“Heta oĩta oipyguaráva, ha pe añetegua oñemyesakãvéta.” (DAN. 12:4, NM)

¿MBAʼÉPA REMBOHOVÁITA?

¿Mbaʼéichapa iñasãi “pe añetegua” koʼã tiémpope?

¿Mbaʼéicha rupípa hetaitéma oĩ umi oñemoag̃uíva Jehová organisasiónre?

¿Mbaʼe mbaʼépa ojejapo iñasãi hag̃ua opárupi pe añetegua?

1, 2. a) ¿Mbaʼépa ohechauka Jesús oĩha koʼág̃a hembiguaikuéra ndive ha oĩtaha avei tenonderãme? b) ¿Mbaʼépa ojehupyty oñehesaʼỹijo porãramo Ñandejára Ñeʼẽ, heʼiháicha Daniel 12:4?

 EPENSAMÍNA reimeha Ñandejára múndo pyahúpe. Káda día reke porã ha repytuʼupaite, nekoʼẽ porã ha nderetiaʼe repuʼãvo. Ndahasýi ndéve mbaʼeve ha ndereguerekói mbaʼeveichagua mbaʼasy. Umi ne cinco sentído ombaʼapo porãmbaite. Nekyreʼỹeterei ha revyʼa rejapóvo ne rembiapokuéra, heta ne amígo ha mbaʼeve nandejopýi. Upeichaite ningo ojeikóta Ñandejára Rréino poguýpe. Cristo, pe Rréi Jehová oiporavovaʼekue, ovendesíta opavave oĩvape igoviérno poguýpe ha omboʼéta chupekuéra pe añetegua.

² Upe tiémpope, Jehová oipytyvõta hembiguaikuéra iñeʼẽrendúvape ojapo hag̃ua upe tembiapo iñimportantetéva ko Yvy tuichakuére. Añetehápe, Haʼe ha Itaʼýra ymaite guivéma omoirũ umi hekojojávape. Upévare, oho mboyve yvágape, Jesús heʼivaʼekue hemimboʼekuérape akóinte oĩtaha hendivekuéra (elee Mateo 28:19, 20). Ikatu hag̃uáicha jajerovia ñande pyʼaite guive ko promésare, jahecháta peteĩ profesía Jehová ohaikavaʼekue Daniélpe oĩrõ guare Babilóniape, ojapo dos mil quinientos áño rasa. Oñeʼẽvo “umi ára paha” rehe, ko proféta ohai: “Heta oĩta oipyguaráva, ha pe añetegua oñemyesakãvéta” (Dan. 12:4). ¿Mbaʼépa heʼise pe ñeʼẽ “oipyguara”? Heʼise ohesaʼỹijo porãva peteĩ mbaʼe. Upéicha rupi opavave ohesaʼỹijo porãva Ñandejára Ñeʼẽ oikuaáta mbaʼépa añetehápe oñemboʼe ipype. Hiʼarive umi mboʼepy iñasãita opárupi ha enterove oaprendeséva, ikatúta oaprende. ¡Ajépa tuichaite ñanepytyvõta ñahesaʼỹijóramo pe añetegua! Jastudiávo ko profesía, jahecháta Jesús oipytyvõha hembiguaikuérape ñane tiémpope ha  Jehová ikatuha okumpli opa mbaʼe oprometevaʼekue.

“PE AÑETEGUA OÑEMYESAKÃVÉTA”

3. ¿Mbaʼépa oiko umi apóstol omanomba rire?

³ Umi apóstol omano rire, heta kristiáno omboyke pe añetegua ha opuʼã Ñandejárare. Umi opensáva upéicha ou heta hetave ha sapyʼaitérõ g̃uarã tata rendýicha ojagarrapa (Hech. 20:28-30; 2 Tes. 2:1-3). Ohasáramo jepe heta tiémpo, ni michĩmi noñemyesakãi “pe añetegua”. Umi rrelihión omoakãva, heʼíva ijehe kristianoha, japúmante omboʼe, omosarambi umi “demónio omboʼéva”, ha umíva oheja vai Ñandejárape (1 Tim. 4:1, NM). Upéicha omokañy umi héntegui heta mbaʼe la Biblia omboʼéva. Pór ehémplo, heʼi hikuái Ñandejára, Itaʼýra Jesucristo ha pe espíritu sánto peteĩnteha. Avei ñane álma nomanoiha, ha oĩha álma ohasa asýva infiérnope opa árare.

4. ¿Mbaʼéichapa oñepyrũvaʼekue ohesaʼỹijo la Biblia umi kristiáno áño 1870 guive?

⁴ Áño 1870 rupi, amo cuarenta áño oñepyrũ mboyve “umi ára paha”, peteĩ grúpo Pensilvaniaygua (Estados Unidos) oñembyaty ohesaʼỹijo hag̃ua la Biblia. Koʼã kristiáno ostudia porã ikatu hag̃uáicha hesakãve ohóvo “pe añetegua” (2 Tim. 3:1). Haʼekuéra oñembohéra Estudiánte de la Biblia, ha noĩri umi hénte ko mundopegua “iñarandu ha iñakãporãva” apytépe. Ha Jesús heʼi haguéicha, koʼãichagua tapichágui Jehová oñomi la Biblia omboʼéva (Mat. 11:25, NM). Umi Estudiánte de la Biblia ningo hekomirĩ, ha ipyʼaite guive ojapose Ñandejára rembipota. Haʼekuéra ohesaʼỹijo porã Ñandejára Ñeʼẽ, olee ha ojepyʼamongeta hese, upéi okomenta umi mbaʼe oaprendéva. Ombojoja hikuái heta versíkulo ha ohesaʼỹijo umi puvlikasión ojapovaʼekue ambue tapicha ontendeséva avei Ñandejára Ñeʼẽ. Upéicha umi Estudiánte de la Biblia saʼi saʼípe ontende umi mbaʼe hypyʼũvéva heta tiémpore nahesakãivaʼekue.

5. ¿Maʼerãpa oñeguenohẽ umi tratádo The Old Theology (Antigua teología)?

⁵ Umi Estudiánte de la Biblia oguerohory opa mbaʼe oaprendéva, péro noñemombaʼeguasúi ni ndoikói heʼi opredikaha peteĩ mbaʼe pyahu (1 Cor. 8:1). Upéva rangue, oguenohẽ heta tratádo hérava The Old Theology (Antigua teología), ikatu hag̃uáicha umi oleéva oikuaa mbaʼépa añetehápe omboʼe la Biblia. Pe primer tratádo osẽvaʼekuépe oĩ avei “informasión ojestudia hag̃ua la Biblia, ikatu hag̃uáicha ojeheja umi kostúmbre yvypórante omoĩva ha ndogustáiva Ñandejárape, ha ojesegi jey hag̃ua Jesucristo ha umi apóstol omboʼevaʼekue” (The Old Theology, número 1, abril de 1889, páhina 32).

6, 7. a) ¿Mbaʼépa Jehová omyesakã oúvo áño 1870 guive? b) ¿Mbaʼépa nde reguerohoryve umi mbaʼe reaprendevaʼekuégui?

⁶ Ojapóma ningo cien áño rasa umi Estudiánte de la Biblia oñepyrũ hague ohesaʼỹijo Ñandejára Ñeʼẽ. ¡Ajépa hetaite mbaʼéma oñemyesakã upe guive! a Umi téma ñanemokyreʼỹ ha ñanemosãso, ha ndojoguaiete teologokuéra ohesaʼỹijóvape. Ñanepytyvõ jaikuaa hag̃ua mbaʼépa jajapóta ñande rekovépe, ñanembovyʼa ha omeʼẽ ñandéve esperánsa. Avei ñanepytyvõ jaikuaa porãve hag̃ua Jehovápe ha mbaʼépa hembipota. Omyesakã mávapa Jesús, maʼerãpa ou oiko ko yvy ape ári ha upe rire omano, ha mbaʼépa ojapohína koʼág̃a. Ñantende avei mbaʼérepa Ñandejára oheja oiko heta mbaʼe vai ha mbaʼérepa ñamano, mbaʼéichapa ñañemboʼevaʼerã  ha mbaʼépa tekotevẽ jajapo javyʼa hag̃ua.

⁷ Koʼág̃a rupi ñantende umi profesía oĩvaʼekue hetaiterei áñore “ñemiháme” ha oñekumplíva koʼã ára pahápe (Dan. 12:9). Umi profesía jatopa hetaiterei hendápe la Bíbliape, péro oĩ hetaiteve Mateo, Marcos, Lucas, Juan ha Revelaciónpe. Jehová oikuaauka ñandéve umi mbaʼe ndaikatuivaʼekue ni jahecha: pór ehémplo, Jesúsgui oikórõ guare Rréi, oñeñorairõramo guare yvágape, oñemosẽrõ guare upégui Satanáspe ha oñembou ko yvy ape ári (Rev. 12:7-12). Avei Jehová ñanepytyvõ ñantende hag̃ua mbaʼérepa oiko umi mbaʼe jahecháva koʼág̃a, pór ehémplo, ñorairõ guasu, yvyryrýi, mbaʼasy, ñembyahýi ha avei mbaʼérepa oĩ hetave iñañáva. Opa koʼã mbaʼe ohechauka jaikoha peteĩ tiémpo ‘ijetuʼuetereíva ha ñanembohasa asývape’ (2 Tim. 3:1-5, NM; Luc. 21:10, 11).

8. ¿Mávapepa ñamombaʼeguasuvaʼerã oheja haguére jahecha ha ñahendu “pe añetegua”?

⁸ Ñande ikatu ñañeñandu Jesús heʼi haguéicha hemimboʼekuérape: “Ovyʼa umi ohecháva koʼã mbaʼe peẽ pehecháva. Che haʼe peẽme: Heta proféta ha mburuvicha ohechasevaʼekue umi mbaʼe peẽ pehecháva, péro ndohechái. Avei ohendusevaʼekue umi mbaʼe peẽ pehendúva, péro nohendúi” (Luc. 10:23, 24, NM). Opavave kristiáno ñamombaʼeguasu Jehovápe oheja haguére jahecha ha ñahendu koʼã mbaʼe, ha jaagradeseterei ombou haguére pe “pytyvõhára”, térã ijespíritu sánto, oikuaaukáva ñandéve “pe añetegua” (elee Juan 16:7, 13). Upéicharõ, ñamombaʼékena “pe añetegua” ha torýpe ñamboʼe ñande rapichakuérape.

OĨ HETA OJEROVIÁVA “PE AÑETEGUA” REHE

9. ¿Mbaʼépa ojejerure pe rrevísta osẽvaʼekuépe abril 1881-pe?

⁹ Abril 1881-pe, dos áño rupi oñeguenohẽ rire ko rrevísta, osẽ pype peteĩ marandu oñembyaty hag̃ua 1.000 opredikavaʼerã. Pe artíkulo heʼi: “Entéro ikatúvape oiporu la mita jepe itiémpo opredika hag̃ua Jesucristo marandu porã, rojerure [...]: tapeho umi táva guasu ha michĩva rupi, omeʼẽháicha pende posivilida, pejapo pende kolportorádo [prekursorádo], ha peñehaʼã peheka umi ipyʼaporãvape, umíva apytépe omombaʼéva Ñandejárape, péro ndoikuaaporãiva mbaʼépa añetehápe omboʼe la Biblia. Pehekákena chupekuéra pemboʼe hag̃ua mbaʼeichaguápa ñande Ru ñanderayhuetéva ha avei umi mbaʼe porãita oĩva Iñeʼẽme”.

10. ¿Mbaʼépa ojapo heta tapicha ojejerurérõ guare 1.000 opredikavaʼerã?

¹⁰ Ko invitasión ohechauka umi Estudiánte de la Biblia ontende porãha umi kristiáno tee opredikavaʼerãha pe marandu porã. ¿Mbaʼéichapa oñembohovái ko invitasión? Ojejeruréramo jepe 1.000 prekursór, saʼi gueteri oĩ ohóva rreunionhápe, upévare ñepyrũrã ndojehupytýi pe oñehaʼarõva. Péro oĩ heta ohechakuaáva pe añetegua ha oasepta pe invitasión olee rire peteĩ tratádo térã rrevísta. Pór ehémplo, áño 1882-pe, peteĩ karai Londresgua ohesaʼỹijovaʼekue peteĩ rrevísta Watch Tower (Ñemañaha) ha peteĩ folléto ojapóva umi Estudiánte de la Biblia, ohai: “Pemombeʼumína chéve mbaʼépa ha mbaʼéichapa apredikavaʼerã, ikatu hag̃uáicha ajapo pe tembiapo marangatu Ñandejára oipotáva ojejapo”.

11, 12. a) ¿Mbaʼérepa ikatu jaʼe umi kolportór oñehaʼã hague oipytyvõ umi héntepe ñande jajapoháicha? b) ¿Mbaʼéichapa umi kolportór omoñepyrũ peteĩ “kláse” térã kongregasión?

¹¹ Áño 1885-pe oĩvaʼekue 300 Estudiánte de la Biblia haʼéva kolportór, térã rrepartidór oñehenói haguéicha upe rire kastellánope. Haʼekuéra ñandeichaite avei oñehaʼã oipytyvõ umi héntepe oiko hag̃ua  chuguikuéra Jesucristo remimboʼe, péro ombaʼapo ótro hendáicha. Pór ehémplo, ñande ñambostudia umi héntepe peteĩteĩ ha upe rire ñainvita chupekuéra oho hag̃ua rreunionhápe, ha upéicha oĩ hikuái peteĩ kongregasiónpe. Yma katu umi kolportór orreparti lívro, upe rire ombyaty umi hénte oikuaasevévape ha ombostudia chupekuéra oñondivepa. Ostudia rangue peteĩteĩ ndive, haʼekuéra omoñepyrũ “kláse”, térã kongregasión.

¹² Pór ehémplo, áño 1907-pe, heta kolportór oñepyrũ oheka peteĩ siudápe entéro orekóvape umi lívro La Aurora del Milenio, hérava avei Estudios de las Escrituras. Rrevísta Watch Tower heʼi upérõ: “Umi oikuaasevéva oñembyatypa peteĩ ógape. Peteĩ domingo pukukue, pe kolportór omyesakã chupekuéra mbaʼépa Jehová rembipota, ha pe ótro domingo omokyreʼỹma chupekuéra ojapo meme hag̃ua umi rreunión”. Áño 1911-pe oñekambia upe método. Cincuenta y ocho ermáno oviaha Estados Unidos ha Canadárupi omeʼẽ hag̃ua diskúrso púvliko, ha oanota umi oikuaasevéva réra ha idireksión. Upéi ojapo arréglo oñembyatypa hag̃ua peteĩ ógape, ha upéicha oñemoñepyrũ peteĩ “kláse”. Áño 1914-pe g̃uarã, ko múndo tuichakuére oĩma 1.200 kongregasión oñembyatyhápe umi Estudiánte de la Biblia.

13. ¿Mbaʼépa reguerohoryve pe tembiapo ojejapóvare oñemog̃uahẽ hag̃ua “pe añetegua” opárupi koʼã árape?

¹³ Koʼág̃a oĩ 109.400 kongregasión rupi ha 895.800 prekursór rupi ko yvy tuichakuére. Haimetéma 8 millón tapicha oikuaa “pe añetegua” ha ojapo umi mbaʼe oaprendéva (elee Isaías 60:22). b Koʼã mbaʼe koʼýte jaguerohoryve ñapensáramo Jesús heʼivaʼekuére: “Avave ndaijaʼemoʼãi penderehe”. Haʼe ohechauka oĩtaha heta opersegíva kristianokuérape, omoingéva kárselpe ha ojukáva chupekuéra ojapo haguére haʼe omandáva (Luc. 21:12-17, NM). Oñemoĩramo jepe hesekuéra Satanás, umi demónio ha heta tapicha iñañáva, Ñandejára rembiguaikuéra ojapo porã hembiapo oipytyvõvo umi héntepe oiko hag̃ua chuguikuéra Jesús remimboʼe. Koʼág̃a rupi opredika hikuái “oparupiete ko yvy ape ári”, umi lugár hakuhápe, roʼyhápe, sérro, desiérto, siudáre, ha umi lugár saʼihápe hénte jepe (Mat. 24:14, NM). Ñandejára noipytyvõirire chupekuéra, arakaʼeve ndojehupytyivaʼerãmoʼã koʼã mbaʼe.

“PE AÑETEGUA OÑEMYESAKÃVÉTA”

14. ¿Mbaʼéichapa umi puvlikasión oipytyvõ iñasãi hag̃ua “pe añetegua”?

¹⁴ “Pe añetegua” iñasãi opárupi oĩgui  hetaiterei maranduhára ha avei umi puvlikasión rupive. Julio 1879-pe, umi Estudiánte de la Biblia oguenohẽ ypy vaʼekue ko rrevísta. Upérõ guare héra Zionʼs Watch Tower and Herald of Christʼs Presence (La Torre del Vigía de Sión y Heraldo de la Presencia de Cristo). Ojejapo ingléspente ha oñeimprimi 6.000 rrevísta peteĩ emprésa rupive. Umi Estudiánte de la Biblia oiporavo idirektorkuerarã Charles Taze Rússellpe, orekóva upérõ 27 áño, ha cinco ijapyteguikuéra ijerovia mbaretéva, oipytyvõ meme chupe. Koʼág̃a Ñemañaha ojejapo 195 idiómape ha haʼehína pe rrevísta ojejapo hetavéva ko múndope, 42.182.000 voi káda número. Upéi oñeguenohẽ ¡Despertad!, 41.042.000 rrevísta 84 idiómape. Káda áño oñeimprimi avei 100 millón rupi lívro ha Biblia.

15. ¿Mbaʼéichapa ojepaga umi gásto ojejapo hag̃ua puvlikasionkuéra?

¹⁵ Ko tembiapo tuichaitéva ojejapo umi kontrivusión rupive (elee Mateo 10:8). Umi tapicha ombaʼapóva impréntape, ohecharamoiterei upéva oikuaa rupi heta ojegastaha kuatia, tínta ha opa mbaʼe oñekotevẽvare ojejapo hag̃ua koʼã puvlikasión. Peteĩ ermáno ombaʼejoguáva sukursalkuérape g̃uarã omombeʼu: “Umi komersiánte ovisitáva ñane imprénta omombaʼeterei ikatu haguére oñemantene kontrivusión rupive umi mákina porã porã ha tuichaicháva. Avei ohecharamoiterei hikuái Betélpe ombaʼapoha vyʼápe umi mitãrusu”.

KO YVY HENYHẼTA ÑANDEJÁRA ARANDÚGUI

16. ¿Maʼerãpa iñasãi “pe añetegua”?

¹⁶ “Pe añetegua” oñemyesakãvéta ohóvo oñekumpli hag̃ua Jehová rembipota. Haʼe oipota “opavave ojesalva ha toikuaa pe añetegua” (1 Tim. 2:3, 4, ÑÑB). Ñandejára oipota opavave yvypóra oikuaa porã pe añetegua ikatu hag̃uáicha omombaʼeguasu chupe haʼe ojerureháicha ha ohupyty ivendisión. Jehová omyesakã rupi “pe añetegua” ombyaty umi kristiáno unhído hembýva. Ha ombyaty avei “opaichagua ñeʼẽ, trívu ha tetãgui” peteĩ “aty guasu” oikovétava opa ára g̃uarã ko yvy ape ári (Rev. 7:9, ÑÑB).

17. ¿Mbaʼépa ojekuaa Jehová organisasión oñakãrapuʼã haguére?

¹⁷ Koʼã 130 áño ohasavaʼekuépe heta hetave tapicha oñemoag̃ui Jehová organisasión rehe, ha upéva ohechauka Ñandejára ha Jesucristo, pe Rréi oiporavovaʼekue, oipytyvõ memeha kristianokuérape. Ojekuaa oñangarekoha hesekuéra ha avei oisãmbyhy ha ohekomboʼeha chupekuéra. Añetehápe Jehová organisasión oñakãrapuʼã ha upéva ñanepytyvõ jajerovia hag̃ua Ñandejára okumplitaha ipromésa. ‘Ko yvy henyhẽta Ñandejára arandúgui y omyenyhẽháicha pe yguasu.’ (Isa. 11:9, ÑÑB.) ¡Ajépa hetaite mbaʼe porã ohupytýta yvyporakuéra!

[Nóta]

[Porandu ñahesaʼỹijóva]

[Nóta oĩva taʼanga ndive páhina 6]

Umi Estudiánte de la Biblia hekomirĩ ha ohechauka ipyʼaite guive ojaposeha Ñandejára rembipota

[Nóta oĩva taʼanga ndive páhina 7]

Jehová ñandeguerohory ohechávo ñañehaʼãmbaiteha ñamombeʼu “pe añetegua”