1. ¿Mbaʼépa oñeporandu heta kristiáno áñorema oservíva Jehovápe ipyʼaite guive?

 PETEĨ ermána heta tiémpore oservímava Jehovápe iprovléma hetáramo jepe, oñeporandu: “¿Ahechánepa oñehundi vove ko múndo aña?”. Heta kristiáno áñorema oservíva Jehovápe ipyʼaite guive opensa avei ko ermánaicha. Añetehápe, enterovéva jaipotaitereíma Ñandejára ‘ombopyahu opaite mbaʼe’ ha oipeʼa umi provléma ñanembohasa asýva (Rev. 21:5, ÑÑB). Umi mbaʼe oikóva koʼág̃a ohechauka oñehundi potaitemaha ko múndo oĩva Satanás poguýpe, péro jaikuaaháicha, heta vése ijetuʼu ñanepasiénsia hag̃ua.

2. ¿Mbaʼépa ñahesaʼỹijóta ko artíkulope?

² La Biblia ohechauka tekotevẽha ñahaʼarõkuaa. Ñandejára rembiguaikuéra yma guare ipasiensiavaʼekue. Ñande avei jajerovia ha ñanepasiensiavaʼerã jahecha hag̃ua mbaʼéichapa Ñandejára okumpli ipromésa (elee Hebreos 6:11, 12). Jehová voi ningo ohechauka ipasiensiaha. Haʼe ikatúma kuri ohundi ko múndo aña, péro koʼág̃a peve ohaʼarõhína ojapo hag̃ua upéva itiempoitépe (Rom. 9:20-24). ¿Mbaʼérepa ipasiensiaite? ¿Mbaʼéichapa Jesús osegi iñehémplo? ¿Ha mbaʼéichapa ñanepytyvõta jajapóramo avei upéicha? Ñahesaʼỹijomína koʼã mbaʼe ikatu hag̃uáicha jajeroviave ha ñanepasiensiave, ñapensáramo jepe Jehová imbegueha okumpli hag̃ua ipromésa.

3, 4. a) ¿Mbaʼérepa Jehová ipasiensiaite okumpli hag̃ua hembipota ko Yvýpe g̃uarã? b) ¿Mbaʼépa Jehová ojapo Adán ha Eva opeka rire?

³ Jehová ningo pe Mburuvicha Tuichavéva, upéicharõ jepe oikuaa ipasiensiavaʼerãha. Edénpe oñepyrũvaʼekue  peteĩ provléma tuichaitereíva, ha Ñandejára oikuaa oñekotevẽha heta tiémpo oñesolusiona hag̃ua upéva. Haʼe oikuaa porã umi ánhel ha yvyporakuérape, oikuaa mbaʼéichapa opensa ha mbaʼérepa ojapo heta mbaʼe. Upévare odesidi opa mbaʼe ou porãveháicha enterovévape (Heb. 4:13).

⁴ Jehová oipotavaʼekue Adán ha Eva familiare omyenyhẽ ko Yvy. Péro upéi Satanás ombotavy Évape ha Adán ou naiñeʼẽrendúi, upéicharõ jepe Jehová nopyrũi iñeʼẽre. Pyʼaguapýpe porã odesidi ojapótava ha ndojapurái omboyke hag̃ua yvyporakuérape, síno ojapo oñekotevẽva oñekumpli hag̃ua hembipota ko Yvýpe g̃uarã (Is. 55:11). Jehová ojejokopaite ha ohaʼarõ hetaiterei tiémpo ikatu hag̃uáicha ojapo heta mbaʼe oĩ porãveháicha. Péicha okumplíta oipotavaʼekue iñepyrũmby guive ha ohechauka haʼe añoite orekoha derécho oisãmbyhy hag̃ua.

5. ¿Mbaʼépa ojehupyty Jehová ipasiénsia rupi?

⁵ ¿Mbaʼérepa Jehová ipasiénsia avei? Upéicha rupi hetave tapicha ikatúta oikove opa ára g̃uarã. Koʼág̃a ojapohína tekotevẽva guive osalva hag̃ua “peteĩ aty guasu” (Rev. 7:9, 14, ÑÑB; Rev. 14:6). Pe predikasión rupive oinvita heta héntepe oaprende hag̃ua umi mbaʼe oipotáva jajapo ha avei umi mbaʼe ojapótava Irréino. Pe “marandu porã” oñeʼẽva ko Rréinore ndaijojahái. Ndaipóri notísia iporãvéva yvyporakuérape g̃uarã (Mat. 24:14, NM). Opavave Jehová oiporavóva ou oike ipuévlope oĩháme tapicha ohayhúva tekojoja (Juan 6:44-47). Ñandejára ñanderayhuetéva ñanepytyvõ ñaime porã hag̃ua hendive. Haʼe oiporavo avei yvyporakuéra apytégui umi oisãmbyhýtava Igoviérnope yvágape. Koʼãva oho vove yvágape oipytyvõta entéro yvypóra iñeʼẽrendúvape ohupyty hag̃ua perfeksión ha jeikove opaveʼỹva. Péicha jahecha Jehová ipasiensiaha okumpli hag̃ua ipromésa ha ombaʼapoha oikóvo ojapo hag̃ua opa mbaʼe ou porãve hag̃uáicha ñandéve.

6. a) ¿Mbaʼéichapa Jehová ohechauka ipasiénsia hague Noé tiémpope? b) ¿Mbaʼéichapa Jehová ohechauka ipasiensiaha ñane tiémpope?

⁶ Jehová avei ohechauka ipasiensiaha umi iñañáva ombopochy jave chupe ikuénta hag̃uáicha. Pór ehémplo pe Ama Guasu mboyve, umi hénte hekovaieterei ha ojahéi hapicháre. Jehová ohechávo umi mbaʼe vaieta oikóva “ombyasy ipyʼaite guive” (Gén. 6:2-8). Haʼe ndohejareíri koʼã mbaʼe ha upévare odesidi ogueru peteĩ Ama Guasu ohundi hag̃ua umi hénte aña. Péro “Ñandejára ipyʼaporã rupi ohaʼarõ” ha ojapo tekotevẽva Noé ha ifamília ojesalva hag̃ua (1 Ped. 3:20, BNP). Itiempoitépe omombeʼu Noépe mbaʼépa odesidi ha ojapouka chupe peteĩ árka (Gén. 6:14-22). Hiʼarive Noé ‘omombeʼu opavavépe mbaʼéichapa [Ñandejára] oipota ojeiko’ ha oavisa umi héntepe pe Ama Guasu og̃uahẽmbotaitemaha (2 Ped. 2:5). Jesús heʼivaʼekue ñane tiémpo ojoguataha Noé tiémpope. Jehová odesidíma arakaʼépa ohundíta ko múndo aña, péro ndaipóri yvypóra oikuaáva “upe día ha upe óra” (Mat. 24:36, NM). Koʼág̃a Jehová oenkarga ñandéve ñamombeʼu hag̃ua umi héntepe mbaʼépa oikóta ha mbaʼépa ojapovaʼerã ojesalva hag̃ua.

7. ¿Ikatúpa jaʼe Jehová imbeguetereiha okumpli hag̃ua ipromésa? Emyesakã.

⁷ ¿Ikatúpa jaʼe Jehová ohejanteha ohasa pe tiémpo? Nahániri. Ani ñaimoʼã nointeresaiha chupe mbaʼeve ohaʼarõkuaa haguére. Péro sapyʼánte hasy ñandéve ñapensa péicha ñande eda vove jahávo térã jahasa asy rupi. Ikatu upéva ñanemokangy térã ñapensa Ñandejára imbeguetereiha okumpli hag̃ua ipromésa (Heb. 10:36). Aníkena arakaʼeve  ñanderesarái Jehová oikuaaha mbaʼérepa ipasiensiavaʼerã ha oiporuha pe tiémpo hembýva hembiguaikuéra venefisiorã (2 Ped. 2:3; 3:9). Péro jahechamína koʼág̃a mbaʼéichapa Jesús ohechauka ipasiensiaha Itúvaicha.

8. ¿Mbaʼéicha javépa Jesús ohechauka ipasiensiaha?

⁸ Ymaiterei guivéma Jesús ojapo hague kyreʼỹme Itúva rembipota. Satanás opuʼãrõ guare Ñandejárare, Jehová odesidi ombou Itaʼýra peteĩete ko yvy ape ári oiko hag̃ua chugui pe Mesías. Jesús ohaʼarõ hetaiterei áño og̃uahẽ meve upe tiémpo, ha péicha ohechauka ipasiensiaha (elee Gálatas 4:4). Péro haʼe ndopytái ojekuʼako upe aja, síno ojapo meme pe tembiapo Ñandejára omeʼẽva chupe. Upéi, hasýpe ou ko yvy ape ári ha oikuaa porã Satanás ojukataha chupe, heʼiháicha umi profesía (Gén. 3:15; Mat. 16:21). Jesús ipasiénsia ha ojapo Ñandejára rembipota, tohasa asy jepe raʼe upearã. Péicha ohechauka ndaiporiha haʼeichagua iñeʼẽrendúva. Haʼe nopensái ijehénte ni ipriviléhiore. ¡Ajépa iporãite iñehémplo! (Heb. 5:8, 9.)

9, 10. a) ¿Mbaʼépa ojapo Jesús ohaʼarõ aja pe tiémpo Jehová omoĩva? b) ¿Mbaʼépa jajapovaʼerã jahecha hag̃ua pe tiémpo Jehová ohechaháicha?

⁹ Oñemoingove jey rire Jesúspe, oñemeʼẽ chupe autorida yvágape ha yvy ape ári (Mat. 28:18). Haʼe akóinte oiporu upe autorida ojapo hag̃ua Itúva rembipota pe tiémpo Jehová omoĩvape. Jesús ipasiénsia ha ohaʼarõ Itúva deréchape áño 1914 peve, oñemoĩrõ guare iñenemigokuérape ‘ipyendáramo’ (Sal. 110:1, 2; Heb. 10:12, 13). Koʼẽrõitéma ohundipáta ko múndo aña oĩva Satanás poguýpe, péro upe aja ipasiénsia ha ogueraha yvyporakuérape ‘pe yvu oporomoingovévape’ (Rev. 7:17, ÑÑB).

¹⁰ ¿Ikatúpa ñahaʼanga Jesúspe ha jahecha pe tiémpo Jehová ohechaháicha? Haʼe ningo ojaposeterei umi mbaʼe Itúva omandáva chupe, upéicharõ jepe ohaʼarõ og̃uahẽ pe tiémpo Jehová omoĩva. Ñande avei ñahaʼarõ aja oñehundi ko múndo aña, tekotevẽ ñanepasiénsia ani hag̃ua ñañemotenondese Ñandejárare ha ani hag̃ua jaguevi. Upéicharõ, ¿mbaʼépa ñanepytyvõta ñanepasiensiave hag̃ua?

11. a) ¿Mbaʼérepa tekotevẽte jajerovia ha ñanepasiénsia? b) ¿Mbaʼérepa jaʼekuaa oĩha hetave mbaʼe ñanepytyvõva jajerovia mbarete hag̃ua?

¹¹ ¿Ikatúpa yvyporakuéra ogueropuʼaka heta mbaʼe ijetuʼúva iñimperféktoramo jepe? Umi proféta ha ambue oservivaʼekue Jehovápe Jesús ou mboyve, ohechauka ikatuha. Haʼekuéra ojerovia ha ipasiensiavaʼekue (elee  Santiago 5:10, 11). Ndojeroviáirire ipyʼaite guive Jehová heʼívare, ndaikatuivaʼerãmoʼã ipasiénsia hikuái ha ohaʼarõ oñekumpli umi promésa. Heta vése ojeapeligra ha ohasa asy, upéicharõ jepe ojerovia Jehováre ha oikuaa porã ndohejareimoʼãiha chupekuéra (Heb. 11:13, 35-40). Ñane tiémpope oĩ hetave mbaʼe ñanepytyvõva jajerovia mbarete hag̃ua. La Biblia heʼi Jesús ‘omongakuaaha hekopete’ ñande jerovia (Heb. 12:2, BNP). Péicha, okumplívo umi profesía ha omyesakãvo ñandéve Ñandejára rembipota, koʼýte ñanemokyreʼỹ jajeroviave hag̃ua Jehováre.

12. ¿Mbaʼépa ikatu jajapo ñamombareteve hag̃ua ñande jerovia?

¹² ¿Mbaʼépa ikatu jajapo ñamombareteve hag̃ua ñande jerovia ha ñanepasiensiave hag̃ua? Jasegivaʼerã umi konsého oúva Jehovágui. Pór ehémplo, jajepyʼamongetavaʼerã mbaʼérepa iñimportantete ñamotenonde Ñandejára Rréino. ¿Ikatúnepa  ñañehaʼãmie jajapo porãve hag̃ua heʼíva Mateo 6:33? Ikatu jahechakuaa tekotevẽha japredikave, térã ñakambia jaiko lája ha ñañekontenta jarekomívarente. Ani ñanderesarái Jehová omyengovia porãha ñandéve umi mbaʼe jajapóva iservísiope. Pór ehémplo, ikatuhína oheja ñambostudia la Biblia peteĩ tapichápe, térã omeʼẽ ñandéve pyʼaguapy ‘oñangarekóva ñane remiandúre’ (elee Filipenses 4:7). Upévare, ñapensa meméramo umi mbaʼe porãita Jehová omeʼẽvare ñandéve ñaneñeʼẽrendúgui chupe, katuete jahechakuaáta iñimportantetereiha ñanepasiénsia (Sal. 34:8).

13. Ehechauka peteĩ ehémplo rupive mbaʼéichapa ikatu jajeroviave ha ñanepasiensiave.

¹³ Ñamoĩmína peteĩ ehémplo ñantende hag̃ua mbaʼéichapa ñande jerovia ñanepytyvõ ñanepasiensiave hag̃ua. Peteĩ chokokue ohechávo ikogakuéra osẽ porãmba, ikyreʼỹeterei oñemitỹ jey hag̃ua. Oikuaáramo jepe tekotevẽha ohaʼarõ og̃uahẽ meve pe tiémpo omonoʼõ hag̃ua ikóga, ndoúi ikangy. Ikatu voi iñakãraku oñotỹ hag̃ua hetave pe ótro áñope, ojeroviágui osẽ porã jeytaha chupe. Upeichaite avei ñañeñandu jajeroviáramo Jehováre. Jahechakuaa jahupytyha heta mbaʼe porã ñaaprende ha jajapóramo Jehová heʼíva. Péicha jajerovia mbareteve hese ha jaikuaa porã katuete ñanevendesitaha (elee Santiago 5:7, 8).

14, 15. ¿Mbaʼéichapa jahechavaʼerã umi jehasa asy?

¹⁴ Ikatu hag̃uáicha ñanepasiensiave tekotevẽ avei jahecha ko múndo ha ñane situasión Jehová ohechaháicha. Pór ehémplo, hetaiterei tiémpore Jehová ohecha ha ombyasy mbaʼéichapa yvyporakuéra ohasa asy, péro ndohejái upéva odesahusia chupe ni ndopytái ojapoʼỹre mbaʼeve. Upéva rangue ombou Itaʼýra peteĩete “ombyai hag̃ua Aña rembiapokue” ha  oipeʼa hag̃ua opa mbaʼe vai Satanás ojapovaʼekue yvyporakuérare (1 Juan 3:8, ÑÑB). Amo ipahápe opaichagua jehasa asy opytáta tesaráipe ha umi mbaʼe porã oúva Jehovágui ndopamoʼãi arakaʼeve. Upéicharõ, ndovaléi jajepyʼapyeterei umi mbaʼe vaieta oikóvare ko múndope, ha ani ñandepyʼatarova ha ñaimoʼã Jehová imbegueha okumpli hag̃ua ipromésa. Upéva rangue jajeroviavaʼerã umi mbaʼe jahechaʼỹvare, péro ndopamoʼãiva arakaʼeve. Jehová omoĩma peteĩ fécha ohundi hag̃ua ko múndo ha ojapóta upéva hiʼoraitépe (Is. 46:13; Nah. 1:9).

¹⁵ Koʼã ára paha aja, ikatu jahasa umi mbaʼe ijetuʼuetereíva. Oĩramo ojahéiva ñanderehe térã jahecha oñembohasa asyha peteĩ jahayhúvape, ani jajapo mbaʼeve ñandepochýgui rei. Ñañehaʼãmbaitékena jajerovia Jehováre ha jasegi Jesús ehémplo, oĩva Mateo 26:39-pe (elee).

16. ¿Mbaʼépa ndovaleiete jajapo ko tiémpo hembývape?

¹⁶ Ikatu hag̃uáicha ñanepasiénsia Jehová ipasiensiaháicha, jajeroviavaʼerã Iñeʼẽre ha ndovaléi ñandepyʼamokõi. ¿Mbaʼérepa jaʼe upéva? Peteĩ tapicha ndogueroviapáiva oñehunditaha ko múndo aña, ohechauka nohaʼarõkuaaiha ha tuicha ojavy. Umi opensáva péicha ikatu hína oimoʼã tekotevẽha ojededika ambue mbaʼépe noñekumplírirõ g̃uarã Jehová promésa. Pór ehémplo, ikatu oñehaʼã ipláta heta ha iñimportánte hag̃ua ko múndope, omotenonde rangue Ñandejára Rréino. Térã oĩ osegíva umi estúdio ijyvatevéva openságui péicha noikotevẽmoʼãiha amo gotyove. Koʼãichagua tapicha ohechauka ndojeroviaiha Ñandejárare. Ñanemanduʼavaʼerã Pablo ñanemokyreʼỹha ñahaʼanga hag̃ua Ñandejára rembiguaikuéra iñeʼẽrenduetévape. Haʼekuéra ‘ojerovia ha ipasiensiavaʼekue’ Jehová oprometérõ guare heta mbaʼe porã (Heb. 6:12, ÑÑB). Jehová ndohejamoʼãi ko múndo aña oho pukueterei, ohejáta oĩ oñekumpli peve hembipota (Hab. 2:3). Péro upe aja jaservivaʼerã chupe ñande pyʼaite guive, ani ñakumpli hag̃uánte hendive. Ñañatende porã vaʼerã ha kyreʼỹme japredika pe marandu porã. Upéicha añoite ikatúta ñañandu jajapoha peteĩ mbaʼe ideprovechoitereíva koʼã tiémpo ijetuʼuetévape (Luc. 21:36).

17, 18. a) ¿Mbaʼépa ikatu jajapo Jehová ipasiénsia rupi? b) ¿Mbaʼépa jahupytýta koʼẽrõite, koʼág̃ama voi ñanepasiénsiaramo?

¹⁷ Oiméramo jaikuaa Jehovápe ojapóma heta áño, térã ramoiténte, enterovéva jaservise chupe opa árare. Ñanepasiénsiaramo jagueropuʼakáta umi mbaʼe ijetuʼúva ha avei ikatúta jajesalva, ndajaikuaáiramo jepe mboy tiémpopa ofalta oñehundi hag̃ua ko múndo. Koʼág̃a rupi Jehová oipota jahechauka jajeroviaha hese ñande pyʼaite guive ha ñaneñeʼẽrenduha chupe opa mbaʼépe, jahasa asýtaramo jepe jajapo haguére haʼe oipotáva (1 Ped. 4:13, 14). Jehová oikuaa tekotevẽha ñahaʼarõkuaa jajesalva hag̃ua, upévare ñanepytyvõ ñanepasiensiave hag̃ua (1 Ped. 5:10).

¹⁸ Jehová omeʼẽ autorida Jesúspe yvágape ha yvy ape ári, upévare ndaipóri ñandepeʼavaʼerã chugui ñande voi ndajahejáiramo chupe (Juan 10:28, 29). Ndovaléi jakyhyje umi mbaʼe ikatúvagui jahasa ni ñamanóramo g̃uarã. Ñanepasiénsia ha ñaaguantáramo ipahaite peve, katuete jajesalváta. Upévare, ani jaheja ko múndo ñanembotavy ni ñanemomombyry Jehovágui. Ñamombarete uvei ñande jerovia ha jaaprovecha Jehová pasiénsia (Mat. 24:13; elee 2 Pedro 3:17, 18).