“¡NDAIPÓRI hesaraivaʼerã koʼã mbaʼégui!” Péicha heʼi heta tapicha ohecha rire pe “Drama de la Creación”. Upéva peteĩ pelíkula osẽvaʼekue itiempoitépe ha entéronte oguerohory opytávo. Hiʼarive oipytyvõ hetaiterei héntepe oikuaa hag̃ua Jehovápe, Hitler oñepyrũ mboyvemi opersegi mbarete Ñandejára siervokuérape oikóva Európape. Péro, ¿mbaʼépa pe “Drama de la Creación”?

Áño 1914-pe, Jehová puévlo, orekóva iséde sentrál Broóklynpe (Nueva York), onohẽ pe “Foto-Drama de la Creación”. Upéva peteĩ pelíkula orekóva músika, kolór ha oĩháme oñeʼẽva, ha ipuku ocho óra. Hetaiterei tapicha ko Yvy tuichakuére ohecha ko “Foto-Drama”. Upe áñope osẽ jey peichagua pelíkula, péro mbykyvéva, hérava “Drama Eureka”. Áño 1920 rupi, umi aparáto oñembohasaha pe pelíkula, umi fóto ha sínta oñepyrũma oñembyai, péro umi hénte ohechasejoa pe “Foto-Drama”. Pór ehémplo, táva Ludwigsburg, Alemániape, heta oporandu: “¿Arakaʼe piko pehechauka jeýta pe ‘Foto-Drama’?”. ¿Mbaʼépa ojejapo upémarõ?

Ojejeruretereímarõ pe “Foto-Drama”, Betel oĩva Magdeburgo, Alemániape, omondo irrepresentánte Paríspe, ojogua hag̃ua sínta ojeporúva ojegrava hag̃ua, peteĩ ahénsia de notísiagui. Avei oñemondo koʼã ermánope Leipzig ha Drésdepe, ikatu hag̃uáicha ojogua diapositíva umi gráfikagui. Upéi ojeporu pe sínta ha diapositíva ojejapo hag̃ua peteĩ pelíkula pyahu ha oñemoĩ pype heta párte ojekuaa porãva gueteri pe ‘Foto-Drámagui’.

Ermáno Erich Frost, peteĩ músiko ikatupyrýva, oprepara umi melodía ojeporútava pe pelíkulape. Avei heta pártepe ojeporu lívro La Creación oñemombeʼu hag̃ua ohóvo umi mbaʼe ojehecháva. Upévare ko pelíkula oñembohéra “Drama de la Creación”.

Ko pelíkula pyahu ipuku ocho óra, “Foto-Drama de la Creación” ipuku haguéicha. Oñembohasa pór párte káda pyhare ojehechapa peve. Pype ojehecha mbaʼéichapa ojejapovaʼekue ko Yvy seis díape, oñemombeʼu heta mbaʼe omboʼéva la Biblia ha mbaʼépa heʼi umi istoriadór. Avei oñemyesakã umi rrelihión japu ombotavyha umi héntepe. Ko pelíkula ojehechauka Alemania, Austria, Luxemburgo, Suiza, ha heta lugárpe oñeñeʼẽháme alemán.

Ermáno Frost heʼi: “Rombohasa jave pe pelíkula, haʼe umi ermáno oĩva orkéstape ha umi ótrope, roaprovecha hag̃ua  ropytuʼu jave ha roikuaveʼẽ lívro ha folléto umi héntepe. Péicha roho umi asiéntorupi ha romeʼẽ hetave puvlikasión umi ogahárupi rohejávagui”. Johannes Rauthe oprepara ojehecha hag̃ua pe pelíkula Polóniape ha avei pe lugár koʼág̃a héravape República Checa. Haʼe imanduʼa oĩ hague heta omeʼẽva idireksión ojevisita hag̃ua chupekuéra, ha upéicha ojejuhu heta rrevisitarã.

Áño 1930 guive, henyhẽte umi lugár ojehechaukahápe pe “Drama de la Creación”, ha opavavénte imanduʼa umi Testigo de Jehová rehe. Áño 1933-pe g̃uarã, haimetéma un millón ohecha pe pelíkula umi lugár pe sukursál Alemaniaygua opreparahápe. Peteĩ ermána hérava Käthe Krauss heʼi: “Rohechaseterei pe dráma, jepe upearã roguatavaʼerã 10 kilómetro rohokuévo ha 10 jey rojukuévo. Rohasavaʼerã kaʼaguy ha ñu, rojupi ha roguejyvaʼerã umi sérro”. Else Billharz katu heʼi: “Pe ‘Drama de la Creación’ chepytyvõ añepyrũ hag̃ua ahayhu pe añetegua”.

Alfred Almendinger omombeʼu isy “ovyʼaiterei hague opytávo ohecha rire pe pelíkula ha ojogua ivivliarã. Upéi oheka pype pe ñeʼẽ purgatório” ha ndojuhúimarõ, oheja irrelihión ha oiko chugui Testígo. Erich Frost heʼi “hetaiterei tapicha oñepyrũha oikuaa pe añetegua pe ‘Drama de la Creación’ rupive” (3 Juan 1-3).

Péro pe pelíkula ojekuaavévo opárupi, umi nási oñepyrũ ojagarra Europa. Áño 1933 oñepyrũvo, Alemániape ojeproivi Testigokuéra oñembyaty ha opredika. Upe guive opa peve segunda gérra mundiál 1945-pe, Ñandejára siervokuéra oikóva Európape, heta ahasa asy ojepersegi mbarete rupi chupekuéra. Erich Frost oĩ préso ocho áño, péro upéi osẽ jey ha oñepyrũ ombaʼapo Alemania sukursálpe, opytáva Wiesbádenpe. Pe “Drama de la Creación” osẽvaʼekue itiempoitépe ha opytáma manduʼarã. Oiméne katuete pe pelíkula omombarete ha ombopyʼaguasu hetaiterei ermáno ohasa potávape umi mbaʼe ijetuʼuetéva segunda gérra mundiál aja. (Manduʼarã oúva Alemániagui.)