Ojapóma 15 áño Emilia oheja hague iprekursorádo ndaikatuvéigui ojapo. Péro, ndaʼareiete oñepyrũ imanduʼa mbaʼeichaitépa ovyʼa upe tiémpope. Upévare ojaposeterei jey iprekursorádo.

Péro itraváho hoʼueterei chugui itiémpo ha upéicha rupi ndovyʼaguasuvéi oikóvo. Peteĩ jey, osẽ heʼi ikompañerokuéra renondépe: “¡Ikatúngaʼu raʼe ambaʼapo saʼimie!”. Ipatróna oikuaávo upéva, oho hendápe ha oporandu chupe añetépa upe heʼíva. Emilia heʼi chupe siertoha. Péro ikatu hag̃uáicha saʼive ombaʼapo, oñeʼẽvaʼerã pe direktór ndive. Hiʼarive oikévo upe emprésape ojeʼe voi umi personálpe oñemeʼẽmbaitevaʼerãha itraváhope. Upévare Emilia ojeprepara porã, oñemboʼe Jehovápe ha ojerure chupe taipyʼaguasu ha taipyʼaguapymi oñeʼẽ hag̃ua pe direktór ndive.

Emilia kyhyjeʼỹme oñemongeta hendive, ha ojerure porãnte chupe ndaikatúipa ombaʼapo saʼive. Omombeʼu chupe ilívre jave oipytyvõha hapichakuérape, ha heʼi: “Chéngo testígo de Jehová ha aipytyvõ che rapichakuérape oikuaave hag̃ua Ñandejárape. Koʼág̃a rupi umi hénte ndojapoguasuvéi iporãva, upévare oikotevẽ ojehechauka chupekuéra umi konsého oĩva la Bíbliape. Che ajapo porãse che traváho koʼápe, péro añemotiemposeve avei umi héntepe g̃uarã. Upévare ikatúramo, saʼive ambaʼapose”.

Pe direktór ohendu porãnte, ha upéi omombeʼu chupe haʼe yma opensa hague avei oipytyvõ umi oikotevẽvape. Ha heʼive: “Iporãiterei upe rejaposéva, upévare ikatu saʼivénte rembaʼapo. Péro reganaʼivéta hína”. Emilia heʼi oikuaaha upéva ha oñehaʼãtaha oiko pe oganamívare. Ha upéi heʼive: “Upe ajaposéva tuicha ideprovéchota umi héntepe, upévare iñimportanteterei chéve g̃uarã”. Upémarõ pe direktór ombohovái: “Aguerohoryeterei umi oñehaʼãmbaitévape oipytyvõ hapichakuérape, ohaʼarõʼỹre mbaʼeve chuguikuéra”.

Koʼág̃a Emilia ombaʼapo cuatro día a la semána. Upe mboyve, ni peteĩvape ndojehejaivaʼekue ombaʼapo saʼive upe emprésape. Ha ndahaʼéi upéva añónte, haʼe ohaʼarõʼỹetére, ojehupi chupe isuéldo ha ogana jey yma guaréicha. Emilia heʼi: “Oikomi jey chehegui prekursóra. ¡Aretéma ningo ahaʼarõ hague upéva!”.

Ha nde, ¿mbaʼépa ikatu rejapo rejagarra hag̃ua avei nde prekursorádo?

[Komentário oĩva páhina 32-pe]

Pe direktór heʼi: “Aguerohoryeterei umi oñehaʼãmbaitévape oipytyvõ hapichakuérape, ohaʼarõʼỹre mbaʼeve chuguikuéra”