“¡CHE ndaikatumoʼãi apredika ogahárupi!”. Añetehápe umi tapicha ostudiáva la Biblia ñanendive oñeñandu jepi péicha ha opensa ndaikatumoʼãiha opredika umi hénte oikuaaʼỹvape. Péro pe heʼivaʼekue péicha ningo peteĩ peregríno térã superintendénte ojapóva diskúrso ha omboʼekuaáva la Biblia.

Heta tapicha oleéva jepi pe rrevísta Zionʼs Watch Tower (La Torre del Vigía de Sión) ndohovéi ijiglésiape ha oipota ovisita chupekuéra umi haʼekuéraicha oikuaaséva la Biblia omboʼéva. Pe rrevísta Zionʼs omokyreʼỹ koʼã tapichápe oheka hag̃ua umi ogueroviávape haʼekuéra ogueroviáva, oñembyaty meme hag̃ua hendivekuéra ha ohesaʼỹijo la Biblia. Áño 1894 rupi Sociedad Watch Tower oñepyrũ omondo superintendénte ovisita hag̃ua umi grúpo ojerurévape hesekuéra. Koʼã ermáno oporovisitáva ikatupyry ha iguápo, upe rire oñehenóiva chupekuéra peregríno. Ojeporavo chupekuéra iñumílde, oikuaa porãgui la Bíbliape heʼíva, oñeʼẽkuaa, oporomboʼekuaa ha ohechaukágui ojeroviaha Jesús sakrifísiore. Haʼekuéra ovisita uno térã dos díante umi ermánope, péro hetaiterei mbaʼe ojapo. Heta Estudiánte de la Biblia oñepyrũ opredika ogahárupi omeʼẽvo invitasión peteĩ diskúrso puvlikorã ojapótava pe peregríno. Peteĩ pyharépe ojapopa rire diskúrso peteĩ eskuélape, Hugo Riemer (upe rire oĩvaʼekue Kuérpo Governántepe) pyharepyte peve ombohovái umi porandu ojejapóva chupe la Bíbliagui. Ikaneʼõramo jepe, ovyʼa ha heʼi voi “upe rreunión iporãiterei” hague.

Yma ningo umi rreunión ojejapovaʼekue ermanokuéra rógape ha pe rrevísta Zionʼs Watch Tower heʼi umi peregríno ovisitávo ermanokuérape, umi rreunión rupive omombarete ha omokyreʼỹha chupekuéra. Ha umi Estudiánte de la Biblia oikóva ag̃ui pe peregríno ovisitahágui, oho ohendu hag̃ua umi diskúrso ojapóva ha mbaʼéichapa ombohovái umi mbaʼe oñeporandúva chupe la Bíbliagui. Opa rire umi rreunión ojeʼu umi tembiʼuita ojepreparavaʼekue. Maude Abbott omombeʼu yma imitãme oho hague peteĩ diskúrso ojejapóvape pyhareve ha upe rire oprepara hague hikuái peteĩ mesa guasu pe okárape okarupa hag̃ua oñondive. Maude heʼi: “¡Hetaite tembiʼu hetereíva oĩvaʼekue! Oñemoĩ hamón, ryguasu chyryry, opaichagua pán ha tórta. Enterove rokaru orekueraiha peve ha kaʼaru la 2 rupi roñembyaty jeýma rohendu hag̃ua ótro diskúrso. Péro, ¡ropirakutu joaite! Peteĩ jey, ermáno Benjamin Barton oservímava heta áñore peregrínoramo, heʼi: “Haʼupárire [...] umi tembiʼu hepa jepéva omoĩva hikuái [...], ymáma ndaserviveivaʼerãmoʼã peregrínoramo”. Tiémpo rire umi ermáno ombaʼapóva Betel oĩva Brooklynpe, oguerahauka peteĩ kárta ermanakuérape ha heʼi umi peregríno ovisita jave chupekuéra “oprepara hag̃ua umi tembiʼu isensillomívante” ha “oheja hag̃ua chupekuéra oke porã” upe rire.

Umi peregríno ikatupyryvaʼekue oporomboʼe hag̃ua, oiporu divúho, taʼanga térã makéta ha opa mbaʼe ikatúva oipytyvõ chupekuéra omyesakã porã hag̃ua pe omboʼeséva. Pór ehémplo, R. H. Barber ñanderesaraiʼỹ hag̃uáicha ojapo umi diskúrso. W. J. Thorn rehe katu ojeʼe oporohayhukuaaha ha “peteĩ túvaicha oñeʼẽ” hague umi ermánope ojapo jave idiskúrso. Oñemombeʼu avei Shield Toutjian oho jave peteĩ veíkulope peichahágui osapukái ha oguejy hague oipoʼo peteĩ yvoty ha oñepyrũ oñeʼẽ iñirũnguérape Jehová rembiapokuére.

 Umi peregríno ohasa heta mbaʼe ijetuʼúva, koʼýte ijedavévo ohóvo. Péro heta ermánope ijetuʼuvevaʼekue iñeʼẽrendu hag̃ua umi kámbio ojejapóvape. Pór ehémplo, ojeʼérõ guare chupekuéra omoakã ha opredika hag̃ua ogahárupi. Pe rrevísta La Torre del Vigía 15 de marzo de 1924 heʼi: “Pe tembiapo iñimportantevéva ojapovaʼerã [umi kristiáno añetegua] oikuaauka Ñandejára Rréino ojapótava. Ha upearã oñemondo umi peregrínope”.

Péro oĩvaʼekue avei umi peregríno apytépe ndogustáiva chupekuéra upe kámbio ha upévare oheja iservísio, ha oĩ voi katu upe rire oformáva irrelihionrã. Ermáno Robie D. Adkins omombeʼu oĩ hague peteĩ peregríno ojapokuaaitereíva diskúrso, péro oikuaávo opredikavaʼerãha ogahárupi ou ndovyʼavéi ha oñepyrũ ojeplagea: “Che platafórma guivénte apredikakuaa. ¡Che ndaikatumoʼãi apredika ogahárupi!” Ermáno Adkins heʼive: “Upéi ahecha jey chupe peteĩ asambléa ojejapóvape áño 1924-pe Colúmbuspe (Ohio), oñemboʼy peteĩ yvyramáta guýpe haʼeño ha ojekuaa hese ipiru ha ndovyʼaveiha. Haʼe oñeamarga oĩramo jepe hetaiterei ermáno ovyʼáva apytépe. Upe riremínte ndahechaveietéma chupe ohejágui Jehová organisasión”. Péro “heta ermáno vyʼapópe ohasa ijypýrupi oguerahávo iveíkulope umi lívro” oñepyrũma hag̃ua opredika ogahárupi (Hech. 20:20, 21).

Umi peregríno ningo oporombokatupyry ha kyreʼỹme osẽ opredika ogahárupi ijetuʼúramo jepe chupekuéra, umi ótro ermánope ijetuʼuháicha. Maxwell G. Friend (Freschel), peteĩ peregríno oñeʼẽva alemánpe, omombeʼu mbaʼéichapa oñeñandu opredika haguére ogahárupi: “Tuicha vendisión chéve g̃uarã ikatu haguére koʼág̃a apredika ermanokuéra ndive avisita jave umi kongregasión”. Ótro peregríno hérava John A. Bohnet, omombeʼu enterove umi ermáno ovyʼaha ojeʼévo chupekuéra opredikavaʼerãha koʼág̃a ogahárupi. Heta oĩ umi “ohose hendýmava voi opredika hag̃ua”.

Heta áñore koʼã ermáno iñeʼẽrenduetéva omokyreʼỹ ha oipytyvõ ermanokuérape ivisíta rupive. Norman Larson, peteĩ Testígo heta áñoma oservíva Jehovápe heʼi: “Che mitã guive ahechakuaa iñimportánte ha tuicha ñanepytyvõha umi peregríno visíta. [...] Haʼekuéra chepytyvõ aguata hag̃ua tape porãre”. Ñane tiémpope, umi superintendénte iñeʼẽrendu ha kyreʼỹme ñanepytyvõ avei jaʼe hag̃ua: “¡Che aháta apredika ogahárupi!”.

[Komentário oĩva páhina 32-pe]

Enterovénte ovyʼa umi peregríno oporovisita jave

[Nóta oĩva taʼanga ndive páhina 31]

Áño 1905-pe Benjamin Barton oprogramavaʼekue 170 visíta rupi

[Nóta oĩva taʼanga ndive páhina 32]

Walter J. Thorn oporohayhukuaa, upévare umi ermáno ohenói chupe Papa

[Nóta oĩva taʼanga ndive páhina 32]

J. A. Browne áño 1902-pe oho Jamáicape omokyreʼỹ ha omombarete hag̃ua umi 14 grúpope

[Nóta oĩva taʼanga ndive páhina 32]

Umi peregríno omombarete ermanokuéra jerovia, omokyreʼỹ oiko hag̃ua peteĩ ñeʼẽme ha omoag̃ui chupekuéra Jehová organisasiónre