1. ¿Mbaʼépa ohupytýta pe “aty guasu”?

 ¿MBAʼÉPA ojapóne mil áñope ihentekuéra rehehápe peteĩ goviérno ipoderósova oisãmbyhyhápe peteĩ mburuvicha hekojoja ha oporoporiahuverekóva? ¡Hetaiterei mbaʼe porã ningo ikatu ojapo! Umi oĩva pe ‘aty guasúpe’ ha ohasátava pe ‘jehasa asy guasu’ ohupytýta avei hetaiterei mbaʼe porã oñehundi rire ko múndo aña (Rev. 7:9, 14, ÑÑB).

2. ¿Mbaʼépa ojehecha umi seis mil áño yvyporakuéra ogoverna haguépe?

² Ojapóma seis mil áño yvypóra ogoverna hague ko yvy ha jehasa asýmante ogueru. Ymaite guive la Biblia heʼímava voi: ‘Umi tetã ruvicha oiporu vai ipuʼaka ombyai hag̃ua hapichápe’ (Ecl. 8:9, ÑÑB). Ha upeichaite ningo oiko. Jahecha oĩha heta ñorairõ, opuʼãva goviérnore, imboriahúva ha heta mbaʼasy. Avei oñehundi ohóvo ko yvy ha roʼyeterei térã hakueterei. Heta mburuvicha heʼi koʼýte ivaivetaha ñane situasión koʼág̃ama nañakambiáiramo.

3. ¿Mbaʼe profesíapa oñekumplíta Jesús ha umi 144.000 ogoverna aja mil áñore?

³ Ñandejára Rréino osolusionáta opa mbaʼe vai ombohasa asýva yvyporakuérape ha ombyaíva ko Yvy. Upéva oikóta Jesucristo ha umi 144.000 ogoverna aja mil áñore. Upépe oñekumplíta ko promésa porãite: “Péina ajapóta yvága pyahu ha yvy pyahu. Yma guare opytáta tesaráipe, avave naimanduʼamoʼãi hese” (Is. 65:17). Añetehápe, hetaiterei mbaʼe porã oikóta upe tiémpope. Ndajahecháiramo jepe koʼág̃a, umi profesía oĩva Ñandejára Ñeʼẽme  ohechaukáma ñandéve “umi mbaʼe ikatuʼỹva jahecha” (2 Cor. 4:18, NM).

4. ¿Mbaʼe provlémapepa ojecha heta hénte?

⁴ Ajépa enterovéva jaipota ñande róga teerã, peteĩ lugár ikatuhápe jaiko kyhyjeʼỹme ñane família ndive. Péro koʼã tiémpope hetaiterei oĩ ndahógaiva. Umi siuda tuicháva katu henyhẽ héntegui, ha atyraite oĩ oiko asy ha isarambipáva umi víllare. Koʼãichagua ningo oipota asy hóga teerã, péro oikuaa porã ni naiñesperansaiha upéva.

5, 6. a) ¿Mbaʼéichapa oñekumplíta Isaías 65:21 ha Miqueas 4:4? b) ¿Mbaʼépa jajapovaʼerã jahupyty hag̃ua koʼã mbaʼe oñeprometéva?

⁵ Ñandejára Rréino poguýpe opavave orekóta hóga tee. Proféta Isaías ohaivaʼekue: “Opavave ojogapóta ha oikóta imbaʼe teépe, oñotýta [parrál] ha hoʼúta hiʼa” (Is. 65:21). Jaikuaaháicha, heta hénte hógama, ha oĩ katu orekóva propieda tuicháva térã mansión voi. Upéicharõ jepe, okyhyje hikuái osórõ g̃uarã térã ojeike ha oñemondapa chupekuéra. Ñandejára Rréino poguýpe ndaiporimoʼãvéima ojepyʼapýva koʼã mbaʼére. Proféta Miqueas heʼivaʼekue: “Kyhyjeʼỹre opárupi ojeikóta, maymáva ikatúta opytuʼu iparrál ha hiʼígo máta guýpe” (Miq. 4:4).

⁶ ¿Mbaʼéichapa ikatu ñanepytyvõ ko esperánsa porãite? Jaikuaaháicha, enterovéva ningo ñaikotevẽ ñande rogarãmi. Upéicharamo jepe, jaiko rangue jaheka peteĩ óga ikomodida hetáva ha jadevepa upearã, ikuentave jajesareko Jehová promésare. Ñapensamína Jesús heʼivaʼekuére ijehe: “Umi aguara oreko haity ha guyrakuéra oreko hupa. Pe Yvypóra Raʼy katu ndorekói ni moõpa oñenóta oke” (Luc. 9:58, NM). Jesús ningo ikatupyry ha oikuaavaʼekue heta mbaʼe ikatu hag̃uáicha omopuʼã térã ojogua peteĩ óga neporãmba jepéva. Péro, ¿mbaʼérepa ndojapói upéva? Haʼe ndoipotái mbaʼeve okompromete rei chupe térã oipeʼa chugui itiémpo, ha ombotapykue Ñandejára Rréino upevakuére. ¿Ikatúpa ñahaʼanga chupe ha ñañekontenta jarekomívarente? Jajapóramo upéicha ndajaikomoʼãi jajepyʼapy rei umi mbaʼerepy rehe (Mat. 6:33, 34).

7. ¿Mbaʼéichapa Jehová oipotavaʼekue oiko yvypóra ha mymbakuéra?

⁷ Jehová ojapovaʼekue yvypórape ojapopa rire opa mbaʼe oĩva ko yvy apére. ¿Mbaʼépa oipota chupekuéra g̃uarã? Haʼete voi omombeʼu upéva Ipytyvõhárape, Itaʼýra Ypykue: “Jajapóna kuimbaʼe ñande joguaháramo; ha toguereko hikuái ipoguýpe umi pira, umi guyra, umi mymba tuicháva, pe yvy tuichakue ha opaichagua mymba oikóva ko yvy apére” (Gén. 1:26, NM). Péicha jahecha Ñandejára omoĩ hague mymbakuéra Adán, Eva ha opavave yvypóra poguýpe.

8. ¿Mbaʼépa ojekuaa umi mymbáre?

⁸ ¿Ikatúnepa yvyporakuéra oreko ipoguýpe umi mymba ha oiko porã oñondive? Ikatu. Ha upévare jahecha heta hénte orekoha jagua, mbarakaja térã ambue mymba. Péro, ¿mbaʼépa jaʼekuaa umi mymba ñarõ rehe? Peteĩ rrevísta omombeʼu: “Umi sientífiko ostudiáva umi mymbáre, ohechakuaa koʼãva oñanduha avei heta mbaʼe”. Pór ehémplo, jahecha jepi umi mymba okyhyje térã ipochyha oĩramo oatakáva chupekuéra. Péro, ¿ikatu piko haʼekuéra ohechauka  oñandúva? Pe rrevísta heʼi avei: “Umi mymba ikatu ohechauka ovyʼa ha oporohayhuha, ha upéva koʼýte ojekuaa okakuaapa vove ohóvo”.

9. ¿Mbaʼéichapa oikóta yvypóra ha mymbakuéra Ñandejára múndo pyahúpe?

⁹ La Biblia opromete yvyporakuéra oiko porãtaha mymbakuéra ndive, ha ñande jajerovia ko promésare (elee Isaías 11:6-9 ha 65:25). Jehová heʼivaʼekue Noé ha ifamiliakuérape osẽrõ guare pe árkagui: “Yvy ape arigua mymbakuéra oñemondýi ha okyhyjéta pendehegui”. Ndareíri ningo heta mymba hesaite, péro upéva oipytyvõ chupekuéra oñeñangareko hag̃ua (Gén. 9:2, 3, ÑÑB). Ñandejára múndo pyahúpe katu haʼekuéra ndokyhyjemoʼãvéima. Péicha, yvypóra ha mymbakuéra oiko porãta oñondive ha oñekumplíta Jehová oipotavaʼekue iñepyrũmby guive (Os. 2:18). ¡Ajépa ojevyʼaitéta ko yvy ape ári!

10. ¿Mbaʼérepa hetave vése ñanerasẽ?

¹⁰ Salomón ohecha “opaichagua jejopy oikóva ko yvy apére”. Upévare oñelamenta ha heʼi: “¡Péina umi ojejopýva resay, péro ndaipóri okonsoláva chupekuéra!” (Ecl. 4:1, NM). Koʼág̃a rupi koʼýte ivaive ñane situasión. Ndaipóri heʼivaʼerã: “Chéngo nacherasẽiva voi arakaʼeve”. Añetehápe sapyʼánte ñanerasẽ vyʼágui, péro hetave vése ñanerasẽ ojehúgui ñandéve peteĩ mbaʼe ñambyasýva.

11. ¿Mbaʼe ehémplo oĩva la Bíbliapepa opokove nderehe?

¹¹ La Bíbliape jajuhúta heta ehémplo ohechaukáva Jehová siervokuéra hasẽ hague oñembyasy jave. Pór ehémplo, “Abrahán ombyasy ha ojaheʼo” Sara omanórõ guare orekópe 127 áño (Gén. 23:1, 2). Noemí, dos vése ojedespedírõ guare inuerakuéra viúdagui, “hasẽ soro” hikuái (Rut 1:9, 14). Rréi Ezequías katu ou hasy ha oikuaáma omanotaha. Upémarõ oñemboʼe ha “hasẽ soro tuicha ñembyasy reheve”, ha amalisia upéva opokoiterei Jehováre (2 Rey. 20:1-5). Avei katuete opoko ñanderehe ñanemanduʼávo Pedro “hasẽ soro” hague onega rire Jesúspe (Mat. 26:75, NM).

12. ¿Mbaʼéichapa Ñandejára Rréino okonsoláta yvyporakuérape?

¹² Enterovévante jahasa umi mbaʼe ivaívare ha ñaikotevẽ ñanekonsoláva. Jesucristo ojapóta upéva oisãmbyhy vove mil áñore. La Biblia opromete: “[Ñandejára] omokãta hesaykuéra, ndaiporimoʼãvéima ñemano, tasẽ, jaheʼo ha mbaʼembyasy” (Rev. 21:4). Javyʼaite ningo jaikuaágui opataha ñembyasy, umi mbaʼe ñanembohasa asýva ha ñanemyasẽva. Ñandejára opromete avei ndaiporimoʼãveimaha omanóva. ¿Mbaʼéichapa ojapóta upéva?

13. ¿Mbaʼépa oiko Adán opeka guive?

¹³ Adán opeka guive, yvyporakuéra omano. Ha pe ñemano haʼete voi peteĩ enemígo imbaretetereíva ha ndaikatúiva ñandepuʼaka hese. Hiʼarive ogueru vyʼaʼỹ ha tuicha ñembyasy (Rom. 5:12, 14). Añetehápe yvyporakuéra ‘okyhyje rupi ñemanógui, oiko hembiguáiramo hekove pukukue aja’ (Heb. 2:15, ÑÑB).

14. ¿Mbaʼépa oikóta ‘oñehundi’ vove pe ñemano?

¹⁴ La Biblia opromete: “Ñane enemígo oñehundítava ipahaite haʼe pe ñemano” (1 Cor. 15:26, NM). Upéva ovenefisiáta mokõi grúpope: pe “aty guasu” ohasátava  pe múndo pyahúpe ha ikatútava oikove opa ára g̃uarã. Upéi, hetaiterei héntepe hoʼavaʼekue ko enemígo pópe ha oikove jeýtava. Epensamíntena mbaʼeichaitépa ovyʼáta pe “aty guasu” oikove jey vove umi ohayhuetéva omanovaʼekue. Jaleemína umi téysto omombeʼúva oñemoingove jey hague mokõi tapichápe. Upéva ñanepytyvõta ñantende porãve hag̃ua ko promésa iporãitéva (elee Marcos 5:38-42 ha Lucas 7:11-17).

15. ¿Mbaʼéichapa reñeñandúta oikove jey vove umi rehayhúva omanovaʼekue?

¹⁵ Ñapensamína koʼã mbaʼe oĩvare pe téysto jaleevaʼekuépe: “ovyʼaiterei ha ni noimoʼãi pe ohecháva”, ha “ombotuicha [hikuái] Ñandejárape”. Ñaimérire upérõ katuete opokovaʼerãmoʼã ñanderehe umi mbaʼe oikóva. Upéicha avei, ág̃a oñemoingove jey vove umi jahayhúva omanovaʼekuépe, javyʼaitereíta. Jesús heʼi: “Og̃uahẽta pe óra opavave umi oĩva pe sepultúrape ohendutaha iñeʼẽ ha osẽta” (Juan 5:28, 29, NM). Pe ñemoingove jey ningo ndajahechái koʼág̃a, oĩgui “umi mbaʼe ikatuʼỹva jahecha” apytépe, péro jaikuaa porã upéva oikotaha katuete.

16. a) ¿Mbaʼérepa ñañeʼẽvaʼerã ‘umi mbaʼe ikatuʼỹvare jahecha’? b) ¿Mbaʼéichapa Pablo omokyreʼỹvaʼekue umi ermáno Corintoyguápe?

¹⁶ Ñaneñeʼẽrendúramo Ñandejárape koʼã tiémpo ijetuʼuetévape jahupytýta hetaiterei mbaʼe porã. Koʼág̃a ningo ndajahechái gueteri umi vendisión ijojahaʼỹva, péro ñapensa meméramo hese ikatúta jajesareko  umi mbaʼe iñimportantevévare ha ndajaikomoʼãi ko múndo oikuaveʼẽva rapykuéri (Luc. 21:34; 1 Tim. 6:17-19). Upéicharõ, ñañeʼẽ memékena ko esperánsa porãitére jastudia ha ñamombaʼeguasu jave Jehovápe ñane família ndive, ñañemongeta jave ñane ermanokuéra ndive, japredika ha ñamboʼe jave ñande rapichápe Ñandejára Ñeʼẽ. Upéicha ko promésa opokovéta ñane korasõre. Apóstol Pablo heʼivaʼekue oipytyvõ umi ermánope opensa hag̃ua mbaʼépa ojehupytýta Cristo goviérno rupive ipukútava mil áño, ha upéva omokyreʼỹeterei chupekuéra. Ejepyʼamongetamína umi mbaʼe hypyʼũetévare ohaivaʼekue 1 Corintios 15:24, 25, 28-pe (elee).

17, 18. a) ¿Mbaʼérepa ikatu jaʼe Jehová ‘añoite omoakã hague opa mbaʼe’ iñepyrũmbýpe? b) ¿Mbaʼépa ojapóta Jesús ikatu hag̃uáicha ojeiko jey pyʼaguapýpe ha peteĩ ñeʼẽme?

¹⁷ Pablo ohechauka mbaʼéichapa oñemohuʼãta Cristo goviérno, heʼívo “Ñandejára añoite omoakãta opa mbaʼe”. ¿Mbaʼépa heʼise upéva? Adán ha Eva opeka mboyve haʼevaʼekue Jehová família ha opavavénte oiko pyʼaguapýpe ha peteĩ ñeʼẽme. Jehová voi ogovernavaʼekue opa mbaʼe ojapovaʼekue, tahaʼe ánhel térã yvypóra. Haʼekuéra ikatu omombaʼeguasu chupe ha oñeʼẽ hendivete voi, ha Jehová ovendesi chupekuéra. Pe Mburuvicha Tuichavéva añoite ‘omoakãvaʼekue opa mbaʼe’.

¹⁸ Péro upéi yvypóra ou ojapo Satanás oipotáva: opuʼã Jehováre ha ndorrespetái pe derécho orekóva ogoverna hag̃ua. Upéicharõ jepe, áño 1914 guive Jesús oñepyrũ ogoverna ikatu hag̃uáicha ojeiko jey pyʼaguapýpe ha peteĩ ñeʼẽme (Efes. 1:9, 10). Ha ogoverna vove mil áñore, oñekumplíta “umi mbaʼe [porãita] ikatuʼỹva jahecha” gueteri. Upéi “ipahaitépe”, térã oñemohuʼã vove Jesucristo goviérno ipukútava mil áño, haʼe “omeʼẽta pe Rréino Itúva Ñandejárape”. Jesús poguýpe ningo oñemoĩ “opa mbaʼe oĩva yvágape ha yvy ape ári”. Upéicharamo jepe haʼe hekomirĩ ha arakaʼeve ndoipeʼamoʼãi Itúvagui igoviérno. Oiporúta pe autorida ha ipriviléhio tuichaite “omombaʼeguasu hag̃ua Ñandejárape” (Mat. 28:18, NM; Filip. 2:9-11).

19, 20. a) ¿Mbaʼéichapa yvyporakuéra ohechaukáta oñemoĩha Jehová poguýpe? b) ¿Mbaʼépa ñaneraʼarõ?

¹⁹ Upe tiémpope g̃uarã opavave yvypóra ohupytýtama perfeksión, hekomirĩta ha vyʼapópe oñemoĩta Jehová poguýpe, Jesús ojapoháicha. Avei ohasavaʼerã pe última pruéva ohechauka hag̃ua oipotaha Jehová oisãmbyhy chupekuéra (Rev. 20:7-10). Upe rire, enterove opuʼãva Ñandejárare oñehundipaitéta, tahaʼe umi ánhel térã yvyporakuéra. ¡Ajépa javyʼaitéta oiko rire upéva! Opavavénte vyʼapópe omombaʼeguasúta Jehovápe. Ha upe tiémpope “Ñandejára añoite omoakãta opa mbaʼe” (elee Salmo 99:1-3).

²⁰ ¿Mbaʼépa rejapóta rehesaʼỹijo rire koʼã promésa porãite Ñandejára Rréino okumpli potaitémava? ¿Rejesareko porãtapa ha reñemeʼẽmbaitéta rejapo hag̃ua Jehová rembipota? ¿Remboykétapa ko múndo oprometéva ha ndereikomoʼãi umi komodida rapykuéri? ¿Reñemoĩtapa Jehová poguýpe ha rerrespetáta upe derécho haʼe orekóva ñanesãmbyhy hag̃ua? Ehechaukákena ne rembiapóre rejaposeha upéva reikove aja pukukue. Upéicha ikatúta revyʼa ha reiko pyʼaguapýpe mil áñore, ha upe rire opa árare.