“Peikovaʼerã hekópe oikoháicha umi ogueroviáva pe marandu porã.” (FILI. 1:27, NM)

¿MBAʼÉPA REMBOHOVÁITA?

¿Máva mávapa ikatu oiko Ñandejára Rréino poguýpe?

¿Mbaʼérepa tekotevẽ jaikuaa Ñandejára Rréino idióma, istória ha iléi?

¿Mbaʼéichapa umi oñemoĩva Ñandejára Rréino poguýpe ohechauka ohayhuha Jehová léi?

1, 2. ¿Mbaʼérepa ontende porã umi kristiáno Filiposgua pe konsého Pablo omeʼẽvaʼekue?

 APÓSTOL Pablo ohaivaʼekue umi kristiáno Filiposguápe: “Peikovaʼerã hekópe oikoháicha umi ogueroviáva pe marandu porã” (elee Filipenses 1:27). Pe ñeʼẽ griégo koʼápe ojetradusíva “peikovaʼerã hekópe”, heʼise avei “peikovaʼerã peteĩ siudadánoicha”. Umi ermáno upepegua ontende porã vaʼekue mbaʼépa heʼise upéva. Filipos oiméne oĩrakaʼe umi táva rromanokuéra oiporavovaʼekue apytépe, avei ojeguereko Roma retãyguáramo ha oñemeʼẽ chupekuéra heta derécho orekóva umi rrománo. Umi Filiposgua térã ambue tavaygua, omombaʼeterei vaʼekue upe priviléhio ha umi mbaʼe porã ohupytýva oiko haguére chuguikuéra Roma retãygua.

² Péro oĩ peteĩ mbaʼe iñimportantevéva ha omombaʼevevaʼerã umi kristiáno unhído oikóva Filípospe. Pablo omomanduʼa chupekuéra: “Ñandéve g̃uarã, pe ñane retã oĩ yvágape” (Fili. 3:20, JMP). Haʼekuéra ningo hetã Ñandejára Rréino, ndahaʼéi peteĩ tetã ko yvy arigua. Upévare ohupyty hikuái heta mbaʼe ijojahaʼỹva ha upe Rréino yvagaygua oñangareko hesekuéra (Efe. 2:19-22).

3. a) ¿Máva mávapa ikatu oiko Ñandejára Rréino poguýpe? b) ¿Mbaʼépa ñahesaʼỹijóta ko artíkulope?

³ Pablo heʼírõ guare “peikovaʼerã hekópe”, opensavaʼekue umi unhídore ogovernátava Cristo ndive yvágape (Fili. 3:20). Upéicharõ jepe, ikatu jaʼe oñeʼẽha avei opavave yvypóra oikótavare ko yvy ape ári Ñandejára Rréino poguýpe. ¿Mbaʼérepa? Entéro kristiáno, tahaʼe oikótava yvágape térã ko yvy ape ári, oservi Jehovápe ha iñeʼẽrenduvaʼerã chupe (Efe. 4:4-6). Koʼág̃a rupi heta hénte ojapo oimeraẽ mbaʼe ikatu  hag̃uáicha oñenasionalisa peteĩ tetã iñimportántevape. Ha ñande koʼýte ñamombaʼevaʼerã oiko haguére ñandehegui siudadáno Ñandejára Rreinopegua. ¿Mbaʼéichapa jahechauka ñamombaʼeha ko priviléhio? Jahechamína mbaʼépa ojerure umi goviérno peteĩ eystranhérope ikatu hag̃uáicha oñenasionalisa, ha ñambojojami Ñandejára goviérno ojerurévare. Upéi ñahesaʼỹijóta mbohapy mbaʼe tekotevẽva jajapo ikatu hag̃uáicha akóinte ñañemoĩ Ñandejára Rréino poguýpe.

MBAʼÉPA JAJAPOVAʼERÃ OIKO HAG̃UA ÑANDEHEGUI PETEĨ SIUDADÁNO

4. ¿Mbaʼépa pe “ñeʼẽ ipotĩva”, ha mbaʼéichapa jaiporu?

⁴ Ñaaprendevaʼerã pe idióma. Oĩ goviérno heʼíva umi eystranhéro oñeʼẽvaʼerãha pe idióma ojeporuvéva upe tetãme ikatu hag̃uáicha oñenasionalisa. Ha oĩramo jepe heta oñenasionalisáva, hasýpe oñeʼẽ porã pe idióma. Ikatu oaprende pyaʼe mbaʼéichapa oñeñeʼẽvaʼerã, péro haʼete ikũ atãmbáva gueteri. Ñandejára Rréino ojerure avei oñeñeʼẽ hag̃ua peteĩ “ñeʼẽ ipotĩva” (elee Sofonías 3:9). ¿Mbaʼépa hína upe ñeʼẽ? Opa mbaʼe la Biblia omboʼéva Ñandejára ha hembipotágui. Ñande jaiporu pe ñeʼẽ ipotĩva ñakumplíramo Jehová léi ha jasegi umi konsého omeʼẽva. Opavave oñemoĩva Ñandejára Rréino poguýpe ikatu oaprende pyaʼe umi mbaʼe iñimportantevéva oĩva la Bíbliape. Péro ojevautisa rire jepe oñehaʼãvaʼerã oiporu porãve ohóvo pe ñeʼẽ ipotĩva. ¿Mbaʼéichapa ojapo upéva? Oñehaʼã memévo ojapo umi mbaʼe oaprendéva la Bíbliagui.

5. ¿Mbaʼérepa tekotevẽ ñaaprende ikatúva guive Jehová organisasióngui?

⁵ Jastudiavaʼerã pe istória. Umi oñenasionalisaséva peteĩ tetãme tekotevẽ oikuaaʼimi jepe pe istória upepegua. Upéicha avei, umi oikoséva Ñandejára Rréino poguýpe oaprendevaʼerã ikatúva guive ko goviérnogui. Ñanemanduʼamína peteĩ mbaʼe oikovaʼekuére yma Israélpe. Coré ñemoñarekuéra ningo omombaʼevaʼekue Jerusalén ha pe lugár ojeporúva oñemombaʼeguasu hag̃ua Jehovápe. Upévare omombeʼuseterei umi mbaʼe oikovaʼekue upe távape. Péro ndoguerohorýi hikuái iporã haguérente Jerusalén ha Ñandejára róga, síno omombaʼeve orrepresentáva. Jerusalénpe oñemboʼe Ñandejára léi ha oñemombaʼeguasu Jehovápe, pe “Mburuvicha Guasu tuichavéva”. Jehová oiporavo ipuevlorã umi oĩva pe rréi Jerusalengua poguýpe (elee Salmo 48:1, 2, 9, 12, 13). ¿Ndépa restudia ha remombeʼuse avei Jehová organisasión ojapóva, ojapo haguéicha yma Coré familiare? Reaprendevévo  umi mbaʼe ojapóva Jehová organisasión ha rehechávo mbaʼéichapa haʼe oisãmbyhy ipuévlo, koʼýte rejeroviavéta Ñandejára Rréinore ha remombeʼuséta umi mbaʼe porã ojapótava (Jer. 9:24; Luc. 4:43).

6. ¿Mbaʼérepa Jehová oipota ñaaprende iléi ha jasegi ikonsého?

⁶ Jaikuaavaʼerã umi léi. Umi goviérno oipota opavave oĩva ipoguýpe oaprende ha okumpli umi léi haʼekuéra omoĩva. Upéicha avei Jehová oipota enterove oñemoĩva Irréino poguýpe oaprende ha okumpli umi léi ha konsého haʼe omeʼẽva (Isa. 2:3; Juan 15:10; 1 Juan 5:3). Pyʼỹinte umi léi omoĩva yvyporakuéra ndoikoguasúi ha iñinhústo, péro “Jehová léi ndojavýi mbaʼevépe” (Sal. 19:7, NM). ¿Reguerohorýpa Ñandejára léi ha relee la Biblia káda día? (Sal. 1:1, 2.) Tekotevẽ ñandete jastudia Ñandejára léi ikatu hag̃uáicha ñaaprende, ndaipóri ojapovaʼerã upéva ñande vése.

UMI OÑEMOĨVA ÑANDEJÁRA RRÉINO POGUÝPE OHAYHU JEHOVÁ LÉI

7. ¿Mbaʼeichagua léipa okumpli opavave oñemoĩva Ñandejára Rréino poguýpe?

⁷ Akóinte jaiko hag̃ua Ñandejára Rréino poguýpe, jaikuaa ha jahayhuvaʼerã Jehová léi. Ko múndope heta tapicha heʼi orrespetaha umi léi oñemoĩva hetãme, péro nokonveníriramo chupe ha oimoʼã avave nomañaiha hese, nokumplivéintema umi léi. Heta vése ojapo hikuái umi léi heʼíva “opyta porã hag̃ua” ótro renondépente (Col. 3:22, BNP). Péro opavave oñemoĩva Ñandejára Rréino poguýpe ohayhu pe léi Apoharépe, upévare okumpli ipyʼaite guive umi léi ijyvatevéva, umi hénte ndohecháiramo jepe chupekuéra (Isa. 33:22; elee Lucas 10:27).

8, 9. ¿Mbaʼéichapa ikatu rehechakuaa oimépa rehayhu Ñandejára léi nde pyʼaite guive?

⁸ ¿Mbaʼéichapa ikatu rehechakuaa rehayhúpa Ñandejára léi nde pyʼaite guive? Epensamína mbaʼépa rejapo oĩ jave oñemoñeʼẽva ndéve, pór ehémplo rejearregla térã reñemonde lájare. Oiméne reñemoĩ mboyve Ñandejára Rréino poguýpe, reñemonde vai rakaʼe térã reiporu umi ao naidesénteiva, péro reikuaavévo Jehovápe rehechakuaa tekotevẽha reñemonde porã ani hag̃ua remotĩ chupe (1 Tim. 2:9, 10; 1 Ped. 3:3, 4). Ikatu koʼág̃a repensa reñemonde porãmaha, péro, ¿mbaʼépa rejapóta peteĩ ansiáno heʼíramo ndéve heta ermánope ostorvaha reñemonde lája? ¿Reñemoĩtapa reñedefende? ¿Ndepochýtapa térã reñemohatãta nde erévapente? Opavave oĩva Ñandejára Rréino poguýpe ohaʼangavaʼerã Crístope, ha upéva peteĩ léi katuete oñekumplivaʼerã (1 Ped. 2:21). Pablo ohaivaʼekue: “Káda uno jajapovaʼerã umi mbaʼe ideprovéchotava ñande rapichápe ha iporãtava omombarete hag̃ua chupe. Cristo jepe nomeʼẽi gústo ijupe” (Rom. 15:2, 3, NM). Ikatu hag̃uáicha ñaime pyʼaguapýpe kongregasiónpe, pe kristiáno iñakãguapýva noñemohatãi haʼe heʼívape, síno oñehaʼãmbaite orrespeta hapichakuéra opensáva (Rom. 14:19-21).

⁹ Jahechamína mokõi mbaʼe tekotevẽva avei ñañatende. La Biblia heʼi mbaʼéichapa jahechavaʼerã pe sexo ha matrimónio. Umi noĩriva Ñandejára Rréino poguýpe opensa ndaivairiha kuimbaʼe oiko kuimbaʼéndi, kuña kuñándi, oñomoakãratĩva, térã ojedivorsiáva. Ótro katu oimoʼã pe pornografía avavépe ndoperhudikaiha. Péro umi oikóva Ñandejára Rréino poguýpe nopensavéima ijehénte ha ohechakuaa koʼã mbaʼe ivaiha. Ikatu oĩ hekovaivaʼekue yma oiko mboyve chugui kristiáno, péro koʼág̃a oikuaáma pe sexo ha  matrimónio haʼeha peteĩ jopói oúva Jehovágui. Haʼekuéra omombaʼeterei Jehová léi ha oikuaa porã opavave hekokyʼáva ndoikomoʼãiha Ñandejára Rréino poguýpe (1 Cor. 6:9-11). Upéicharõ jepe, ohechakuaa hikuái ñane korasõ ikatuha ñanetraisiona (Jer. 17:9). Upévare oagradese oĩramo oñemoñeʼẽva ha oipytyvõva chupekuéra akóinte orrespeta hag̃ua umi léi ijyvatevéva.

UMI OÑEMOĨVA ÑANDEJÁRA RRÉINO POGUÝPE OHENDU OJEʼÉVA CHUPEKUÉRA

10, 11. ¿Mbaʼépa ñandeavisa Ñandejára Rréino, ha mbaʼépa repensa koʼã mbaʼére?

¹⁰ Umi goviérno pyʼỹinte oavisa hetãyguakuérape mbaʼe mbaʼépa ojapovaʼerã ani hag̃ua hasy. Pór ehémplo, oavisa mbaʼe tembiʼu ha pohãpa ikatu oporombyai. Péro jaikuaaháicha, upéva ndeʼiséi entéro tembiʼu ha pohã oporoperhudikataha. Umi goviérno nomeʼẽiramo pe avíso ohechauka noñangarekoiha ihentekuérare. Ñandejára Rréino ñandeavisa avei mbaʼe mbaʼépa ikatu ñandeperhudika ha omokangy ñande jerovia. Pór ehémplo, Internet rupive ikatu ñañekomunika ñande rapichakuérandi, ñaaprende heta mbaʼe ha avei jaiporu jajediverti hag̃ua. Ñandejára organisasión oiporu avei Internet ojapo hag̃ua heta mbaʼe iporãva. Péro pe tembiguái jeroviaha ñandeavisa avei upépe oĩha heta mbaʼe ikatúva ñanemomombyry Jehovágui, umíva apytépe umi páhina ohechaukáva pornografía. ¡Jaagradesete ningo Jehovápe ojepyʼapy haguére ñanderehe!

¹¹ Koʼág̃a rupi ojeporueterei avei umi rréd sosiál. Upéva ikatu ideprovécho ñandéve jaiporu porãramo, péro nañañatendéiramo ikatu tuicha ñandeperhudika. Heta oiporúva koʼã rréd sosiál, ohechakuaaʼỹre ou ijúnta vai (1 Cor. 15:33). Ndareíri ningo Jehová organisasión oavisa porã oñeñatende hag̃ua ojeporu jave koʼã rréd sosiál. Tembiguái jeroviaha oguenohẽma heta informasión oñeʼẽva koʼã mbaʼére. ¿Releepámapa umi osẽ ramovéva? Jaiporúramo umi rréd sosiál jaleeʼỹre koʼã informasión, haʼete jaʼúva pohã imbaretéva jalee mboyve umi indikasión. a

12. ¿Mbaʼérepa jaʼekuaa ñandevyroha nañapenáiramo tembiguái jeroviaha heʼívare?

¹² Umi nopenáiva pe tembiguái jeroviaha heʼívare, katuete osẽ vai ha ombohasa asy umi ohayhúvape chupe. Oĩ oñenvisiaitéva pornografíare térã hoʼa tekovaípe ha oimoʼã Jehová ndohechaiha chupe. ¡Ajépa ñandevyroitevaʼerã ñapensáramo ñañomitaha Jehovágui ñane rembiapo vaikue! (Prov. 15:3; elee Hebreos 4:13.) Umi goviérno ko yvy arigua ikatu omosẽ umi eystranhérope nokumplíriramo pe léi haʼekuéra omoĩva. Péicha avei, umi nokumplíriva Jehová léi ha noñearrepentíri, ndaikatumoʼãi oiko Ñandejára Rréino poguýpe (1 Cor. 5:11-13). b Upéicharõ jepe, Jehová oiporiahuvereko koʼãichagua tapichápe ha oipytyvõse chupekuéra, ha upearã oiporu umi ansiánope (Gál. 6:1).  Umi oñearrepenti ha okambiáva ikatu oñemoĩ porã jey Jehovándi ha osegi Ñandejára Rréino poguýpe (2 Cor. 2:5-8). ¡Ajépa javyʼaite jaservi haguére peteĩ Rréi oporohayhuetévape!

UMI OĨVA ÑANDEJÁRA RRÉINO POGUÝPE OÑEHEKOMBOʼE

13. ¿Mbaʼéichapa umi oĩva Ñandejára Rréino poguýpe ohechauka iñimportanteveha Jehová omboʼéva?

¹³ Oĩ heta goviérno oñehaʼãva ohekomboʼe hetãyguakuérape. Pór ehémplo omoĩ eskuéla ha koléhio ikatu hag̃uáicha umi hénte olee ha oskrivi. Avei omoĩ institusión ombokatupyrýva chupekuéra oñemantene hag̃ua. Umi kristiáno omombaʼe koʼã edukasión ha oñevenefisia chugui. Péro chupekuéra g̃uarã iñimportanteve Ñandejára Rréino omboʼéva. Umi kongregasión rupive Jehová oporomokyreʼỹ ojelee hag̃ua, upévare tuvakuérape ojeʼe olee meme hag̃ua ifamília michĩvape. Pe tembiguái jeroviaha káda més oguenohẽ heta informasión oñeʼẽva la Biblia rehe rrevísta Ñemañaha ha ¡Despertad! rupive. Releéramo mokõi páhina rupi káda día, ikatúta releepa koʼã informasión. Upéicha rehejareína Jehová nerekomboʼe.

14. a) ¿Mbaʼéichapa Jehová ñanerekomboʼe? b) ¿Mbaʼéichapa nde rejapo pe Aty Jastudia Hag̃ua Ñande Rogayguándi?

¹⁴ Káda semána oñehekomboʼe Ñandejára rembiguaikuérape umi kongregasión rupive. Pór ehémplo, ojapóma 60 áño rasa pe Eskuéla Jaiporukuaa Hag̃ua la Biblia ñanembokatupyry hague ñamboʼe hag̃ua Ñandejára Ñeʼẽ. ¿Ndépa reñeanotáma ko eskuélape? Avei koʼã áño ohasávape, pe tembiguái jeroviaha ha iñarandúva heʼi jey jey iñimportanteha jajapo káda semána pe Aty Jastudia Hag̃ua Ñande Rogayguándi. Ko aty oipytyvõ umi famíliape ojoayhuve hag̃ua. ¿Restudiápa ne famíliandi ojeʼeháicha umi puvlikasiónpe? c

15. ¿Mbaʼe priviléhio iporãitévapa jareko?

¹⁵ Heta hénte ombaʼapo meme peteĩ partído polítiko rehehápe ha oĩ voi ohóva ogahárupi ojerure hag̃ua vóto. Upéicha avei, umi oĩva Ñandejára Rréino poguýpe opredika meme pe marandu porã ko yvy tuichakuére, tahaʼe kállere térã ogahárupi. Jahecha haguéicha pe artíkulo jastudiavaʼekuépe, pe rrevísta Ñemañaha, oikuaaukáva Jehová Sãmbyhy, haʼe hína pe ojejapo hetavéva ha iñasãivéva ko múndope. ¡Ajépa tuichaite mbaʼe ikatu haguére ñamombeʼu ñande rapichakuérape pe marandu porã! Ha ñande, ¿ñanekyreʼỹpa japredika hag̃ua umi héntepe? (Mat. 28:19, 20.)

16. ¿Mbaʼéichapa ikatu jahechauka ñañemoĩha Ñandejára Rréino poguýpe?

¹⁶ Koʼẽrõitéma Ñandejára Rréino añoite ogovernáta ko Yvy ha ñanesãmbyhýta opa mbaʼépe. ¿Ñañemoĩmapa hína upe Rréino poguýpe? Ñamombaʼeguasúkena Jehovápe opa mbaʼe jadesidívape ha jahechauka jaikoha siudadánoicha Ñandejára Rréinope (1 Cor. 10:31).

[Nóta]

[Porandu ñahesaʼỹijóva]

[Komentário oĩva páhina 14-pe]

¿Resegípa umi konsého la Biblia omeʼẽva reiporúta jave Internet?

[Nóta oĩva taʼanga ndive páhina 12]

¿Rehayhúpa Jehová organisasión ha ijistória, Coré familiare ohayhu haguéicha?

[Nóta oĩva taʼanga ndive páhina 15]

Pe Aty Jastudia Hag̃ua Ñande Rogayguándi ñanepytyvõta jaiko hag̃ua Ñandejára Rréino poguýpe