HETA tiémporema oipytyvõ kuña ha kuimbaʼe oparupiguápe umi informasión vívlika osẽva Ñemañaháme. Péro julio 2011 guive osẽ ingléspe pe Ñemañaha ndahasýiva oñentende. Oñeguenohẽkuri un áño aja ojehecha hag̃ua oipytyvõtapa ermanokuérape.

Rovyʼaiterei ikatu haguére romombeʼu peẽme rodesidiha rosegi roguenohẽ ingléspe pe Ñemañaha ndahasýiva oñentende, ha amo gotyove roguenohẽta avei español, francés ha portuguéspe.

Orresivi rire pe Ñemañaha ndahasýiva oñentende, heta testígo de Jehová oikóva Pacífico súrpe heʼi: “Koʼág̃a ermanokuéra ontende porãvéma umi mbaʼe heʼíva Ñemañaha”. Ambue kárta heʼi: “Pe tiémpo roiporuvaʼekue rontende hag̃ua mbaʼépa heʼise umi ñeʼẽ oĩva Ñemañaháme, koʼág̃a roiporu rohesaʼỹijo hag̃ua umi téysto vívliko ha rohechakuaa hag̃ua mbaʼéichapa ojogueraha pe témandi”.

Estados Unídospe, peteĩ ermána orekóva título universitário heʼi: “Dieciocho áño pukukue añeʼẽ ha askrivi hag̃ua aiporu umi ñeʼẽ ijestúdio yvatéva oiporúva, añeʼẽ ha amombeʼuse jave peteĩ mbaʼe avave nachentendéi, ahechakuaa tekotevẽha akambia”. Koʼág̃a ko maranduhára katupyrýpema oporomboʼe ha omombeʼu mbaʼéichapa oñeñandu: “Pe Ñemañaha ndahasýiva oñentende, tuicha chepytyvõ. Umi ñeʼẽ ojeporúva pype ohechauka porã mbaʼéichapa ojeʼevaʼerã peteĩ mbaʼe oñentende porã hag̃ua”.

 Peteĩ ermána Inglaterraygua ojevautisavaʼekue 1972-pe heʼi: “Aleérõ guare pe primer Ñemañaha ndahasýiva oñentende, haʼetévaicha voi Jehová mbaʼe che añuã ha oleéva chéve, peteĩ túva oleeháicha istória itajyraʼípe”.

Estados Unídospe, peteĩ vetelíta ojapómava 40 áño rasa ojevautisa hague omombeʼu pe Ñemañaha ndahasýiva oñentende oipytyvõ hague chupe oñepyrũ hag̃ua ontende porã heta mbaʼe la Biblia omboʼéva. Pór ehémplo, peteĩ rrekuádrope pe rrevísta 15 de septiembre de 2011 omyesakã porã mbaʼépa heʼise “hetaiterei testígo, haʼetéva peteĩ arai guasu” oĩva Hebreos 12:1-pe. Upépe ohechauka porã heʼiseha hetaiterei testígo ndaikatúiva ojepapa. Upe ermána heʼi: “Koʼág̃a antende porãve mbaʼépa heʼise ko versíkulo, ha kongregasiónpe katu peteĩ mitã jepe okomenta hag̃ua oleéramo pe Ñemañaha ndahasýivagui oñentende, enterove orekóva pe Ñemañaha osẽva jepi voi, oguerohoryeterei upe komentário”.

Ambue vetelíta katu heʼi: “Igustoiterei chéve ahendúvo umi mitãme okomenta rreunionhápe. Pe Ñemañaha ndahasýiva oñentende, oipytyvõ chupekuéra okomenta hag̃ua ipyʼaite guive, ha chemokyreʼỹeterei ahendúvo chupekuéra”.

Peteĩ ermána ojevautisavaʼekue 1984-pe oagradeseterei avei ha heʼi: “Haʼete voi chéve g̃uarãite ojeskrivivaʼekue. Antende porãiterei  ningo umi aleéva ha upévare ndakyhyjéi akomenta hag̃ua oñehesaʼỹijo jave pe Ñemañaha”.

Peteĩ sy orekóva mitã de siete áño heʼi: “Yma rojeprepara jave chemembýndi Ñemañaha Ñehesaʼỹijorã, chegueraha hetaiterei tiémpo amyesakã porã hag̃ua chupe umi mbaʼe heʼíva pype ha ore kaneʼõma rostudiapárõ g̃uarã”. ¿Mbaʼéichapa oipytyvõ chupe upe rire pe Ñemañaha ndahasýiva oñentende? Pe sy heʼi: “Avyʼaiterei ahechávo che membýpe olee umi párrafo ha ontendepaite. Haʼe oñeñandu porã ndahasýigui umi ñeʼẽ ha mbyky rupi umi fráse ojeporúva pype. Haʼete voi oprepara ikomentariorã ha oñatende porã oñehesaʼỹijo jave”.

Peteĩ ermána orekóva imembykuñaʼi de nueve áño heʼi: “Koʼág̃a natekotevẽvéima aipytyvõ chupe oprepara hag̃ua ikomentariorã. Sapyʼapyʼántema roiporu heta tiémpo romyesakã hag̃ua chupe peteĩ artíkulo. Pe Ñemañaha ndahasýiva oñentende ojejapo rupi mitã jepe ontende hag̃uáicha, ogustaiterei chupe oñehesaʼỹijo jave”.

Heta mitã heʼi ojejapoha chupekuéra g̃uarãite pe rrevísta Ñemañaha ndahasýiva oñentende. Rebecca, orekóva 12 áño omombeʼu: “Pesegíkena pejapo peichagua rrevísta. Chegustaiterei mbaʼéichapa umi ñeʼẽ oñemyesakã umi rrekuádrope. Ndahasyiete rupi, ore mitã jepe ikatu rontende”.

Nicolette, orekóva siete áño heʼi avei: “Pe Ñemañaha osẽva jepi voi hasyeterei vaʼekue chéve. Péro koʼág̃a ikatúma chejeheguíntema akomenta meme rreunionhápe”. Emma, orekóva nueve áño ohai: “Chéve ha che ermaníto de seis áñope orepytyvõ heta mbaʼe rontende porãve hag̃ua. ¡Grásiamante!”.

Jahechaháicha hetaitereípe oipytyvõhína pe rrevísta Ñemañaha ndahasýiva oñentende, oiporu rupi umi ñeʼẽ ha fráse ndahasýiva. Ojekuaa oñekotevẽtereíma hague upe rrevísta, upévare ojesegíta ojejapo pe ambue Ñemañaha ndive, ko rrevísta osẽva 1879 guive hetaitereípema avei oipytyvõ.