1, 2. ¿Mbaʼépa ñahesaʼỹijóta ko artíkulope?

 YMAITE guivéma testígo de Jehová ojapo umi asambléa de distríto ha umi asambléa internasionál opytáva manduʼarã. Oimevaʼerã katuete oĩ ñande apytépe ohóva heta vésema peichagua asambleahápe.

² Yma Ñandejára puévlo oñembyatyvaʼekue avei peteĩ asambléape. Ñahesaʼỹijóvo umíva, jahecháta mbaʼéichapa ojojogua umi asambléa ojejapovaʼekue yma ha umi ojejapóva ñane tiémpope, jahecháta avei mbaʼépa ojehupyty ojehóvo umi asambleahápe (Sal. 44:1; Rom. 15:4).

3. a) ¿Mbaʼépa oiko pe asambléa ojejapo ñepyrũvaʼekuépe? b) ¿Mbaʼépa ojejapo upe rire oñembyaty hag̃ua umi isrraelíta?

³ Mónte Sinaí ypýpe Ñandejára puévlo ojapo ñepyrũvaʼekue peteĩ asambléa. Upépe oñembyaty hikuái Jehová ohekomboʼe hag̃ua chupekuéra ha upéva opyta manduʼarã. ¿Mbaʼérepa? Upérõ Jehová omeʼẽ Iléi umi isrraelítape ha ohechauka chupekuéra ipuʼaka ijojahaʼỹva (Éx. 19:2-9, 16-19; elee Éxodo 20:18 ha Deuteronomio 4:9, 10). Upe oikovaʼekue tuichaiterei oipytyvõ umi Israelguápe oiko porã hag̃ua Ñandejára ndive. Tiémpo rire, Jehová heʼi mbaʼépa ojejapovaʼerã oñembyaty hag̃ua ipuévlo. Omanda Moiséspe ojapo hag̃ua mokõi trompéta de pláta ojeporuvaʼerã ojeavisa hag̃ua enterove ‘Israel ñemoñarépe’ oñembyaty hag̃ua pe tavernákulo renondépe (Núm. 10:1-4). ¡Oiménepa ovyʼaite hikuái upéicha jave!

4, 5. ¿Mbaʼérepa iñimportantete umi aty ojapovaʼekue Moisés ha Josué?

⁴ Cuarenta áño rupi umi isrraelíta oiko rire pe desiértore,  Moisés ombyatypaite chupekuéra. Upérõ pe tetã Israel oĩ peteĩ tiémpo iñimportantetereívape, oike potaitéma hikuái pe Yvy Oñeprometevaʼekuépe. Upévare tekotevẽterei Moisés omomanduʼa chupekuéra umi mbaʼe porã Jehová ojapovaʼekuére ha ojapótava hesehapekuéra (Deut. 29:1-15; 30:15-20; 31:30).

⁵ Ikatu oime Moisés upe atýpe imanduʼáraʼe chupekuéra pe mandáto heʼívare oñembyaty meme vaʼerãha hikuái oikuaa hag̃ua heta mbaʼe Jehová rapégui. Káda siete áño ojejapo jave pe fiésta de las Cabañas, kuimbaʼe, kuña ha umi tetã ambuegua oikóva Israélpe oñembyatypaitevaʼerã pe lugár heʼihápe chupekuéra Jehová. ¿Maʼerãpa? La Biblia heʼi: “Ohendu ha oikuaa hag̃ua hikuái, ha tokyhyje [...] Ñandejáragui, ha toñeñangareko ojapo hag̃ua hekoitépe [iléi] Haʼe heʼi hagueichaite” (elee Deuteronomio 31:1, 10-12). Jahechakuaa upéicharõ, Jehová oipotaha ipuévlo oñembyaty ohesaʼỹijo hag̃ua iñeʼẽ ha oikuaa hag̃ua hembipota. Umi Israelgua oikérõ guare pe Yvy Oñeprometevaʼekuépe oĩ gueteri ijerére umi tetã ndoservíriva Ñandejárape. Upévare, Josué ombyaty enterove isrraelítape ha omokyreʼỹ chupekuéra akóinte iñeʼẽrendu hag̃ua Jehovápe. Upépe umi Israelgua ohura oservitaha Jehovápe añoite (Jos. 23:1, 2; 24:1, 15, 21-24).

6, 7. ¿Mbaʼérepa iñimportantete umi Aty Guasu ojapóva Testígo de Jehová ñane tiémpope?

⁶ Ñane tiémpope Jehová siervokuéra ojapo avei umi asambléa, ha umívape ojehecha umi mbaʼe porã ojehupytýva térã oñemyesakã porãve Ñandejára Ñeʼẽ omboʼéva (Prov. 4:18). Primera gérra mundiál rire, áño 1919-pe umi Estudiánte de la Biblia ojapo peteĩ asambléa tuichaitereíva Cedar Póintpe (Ohio, Estados Unidos). Upérõ ijaty siete mil tapicha rupi ha upépe ojeʼe oñeñepyrũtaha ojepredika opárupi ko yvy ape ári. Ótra asambléa ojejapo jey upe lugárpe áño 1922-pe ipukúva 9 día. Ermáno Joseph F. Rutherford omokyreʼỹ enterove oĩvape upe atýpe ojapo hag̃ua ko tembiapo heʼívo: “Peneñeʼẽrendúkena ha pehechauka peẽ haʼeha testígo de Jehová. Pesegíkena pepredika umi rrelihión japu oñehundipa peve. Ko múndo oikuaavaʼerã Ñandejára haʼeha Jehová, Rréi katu Jesucristo, mburuvichakuéra oĩva guive Ruvicha. Ko ára hína pe iñimportantevéva. ¡Péina, pe Rréi ogovernáma! Peẽ peñeʼẽvaʼerã hérape. Upévare, tapeho peikuaauka, peikuaauka, peikuaauka mávapa pe Rréi ha irréino”. Enterove umi oĩva upe atýpe ha umi Jehová siervokuéra oĩva ko yvy tuichakuére vyʼápe ojapo upe ojeʼéva chupekuéra.

⁷ Áño 1931-pe umi Estudiánte de la Biblia ojapo peteĩ Aty Guasu Colúmbuspe (Ohio), ha upépe odesidi hikuái oñehenoitaha testígo de Jehová. Áño 1935-pe katu Wáshingtonpe, ermáno Rutherford omyesakã mávapa pe “aty guasu [...] oñemboʼýva hína pe tróno ha pe Ovecha Raʼy renondépe” oñeʼẽha lívro de Revelación (Rev. 7:9-17, BNP). Áño 1942-pe segunda gérra mundiál aja, ermáno Nathan H. Knorr ojapo peteĩ diskúrso iñimportantetereíva hérava: “Pyʼaguapy... ¿arakaʼe pevépa oĩne?”. Upépe omyesakã mbaʼépa orrepresenta pe “mymba ñarõ pytã” oĩva Revelación kapítulo 17-pe ha heʼi opa rire pe gérra ojesegivaʼerãha ojepredika.

8, 9. ¿Mbaʼérepa oĩ asambléa ombovyʼaitereivaʼekue ermanokuérape?

⁸ Áño 1946-pe ojejapo peteĩ Aty Guasu hérava “Naciones Alegres” Clévelandpe (Ohio). Upérõ ermáno Nathan Knorr ojapo peteĩ diskúrso iporãitereíva hérava: “Los problemas de la reconstrucción y la expansión”. Peteĩ ermáno oĩvaʼekue upe atýpe  omombeʼu mbaʼéichapa oñeñandu umi ermáno ohendúvo pe diskúrso: “Upe pyhare, ermáno Knorr ojapórõ guare idiskúrso, che aime ikupépe platafórmape. Haʼe omombeʼúvo mbaʼéichapa oho hese umi tembiapo ojejapóva Jehová servísiope ha oñembotuichavetaha Betel oĩva Brooklynpe, umi ermáno oĩva upe Aty Guasúpe heta vése are are ojepopete. Ndahecháiramo jepe hovakuéra pe platafórma guive, ahechakuaa mbaʼeichaitépa ovyʼa enterove”. Áño 1950-pe katu ojejapo peteĩ asambléa internasionál Nueva Yórkpe. Upépe oñepresenta pe Traducción del Nuevo Mundo de las Escrituras Griegas Cristianas. Ko Biblia opavave ikatu ontende ha oñemoĩ pype Ñandejára réra umi lugár ojehai ypy haguépe (Jer. 16:21).

⁹ Ñanemopirĩmba avei umi Aty Guasu ojejapovaʼekue hetaite ojepersegi ha oñembohasa asy rire Jehová siervokuérape. Pór ehémplo, Alemániape, Adolf Hitler ohuravaʼekue ohundipataha umi testígo de Jehovápe, péro áño 1955-pe ojejapo peteĩ Aty Guasu Núrembergpe, upe lugár Adolf Hitler oiporu haguépe oñembyaty hag̃ua isegidorkuéra ndive. Upe asambléape ijatyvaʼekue 107.000 testígo de Jehová ha hetaiterei oĩvaʼekue hasẽva vyʼágui. Áño 1989-pe ojejapo avei Polóniape mbohapy Aty Guasu hérava “Devoción Piadosa”. Umi 166.518 apytépe oĩvaʼekue oúva heta tetãgui, umíva apytépe Unión Soviética, Checoslovaquia ha umi tetã oĩvagui Europa del Éstepe. Ijapytepekuéra oĩvaʼekue 15 térã 20 ermánonte oñembyatýva jepi rreunionrã ha koʼág̃a primera vés ikatu oñembyaty hetaiterei ermáno ndive. Áño 1993-pe ojejapo Kiévpe (Ucrania) ambue asambléa internasionál hérava “Enseñanza Divina”. Epensamíntena mbaʼeichaitépa oiméne ovyʼa umi ermáno ohechávo ojevautisa 7.402 tapicha. Neʼĩrava peichaite peve oĩ heta ojevautisáva peteĩ asambléape (Is. 60:22; Ageo 2:7).

10. ¿Nemanduʼápa peteĩ asambléa ndegustavevaʼekuére ha mbaʼérepa?

¹⁰ Oimevaʼerã akóinte nemanduʼa peteĩ asambléa de distríto térã internasionál ojejapovaʼekuére. Oiméne nanderesaráiri voi pe primera asambléa reho hague térã pe rejevautisa haguégui. Koʼã mbaʼe ningo iñimportanteterei peteĩ kristiánope g̃uarã ha akóinte ñanemanduʼavaʼerã hese (Sal. 42:4).

11. ¿Mbaʼeichaguápa umi fiésta Jehová heʼivaʼekue umi Israelguápe ojapovaʼerãha káda áño?

¹¹ Jehová ojerurevaʼekue umi isrraelítape oho hag̃ua káda áño Jerusalénpe ojapo hag̃ua mbohapy arete: Fiésta de las Tortas no Fermentadas (ojejapóva siete día pukukue pe páskua rire), Fiésta de las Semanas (oñehenóiva upe rire Pentecostés) ha Fiésta de las Cabañas (ojejapóva ojeagradese hag̃ua Jehovápe osẽ porã haguére umi ñemitỹngue). Pe mandáto oñemeʼẽvaʼekue chupekuéra heʼi: “Peteĩ áñope, tres vése ouvaʼerã mayma kuimbaʼe Ñandejára Jehová  renondépe” (Éx. 23:14-17, NM). Umi omoakãva hogapy ohechakuaa mbaʼéichapa omoag̃ui chupekuéra Ñandejárare umi Aty ha upévare oguerahapaite ifamíliape (1 Sam. 1:1-7; Luc. 2:41, 42).

12, 13. ¿Mbaʼépa ojapovaʼerã umi família Israelgua oho hag̃ua umi fiésta ojejapóvape káda áño?

¹² Epensamína umi sakrifísio ojapovaʼekuére umi família Israelgua oho hag̃ua umi fiésta ojejapóvape. Pór ehémplo, José ha María oikovaʼekue Nazarétpe, ha haʼekuéra oguatavaʼerã 100 kilómetro og̃uahẽ hag̃ua Jerusalénpe. ¿Mboy díapepa nde reg̃uahẽne rehóramo yvýrupi ne familiakuéra michĩva ndive? Jaleéramo la Bíbliape pe istória omombeʼúva Jesús imitãme oho hague Jerusalénpe, jahechakuaa umi oñopariénte ha oñoamígova sapyʼánte oviaha hague oñondivepa. Oimevaʼerã heta mbaʼe ohasa hikuái oviahávo upéicha, oñekosinavaʼerã hetápe g̃uarã ha umi lugár ndoikuaaporãiháre ohekavaʼerã opyta hag̃ua oke. Upéicharõ jepe, oiméne ndaipeligrosoguasúiraʼe ajeve ituvakuéra opoi Jesúsgui umi hénte apytépe orekórõ guare 12 áño. Koʼýte umi imitãva oimevaʼerã arakaʼeve ndahesaráiri umi viáhegui (Luc. 2:44-46).

¹³ Heta isrraelíta ovavaʼekue mombyry hetãgui, upéicha rupi heta tetãgui oĩvaʼekue oúva Jerusalénpe umi fiestarã. Pór ehémplo Pentecostés año 33-pe, oĩvaʼekue hudío teéva ha ambue tetãygua oservíva Jehovápe oúva Italia, Libia, Creta, Asia Menor ha Mesopotámiagui (Hech. 2:5-11; 20:16).

14. ¿Mbaʼéichapa oñeñanduvaʼekue umi isrraelíta ohóvo umi fiésta ojejapóvape káda áño?

¹⁴ ¿Mbaʼérepa umi isrraelíta iñeʼẽrendúva omombaʼe ha oguerohoryete umi viáhe ojapóva oñondivepa? Ikatúgui omombaʼeguasu Jehovápe hetaiterei hapicha ndive. ¿Mbaʼéichapa oñeñandúneraʼe? Oiméne ovyʼáraʼe hikuái. Pe Fiésta de las Cabañas ojejapo hag̃ua Jehová heʼivaʼekue chupekuéra: ‘Pevyʼavaʼerã pe arete guasúpe, nde, nde raʼy, nde rajy, ne rembiguái kuimbaʼe ha kuñáva, pe levíta, pe tetã ambuegua, pe ityreʼỹva ha pe viúda oikóva pende apytépe. Siete ára pukukue pemboarete [Jehová] Ñandejárape g̃uarã, pe lugár haʼe oiporavótavape; pevyʼaite hag̃ua [...] haʼe penepytyvõ porã haguére pene rembiapópe’ (Deut. 16:14, 15, ÑÑB; elee Mateo 5:3).

15, 16. ¿Mbaʼe sakrifísiopa nde rejapo reho hag̃ua asambleahápe? ¿Rembyasýpa rejapo haguére upéicha?

¹⁵ Heta mbaʼe ikatu ñaaprende umi asambléa ojejapovaʼekuégui yma. Okambiáramo jepe heta mbaʼe upe guive, ojejapo gueteri oñemombaʼeguasu hag̃ua Jehovápe. Yma umi ohóva Jerusalénpe fiestarã heta ojesakrifikavaʼekue, ñane tiémpope avei oĩ ermáno heta ojesakrifikáva oho hag̃ua umi asambleahápe. Péro ovyʼaiterei ojapo haguére upéicha oikuaágui ohupytyha heta mbaʼe porã. Upépe jaikuaa ha ñantende porãve heta mbaʼe ñanepytyvõtava ñaime porã hag̃ua Jehová ndive. Ñanemokyreʼỹ jajapo hag̃ua umi mbaʼe ñaaprendéva, jajehekýi hag̃ua heta akãrasýgui ha ñanemokyreʼỹ ñañehaʼã hag̃ua jahupyty umi mbaʼe ñanemombaretétava ha ñamboyke umi mbaʼe ikatúva ñandepyʼapy rei (Sal. 122:1-4).

¹⁶ Akóinte ningo ovyʼa umi oĩva Aty Guasuhápe. Peteĩ infórme ojejapóva pe asambléa oikovaʼekuére áño 1946-pe heʼi: “Ñanembovyʼa jahechávo mbaʼéichapa hetaiterei ermáno ojapysaka porã umi prográmare. Peteĩ grúpo ombopu umi kántiko ha umi ermáno omboryrýi pe lugár opurahéivo oñondivepa omombaʼeguasu hag̃ua Jehovápe. Oĩ avei heta ermáno oñeanotáva ombaʼapo ha oipytyvõ hag̃ua kyreʼỹme  ermanokuérape”. ¿Reñeñandúpa nde avei péicha umi asambléa de distríto térã internasionál ojejapóvape? (Sal. 110:3; Is. 42:10-12.)

17. ¿Mbaʼéichapa ojejapo koʼág̃a umi Aty Guasu?

¹⁷ Koʼág̃a ndojejapovéima umi asambléa yma ojejapo haguéicha. Pór ehémplo, oĩ ermáno imanduʼáva gueteri umi Aty Guasu ojejapo hague 8 día. Oĩvaʼekue prográma pyhareve, kaʼaru ha pyhare g̃uarã. Umi prográma apytépe oĩ avei predikasión. Umi diskúrso oñepyrũ pyhareve la 9 ha sapyʼánte oho hese pyhare la 9 peve. Heta ermáno ombaʼapo jejopými oprepara hag̃ua rambosag̃ua, karurã ha senag̃ua umi oĩvape g̃uarã upe asambleahápe. Péro koʼág̃a umi Aty Guasu ndojejapovéima 8 día ha káda únoma ogueraha hembiʼurã ikatu hag̃uáicha enterove ojapysaka porã umi mbaʼe ojeʼévare asambleahápe.

18, 19. ¿Mbaʼépa reguerohoryve umi asambléa rehe ha mbaʼérepa?

¹⁸ Umi asambléa ojejapóta jave oñehaʼarõiterei voi ojekuaaségui mbaʼépa ojeʼe ha oñepresentáta upépe. Umi Aty Guasúpe, umi diskúrso ha puvlikasión osẽ pyahúva rupive oñemeʼẽ ñandéve “hiʼupy hiʼoraitépe”. Umívape oñemyesakã porãve ñandéve umi profesía ha hetave mbaʼe la Biblia omboʼéva (Mat. 24:45, NM). Umi puvlikasión pyahu oñepresentáva rupive ñaipytyvõ jepi avei umi héntepe omombaʼe hag̃ua la Biblia omboʼéva. Umi teátro ojejapóva omokyreʼỹ mitãrusukuéra ha umi ijedavévape ohecha hag̃ua mbaʼéichapa oĩ Ñandejára renondépe ha oñeñangareko hag̃ua ko múndo añágui. Pe diskúrso ojejapóva umi ojevautisátavape g̃uarã, ñanemomanduʼa jahecha hag̃ua mbaʼépa ñamotenondeñaína ñanderekovépe ha ñanembovyʼa jahechávo mbaʼéichapa ambue tapicha ohechauka oñemeʼẽma hague Jehovápe ha ojevautisa.

¹⁹ Yma guivéma umi asambléa rupive oñemombaʼeguasu Jehovápe. Koʼãva ñanepytyvõ ñaneñeʼẽrendu meme hag̃ua Ñandejárape jahasáramo jepe heta mbaʼe ijetuʼúva. Avei omombarete ñande jerovia, ñanepytyvõ jajuhu hag̃ua amígo teete ha ñamombaʼe hag̃ua ikatu haguére jaservi Jehovápe peteĩ ñeʼẽme ñane ermanokuéra opa tetãygua ndive. Umi Aty Guasu rupive Jehová ñanevendesi ha oñangareko ñanderehe. Upévare ñañehaʼãmbaitékena ani jajavy ni michĩmi umi Aty Guasu ha jahupytýta heta mbaʼe porã (Prov. 10:22).