1. ¿Mbaʼépa opensa heta hénte umi tetã ambueguáre, ha mbaʼérepa jaʼekuaa tuicha ojavyha hikuái?

 JAHECHA haguéicha pe artíkulo ohasavaʼekuépe, heta oĩ opensa vaíva térã ndaijaʼéiva umi tetã ambueguáre. Péro umi oimoʼãva iñimportanteveha umi extranhérogui, ohechauka ndopororrespetaiha ha hiʼarive itavyha. Peteĩ lívro heʼi: “La Biblia heʼiháicha, opaichagua rrása oñoermáno” (The Races of Mankind). Umi oñoermánova sapyʼánte ndojojoguaiete, upéicharõ jepe ndaikatúi onega oñoermanoha.

2, 3. ¿Mbaʼéichapa Jehová ohecha umi tapicha ndoikóivape hetãme?

² Tahaʼe haʼéva ñane retã, oĩnte voi extranhéro ñande apytépe. Upéicha vaʼekue avei Israélpe. Pe tetã ningo orekovaʼekue peteĩ kompromíso Jehovándi pe Léi rupive. Upe Léi omanda mbaʼéichapa ojetratavaʼerã umi tetã ambueguápe. Heʼi mbaʼe mbaʼépa ojapovaʼerã hikuái, péro avei heʼi umi isrraelíta omombaʼe ha otratavaʼerãha chupekuéra tekojojápe. Péicha avei, ñande kristiáno ndovaléi ñamboyke avavépe, síno japorotratavaʼerã peteĩchapa. Apóstol Pedro heʼi “Ñandejára otrataha enterovépe peteĩchante, haʼe oguerohory entéro umi hembiapo porãva ha okyhyjéva chugui, tahaʼe haʼéva tetãygua” (Hech. 10:34, 35, NM).

³ Umi extranhéro ikatuvaʼekue oiko isrraelíta apytépe ha oñevenefisia heta mbaʼégui. Upéva ohechauka mbaʼéichapa Jehová ohecha umi tapicha ndoikóivape hetã teépe. Tiémpo rire apóstol Pablo heʼi: “¿Ñandejára piko ojapo umi hudíopente? ¿Ndojapói piko avei umi tetã ambueguápe? Si, ojapo avei umi tetã ambueguápe” (Rom. 3:29, NM; Joel 2:32).

4. ¿Mbaʼérepa ikatu jaʼe pe ‘Israel Ñandejára mbaʼévape’ ndaiporiha extranhéro?

 ⁴ Pe kompromíso pyahu rupive Jehová omboyke tetã Israélpe ha omoñepyrũ peteĩ tetã pyahu oĩháme umi kristiáno unhído, oñehenóiva “Israel Ñandejára mbaʼéva” (Gál. 6:16, NM). Apóstol Pablo omyesakã ko tetã pyahúpe ndaiporiha “griégo, hudío, oñesirkunsidáva, noñesirkunsidáiva, tetã ambuegua, escita, tembiguái, ni orekóva liverta, síno Cristo haʼe opa mbaʼe ha oĩ opa mbaʼépe” (Col. 3:11, NM). Upévare ikatu jaʼe unhidokuéra apytépe ndaiporiha extranhéro.

5, 6. a) ¿Mbaʼépa ikatu ñañeporandu pe profesía oĩvare Isaías 61:5 ha 6-pe? b) ¿Mávapa hína ‘Jehová saserdotekuéra’ ha umi “tetã ambueguakuéra”? c) ¿Mbaʼe tembiapópa ojapo ‘Jehová saserdotekuéra’ ha umi “tetã ambueguakuéra”?

⁵ Jahechamína koʼág̃a mbaʼéichapa pe profesía oĩva Isaías kapítulo 61-pe oñekumpli kristianokuérare. ¿Mbaʼérepa umi versíkulo 5 ha 6 heʼi oĩtaha “tetã ambueguakuéra” ombaʼapóva ‘Jehová saserdotekuéra’ ndive?

⁶ Umi saserdóte oñeñeʼẽha Isaíaspe haʼe hína unhidokuéra. Haʼekuéra ‘tenondete oikove jey’ ha “oikóta chuguikuéra Ñandejára ha Cristo saserdóte, ha ogovernáta hendive mil áñore” (Rev. 20:6, NM). Péro oĩ avei heta kristiáno iñeʼẽrendúva ndoikomoʼãiva yvágape, síno oikóta opa ára g̃uarã ko yvy ape ári. Koʼãva hína umi “tetã ambueguakuéra” oipytyvõ meméva umi ohótavape yvágape. Haʼekuéra ombaʼapo kyreʼỹ ‘Jehová saserdotekuérape’ g̃uarã ‘oñangareko hag̃ua ‘ikokue ha iparraltýre’. Avei oipytyvõ chupekuéra opredika ha omboʼe hag̃ua pe añetegua, ikatu hag̃uáicha hetave tapicha omombaʼeguasu Jehovápe. Upéicharõ, umi unhído ha “ambue ovechakuéra” mborayhúpe oheka umi tapicha ipyʼaporãvape oserviséva Ñandejárape opa árare ha oñangareko hesekuéra (Juan 10:16, NM).

7. ¿Mbaʼépepa jajogua Ñandejára rembiguaikuéra yma guarépe?

⁷ Jahecháma haguéicha pe artíkulo  ohasavaʼekuépe, ñande kristiáno jaiko extranhéroicha ko múndo oĩvape Satanás poguýpe. Jajogua Jehová rembiguaikuéra yma guarépe, pór ehémplo Abrahánpe. Haʼe ningo oikovaʼekue “tetã ambuegua ha arrivéñoicha” (Heb. 11:13, NM). Koʼág̃a avei, enterovéva ikatu ñañemoag̃ui Jehováre Abrahán ojapo haguéicha, jaikótaramo jepe yvágape térã ko yvy ape ári. Santiago heʼivaʼekue: “Abrahán ojerovia Jehováre ha upévare ojeʼe hese hekojojaha, ha upéicha rupi ojeʼe hese haʼeha ‘Jehová amígo’” (Sant. 2:23, NM).

8. ¿Mbaʼépa opromete Jehová, ha mbaʼépa oikuaa porã Abrahán?

⁸ Ñandejára opromete opavave yvypóra, ndahaʼéi peteĩ tetã añónte, oñevendesitaha Abrahán ha iñemoñarekuéra rupive (elee Génesis 22:15-18). Ofaltáramo jepe heta tiémpo gueteri oñekumpli hag̃ua upe promésa, Abrahán oikuaa porã vaʼekue oñekumplitaha katuete. Haʼe cien áñore ova ha ova ifamília ndive, ha upe tiémpope akóinte ohechauka oĩha Jehová ndive.

9, 10. a) ¿Mbaʼépa ñanemboʼe Abrahán ehémplo? b) ¿Mbaʼe invitasiónpa ikatu ñameʼẽ enterovéva?

⁹ Abrahán ningo ndoikuaáikuri mboy tiémpopa ohaʼarõvaʼerã, upéicharamo jepe ohayhu Ñandejárape ha ojerovia hese ipyʼaite guive. Haʼe ojesareko meme pe promésa rehe, ha nopensái iporãveha opytánte peteĩ tetãme ojestavlese hag̃ua upépe (Heb. 11:14, 15). ¿Mbaʼépa ñanemboʼe iñehémplo? Ohechauka ñandéve ndovaleiha jajepyʼapy umi mbaʼerepýre, ñañemoimportantese térã ñañehaʼã jahupyty umi mbaʼe tuicháva ko múndope. Upéva rangue ñañekontentavaʼerã jarekomívarente. Naikuentaiete ñañehaʼã jaiko porã ko múndo oñehundívape ohóvo, ha reiete ñañemohatãta peteĩ mbaʼe opa reítavare. Ñande avei ñahaʼarõ peteĩ mbaʼe iporãitevéva ha jahechauka ñanepasiensiaha oñekumpli peve Ñandejára promésa (elee Romanos 8:25).

¹⁰ Koʼág̃a peve Ñandejára oinvita opavave tapicha oparupiguápe oñehaʼã hag̃ua ohupyty umi vendisión oñemeʼẽva Abrahán ñemoñare rupive. Ha ‘Jehová saserdotekuéra’ térã umi unhído, ha umi ‘tetã ambuegua’ térã ambue ovechakuéra omeʼẽ pe invitasión ko Yvy tuichakuére 600 idióma rasápe.

11. ¿Mbaʼéichapa Jehová ohecha umi extranhérope, ohechaukaháicha Salomón ñemboʼe?

¹¹ Oñeinaugurárõ guare pe témplo áño 1026-pe, Jesús ou mboyve, Salomón ojapo peteĩ ñemboʼe ohechaukáva umi hénte opa tetãygua oñembyatytaha omombaʼeguasu hag̃ua Jehovápe. Péicha umi extranhéro oñevenefisiáta pe promésa Jehová ojapovaʼekuégui Abrahánpe. Salomón heʼi iñemboʼépe: “Peteĩ ndahaʼéiva ne retãygua oúrõ mombyrýgui nderehehápe, ha oñemboʼéramo ko [témplo] gotyo (ohendu haguére ndetuicha ha ndepokatuha), ehendu yvága reikohágui, ha emeʼẽ chupe opa ojeruréva, ikatu hag̃ua opa tetãnguéra ndekuaa ha nemomorã ojapoháicha ne retã Israel” (1 Rey. 8:41-43).

12. ¿Mbaʼérepa oĩ heta hénte opensáva testígo de Jehovápe nointeresaiha umi mbaʼe oikóva hetãme?

¹² Pe palávra “extranhéro” ojeporu oñeñeʼẽ jave peteĩ tapicha ndoikóivare hetãme. Upévare ikatu jaʼe entéro testígo  de Jehová oikoha tetã ambueguáicha oimeraẽ tetãme. Haʼekuéra opromete oñemoĩtaha Ñandejára Rréino poguýpe, oĩva Jesucristo kárgope. Upéicha rupi noñentremetéi polítikape, oĩramo jepe opensáva nointeresaiha chupekuéra umi mbaʼe oikóva hetãme.

13. a) ¿Mbaʼérepa heta tapicha opensa umi extranhéro idiferenteha chuguikuéra? b) ¿Mbaʼérepa jaʼekuaa iñepyrũ guive Jehová ndoipotái hague oĩ extranhéro?

¹³ Sapyʼánte ikatu jahechakuaa peteĩ tapicha extranheroha oñeʼẽ ha oñemonde lájare, ikostúmbre térã ipire kolór rehe. Péro jajesarekoitereíramo koʼã mbaʼére, ñapensáta umi extranhéro ideferenteha ñandehegui. Añetehápe, tahaʼe haʼéva ñane retã, enterove yvypóra jajojogua heta mbaʼépe. Upévare ndovaléi jajesarekoiterei umi diferénsiare, upéicha jahechakuaáta peteĩchanteha enterovéva. Amo ipahápe ningo opavave yvypóra ñaiméramo peteĩ goviérno poguýpe, ndaiporimoʼãi extranhéro. Ha iñepyrũmby guive, Jehová oipotavaʼekue voi yvyporakuéra oiko oñondivepa peteĩ famíliaicha Igoviérno poguýpe. Péro, ¿ikatúnepa ojehupyty upéva ñane tiémpope?

14, 15. ¿Mbaʼépa ojehupyty testígo de Jehová apytépe?

¹⁴ Ko múndope henyhẽ umi oñembotuicháva ha hetãrayhúva, upévare ojeguerohory umi hénte ndodespresiáiva hapichápe ndahaʼéi haguére hetãygua. Péro sapyʼánte hasy ñapensa hag̃ua upéicha. Pe karai omoñepyrũvaʼekue pe kanál de televisión CNN, hérava Ted Turner, ombaʼapo umi tapicha ikatupyrývandi oúva heta tetãgui. Haʼe omombeʼu: “Ambaʼapo rire koʼã héntendi napensavéima haʼekuéra extranheroha, síno ahecha chupekuéra peteĩchapánte. Hiʼarive apensa pe ñeʼẽ extranhéro oporoapoʼiha, upévare aproivi ojeporu pe kanálpe, tahaʼe umi prográma jave térã upe rire jepe. Upéva rangue ojeporuvaʼerã pe ñeʼẽ internasionál”.

¹⁵ Ko múndope, testígo de Jehová añoite opensa Jehová opensaháicha ha nomboykéi avavépe ndahaʼéi haguére hetãygua. Haʼekuéra otrata porã umi tetã ambueguápe ha nopensavaíri hesekuéra, síno oguerohory ha omombaʼe enterovévape. ¿Jahechakuaápa mbaʼeichaitépa iñimportánte ojehupytýva testígo de Jehová apytépe ha mbaʼéichapa ñanepytyvõ jajogueraha porã hag̃ua opavavéndi?

16, 17. ¿Mbaʼéichapa jaikóta ág̃a oñekumpli vove Revelación 16:16 ha Daniel 2:44?

¹⁶ Koʼẽrõite, umi goviérno ko mundopegua oñorairõta Ñandejára goviérno ndive, omoakãtava Jesucristo ha omoirũta chupe ijehérsito yvagapegua. Upéva oikóta pe gérra “héravape evréo ñeʼẽme Armagedón” (Rev. 16:14, 16, NM; Rev. 19:11-16). Ojapo 2.500 áño rasa proféta Daniel heʼi hague oñehunditaha entéro goviérno oñemoĩva Ñandejára rembipotáre: “Oisãmbyhy aja koʼã mburuvicha, Ñandejára yvagapegua omoĩta peteĩ goviérno noñehundimoʼãiva arakaʼeve. Ndoʼamoʼãi avaveichagua tetã poguýpe. Ohundietéta uvei ambue goviernokuéra ha ndopamoʼãi arakaʼeve” (Dan. 2:44, NM).

¹⁷ ¿Ndépa repensáma mbaʼéichapa reikóta ág̃a oñekumpli vove ko promésa? Umi frontéra yvyporakuérante omoĩvaʼekue opa reíta ha ndaiporimoʼãvéima extranhéro. Umi mbaʼe ñanemodiferénteva ojuehegui, pór ehémplo ñande pire kolór térã ambue mbaʼe, ohechaukáta Ñandejára ñanembojopara porãnte hague. ¡Ajépa javyʼaitéta upe tiémpope! Ñañehaʼãmbaitékena ñamombaʼeguasu ha ñambotuicha ñande Apohare Jehovápe.

18. ¿Mbaʼérepa ikatu jaʼe testígo de Jehovápe ndojokoiha umi frontéra?

¹⁸ ¿Ikatúpa jajerovia ko promésare? Oĩ heta mbaʼe ohechaukáva oñekumplitaha. Ñandéve g̃uarã naiñimportántei mbaʼe tetãyguápa ñane ermanokuéra. Pór ehémplo, pe Kuérpo Governánte odesidi ouni heta sukursál michĩvéva ótra sukursál ndive, ikatu hag̃uáicha upe guive ojedirihi porãve heta tembiapo ha avei oñemog̃uahẽ porãve hag̃ua pe marandu porã heta hendárupi (Mat. 24:14). Añetehápe, ojekuaa Testigokuéra ombaʼapoha peteĩ ñeʼẽme, tahaʼe haʼéva hetã. Avei ojekuaa umi frontéra ndojokoiha chupekuéra upearã, umi léi opermitíma guive. Upéva ohechauka Jesucristo, pe Rréi Jehová omoĩvaʼekue, osẽmaha oipeʼa hag̃ua umi mbaʼe oseparáva yvyporakuérape ha koʼẽrõitéma ‘omohuʼãtaha iñorairõ’ (Rev. 6:2, NM).

19. ¿Mbaʼépa ojehupyty oñeñeʼẽ haguére pe ñeʼẽ ipotĩva oĩva la Bíbliape?

¹⁹ Ñande testígo de Jehová ñaime hetaiterei tetãme ha ñañeʼẽ diferénte idiómape, péro opavavénte ñañehaʼã ñaaprende pe ñeʼẽ ipotĩva oĩva la Bíbliape, ha péicha jaiko peteĩ ñeʼẽme (elee Sofonías 3:9). Jaikóramo jepe ko múndo añáme, ndajajeheʼái umi hembiapo vaívare. Koʼág̃ama voi jajoayhu oñoermánoicha, ha upéva ohechauka mbaʼéichapa jaikóta pe múndo pyahúpe, ndaiporimoʼãihápe extranhéro. Upépe enterove yvypóra ohechakuaáta añeteha heʼíva pe lívro ñañeʼẽ hague iñepyrũme: “La Biblia heʼiháicha, opaichagua rrása oñoermáno” (The Races of Mankind).