1. ¿Mbaʼépa jajapovaʼerã ikatu hag̃uáicha ñañatende porã?

 UMI profesía oñekumplímava ohechauka koʼẽrõite oikotaha heta mbaʼe tuicha okambiátava ko múndo. ¿Mbaʼépa jajapovaʼerã ikatu hag̃uáicha ñañatende porã? Apóstol Pablo ñanemokyreʼỹ ani hag̃ua jaiko “ñapensa meme umi mbaʼe ikatúvare jahecha, upéva rangue ñapensavaʼerã umi mbaʼe ikatuʼỹvare jahecha”. Upéva heʼise ndajaipeʼaivaʼerãha ñane akãgui ñane esperánsa: jaikovetaha opa árare, tahaʼe yvágape térã ko yvy ape ári. Jaleevéramo umi versíkulo Pablo ohaivaʼekue, jahechakuaáta haʼe omokyreʼỹ hague kristianokuérape opensa hag̃ua umi mbaʼe ohupytýtavare hikuái iñeʼẽrendúramo. Haʼekuéra ojesarekóramo pe esperánsare, ogueropuʼakáta umi mbaʼe ijetuʼúva ha ikatúta oaguanta ojepersegírõ chupekuéra (2 Cor. 4:8, 9, 16-18, NM; 2 Cor. 5:7).

2. a) ¿Mbaʼépa jajapovaʼerã jajesareko meme hag̃ua ñane esperánsare? b) ¿Mbaʼépa ñahesaʼỹijóta ko artíkulope ha pe ótro oúvape?

² Pe konsého Pablo omeʼẽvaʼekue ñanemboʼe peteĩ mbaʼe iñimportantetereíva: ikatu hag̃uáicha jajesareko meme ñane esperánsare, nañamañaivaʼerã umi mbaʼe oĩvare ñane renondetépente, síno jajesarekovaʼerã avei umi mbaʼe ndajahecháivare (Heb. 11:1; 12:1, 2). Jahechamína diez profesía oñekumplítava koʼẽrõite ha omombaretéva ñane esperánsa. Ko artíkulope ñahesaʼỹijóta cinco profesía ha pe ótrope jahechavéta cinco.

3. a) Heʼiháicha 1 Tesalonicenses 5:2, 3, ¿mbaʼe profesíapa oñekumplíta koʼẽrõite? b) ¿Mbaʼépa ojapóta umi mburuvicha, ha mávapa ikatuhína omoirũ chupekuéra?

³ Pablo ohaírõ guare umi kristiáno Tesalonicayguápe, omombeʼuvaʼekue mbaʼépa oiko raẽ vaʼerã oñehundi mboyve ko múndo (elee 1 Tesalonicenses  5:2, 3). Upérõ haʼe imanduʼa “Jehová ára” rehe. Upe tiémpo oñepyrũta oñehundi vove entéro rrelihión japu, ha oñemohuʼãta Armagedónpe. Oñepyrũ mboyvemi “Jehová ára”, umi omanda guasúva ko múndope heʼíta: “¡Jaikóma pyʼaguapýpe ha kyhyjeʼỹme!”. Ikatu ningo upéva heʼise oikotaha peteĩ mbaʼe añónte, térã hetave mbaʼe ojoapykueripa. Umi goviérno oimoʼãta saʼíma ofaltaha osolusiona hag̃ua umi provléma tuichavéva. ¿Ha mbaʼépa jaʼekuaa umi rrelihión japu omoakãvare? Haʼekuéra ningo ko mundopegua avei, ha upévare oiméne omoirũta umi polítikope (Rev. 17:1, 2). Upéicha ojoguáta hikuái umi proféta japu Judayguápe, heʼivaʼekue: “Pyʼaguapy, pyʼaguapy”, ndaipóriramo jepe pyʼaguapy (Jer. 6:14, ÑÑB; Jer. 23:16, 17).

4. ¿Mbaʼépa ñande jahechakuaa koʼág̃a rupi ha ñantende porã?

⁴ Jahechaháicha, oĩta heʼíva ‘jaikomaha pyʼaguapýpe ha kyhyjeʼỹme’, ha upéva ohechaukáta oñepyrũmbotaitemaha Jehová ára. Upévare Pablo heʼi: “Che ermanokuéra, peẽ ndapeikói pytũmbýpe upe ára pendejagarra hag̃ua ku ojagarraháicha mondahápe. Peẽ ningo pe ohesapéva raʼykuéra hína” (1 Tes. 5:4, 5, NM). Ñande nañaiméi pytũmbýpe oĩháicha hetaiterei hénte, síno ñantende porã la Biblia omboʼéva ha jahechakuaa iñimportantetereiha umi mbaʼe oikóva koʼág̃a rupi. Péro, ¿mbaʼeichaitépa ojeʼéta: “¡Jaikóma pyʼaguapýpe ha kyhyjeʼỹme!”? Upépemante jaikuaáta. Upévare “japayvaʼerã [...] ha jaiko hekópe” (1 Tes. 5:6, BNP; Sof. 3:8).

5. a) ¿Mbaʼéichapa oñepyrũta pe “jehasa asy guasu”? b) ¿Mbaʼérepa jaʼekuaa tuichaiterei ojavytaha pe “rréina”?

⁵ ¿Mbaʼépa oikóta upe rire? Pablo omombeʼu: “Yvyporakuéra heʼi vove: ‘¡Jaikóma pyʼaguapýpe ha kyhyjeʼỹme!’, upépe oúta hiʼarikuéra ñehundi guasu oimoʼãʼỹve jave”. ¿Mbaʼéichapa og̃uahẽta pe ‘ñehundi guasu oñeimoʼãʼỹve jave’? Ñepyrũrã oñepuʼãta “Babilonia Guasu” rehe, térã entéro rrelihión japúre, oñehenóiva avei “kuña rekovai” (Rev. 17:5, 6, 15, NM). Oñepuʼã vove entéro rrelihión japu oĩvare ko múndope, ijapytepekuéra umi heʼíva kristianoha, oñepyrũta pe “jehasa asy guasu” (Mat. 24:21, NM; 2 Tes. 2:8). Heta tapicha ni noimoʼãmoʼãi upe oikóva. ¿Mbaʼérepa? Upe tiémpo peve, pe kuña rekovai ojeroviaitereíta ijehe ha opensáta haʼeha peteĩ “rréina”, ha heʼíta: “Arakaʼeve ndahasaʼasymoʼãi”. Péro upépe ohechakuaáta tuichaiterei ojavy hague. “Peteĩ árape”, peteĩ  tesapirĩme oñehundíta (Rev. 18:7, 8, NM).

6. ¿Mávapa ohundíta umi rrelihión japu?

⁶ ¿Mávapa opuʼãta pe kuña rekovaíre? Ñandejára Ñeʼẽ omombeʼu peteĩ “mymba ñarõ” ‘diez hatĩva’ opuʼãtaha hese. Ñahesaʼỹijo porãramo Revelación, jahechakuaáta pe ONU orrepresentaha upe mymbápe, ha umi “diez hatĩ” katu entéro umi goviérno omanda guasuvévape ha ombaʼapo meméva ko “mymba ñarõ pytã” ndive (Rev. 17:3, 5, 11, 12, NM). a ¿Mbaʼéichapa oñepuʼãta pe kuña rekovaíre? Umi tetã oĩva ONU-pe omoperõta ko kuña rekovaípe, ohechaukáta mbaʼeichaguápa haʼe ha “ohapýta” chupe. Jahechaháicha, pe kuña rekovai oñehundietéta (elee Revelación 17:16).

7. ¿Mbaʼéichapa pe “mymba ñarõ” opuʼãta pe kuña rekovaíre?

⁷ Umi profesía ohechauka avei mbaʼéichapa umi goviérno opuʼãta entéro rrelihión japúre. Jehová omoĩta mburuvichakuéra pyʼapýpe “ojapo hag̃ua pe Haʼe oipotáva” ha ohundíta hikuái pe kuña rekovaípe (Rev. 17:17). Rrelihión káusare ningo oiko jepi heta gérra, upévare umi mburuvicha ikatu opensa ikuentaveha ohundiete opaichagua rrelihión. Haʼekuéra oimoʼãta ojapoha upéva ijehegui reínte, péro añetehápe Jehová oiporúta chupekuéra ohundi hag̃ua entéro rrelihión japu. Peichaháguinte umi goviérno opuʼãta rrelihionkuérare, ha Satanás ndaikatumoʼãi ojapo mbaʼeve ohechávo mbaʼéichapa pe múndo oĩva ipoguýpe oñehundi ohóvo (Mat. 12:25, 26).

8. ¿Mbaʼépa ojapóta “Gog, Magog retã ruvicha”?

⁸ Oñehundipa rire entéro rrelihión japu, opytáta Ñandejára rembiguaikuéra ha ojehecháta oikoha hikuái “kyhyjeʼỹme”, ndorekóiramo jepe peteĩ ‘murálla’ omoʼãva chupekuéra (Ezeq. 38:11, 14, NM). Jehová siervokuéra osegíta omombaʼeguasu chupe, haʼetéramo jepe avave noñangarekoiha hesekuéra. Péicha jahecha ikatuha “heta tetã” opuʼã mbarete hesekuéra. Ñandejára Ñeʼẽ ohechauka upéva ojapotaha “Gog, haʼéva Magog territoriopegua” (elee Ezequiel 38:2, 15, 16). ¿Jajepyʼapyvaʼerãpa upe oikótavare?

9. a) ¿Mbaʼépa iñimportanteve ñandéve g̃uarã? b) ¿Mbaʼépa tekotevẽ jajapo ñamombareteve hag̃ua ñande jerovia?

⁹ Ñande jaservíva Jehovápe ndajakyhyjéi oñepuʼãta haguére ipuévlore, ni ndajaikói ñañehaʼã jajesalva hag̃uánte. Upéva  rangue iñimportanteve ñandéve g̃uarã oñemopotĩ Jehová réra ha tojekuaa opárupi haʼe añoite orekoha derécho ñanesãmbyhývo. Lívro de Ezequiélpe Ñandejára voi heʼivaʼekue sesenta vése rasa: “Peikuaáta che haʼeha Jehová” (Ezeq. 6:7; ehecha pe nóta, NM). Upévare jaipotaitereíma oñekumpli ko profesía, ha avei jajerovia Ñandejára “oipeʼataha jejopy vaígui umi ohayhúvape chupe” (2 Ped. 2:9). Ñahaʼarõ aja upe tiémpo, jajapovaʼerã ikatúva guive ñamombarete hag̃ua ñande jerovia, ikatu hag̃uáicha akóinte ñaneñeʼẽrendu Jehovápe toiko la oikóva. ¿Mbaʼéichapa jajapóta upéva? Tekotevẽ ñañemboʼe, ñahesaʼỹijo la Biblia, jajepyʼamongeta hese ha ñamombeʼu opárupi umi mbaʼe porã ojapótava Ñandejára Rréino. Péichamante ñane esperánsa imbaretéta peteĩ “ánklaicha” ha ñanepytyvõta jagueropuʼaka hag̃ua umi mbaʼe ijetuʼuetéva (Heb. 6:19, BNP; Sal. 25:21).

10, 11. ¿Mbaʼéichapa oñepyrũta Armagedón, ha mbaʼépa oikóta upe ñorairõme?

¹⁰ ¿Mbaʼépa oikóta oñepuʼã rire Ñandejára puévlore? Oikóta peteĩ mbaʼe omondýitava ko múndope. Jehová oiporúta Jesús ha umi ánhelpe odefende hag̃ua hembiguaikuérape (Rev. 19:11-16). Péicha oñepyrũta “Ñandejára Ipuʼakapáva ñorairõha ára guasu”, térã Armagedón (Rev. 16:14, 16, NM).

¹¹ ¿Mbaʼépa oikóta upe ñorairõ guasúpe? Jehová heʼivaʼekue Ezequiel rupive: “Che asapukáita mayma che serrokuéragui. Pe kyse puku toʼa [Gog ári], heʼi yvága jára, oimeraẽva omopuʼãta ikyse puku iñirũ rehe”. Umi oĩva Satanás ndive oñemondyipáta, ndoikuaamoʼãi mbaʼépa ojapóta ha ojojukapáta. Ha Satanás jepe ndaikatumoʼãi ojesalva. Jehová heʼi voi: ‘Amongýta amandáu, tata ha asúfre [hiʼári], isoldádo aty ha heta tetã ambuegua ári’ (Ezeq. 38:21, 22, ÑÑB). ¿Mbaʼéichapa opáta Ñandejára ñorairõ guasu?

12. ¿Mbaʼépa orrekonoséta umi tetã?

¹² Umi tetã ohechávo mbaʼépa oiko, ndaikatumoʼãi onega Jehová ogueruha hiʼarikuéra pe ñehundi guasu. Yma umi soldádo Egiptoygua orrekonosevaʼekue Jehová odefendeha umi isrraelítape pe már Rójope, upéicha avei Satanás ehérsito ikatu heʼi: “[Jehová] oñorairõ hesehapekuéra ha oñemoĩ ñanderehe” (Éx. 14:25). Péicha, tetãnguéra oikuaáta mávapa hína Jehová (elee Ezequiel 38:23). ¿Mboýpa ofalta oñepyrũ hag̃ua oiko koʼã mbaʼe?

13. ¿Mbaʼépa jaʼekuaa pe goviérno cincoháre oñerrepresentáva pe estátuape?

¹³ Peteĩ profesía oĩva lívro de Daniélpe ñanepytyvõ jahechakuaa hag̃ua mbaʼe tiémpopepa ñaime. Ko proféta omyesakã mbaʼépa orrepresenta peteĩ estátua de diferénte metál orekóva cinco párte (Dan. 2:28, 31-33). Káda párte orrepresenta umi goviérno omanda guasúvape ha orekóva ipoguýpe Ñandejára puévlo. Umíva hína: Babilonia, Medopersia, Grecia, Roma ha pe último katu omandahína ñane tiémpope. Pe profesía ohechauka ko último orrepresentaha pe estátua py ha ipysãnguéra. Primera gérra mundiál aja, Gran Bretaña ha Estados Unidos oñomoirũvaʼekue heta mbaʼépe. Upévare jaʼekuaa haʼekuéra haʼeha pe goviérno cincoha omanda guasuvéva. Pe estátua ndorekovéima ótra párte, upéva heʼise ndaiporimoʼãveimaha ótro goviérno omanda guasuvéva ojupítava upe rire. Hiʼarive ipy ha ipysãnguéra ojejapo  iérro ha ñaiʼũgui, ha upéva ohechauka Gran Bretaña ha Estados Unidos ikangyha heta mbaʼépe.

14. ¿Mbaʼe goviérnopa omanda guasuvéta oñepyrũ vove Armagedón?

¹⁴ Ko profesíape ojehechauka peteĩ ita guasu osẽha peteĩ montáña tuichávagui. Upe ita orrepresenta Ñandejára Rréino, ha pe montáña katu pe derécho Jehová orekóva oisãmbyhy hag̃ua. Pe ita osẽ pe montáñagui áño 1914-pe ha koʼág̃a hatãiterei oho oñembota hag̃uáicha pe estátua pýre. Armagedónpe, pe estátua py ha umi ótra párte oñehundíta ikuʼipa peve (elee Daniel 2:44, 45). Upévare jaʼekuaa oñepyrũ vove Armagedón umi goviérno omanda guasuvéva haʼetaha hína Gran Bretaña ha Estados Unidos. ¡Ajépa javyʼaitéta jahechávo mbaʼéichapa oñekumplipaite umi profesía! b Péro, ¿mbaʼépa Jehová ojapóta Satanás rehe? Jahechamína.

15. ¿Mbaʼépa oikóta Satanás ha idemoniokuérare Armagedón rire?

¹⁵ Ñepyrũrã, Satanás ohecháta mbaʼéichapa oñehundipaite iñorganisasión oĩva ko yvy ape ári. Upe rire katu ohupytýta avei chupe. Apóstol Juan omombeʼu mbaʼéichapa oikóta upéva (elee Revelación 20:1-3). Jesucristo, pe ánhel orekóva pe “yvykua pypuku [...] lláve”, ojagarráta Satanás ha idemoniokuérape, oitýta pe yvykua pypukúpe ha orekóta chupekuéra upépe mil áñore (Luc. 8:30, 31; 1 Juan 3:8). Ág̃a upéva oiko vove heʼise Jesucristo oñepyrũmaha opyrũ pe mbói akãre (Gén. 3:15). c

16. ¿Mbaʼéichapa Satanás oĩta pe “yvykua pypukúpe”?

¹⁶ ¿Mbaʼépa hína pe “yvykua pypuku” ojepoitahápe Satanás ha idemoniokuérape? Upéva hína peteĩ lugár oĩtahápe hikuái ku omanorõguáicha. Upépe ndaikatúi oike avave. Jehová ha pe ánhel orekóva pe “yvykua [...] lláve” añoite oreko ipoguýpe upe lugár. Upépe Satanás ndaikatumoʼãi ombotavy yvyporakuérape. Péicha ojejurumbotýta pe ‘león okororõvape’ (1 Ped. 5:8, BNP).

17, 18. a) ¿Mbaʼe profesíapa ñahesaʼỹijóraʼe ko artíkulope? b) ¿Mbaʼépa oikóta opa rire umi mbaʼe vaieta?

¹⁷ Oñekumpli potaitéma ningo umi profesía okambiátava ko múndo. Jaikuaasetereíma mbaʼéichapa ojeʼéta ‘jaikomaha pyʼaguapýpe ha kyhyjeʼỹme’. Upe rire jahecháta mbaʼéichapa oñehundi Babilonia Guasu, mbaʼéichapa Gog Magogpegua opuʼã Ñandejára rembiguaikuérare ha jahecháta pe ñorairõ guasu, térã Armagedón. Upéi ojeitýta pe yvykua pypukúpe Satanás ha idemoniokuérape. Opa vove umi mbaʼe vaieta oĩva koʼág̃a rupi, Cristo oñepyrũta ogoverna mil áñore, ha upe tiémpo guive jaikóta “pyʼaguapýpe” (Sal. 37:10, 11).

¹⁸ Ñahesaʼỹijóma cinco profesía ‘ndajahecháiva’ gueteri, upéicharõ jepe “ñapensa meme” vaʼerã umívare. Pe artíkulo oúvape ñahesaʼỹijovéta cinco profesía oñekumplítava tenonderãme.