1, 2. ¿Mávapa hína umi “ojeporavovaʼekue” heʼi haguéicha Pedro, ha mbaʼérepa heʼi oikoha hikuái “arrivéñoicha”?

 TREINTA áño rupi Jesús oho jey rire yvágape, apóstol Pedro ohai peteĩ kuatiañeʼẽ “umi ojeporavovaʼekuépe, oikóva arrivéñoicha ha isarambíva Ponto, Galacia, Capadocia, Asia, ha Bitíniarupi” (1 Ped. 1:1, NM). Jaikuaa ningo koʼã kristiáno ‘ojeporavo’ hague espíritu sánto rupive Pédrope ojeporavo haguéicha avei, ha haʼekuéra ‘onase jey oguereko hag̃ua peteĩ esperánsa oikovéva’. Upéva heʼise ikatutaha ogoverna hikuái Jesucristo ndive yvágape (elee 1 Pedro 1:3, 4). ¿Mbaʼérepa Pedro heʼi hesekuéra oikoha “arrivéñoicha ha tetã ambueguáicha ko múndope”? (1 Ped. 2:11.) ¿Mbaʼérepa ñaneinteresavaʼerã upéva oĩramo jepe saʼive testígo de Jehová ojeporavovaʼekue oho hag̃ua yvágape?

² Añetehápe, Pedro ndojavýi heʼívo umi unhído síglo primérope guare oikoha “arrivéñoicha”. Haʼe oikuaa porã kuri haʼekuéra noĩmoʼãiha opa árare ko yvy ape ári. Upéicha avei umi unhído koʼag̃agua oiko “arrivéñoicha”. Apóstol Pablo, oĩvaʼekue avei “ovechakuéra mbovymi” apytépe, peteĩ jey omyesakã: “Ñande katu ñane retã hína yvága, ha ñahaʼarõitereíma peteĩ Salvadór: ñande Ruvicha Jesucristo oĩva yvágape” (Luc. 12:32, NM; Filip. 3:20, NM). Umi unhído ningo siudadáno ‘yvagapegua’ ha upévare omano vove oheja ko yvy ha oñemeʼẽ chupekuéra tekove opaʼỹva yvágape (elee Filipenses 1:21-23). Upéicharõ, ikatu jaʼe umi unhído oikoha “arrivéñoicha” ko múndo oĩvape Satanás poguýpe.

3. ¿Mbaʼépa ojeʼe avei “ambue ovechakuéra” rehe?

 ³ ¿Mbaʼépa ikatu jaʼe “ambue ovechakuéra” rehe? (Juan 10:16, NM.) Haʼekuéra ndoikomoʼãi ko yvy ape ári sapyʼamínte, síno heʼiháicha Ñandejára Ñeʼẽ, ikatúta oiko opa ára g̃uarã. Upéicharõ jepe, jaʼekuaa haʼekuéra oikoha avei arrivéñoicha. Jahechamína mbaʼérepa.

4. ¿Mbaʼépa ndaikatumoʼãi ojapo heta tapicha oñehaʼãramo jepe?

⁴ Ñaime aja ko múndo añáme, opavave yvypóra, ha ñande kristiáno jepe jahasáta heta mbaʼe ijetuʼúva Satanás opuʼã haguére Jehováre. Apóstol Pablo heʼivaʼekue: “Jaikuaa entéro yvypóra koʼag̃aite peve ipyahẽ ha ohasa asyha oñondivepa” (Rom. 8:22, NM). Oĩramo jepe oiporúva polítika, siénsia ha pláta osolusiona hag̃ua yvyporakuéra provléma, ndaikatumoʼãi oipeʼa hikuái ko yvy ape árigui umi jehasa asy.

5. ¿Mbaʼépa ojapo heta tapicha áño 1914 guive, ha mbaʼérepa?

⁵ Hetaiterei tapicha ohechakuaa yvyporakuéra nosolusionamoʼãiha umi provléma oĩva. Upévare, áño 1914 guive, oñemoĩma hikuái Jesucristo poguýpe, pe Rréi Jehová oiporavovaʼekue. Haʼekuéra ni mbaʼevéicharõ ndojeheʼái ko múndore oĩva Satanás poguýpe. Upéva rangue oiporu opa mbaʼe orekóva, imbaretekue ha hekove jepe Ñandejára Rréino rehehápe (Rom. 14:7, 8).

6. ¿Mbaʼérepa ikatu jaʼe entéro Testígo jaikoha “arrivéñoicha” ko múndope?

⁶ Opavave testígo de Jehová oĩva ko yvy tuichakuére, amo 200 tetã rupi, okumpli umi mbaʼe ojejeruréva káda siudadánogui. Péro toiko oikohápe, ikatu jaʼe enterovéva haʼeha avei ‘arrivéño’ téra extranhéro. Haʼekuéra ndoikéi mbaʼeveichagua polítikape ni umi provléma orekóvape umi tetã. Upéva rangue ohechauka hikuái oikomaha Ñandejára Rréino poguýpe, ha ovyʼa oikuaávo  ndoikoaremoʼãiha ko múndo aña koʼẽrõite oñehundítavape.

7. ¿Moõpa oikóta opa ára g̃uarã Ñandejára rembiguaikuéra, ha arakaʼépa?

⁷ Koʼẽrõitéma Jesucristo oiporúta ijautorida ohundi hag̃ua ko múndo aña oĩva Satanás poguýpe, ha oipeʼáta pekádo ha opaichagua jehasa asy ko yvy ape árigui. Hiʼarive ojukapaitéta umi ánhel ha yvyporakuéra ndorrespetáiva pe derécho Ñandejára oguerekóva oporosãmbyhy hag̃ua. Upe rire, Jehová rembiguaikuéra iñeʼẽrendúva ikatútama oiko opa ára g̃uarã peteĩ hardín iporãitereívape ko yvy ape ári (elee Revelación 21:1-5). Entéro yvypóra ‘ojeíta ñehundi poguýgui ha ohupytýta Ñandejára raʼykuéra liverta ijojahaʼỹva’ (Rom. 8:21, NM).

8, 9. ¿Mbaʼe rehépa oñeʼẽ Pedro heʼívo “ani [...] peñemeʼẽ pende rete rembipotápe”?

⁸ Apóstol Pedro omyesakãvaʼekue mbaʼépa ojapovaʼerã opavave kristiáno: “Ajerure jey jey peẽme ani hag̃ua peñemeʼẽ pende rete rembipotápe, oñorairõva hína pene kóntrape” (1 Ped. 2:11, NM). Upérõ haʼe oñemoñeʼẽ umi ermáno unhídope, péro ko konsého ideprovécho avei ambue ovechakuérape.

⁹ Ndaivaíri ningo jajapo umi mbaʼe ñandegustáva, jarrespetáma guive Ñandejára heʼíva. Ha heta vése jajapo jave umíva, ñañeñandu porãiterei. Pór ehémplo, entéro javyʼa jaʼúramo umi tembiʼu héva, jajapo umi mbaʼe ñanembopyʼarorýva ha jajediverti ñane amigokuéra ndive. Ha ndaivaíri umi omendáva oĩramo oñondive (1 Cor. 7:3-5). Péro oñeʼẽvo ñande “rete rembipota” rehe, Pedro imanduʼa umi mbaʼe oĩvare ñande pyʼapýpe ha ohaʼãva “ñane kóntrape”. Upévare oĩ Biblia oiporúva umi ñeʼẽ: ‘tembipota vai’ ha ‘mbaʼepota vai’ (ÑÑB; JMP). Upéicharõ, ikatu jaʼe enterove kristiáno tekotevẽha ojejokokuaa ani hag̃ua ojapo mbaʼevete oñemoĩva Jehová rembipotáre ha ikatúva oheja vai chupekuéra henondépe. Jaikóramo ñane rembipota vai rapykuéri ndaikatumoʼãi jahupyty pe jeikove opaʼỹva.

10. ¿Mbaʼeichagua ñuhãpa oiporu Satanás ikatu hag̃uáicha jaiko ko múndope ojeikoháicha?

¹⁰ Satanás oiporu heta ñuhã ndoipotáigui jaiko “arrivéñoicha”, pór ehémplo, oipota jaiko mbaʼerepy rapykuéri, ñapensa ñandejehénte, ñañemoimportánte, ñanderekovai ha ñamombaʼeguasu ñane retã. Haʼe oipota ñaimoʼã koʼã mbaʼe iporãitereiha, péro ani ñanderesarái oiporuha koʼã ñuhã ñandereity hag̃uánte. Ñañehaʼãmbaitéramo ñamboyke koʼã mbaʼe vaieta, jahechaukáta ndajaikoseiha Satanás múndope ha ñaimeha pype sapyʼamínte. Añetehápe ningo ñaimeseterei Ñandejára múndo pyahúpe, ha jaikose pype opa árare.

11, 12. ¿Mbaʼépa pyʼỹinte ojeʼe umi tetã ambueguáre, ha mbaʼépa ikatu jaʼe testígo de Jehováre?

¹¹ Versíkulo 12-pe, Pedro omyesakã jey mbaʼépa oñehaʼarõ entéro kristiánogui oikóva “arrivéñoicha ha tetã ambueguáicha”. Haʼe heʼi: “Akóinte penderekoporãvaʼerã umi hénte ko mundopegua apytépe, péicha haʼekuéra heʼi jave peẽ haʼeha mbaʼe vai apoha, ohecháta umi mbaʼe porã pejapóva ha upe haguére ombotuicháta hikuái Ñandejárape ág̃a haʼe ou vove ohecha yvyporakuéra ojapóva”. Heta tetãme ojetaky jepi umi extranhérore ha ojereko chupekuéra  ‘mbaʼe vai apoháramo’. Oĩ oñeʼẽ vaíva hesekuéra ipire kolór, iñidióma, ikostúmbre ha oñemonde diferénte haguére. Péro oiko lájare, pyʼỹinte ohechauka hikuái ndahaʼeiha hénte aña.

¹² Péicha avei umi kristiáno tee ikatu idiferénte heta mbaʼépe ivesinokuéragui. Pór ehémplo, oñeʼẽ ha oñemonde lájape ha avei oiporavo jave umi vyʼarã. Upéicha rupi heta tapicha openáva umi ñeʼẽnguére oñeʼẽ vai hesekuéra. Péro oĩ avei heta oguerohorýva kristianokuérape.

13, 14. ¿Mbaʼérepa ikatu jaʼe ‘jajapóvare ojekuaaha ñanearanduha’? Eiporu umi ehémplo.

¹³ Ñanerembiapo porãramo, umi hénte ikatúta ohechakuaa japuha umi mbaʼe vai ojeʼéva ñanderehe. Ñanemanduʼavaʼerã Jesús rehe oñeñeʼẽ vai hague avei, hiʼarive haʼe arakaʼeve ndojavýi ni ndopekáiva. Ojeʼe hese: “¡Pévango ikaʼu ha okaruhárente voi oiko, ojeheʼa umi impuésto kovraháre ha umi mbaʼe vai apoháre!”. Péro Jesús ningo nahembiapovaíri, upéva rangue iñarandu ha iñeʼẽrendu Ñandejárape. Haʼe voi heʼivaʼekue: “Jajapóvare ojekuaa ñanearandúpa” (Mat. 11:19, NM). Ha upéichante avei koʼág̃a rupi. Pór ehémplo, táva Sélterspe (Alemania), heta hénte oiko ag̃uíva Betélgui noñeʼẽporãi umi ombaʼapóvare upépe. Péro pe intendénte heʼi: “Umi Testígo upepegua idiferénte ñandehegui, upéicharõ jepe arakaʼeve ndostorvái avavépe”.

¹⁴ Péicha avei oiko Moscúpe (Rusia) oñeñeʼẽ reírõ guare umi testígo de Jehová rehe. Ñane ermanokuéra oñepresenta Tribunal Europeo de Derechos Humánospe, oĩva Estrasbúrgope (Francia), ha junio 2010-pe ojekuaáma mbaʼépa odesidi umi hués. Haʼekuéra heʼi: “Ko Tribunal ohechakuaa noĩporãiha ojejapóva Moscúpe. Ojeʼe testígo de Jehová ombyaiha família, [...] oporomokyreʼỹha ojesuisida hag̃ua, térã ndosegiseiha umi tratamiénto médiko [...]. Péro opavave tapicha oreko derécho osegi hag̃ua pe rrelihión osegiséva ha avei oñembyaty hag̃ua. Umi pruéva oñemoĩva Testigokuéra Moscugua kóntrape ‘saʼieterei ha ndovaléi’ ojekulpa hag̃ua chupekuéra. Umi mbaʼe odesidíva umi trivunál upe tetãmegua ohechauka ojopyeterei ha iñinhustoha hendivekuéra”.

15. ¿Mbaʼe konséhopa jasegi opavave kristiáno tee?

¹⁵ Opavave testígo de Jehová oĩva Moscúpe ha ko yvy tuichakuére okumpli ko konsého omeʼẽvaʼekue apóstol Pedro: “Ñande Ruvicha rehehápe, peñemoĩkena entéro umi autorida yvyporakuéra omoĩva poguýpe: tahaʼe peteĩ rréi poguýpe, tuichave haguére pendehegui,  térã mburuvichakuéra poguýpe” (1 Ped. 2:13, 14, NM). Ñande ndajajeheʼáiramo jepe ko múndore, jarrespeta umi autoridápe jaikuaágui umíva ‘oĩha Ñandejára omoĩ rupínte’ (elee Romanos 13:1, 5-7).

16, 17. a) ¿Mbaʼérepa jaʼekuaa ñande testígo de Jehová nañañemoĩriha umi goviérnore? b) ¿Mbaʼépa ohechakuaa heta polítiko?

¹⁶ Ñande ningo jaiko “arrivéñoicha” ko múndope, péro upéva ndeʼiséi ñapuʼãha goviernokuérare térã ndajarrespetaiha umi hénte ogueroviáva. Haʼekuéra ikatu opensa mbaʼéichapa oñesolusionáta yvypóra provlemakuéra ha odesidi mbaʼeichagua goviérnopa oipota. Péro ñande nañañemoĩri haʼekuéra odesidívare. Ndajaikéi mbaʼeveichagua polítikape, ni ndajajopýi umi autoridápe ojapo hag̃ua ñande jaipotáva, ojapoháicha heta rrelihión. Arakaʼeve nañapuʼãi umi mburuvicháre ni nañamboligái avavépe ojapo hag̃ua upéva.

¹⁷ Ñaneñeʼẽrendúvo umi autoridápe jahechauka jarrespetaha chupekuéra, ha jasegi pe konsého Pedro omeʼẽvaʼekue: “Pemombaʼe pe rréipe” (1 Ped. 2:17, NM). Oĩ polítiko oñeʼẽ porãva Testigokuérare. Jahechamína mbaʼépa omombeʼu peteĩ polítiko alemán hérava Steffen Reiche. Haʼe ombaʼapovaʼekue goviérno Brandebúrgope ha upéi Parlamento alemánpe. Ko karai heʼi: “Umi kámpo de konsentrasión ha kárselpe, haʼekuéra ohechauka heta mbaʼe porã oñekotevẽ vaʼekue yma ha koʼág̃a avei, ikatu hag̃uáicha oho porã hese peteĩ goviérno demokrátiko. Umi Testígo nokambiaivaʼekue ogueroviáva, pe SS ojopýramo jepe chupekuéra ha avei ohechauka ohayhuha umi ótro prisionérope. Jaiko ningo peteĩ tiémpo oĩháme heta hetave ojahéiva umi extranhérore ha avei ojejahéi umi tapicha opensávare diferénte, upévare tekotevẽterei opavave ñane retãme ñahaʼanga umi Testígope”.

18. a) ¿Mbaʼérepa ñande testígo de Jehová ‘jahayhu enterove ermánope’? b) ¿Mbaʼépa ohecharamo heta hénte?

¹⁸ Apóstol Pedro heʼi: “Pehayhu enterove ermánope, akóinte pekyhyje Ñandejáragui” (1 Ped. 2:17, NM). Ñande Testígo ndajajaposéi mbaʼeve Jehovápe ndogustáiva, ha upéva ñanemomýi avei jajapo hag̃ua hembipota. Hiʼarive javyʼa ñaime haguére hetaiterei kristiáno jaservíva Ñandejárape peteĩ ñeʼẽme, ha ‘jahayhu enterove ermánope’. Ko múndope ningo umi hénte opensa ijehénte, péro ñande jajoayhueterei, ha upéva ojehecharamo opárupi. Pór ehémplo, peteĩ kuñakarai ombaʼapóva turísmope, ijurujái ohechávo mbaʼéichapa umi ermáno alemán oguerohoryeterei umi Testígo tetã ambueguápe oúva peteĩ asambléa internasionálpe ojejapóva Alemániape áño 2009-pe. Ko kuñakarai heʼi arakaʼeve ndohecháiva koʼã mbaʼe. Upe rire, peteĩ ermáno omombeʼu: “Oñeʼẽ lájare ojekuaa omombaʼetereiha pe ohecháva”. ¿Ndépa rehendúma péicha oñeñeʼẽ porãha Testigokuérare asambléa jave?

19. ¿Mbaʼépa jajedesidivaʼerã akóinte jajapo, ha mbaʼépa ñahaʼarõ?

¹⁹ Jahecha haguéicha, ñande testígo de Jehová jahechauka heta hendáicha jaikoha “arrivéñoicha” ko múndope oĩva Satanás poguýpe. Ha vyʼapópe jadesidi jasegi upéicha. Koʼẽrõitéma ningo jaikóta opa árare Ñandejára múndo pyahúpe. ¡Ajépa jaipotaitéma og̃uahẽ upe ára!