PETEĨ mitãrusu Italiaygua, hérava Bruno, odesidivaʼerã kuri peteĩ mbaʼe ijetuʼuetereíva. Oterminárõ guare ikoléhio haʼe inóta porãiterei, upévare ihénte ha imboʼeharakuéra omboliga chupe oho hag̃ua universidápe. Péro haʼe odesidíma vaʼekue omotenondetaha Ñandejára Rréino. ¿Mbaʼépa ojapo upémarõ? Haʼe omombeʼu: “Añemboʼe Jehovápe ha haʼe akumplitaha pe aprometevaʼekue añemeʼẽrõ guare chupe, ha amotenondetaha hembipota. Péro haʼe porã avei chupe ajaposeha heta mbaʼe iservísiope”.

 Tiémpo rire, Bruno ova Ecuadórpe. Ha upéi heʼi: “Jehová omeʼẽ chéve hetave mbaʼe ajerurevaʼekuégui”. Og̃uahẽrõ guare Ecuadórpe, otopa heta mitãrusu ohóva avei upe tetãme oservi porãve hag̃ua Jehovápe.

MITÃRUSUKUÉRA OMBAʼAPOVÉVA JEHOVÁPE G̃UARÃ

Bruno ha hetave mitãrusu oasepta ko invitasión Jehová ojapóva: ‘Petanteántena ikatúramo, ha pehecháta mbaʼéichapa [...] ahykuavo pende ári heta mbaʼe porã’ (Mal. 3:10). Koʼã mitãrusu ha mitãkuña ohayhueterei Jehovápe, upévare oiporu itiémpo, imbaretekue ha orekomíva oservi hag̃ua umi tetã oñekotevẽvehápe. Ha upéicha haʼete ku otanteáva mbaʼeichaite pevépa Jehová ikatu ovendesi chupekuéra.

Og̃uahẽre voi upe lugár oservitahápe, koʼã ermáno ohecháma “oĩha hetaiterei kóga oñemonoʼõvaʼerã, péro saʼiha umi omonoʼõva” (Mat. 9:37, NM). Pór ehémplo Jaqueline, Alemaniaygua, ohai kóicha Ecuador sukursálpe: “Ojapo dos áño rasami aservi hague ko tetãme, arekóma 13 estúdio, ha umívagui 4 oho meme rreunionhápe. ¡Avyʼaiterei ningo koʼápe!”. Chantal, peteĩ ermána Canadaygua, omombeʼu: “Áño 2008-pe ava Ecuadórpe, peteĩ lugár oĩvape ag̃uiete márgui. Upérõ oĩvaʼekue peteĩ kongregasión añónte, péro koʼág̃a oĩma 3 kongregasión,  ha prekursór katu 30 ári voi. ¡Chembopyʼarory ahechávo heta hénte oñakãrapuʼãva ha oservíva Jehovápe! Ndaʼareiete ava jey ótra siudápe, oĩva 2.743 métro de altúrape, kordilléra de los Ándespe. Upépe oĩ peteĩ kongregasión añónte, oĩramo jepe 75.000 rasa umi oikóva upe siudápe. Umi hénte ningo ohenduseterei pe predikasión, ha che avyʼaiterei aipytyvõ haguére chupekuéra”.

OMBOHOVÁI HETA MBAʼE IJETUʼÚVA

Añetehápe umi ohóva oservi ótro tetãme ombohovái heta mbaʼe ijetuʼúva. Heta vése osẽ mboyve voi hetãgui ijetuʼúma hendivekuéra. Kayla, Estados Unidosgua, imanduʼa: “Oĩvaʼekue ermáno ojepyʼapýgui cherehe oñemoñeʼẽva chéve, péro umi mbaʼe heʼíva chemokangy. Haʼekuéra nontendéi mbaʼérepa ahase aservi ótro tetãme. Upévare ndaikuaaporãivaʼekue oĩ porãpa la ajaposéva”. Upéicharõ jepe, Kayla ova Ecuadórpe. Haʼe heʼi mbaʼépa omokyreʼỹ chupe: “Heta añemboʼe Jehovápe, ha añeʼẽ umi ermáno ijerovia mbaretéva ndive. Ha ahechakuaa Ñandejára oipytyvõha umi ombaʼaposevévape chupe g̃uarã”.

Hetápe katu ijetuʼueterei oaprende hag̃ua ótro idióma. Siobhan, peteĩ ermána Irlandaygua, omombeʼu: “Añeñandu vaieterei ndaikatúigui añeʼẽ porã iñidiomakuérape. Upéi ahechakuaa tekotevẽha chepasiénsia, añehaʼãmbaite astudiave upe idióma ha apukánte ajavy jave”. Anna, Estoniaygua, heʼi: “Koʼápe ningo haku, yvytimboiterei ha y roʼysãitépe rojahuvaʼerã. Péro umi mbaʼe, vyrorei ñambojojárõ ahasávare aaprende hag̃ua kastelláno. Heta vése ajedehaséntema voi. Ha ahechakuaa ofaltaitiha chéve heta mbaʼe, péro napensavéi umívare ha añehaʼã ajesareko umi mbaʼe ahupytýmavare”.

Heta mitãrusúpe ojopy avei techagaʼu. Jonathan, Estados Unidosgua, omombeʼu: “Ag̃uahẽ riremínte Ecuadórpe ahechagaʼueterei che hénte ha che amigokuérape. Péro apredika meme ha astudia rupi Ñandejára Ñeʼẽ, chekyreʼỹve. Umi mbaʼe porã ahasáva aipytyvõvo che rapichakuérape ha umi amígo pyahu atopáva kongregasiónpe, tuicha chepytyvõ avyʼa jey hag̃ua”.

 Ótrope g̃uarã ijetuʼu ojepokuaa tetã ahénope. Beau, peteĩ ermáno Canadaygua, omombeʼu: “Ore retãme oĩmba voi elektrisida ha água korriénte, ha ni ndorohecharamovéima umíva. Péro koʼápe pyʼỹinte opa jeýma koʼã mbaʼe”. Umi tetã imboriahúvape ijetuʼu javiaha ha heta hénte ndohói eskuélape. Ines, Austriaygua, omombeʼu mbaʼe rehépa ojesareko ogueropuʼaka hag̃ua: “Koʼápe umi hénte imbaʼeporãiterei, iñumílde ha, iñimportanteveha katu, oikuaase Ñandejárape. Che añehaʼã ajesareko umívare chekyreʼỹ jey hag̃ua”.

ÑANDEJÁRA OVENDESI CHUPEKUÉRA

Koʼã mitãrusu ha mitãkuña ombohovái heta mbaʼe ijetuʼúva oservi hag̃ua Ecuadórpe. Péro ohechakuaa hikuái Jehová ‘ikatuha ojapo hetaitereive mbaʼe ñande ñaimoʼã térã jajerurévagui’ (Efe. 3:20). Ha ohecha avei hikuái mbaʼéichapa Jehová okumpli ipromésa oñohẽvo hiʼarikuéra mbaʼe porã “renyhẽ chovi” (Mal. 3:10). Jahechamína mbaʼépa heʼi hikuái hembiapóre.

Bruno: “Ag̃uahẽrõ guare Ecuadórpe, aservi peteĩ lugár oĩva Amazónaspe. Upéi, aipytyvõ oñembotuichavérõ guare Betel, ha koʼág̃a ambaʼapo upépe. Aimérõ guare Itáliape adesidi amotenonde Jehovápe, ha avyʼa haʼe omeʼẽ haguére chéve pe oportunida aservi hag̃ua chupe heta hendáicha”.

Beau: “Ecuadórpe ambaʼapo kyreʼỹ Jehová servísiope, ha upéicha rupi añemoag̃uive hese. Avei hetáma akorre ha aikuaa umi lugár neporãmba jepéva, upéva yma guivéma voi ajaposevaʼekue”.

Anna: “Che ni naimoʼãiva chesoltéra aja ikatutaha aservi peteĩ misionéraicha. Péro ikatúmboraʼe. Jehová chevendesi, ha avyʼa aipytyvõvo che rapichakuérape oikuaa hag̃ua chupe. Avei chembopyʼarory ikatu haguére ambaʼapo oñemopuʼã hag̃ua umi Salón pyahu ha atopa haguére heta che amigorã”.

Elke: “Aikórõ guare Áustriape, ajerurémi Jehovápe akonsegi hag̃ua peteĩ estúdio jepe. ¡Aváiko oimoʼãta koʼápe ajapoha 15 estúdio voi! Avyʼaiterei ahechávo mbaʼéichapa umi hénte oñakãrapuʼã porãite Jehová organisasiónpe”.

Joel: “Avyʼaiterei ikatu haguére aservi Jehovápe peteĩ lugár aikuaaʼỹvape. Ahechakuaa mbaʼéichapa haʼe chepytyvõ opaite mbaʼépe, ha upéicha rupi ajeroviave hese. Aju ramóme Estados Unídosgui, oĩvaʼekue 6 puvlikadór añónte pe grúpo aĩháme; un áño haguépe roiméma 21, ha Conmemoracionhápe katu roimékuri 110 voi”.

HA NDE, ¿MBAʼÉPA REJAPÓTA?

Oiméramo nde rejevautisáma ha ikatu reho reservi oñekotevẽvehápe, ¿rehótapa? Upearã rejeprepara porã raẽ vaʼerã. Ha iñimportanteveha, tekotevẽ rehayhu nde pyʼaite guive Jehovápe ha nde rapichakuérape. Upéi eñemboʼe chupe nepytyvõ hag̃ua. Ha eñeʼẽ nde tuvakuéra ha umi ansiáno ne kongregasionpegua ndive. Rejapopa rire koʼã mbaʼe, ikatu rehecha ijaha ndéve reho reservi oñekotevẽvehápe ha revyʼa rembaʼapovévo Jehovápe g̃uarã.

[Komentário oĩva páhina 3-pe]

“Heta añemboʼe Jehovápe, ha añeʼẽ umi ermáno ijerovia mbaretéva ndive. Ha ahechakuaa Ñandejára oipytyvõha umi ombaʼaposevévape chupe g̃uarã.” (Kayla, Estados Unidosgua)

[Taʼanga ha rrekuádro oĩva páhina 6-pe]

¿Mbaʼépa ikatu rejapo reservi hag̃ua oñekotevẽvehápe?

• Ejepokuaa estudia meme la Biblia

• Ehecha mbaʼépa heʼi Ñane Marandu Porã agosto 2011, páhina 4-6

• Eñemongeta umi ohomavaʼekuéndi oservi oñekotevẽvehápe

• Eñehaʼã eikuaa upe siuda térã upe tetã istória ha ikostumbrekuéra

• Estudia upe idióma oñeñeʼẽva upe lugárpe

[Taʼanga ha rrekuádro oĩva páhina 6-pe]

¿Mbaʼéichapa ikatu reñemantene?

• Oĩ ohóva ombaʼapo mimi káda áño hetãme térã ipuévlope

• Oĩ oalkiláva hóga térã inegósio

• Ótro katu ojapo traváho Internet rupive

[Nóta oĩva taʼanga ndive páhina 4 ha 5]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)