“Ajerure peẽme [...] peñehaʼãmbaite hag̃ua peiko peteĩ ñeʼẽme espíritu sánto rupive.” (EFE. 4:1, 3, NM)

¿IKATÚPA REMYESAKÃ?

¿Maʼerãpa Ñandejára omoĩ peteĩ administrasión?

¿Mbaʼépa heʼise ‘ñañehaʼãmbaite jaiko peteĩ ñeʼẽme espíritu sánto rupive’?

¿Mbaʼépa ñanepytyvõta ‘ñandepyʼaporã hag̃ua oñondive’?

1, 2. ¿Mbaʼépa Jehová rembipota ko Yvy ha yvyporakuérape g̃uarã?

 FAMÍLIA. ¿Mbaʼe rehépa nemanduʼa rehendúvo ko ñeʼẽ? Oiméramo nde reiko peteĩ óga oĩháme mborayhu, katuete repensáne mbaʼeichaitépa pevyʼa ha peñehaʼã oñondivepa pehupyty peteĩ mbaʼe opavave peipotáva. Upépe pekakuaa, peaprende heta mbaʼe, ha torýpe peñemongeta. Jehová ningo pe omoñepyrũvaʼekue pe família (Efe. 3:14, 15). Haʼe oipota entéro hembiapokue, tahaʼe oĩva yvágape térã ko yvy ape ári, ojerovia ojuehe, oiko kyhyjeʼỹ ha peteĩ ñeʼẽme.

² Opeka rire ñande tuvakuéra ypykue, opavave yvypóra ñasẽma Ñandejára famíliagui, péro upéva ndojokói Jehová ojapótava. Haʼe ojapóta ko Yvýgui peteĩ lugár neporãmba jepéva ha omyenyhẽta Adán ha Eva familiare perféktovagui (Gén. 1:28; Isa. 45:18). Ñandejára ojapóma tekotevẽva oñekumpli hag̃ua hembipota, ha heta umi mbaʼe oñemyesakã Efésiospe, ojehechaukahápe avei mbaʼeichaitépa iñimportánte ojeiko peteĩ ñeʼẽme. Ñahesaʼỹijomína umi versíkulo oñeʼẽva koʼã mbaʼére ha jahecha mbaʼéichapa ikatu ñambaʼapo Jehová ndive ifamiliakuéra oiko hag̃ua peteĩ ñeʼẽme, ha péicha oñekumpli hembipota.

MBAʼÉPA JEHOVÁ OJAPO OKUMPLI HAG̃UA HEMBIPOTA

3. ¿Mbaʼépa pe administrasión oñeñeʼẽha Efesios 1:10-pe, ha arakaʼépa oñepyrũ pe primera etápa?

³ Jehová ningo ojapo opa mbaʼe okumpli hag̃uáicha hembipota. Upévare “og̃uahẽvo pe ára Ñandejára oiporavovaʼekue”, omoĩ peteĩ administrasión, térã omoñepyrũ peteĩ tembiapo ikatu hag̃uáicha omoĩ peteĩ ñeʼẽme opa hembiapokue (elee Efesios 1:8-10).  Ko tembiapo ojejapo mokõi etápape. Primero, ojeprepara umi kristiáno unhídope oiko hag̃ua yvágape, ha haʼekuéra ombaʼapo meméta upépe Jesucristo poguýpe. Pe primera etápa oñepyrũ Pentecostés áño 33-pe, Jehová oiporavo ñepyrũrõ guare umi oisãmbyhýtavape Jesucristo ndive yvágape (Hech. 2:1-4). Jesucristo sakrifísio rupive, koʼã unhídope ojeguereko hekojojávaramo ha haʼekuéra omerese oikove opa ára g̃uarã. Upéicha rupi oikuaa porã hikuái haʼeha “Ñandejára raʼy” (Rom. 3:23, 24; 5:1; 8:15-17, NM).

4, 5. ¿Mbaʼépa ojejapo pe segunda etápape?

⁴ Pe segunda etápape ojeprepara umi oikótavape peteĩ múndo neporãmba jepévape ko yvy ape ári Jesús goviérno poguýpe. Ko grúpope oike raẽ pe “aty guasu” (Rev. 7:9, 13-17, ÑÑB; 21:1-5). Ha upéi, Cristo oisãmbyhy vove mil áño rehe, oikéta upe grúpope hetaiterei tapicha oñemoingove jeýva (Rev. 20:12, 13). Epensamíntena mbaʼeichaitépa ikatúta jahechauka jaikoha peteĩ ñeʼẽme oikove jey vove koʼã tapicha. Og̃uahẽ vove huʼãme umi mil áño “opaite mbaʼe oĩva [...] yvýpe” ohasáta peteĩ pruéva ijetuʼúva, ha umi nomboykéiva guive Jehovápe opytáta ‘Ñandejára raʼýramo’ ko yvy ape ári (Rom. 8:21, NM; Rev. 20:7, 8).

⁵ Koʼã árape Jehová opreparahína umi ohótavape yvágape ha umi oikótavape ko yvy ape ári. Péro, ¿mbaʼéichapa káda uno ikatu ñambaʼapo Jehová ndive oñekumpli hag̃ua hembipota?

‘ÑAÑEHAʼÃMBAITE JAIKO PETEĨ ÑEʼẼME ESPÍRITU SÁNTO RUPIVE’

6. ¿Mbaʼéichapa la Biblia ohechauka tekotevẽha ñañembyaty?

⁶ Ñandejára Ñeʼẽ heʼi kristianokuéra oñembyatyvaʼerãha (1 Cor. 14:23; Heb. 10:24, 25). Upéva ndeʼiséi jahavaʼerãha peteĩ hendápe ha ñaimembánte oñondive, ku jaharõguáicha merkádope térã kánchape. Ñaime hag̃ua peteĩ ñeʼẽme, tekotevẽ jajapo Jehová heʼíva ha jaheja ijespíritu sánto ñanesãmbyhy.

7. ¿Mbaʼépa heʼise “peñehaʼãmbaite peiko hag̃ua peteĩ ñeʼẽme espíritu sánto rupive”?

⁷ Jesús sakrifísio rupive Jehová ombohekojoja umi unhídope ha oreko chupekuéra itaʼýraramo, avei ombohekojoja ambue ovechakuérape ha oreko chupekuéra iñamígoramo. Péro ani ñanderesarái jaiko aja ko múndo añáme, katuete jajoavytaha ñande rapichándi (Rom. 5:9; Sant. 2:23). Ndajajoavýirire nañaikotevẽivaʼerãmoʼã pe konsého heʼíva ‘jajogueraha porã vaʼerãha’. ¿Mbaʼépa jajapovaʼerã jaiko hag̃ua peteĩ ñeʼẽme ñane ermanokuéra ndive? Tekotevẽ ‘ñañemomirĩ ha ñandepyʼaporã’. Avei jajapo Pablo heʼivaʼekue: “Ajerure peẽme [...] peñehaʼãmbaite hag̃ua peiko peteĩ ñeʼẽme espíritu sánto rupive ha pesegi upéicha akóinte peime hag̃ua pyʼaguapýpe” (elee Efesios 4:1-3). Upearã jahejavaʼerã espíritu sánto ñanesãmbyhy ha ñañehaʼã jajapo umi mbaʼe porã oúva chugui. Ñande rete rembipota ningo ojapouka ñandéve umi mbaʼe ñanemoingo vaíva, péro umi mbaʼe oúva pe espíritugui ñanepytyvõ ñasolusiona hag̃ua ñane provlemakuéra.

8. ¿Mbaʼérepa umi ojapóva hete rembipota vai oñemomombyry ótrogui?

⁸ Umi tapicha “ojapóva hete rembipota vai” ndaikatúi oiko porã avavéndi (elee Gálatas 5:19-21). Pór ehémplo, umi hekovaíva oñemomombyry Jehovágui ha kongregasióngui; umi oporomoakãratĩva katu oipeʼa ojuehegui mitãnguéra itúva térã isýgui, ha ména tembirekógui. Pe hekokyʼáva ndaikatúi oñemoag̃ui Ñandejárare ni umi ohayhúvare chupe. Ñapensamína jaiporuha pegaménto ñamboja hag̃ua ojuehe mokõi mbaʼe. Jaikuaaháicha, umi párte ñamoĩhápe pe pegaménto tekotevẽ  ipotĩ porã ikatu hag̃uáicha oja hatã. Avei umi notĩriva hembiapo vai hag̃ua ohechauka nomombaʼeieteha Ñandejára léi. Ha upéicha jahecha umi yvypóra rembipota vai omomombyryha umi héntepe hapichakuéra ha Jehovágui. Ñandejára ndaijaʼeiete opaite koʼã mbaʼe rehe.

9. ¿Mbaʼépa oñeporanduvaʼerã peteĩ kristiáno oikuaa hag̃ua ‘oñehaʼãpa oiko peteĩ ñeʼẽme espíritu sánto rupive’?

⁹ Upéicharõ iporã entéro ñañeporandu: “¿Mbaʼeichaite pevépa ‘añehaʼã aiko peteĩ ñeʼẽme espíritu sánto rupive’ ermanokuéra ndive? ¿Mbaʼépa ajapo oĩ jave provléma? ¿Aikópa amombeʼu ápe ha pépe aipotágui che amigokuéra cheladea? ¿Ahaʼarõpa ansianokuérante osolusiona pe provléma, añehaʼã rangue chete añeʼẽ pe ermáno ndive? Afalláramo peteĩ ermáno ndive, ¿ajeréntepa chugui ani hag̃ua roñemongeta upe provlémare?”. Oiméramo ñapensa upéicha, ñañemoĩñaína Ñandejára rembipotáre ha nañambaʼapói Jehová ndive oñembyaty hag̃ua opa mbaʼe Cristo rupive.

10, 11. a) ¿Mbaʼérepa ñañehaʼãvaʼerã jaiko porãmba ñane ermanokuéra ndive? b) Mbaʼépa ñanepytyvõta ñamombareteve hag̃ua ñande jerovia ha jaiko hag̃ua pyʼaguapýpe?

¹⁰ Jesús heʼi: “Regueraha jave nde jopói pe altárpe, nemanduʼáramo ne ermáno ipochyha nderehe, eheja nde jopói pe altár renondépe, ha tereho eñemoĩ porã raẽ ne ermánondi, upéi ae eju emeʼẽ nde jopói. [...] Eñehaʼã pyaʼe eiko porã jey hendive” (Mat. 5:23-25, NM). Ha Santiago ohai: “Umi oñehaʼãva oporomoingo porã hag̃ua, ku oñotỹvaramoguáicha pyʼaguapy omonoʼõ chugui tekojoja” (Sant. 3:17, 18). Upéicharõ, ndaikatúi ñanderekojoja nañañehaʼãiramo jaiko pyʼaguapýpe.

¹¹ Ñapensamína ko ehémplore. Ojekalkula heta tetã oiko haguépe gérra ikatuha oñeñemitỹ hetave, haimete 35% voi, ndaipóririre umi vómba oñemoĩva yvyguýpe. Umi chokokue otopávo umichagua vómba ikokuépe, oheja rei hikuái pe yvy, umi puévlope ijetuʼuvéma hentekuérape oñemantene hag̃ua ha umi siudápe katu ofaltapa hiʼupy. Upéicha avei ñande jerovia ndaikatumoʼãi imbareteve, ñande voi nañañehaʼãiramo jaiko porã ñane ermanokuéra ndive. Péro pyaʼe ñaporoperdonáramo ha ñamotenonde ñane ermanokuérape, opavavénte javyʼáta.

12. ¿Mbaʼéichapa ansianokuéra ñanepytyvõ jaiko hag̃ua peteĩ ñeʼẽme?

¹² Jehová omeʼẽ avei “kuimbaʼe jopóiramo” ikatu hag̃uáicha jaiko peteĩ ñeʼẽme. Haʼekuéra ñanepytyvõ “jajoaju hag̃ua peteĩcha ñande jeroviápe” (Efe. 4:8, 13, NM). Ansianokuéra ñanemoirũ ñamombaʼeguasu hag̃ua Jehovápe ha ñanemokyreʼỹ la Biblia rupive, upéicha jave ñanepytyvõ  ñañemonde hag̃ua pe teko pyahúgui (Efe. 4:22-24). Ansianokuéra oñemoñeʼẽ jave ñandéve, ¿jahechakuaápa umi konsého ouha Jehovágui ha péicha haʼe ñandepreparaha jaiko hag̃ua pe múndo pyahúpe Itaʼýra poguýpe? Ha peẽ ansiáno, ¿pepensápa koʼã mbaʼe rehe peipytyvõ jave ermanokuérape? (Gál. 6:1.)

‘PENDEPYʼAPORÃ UVEI OÑONDIVE’

13. ¿Mbaʼépa ikatu oiko ndajajapóiramo Efesios 4:25-32 heʼíva?

¹³ Efesios 4:25-29 heʼi ñamboykevaʼerãha heta mbaʼe ñandeperhudikáva. Pór ehémplo, heʼi ndovaleiha ñandejapu, ñandepochy, ñaneateʼỹ ni jaʼe umi mbaʼe ojapo vaítava ñande rapicháre. Noñepenáiramo koʼã konséhore, Ñandejára espíritu sánto oñembyasy ha noipytyvõi ojeiko hag̃ua peteĩ ñeʼẽme (Efe. 4:30). Ikatu hag̃uáicha ñandepyʼaguapy ha jaiko porãmba, tekotevẽ avei jajapo Pablo heʼivaʼekue: ‘Anive pendepyʼaro, pendepochy vai térã pendepochy rei. Ani pesapukái térã peneñeʼẽguasu ojupe. Peheja ñaña opaichagua. Pendepyʼaporã uvei oñondive ha pejoporiahuvereko. Pembohasa rei umi mbaʼe vai pejapóva ojuehe, Ñandejára oheja rei haguéicha peẽme pene rembiapo vaikue Cristo rupi’ (Efe. 4:31, 32).

14. a) ¿Mbaʼépa ohechauka pe ñeʼẽ “pendepyʼaporã uvei”? b) ¿Mbaʼépa ñanepytyvõta ñandepyʼaporã hag̃ua?

¹⁴ Pe ñeʼẽ “pendepyʼaporã uvei”, ohechauka ikatuha ñañehaʼãve ñandepyʼaporã hag̃ua. ¡Ajépa iñimportantete akóinte ñamotenonde ñande rapichakuéra oñandúva! (Fili. 2:4.) Ikatu sapyʼánte oñantoha ñandéve jaʼe peteĩ mbaʼe ñaimoʼãva oporombopukataha térã ñanderejátava ku ñandevaleverõguáicha. Péro, ¿jahechaukátapa upéicha ñandepyʼaporãha? Jajapo hag̃ua Pablo heʼíva ñapensa porã vaʼerã ñañeʼẽ mboyve.

JAJOAYHU HA JAJORRESPETA ÑANDE ROGAPÝPE

15. ¿Mbaʼéichapa Cristo otrata kongregasiónpe heʼiháicha Efesios 5:28?

¹⁵ La Biblia heʼi mbaʼéichapa Jesucristo otrata kongregasiónpe, ha ohechauka mbaʼéichapa umi omendáva ojotratavaʼerã. Upéicharõ pe ména ohayhu ha ohechaukavaʼerã hembirekópe mbaʼéichapa oikovaʼerã, ha avei tekotevẽ oñangareko hese. Ha pe tembireko katu oñemoĩvaʼerã iména poguýpe (Efe. 5:22-33). Pablo ohaivaʼekue: “Upéicha avei, menakuéra ohayhuvaʼerã hembirekópe, haʼekuéra ojehayhuháicha” (Efe. 5:28). ¿Mbaʼépa Apóstol Pablo omboʼese raʼe heʼívo “upéicha avei”? Upe mboyve heʼi: ‘Cristo ohayhu pe kongregasión ha omeʼẽ hekove hesehápe [...], omopotĩvo ýperamoguaicha Ñandejára Ñeʼẽ rupive’. Upéicharõ, pe ména omombarete meme vaʼerã ifamiliakuéra jerovia ikatu hag̃uáicha ombaʼapo Jehová ndive ombyaty hag̃ua opa mbaʼe Cristo rupive.

16. ¿Mbaʼépa ojehupytýta tuvakuéra ojapóramo Jehová ojeruréva chupekuéra?

¹⁶ Tuvakuéra imanduʼavaʼerã Ñandejára omeʼẽha chupekuéra peteĩ tembiapo iñimportánteva. Péro ñambyasýramo jepe oĩ hetaiterei hénte “ndohayhúiva avavépe” (2 Tim. 3:1, 3, ÑÑB). Heta kuimbaʼe nopenái ifamiliakuérare ha péicha tuichaiterei operhudika chupekuéra. Pablo omeʼẽ ko konsého kuimbaʼekuérape: “Peẽ tuvakuéra, ani pembopochy rei pende raʼykuérape. Pemongakuaa ha pehekomboʼe uvei Ñandejára oipotaháicha” (Efe. 6:4). Mitãnguéra ningo hogapýpe oñepyrũ oaprende oporohayhu ha opororrespeta hag̃ua. Upévare, jaʼekuaa tuvakuéra omboʼéva koʼã mbaʼe ifamíliape ombaʼapoha Jehová ndive ojeiko hag̃ua peteĩ ñeʼẽme. Ñande rogapýpe ndajaikóiramo ñandepochy  ha jajahéi ojuehe, ñamboʼeñaína ñane familiakuérape oporohayhu ha oñemoĩ hag̃ua umi omoakãva poguýpe. Koʼã mbaʼe oprepara chupekuéra oiko hag̃ua Ñandejára múndo pyahúpe.

17. ¿Mbaʼépa tekotevẽ jajapo jagueropuʼaka hag̃ua Satanás oñemoĩ jave ñanderehe?

¹⁷ Ñanemanduʼavaʼerã Satanás oñepyrũ hague oporomoingo vai, ha oñehaʼãmbaitetaha ani hag̃ua jajapo Ñandejára rembipota. Upéva ojehechakuaa oĩgui koʼág̃a rupi heta hetave oikóva oñondive omendaʼỹre, ména ha tembireko ojopoíva, térã kuimbaʼe omendáva kuimbaʼére ỹrõ kuña kuñáre. Péro ñandéve g̃uarã koʼã mbaʼe noĩporãi ha ndajahejái ñandegueraha vai, upéva rangue jasegi Jesús ehémplo (Efe. 4:17-21). La Biblia ñanemokyreʼỹ ñamoĩ hag̃ua pe “armadúra Ñandejára omeʼẽva” ikatu hag̃uáicha jagueropuʼaka Satanás ha idemoniokuérape oñemoĩ jave ñanderehe (elee Efesios 6:10-13).

“PEIKO MBORAYHÚPE”

18. ¿Mbaʼéicha rupípa jaiko peteĩ ñeʼẽme ñane ermanokuéra ndive?

¹⁸ Jaiko hag̃ua peteĩ ñeʼẽme ermanokuéra ndive tekotevẽ jajoayhu. Ñande ningo jahayhueterei Jesucrístope, Jehovápe ha ñane ermanokuérape, upévare ‘ñañehaʼãmbaite jaiko peteĩ ñeʼẽme espíritu sánto rupive ha jasegi upéicha akóinte ñaime hag̃ua pyʼaguapýpe’ (Efe. 4:3-6). Jesús oñemboʼérõ guare Itúvape oñeʼẽ peichagua mborayhúre heʼívo: “Che ndajeruréi ndéve hesekuéra añónte, ajerure avei umi ojeroviátavare cherehe ohendu rire chupekuéra. Péicha oiko hag̃ua chuguikuéra peteĩnte, nde che Ru reimeháicha chendive ha che aime nendive, haʼekuéra avei toĩ ñanendive [...]. Che aikuaauka chupekuéra nde réra ha aikuaaukáta gueteri, ikatu hag̃uáicha haʼekuéra oporohayhu nde cherayhu haguéicha ha che aime hag̃ua hendivekuéra” (Juan 17:20, 21, 26, NM).

19. ¿Mbaʼépa jajedesidivaʼerã jajapo?

¹⁹ Ñaneimperfékto rupi, ikatu oĩ heta mbaʼe hasýva ñandéve ñakambia hag̃ua. Péro japorohayhúramo ñanekyreʼỹta jajapo hag̃ua heʼivaʼekue pe salmísta: “Chembopyʼapeteĩ nde réra amombaʼe hag̃ua” (Sal. 86:11). Ñañemoĩkena Satanás rehe ha ani jaheja ñanemomombyry ñande Ru ñanderayhuetévagui, ni umi Jehová oguerohorývagui. Ñañehaʼãmbaite jasegi Pablo konsého ñande rogapýpe, predikasión ha kongregasiónpe. Haʼe heʼivaʼekue: ‘Peñehaʼãke pehaʼanga Ñandejárape, ha peiko mborayhúpe’ (Efe. 5:1, 2, ÑÑB).

[Porandu ñahesaʼỹijóva]

[Nóta oĩva taʼanga ndive páhina 29]

Eheja nde jopói pe altár renondépe, ha tereho eñemoĩ porã raẽ ne ermánondi

[Nóta oĩva taʼanga ndive páhina 31]

Tuvakuéra, pemboʼékena pene famíliape opororrespeta hag̃ua