansiáno oipotaiterei apyta hógape, péro neʼĩra gueteri oñemopuʼãmba. ¡Upe semánape ake ivañérape! Upéicharamo jepe, umi díape heta roñemongeta ha romombarete ore jerovia.

Áño 1953-pe oiko peteĩ mbaʼe nahaʼarõietéva: og̃uahẽ chéve peteĩ solisitu aha hag̃ua Eskuéla de Galaádpe, kláse 22-pe. Avyʼaiterei ningo, péro ajepyʼapy avei. ¿Mbaʼérepa? El 30 de julio de 1950 che ermána ha iména omohuʼã ikúrso Eskuéla de Galaádpe ha oñemondo Pakistánpe. Péro un áño mboyve, Lesley hasyete ha omano upépe. Upévare añeporandu: “¿Mbaʼéichapa oñeñandúne che tuvakuéra aháramo mombyry ko omano ramónteva che ermána?”. Haʼekuéra heʼi chéve: “Tereho katu, ha eservi Jehovápe haʼe oipotahápe”. Upe guive ndahechavéi che túvape. Haʼe omano áño 1957-pe.

Upe riremínte aviaha Nueva Yórkpe 5 ermáno australiáno ndive, ha rog̃uahẽ hag̃ua, 6 semánare roviaha. Pe várkope rolee ha rostudia la Biblia, ha ropredika avei umi pasahérope. Roho mboyve pe Eskuélape, opytáva South Lansing, Nueva Yórkpe, roho raẽ pe asambléa internasionálpe ojejapovaʼekue julio de 1953-pe, Estádio Yánkeepe. Upépe ijaty 165.829 tapicha.

Upe Eskuélape roime 120 estudiánte rojúva opáguio. Ha oñemohuʼãvo ore kúrso oñemombeʼu oréve moõpa rohóta. Ijamíre oréve pyaʼe roho pe vivliotékape oĩva upépe rohecha hag̃ua mbaʼeichagua lugárpepa roñemondóta. Chéve otoka Paraguay, peteĩ tetã oiko haguépe heta rrevolusión. Ag̃uahẽmírente upépe, peteĩ pyhare ahendu tyapu oikoha pe kállere. Upe koʼẽme aporandu umi ótro misionérope mbaʼépa “ojefesteha raʼe”. Haʼekuéra opukánte ha heʼi chéve: “¡Rehasáma katu peteĩ rrevolusión! Esẽmi emaña okápe”. Asẽ amaña ha ahecha oĩha soldádo káda eskínape.

AHASA PETEĨ MBAʼE NDACHERESARÁIRIVA

Peteĩ jey, aviaha pe superintendénte ndive rovisita hag̃ua peteĩ kongregasión opytáva mombyryeterei, ha avei rohechauka hag̃ua pe pelíkula La Sociedad del Nuevo Mundo en acción.  Roviaha ocho térã nueve óra rupi: ñepyrũrã trénpe, upéi katu karrítope ha amo ipahápe karrétape. Rogueraha peteĩ projektór ha peteĩ heneradór rohechauka hag̃ua pe pelíkula. Pe ótro díape rosẽ rovisita umi héntepe oikóva umi gránharupi ha roinvita chupekuéra oho hag̃ua ohecha pe pelíkula upe pyharépe voi, ha oho hikuái 15 rupi.

Oñepyrũ rire pe pelíkula 20 minúto rupi, oĩ heʼíva oréve pyaʼe roike hag̃ua pe ógape. Upémarõ rojagarra pe projektór ha roike. Upérõ g̃uarã og̃uahẽma katu atyraite hénte ombokapúva hiʼárma ha osapukaijoa: “¡Ore jára oipota tuguy, ha oipota gríngo ruguy!”. Upépe ningo oĩ mokõi “gríngonte”, ha che hína peteĩva. Umi hénte mbaretépe oikese, péro umi ohovaʼekue ohecha pe pelíkula ojoko chupekuéra. Upéicharõ jepe, umi henteita ou jey las tres de la madrugáda rupi, ombokapu ha heʼi orejagarrataha rosẽ vove roho hag̃ua puévlope.

Umi ermáno oho omombeʼu polisíape mbaʼépa oiko, ha peteĩva ou kaʼaru mokõi kavaju reheve oregueraha hag̃ua pe puévlope. Tapére, rohasáta jave umi yvyratýre térã ñanandýre, pe polisía oñemotenonde jepi ipistóla reheve ha ohecha raẽ pe lugár ore rohasa mboyve. Upépe ahechakuaa iñimportanteha jareko peteĩ kavaju, upémarõ upe rire ajogua peteĩ chembaʼerã.

OG̃UAHẼ HETAVE MISIONÉRO

Umi rrelihióso oñemoĩ meme orerehe, upéicharamo jepe umi hénte ohendu porã pe predikasión. Áño 1955-pe, og̃uahẽve cinco misionéro, ijapytepekuéra Elsie Swanson, peteĩ ermána Canadaygua ohovaʼekue Eskuéla de Galaádpe, kláse 25-pe. Elsie tuvakuéra ndahaʼéi Testígo ha noipytyvõi chupe, upéicharõ jepe haʼe oñemeʼẽmbaite Jehová servísiope. Peteĩ tiémpore, mokõivéva rombaʼapo sukursálpe ha upéi oñemondo chupe ótra siudápe. Pe 31 de diciembre de 1957 romenda ha roñemondo súr gotyo Paraguáipe, ha roiko oreaño peteĩ kása misionálpe.

Upe ógape ndaipóri y, váño modérno ni lavarrópa, péro pe korapýpe oĩ peteĩ póso. Ndoroguerekói avei eladéra, upévare rojoguavaʼerã káda día hiʼupy. Añetehápe, heta rovyʼa umi tiémpope. Roiko umi mbaʼe roikotevẽmívarente ha rohayhueterei umi ermánope.

Áño 1963-pe roviaha Austráliape rovisita hag̃ua che sýpe. Rojuecha jey diez áño haguépe, ha  upéva haʼete ojopyetereíva chupe, ha upe riremínte ou iñinfárto. Ore avei ropyta peteĩ situasión ijetuʼuetereívape. Og̃uahẽ pe tiémpo roho jeýma hag̃ua Paraguáipe ha rodesidivaʼerã rohejátapa che sýpe ospitálpe oñangareko hag̃ua hese ótronte, térãpa rosegíta ore asignasión rohayhuetévape. Heta roñemboʼe rire, Elsie ha che rodesidi ropyta roñangareko mamáre omano meve 1966-pe. Upe aja rosegi avei roservi de tiémpo kompléto.

Heta áño aservi superintendénte de sirkuíto ha de distrítoramo ha ameʼẽ kláse pe Eskuéla del Ministério del Rréinope ansianokuérape g̃uarã, ha umíva tuichaiterei mbaʼe chéve g̃uarã. Upéi katu añeasigna aservi hag̃ua pe primer Komite de Sukursál Australiayguápe. Upe rire ojedesidi oñemopuʼã pe sukursál pyahu ha chemoĩ hikuái presidénteramo pe komite de konstruksiónpe. Hetaiterei ermáno ikatupyrýva orepytyvõ ha péicha rupi pe sukursál opyta iporãiterei.

Upéi chemoĩ hikuái Departaménto de Servísiope, ohecháva mbaʼéichapa oñembaʼapo predikasiónpe. Avei aha avisita umi sukursál tetã ambueygua superintendénte de sónaramo, amokyreʼỹ ha aipytyvõ hag̃ua ermanokuérape. Heta tetãme aikuaa umi ermáno hiʼarevaʼekue kárselpe ha kámpo de konsentrasiónpe, iñeʼẽrendu haguére Jehovápe. Hembiasakue chepytyvõiterei amombareteve hag̃ua che jerovia.

KOʼÁG̃A ROSERVI BROÓKLYNPE

Áño 2001-pe, ag̃uahẽ rire peteĩ viáhegui, ajumi atopa peteĩ kárta añeinvitahápe ava hag̃ua Broóklynpe (Nueva York), aservi hag̃uáicha pe Komite de Sukursál Estados Unidosguápe oñepyrũ ramóva ombaʼapo. Elsie ha che roñemboʼe Jehovápe, ropensa porã mbaʼépa rojapóta ha upéi vyʼapópe rodesidi roho. Upéva ojapóma once áño ha koʼág̃a peve roime koʼápe.

Avyʼaiterei che rembireko akóinte oñemeʼẽmbaite haguére ojapo hag̃ua Ñandejára ojeruréva oréve. Koʼág̃a rorekóma 80 áño ári ha oreresãi gueteri. Roipotaiterei ningo Jehová oremboʼe opa árare ha rohupytyse umi vendisión haʼe oprometéva opavave ojapóvape hembipota.

[Komentário oĩva páhina 19-pe]

Una semána aha kolektívope, ótra semána tranvíape, upéi áutope ha sapyʼánte móto ári ótro apýri; peteĩ che pópe araha che valíha ha ótro che pópe katu che kartéra aiporúva predikasiónpe

[Komentário oĩva páhina 21-pe]

Roipotaiterei ningo Jehová oremboʼe opa árare

[Nóta oĩva taʼanga ndive páhina 18]

Iskiérda: Aservírõ guare superintendénteramo Austráliape

Derécha: Che tuvakuéra ha che

[Nóta oĩva taʼanga ndive páhina 20]

Romendárõ guare, 31 de diciembre de 1957