1, 2. ¿Mbaʼeichagua ñorairõpa hiʼag̃uimbaitéma, ha mbaʼépa natekotevẽmoʼãi ojapo Ñandejára siervokuéra?

PE 30 de octubre de 1938 pyharépe, hetaiterei tapicha Estados Unidosgua ojapysakajoa peteĩ prográma oñehenduetereívare rrádiope. Pe prográmape oñembohasa peteĩ teátro hérava La guerra de los mundos. Oĩ oaktuáva periodístaramo ha omombeʼu guaʼúva og̃uahẽha extraterréstre planéta Mártegui ha ojapoha sarambi ko yvy ape ári. Ojeʼéramo jepe peteĩ teatronteha, heta hénte ogueroviaite pe ohendúva ha tuichaiterei oñemondýi. Oĩ katu ojapóva tekotevẽva guive oñedefende hag̃ua chuguikuéra.

² Koʼág̃a ningo hiʼag̃uimbaitéma peteĩ ñorairõ guasu, péro hetaiterei hénte ndojapói mbaʼeve ojesalva hag̃ua. Ñandejára Ñeʼẽ, la Biblia heʼi ko gérra oikotaha katuete, ndahaʼéi peteĩ istória reínte ojoguáva teátrope. ¿Mbaʼe rehépa ñañeʼẽñaína? Armagedón rehe, peteĩ ára Jehová oñorairõtahápe ko múndo aña ndive (Rev. 16:14-16). Péro pe tiémpo og̃uahẽ vove, Ñandejára rembiguaikuéra natekotevẽmoʼãi oñorairõ. Haʼekuéra ohecháta umi mbaʼe tuichaitereíva Jehová ojapótava ha omopirĩetereíta chupekuéra pe oikóva.

3. ¿Mbaʼe profesíapa ñahesaʼỹijóta, ha mbaʼérepa ñañatende porã vaʼerã hese?

³ Pe profesía oĩva Zacarías kapítulo 14-pe oñeʼẽ Armagedón rehe. Ojapóramo jepe dos mil quinientos áñoma ojehai hague, koʼág̃a iñimportanteterei gueteri ñandéve g̃uarã (Rom. 15:4). Upe profesía ohechauka umi mbaʼe ohasáva Jehová puévlo áño 1914 guive, Ñandejára Rréino oñepyrũrõ guare ogoverna yvágape, ha avei umi mbaʼe tuichaitéva oikótava koʼẽrõite. Ko profesía oñeʼẽ mokõi mbaʼe iñimportántevare: “peteĩ sérro paʼũ tuichaitereíva”, ha “y oporomoingovéva” osyrýva Jerusaléngui (Zac. 14:4, 8, NM). Ñande  ñaiméva Jehová puévlope, ñaikotevẽ ko lugár rehe ikatu hag̃uáicha ñañemoʼã. Ha jahechakuaávo mbaʼépa orrepresenta pe y, ñantende mbaʼérepa iñimportánte jayʼu chugui, ha katuete jayʼuséta voi chugui. Ñañatende porãkena ko profesíare ikatu hag̃uáicha ideprovécho ñandéve (2 Ped. 1:19, 20).

4. a) ¿Arakaʼépa oñepyrũ “Jehová ára”? b) ¿Mbaʼépa opredika Jehová siervokuéra áño 1914 mboyve, ha mbaʼépa ojapo umi tetã?

⁴ Zacarías kapítulo 14 oñepyrũre, oñeʼẽ “Jehová ára” rehe (elee Zacarías 14:1, 2). ¿Mbaʼépa hína upéva? La Bíbliape oñehenói upe árape ‘ñande Ruvicha ára’, ha oñepyrũ “Ñandejára ha Cristo rréino ogoverna [ypy guive] yvyporakuérape” (Rev. 1:10, NM; Rev. 11:15, NM). ¿Arakaʼépa upéva? Ñandejára Rréino oĩva Jesucristo pópe oñepyrũrõ guare oisãmbyhy yvágape áño 1914-pe. Péro upe mboyvéma voi, Jehová siervokuéra opredikáma vaʼekue “pe tiémpo oñemeʼẽva umi tetãme” opataha 1914-pe, ha upe áño guive oĩtaha hetaiterei provléma ko múndope (Luc. 21:24, NM). ¿Mbaʼépa ojapo tetãnguéra? Umi omoakãva polítika ha rrelihión nopenái ko marandúre, upéva rangue oñepyrũ oñembohory ha opersegi umi unhídope opredikáva kaneʼõʼỹre. Péicha haʼekuéra oñembohory Ñandejára Ipuʼakapávare. ¿Mbaʼérepa jaʼe upéva? Koʼã unhído orrepresenta Ñandejára Rréinope oĩva Jesucristo pópe, térã pe “Jerusalén yvagapegua” (Heb. 12:22, 28, NM).

5, 6. a) Oprofetisa haguéicha Zacarías, ¿mbaʼépa ojapo umi tetã ‘pe távare’ ha umi oikóvare pype? b) ¿Mávapa umi “hembýva pe távape”?

⁵ Zacarías heʼíma vaʼekue mbaʼépa ojapóta umi tetã: “Pe táva [Jerusalén] ojejagarráta”. “Pe táva” orrepresenta Ñandejára Rréinope, oĩva Jesucristo pópe, ha umi oikóva pype katu orrepresenta umi kristiáno unhídope oĩva gueteri ko yvy ape ári (Filip. 3:20). Primera gérra mundiál aja ‘pe táva ojejagarra’, ojapresárõ guare umi kristiáno omotenondéva Jehová organisasión ha ojegueraha chupekuéra kárselpe Atlántape (Georgia, Estados Unidos). ‘Umi óga oñemondapa’ koʼã ermáno ha ambue kristiáno iñeʼẽrendúvape ojepersegi ha ojejapórõ guare hesekuéra heta mbaʼe vai. Avei umi oñemoĩva hesekuéra, haʼete ku omondapáva koʼã ermánope oproivívo chuguikuéra oiporu umi puvlikasión ha ojokose pe predikasión.

⁶ Upérõ ningo Ñandejára rembiguaikuéra mbovymínte ha heta ojepersegi, oñembohasa asy ha ojeʼe japu hesekuéra. Upéicharõ jepe, umi oñemoĩva hesekuéra ndaikatúi ohundi pe rrelihión añetegua umi unhído ndohejái rupi Jehovápe. Koʼã unhído haʼe hína umi “hembýva pe távape”, ha imbarete rupi ‘opytáva pe siudápe’.

7. ¿Mbaʼéichapa ñanepytyvõ umi mbaʼe ohasavaʼekue unhidokuéra?

⁷ ¿Oñekumplipámapa raʼe ko profesía opárõ guare primera gérra mundiál? Nahániri. Tetãnguéra osegi opersegi umi unhídope ha avei iñirũnguéra oikótavape ko yvy ape ári opa ára g̃uarã (Rev. 12:17). Upéva ojehecha pe segunda gérra mundiál aja, oñembohasa asyetereírõ guare Ñandejára puévlope. Umi mbaʼe ohasavaʼekue unhidokuéra oipytyvõ opavave Jehová siérvo koʼag̃aguápe ogueropuʼaka hag̃ua heta mbaʼe ijetuʼúva, pór ehémplo oñembohorýramo hesekuéra ha omboykérõ chupekuéra ihénte ndahaʼéiva Testígo, ikompañéro de traváho, de eskuéla térã de koléhio (1 Ped. 1:6, 7). Mamo oikohápe, umi kristiáno tee odesidíma ‘ojepytaso mbarete’ Jehová ykére ha ‘ni mbaʼevéicharõ ndokyhyjéi iñenemigokuéragui’  (Filip. 1:27, 28, NM). Péro, ¿moõpa Ñandejára puévlo ikatu oñemoʼã opavavénte ko múndope ndaijaʼéiramo hesekuéra? (Juan 15:17-19.)

8. a) ¿Mbaʼépa ikatu orrepresenta umi sérro la Bíbliape? b) ¿Mbaʼépa orrepresenta “pe sérro olivoty”?

⁸ Jahecha haguéicha, “pe táva” Jerusalén orrepresenta pe Jerusalén yvagaygua. Upéicharõ, “pe sérro olivoty oĩva Jerusalén rovái” oimevaʼerã orrepresenta avei ambue mbaʼe. ¿Mbaʼépa hína upéva? ¿Mbaʼérepa “oñembojaʼovaʼerã mbytépe” ha oiko chugui mokõi sérro? ¿Ha mbaʼérepa Jehová heʼi umívare “che serrokuéra”? (Elee Zacarías 14:3-5.) La Bíbliape oñeñeʼẽ jave sérrore, ikatu orrepresenta goviérno térã rréino. Ha oñeñeʼẽ jave Ñandejára sérrore katu heʼise Jehová oñangarekoha ñanderehe ha omeʼẽha ñandéve heta mbaʼe porã (Sal. 72:3; Is. 25:6, 7). Upévare, “pe sérro olivoty” Ñandejára oñemboʼyha orrepresenta pe derécho Haʼe añoite orekóva ogoverna hag̃ua opaite mbaʼe yvy ha yvágape.

9. ¿Mbaʼépa heʼise “pe sérro olivoty” oñembojaʼóva mbytépe?

⁹ ¿Mbaʼépa heʼise “pe sérro olivoty” oñembojaʼóva mbytépe? Pe sérro oĩva kuarahyresẽ gotyo Jerusaléngui ha oñembojaʼóva, ohechauka Jehová omoñepyrũha ótro goviérno: Ñandejára Rréino oĩva Jesucristo pópe. Ko goviérno Ñandejára mbaʼénte avei. Upévare, “pe sérro olivoty” oñembojaʼóvo ha oiko rire chugui mokõi sérro, Jehová heʼi umívare “che serrokuéra” (Zac. 14:4, 5, NM). Mokõive umi sérro imbaʼe.

10. ¿Mbaʼépa orrepresenta pe lugár tuichaitéva ojeavríva pe ‘sérro paʼũme’?

¹⁰ “Pe sérro olivoty” oñembojaʼóvo mbytépe, peteĩ párte opyta nórte gotyo ha pe ótra párte opyta súr gotyo. Jehová katu oñemboʼy mokõive sérro ári ha ojeavri iguýpe “peteĩ sérro paʼũ tuichaitereíva”. ¿Mbaʼépa orrepresenta pe sérro paʼũ? Pe lugár heʼise Jehová oñangarekoha isiervokuérare Igoviérno ha pe Rréino oĩva Itaʼýra pópe rupive. Upéicha Jehová ohechauka ndaiporimoʼãiha ohundíva pe rrelihión añetegua. ¿Arakaʼépa oñembojaʼóraʼe “pe sérro”? Áño 1914-pe, opárõ guare pe tiémpo oñemeʼẽva umi tetãme ha Ñandejára Rréino oĩva Jesucristo pópe oñepyrũrõ guare oisãmbyhy yvágape. ¿Ha arakaʼépa Ñandejára siervokuéra oñepyrũ oike upe ‘sérro paʼũme’?

11, 12. a) ¿Arakaʼépa oñepyrũ ojeike pe lugár Jehová opreparavaʼekuépe? b) ¿Mbaʼépa ohechauka Jehová oñangarekoha ipuévlore ipyapy mbarete reheve?

¹¹ Jesús heʼi porã vaʼekue hemimboʼekuérape: “Opa tetãme avave ndaijaʼemoʼãi penderehe che réra káusare” (Mat. 24:9, NM). Oñepyrũ guive umi ára paha, áño 1914-pe, heta hetavéma oĩ ndaijaʼéiva kristianokuérare. Primera gérra mundiál aja ojepersegi ha oñembohasa asyeterei umi unhídope. Jahecháma haguéicha, heta ermánope oñemoinge kárselpe, upéicharõ jepe iñenemigokuéra ndaikatúi ohundi pe rrelihión añetegua. Áño 1919-pe katu oñeguenohẽ chupekuéra kárselgui, ha upe guive koʼã kristiáno isãso Babilonia Guasu poguýgui, térã entéro rrelihión japúgui oĩva ko múndope (Rev. 11:11, 12). * Upe guive ojeike ñepyrũ pe lugár Jehová opreparavaʼekuépe, oĩva iserrokuéra paʼũme.

¹² Upe áño guive, umi kristiáno tee oĩva ko yvy tuichakuére oike pe lugár Jehová opreparavaʼekuépe, térã pe ‘sérro paʼũme’,  oñemoʼã hag̃ua. Heta áñore umi goviérno oproivi ojeporu ñane puvlikasionkuéra ha ojapo ikatúva guive ojoko hag̃ua pe predikasión heta tetãme. Péro ni oñehaʼãvéramo ndaikatumoʼãi ohundi hikuái pe rrelihión añetegua. Jehová ningo ipyapy mbarete ha oñangareko porã ipuévlore (Deut. 11:2).

13. ¿Mbaʼéichapa jahechauka jaikeha pe lugár Jehová opreparavaʼekuépe, ha mbaʼérepa koʼág̃a iñimportantete japyta upépe?

¹³ Ñaiméramo Jehová ykére ha ñadefende pe añetegua, Haʼe ha Itaʼýra Jesucristo oñangarekóta ñanderehe. Ñandejára ndohejamoʼãi mbaʼeve ni avave ñanemomombyry chugui (Juan 10:28, 29). Jehová ñanepytyvõse akóinte ñaneñeʼẽrendu hag̃ua chupe, ñañemoĩvo Igoviérno ha pe Rréino Jesucristo oisãmbyhýva poguýpe. Koʼág̃a ningo hiʼag̃uivéntema pe jehasa asy guasu, upévare tekotevẽtereive japyta pe lugár haʼe opreparavaʼekuépe.

14, 15. ¿Mbaʼépa oikóta umi noĩrivagui pe “sérro paʼũ” tuichaitéva Jehová opreparavaʼekuépe ág̃a Haʼe oñorairõ vove?

¹⁴ Ko múndo aña oñehundiete peve, Satanás ombohasa asy asyvéta Jehová puévlope. Péro og̃uahẽta pe ára haʼe opuʼãtahápe ipahaite Jehová puévlore. Upéicharõ jepe, Ñandejára ñanedefendéta “oñorairõha árape”. Upépe ojekuaáta ndaiporiha ipuʼakáva pe Mburuvicha Tuichavévare (Zac. 14:3).

¹⁵ Péro, ¿mbaʼépa oikóta umi noĩrivagui pe “sérro paʼũ” tuichaitéva Jehová opreparavaʼekuépe? La Biblia heʼi haʼekuéra oĩtaha “nahesakãihápe”. Upéva heʼise Ñandejára ndoguerohorymoʼãiha umívape. Avei pe profesía heʼi umi “kavaju, mburika, kaméllo, vúrro ha opaichagua mymba” hatãmbataha. Koʼã mymba orrepresenta umi armaménto orekóva tetãnguéra, ha haʼetéta ku roʼy omohatãmbáva ha opyta ndovaléi mbaʼeverã. Pe profesía heʼive Jehová oguerutaha “plága”, térã mbaʼasy. Ndajaikuaái mbaʼeichaitépa oikóta upéva, péro tahaʼe haʼeháicha, umi mbaʼe Jehová oguerútava ojurumbotyetéta iñenemigokuérape, oikóva oamenasa vai ipuévlope. Upe árape umi hénte “resa ha ikũ itujúta”. ¿Mbaʼépa heʼise upéva? Haʼekuéra ndaikatumoʼãiha ojapo mbaʼeve ñanderehe ni odesafia Ñandejárape umi mbaʼe heʼívape (Zac. 14:6, 7, 12, 15, NM). Añetehápe ningo Satanás orekóta hetaiterei ehérsito oĩmava oñorairõ hag̃uáicha, péro Jehová ohundipaitéta chupekuéra toĩ oĩháme (Rev. 19:19-21). Oikóta heʼi hagueichaite Jeremías: “Umi Jehová ojukáva upe árape, opytáta ojepyso peteĩ yvy apýragui ambue yvy apýra peve” (Jer. 25:32, 33, NM).

16. Jahechakuaávo hiʼag̃uimaha pe ára Jehová oñorairõtaha, ¿mbaʼépa iporã ñañeporandu, ha mbaʼépa tekotevẽta jajapo?

¹⁶ Oiko jave peteĩ gérra, enterove osufri, umi oganáva jepe. Oĩ operdéva hóga, imbaʼerepy ha umi derécho orekóva. Umi tiémpope ojehasa asyeterei ha heta oĩ ndorekóiva ni hoʼuvaʼerã. Pe jehasa asy guasu ou vove, ikatu hína oiko koʼã mbaʼe ñanderehe. ¿Mbaʼépa jajapóta upe tiémpope? ¿Ñañepyrũtapa ñandepyʼatarova ha jakyhyje? ¿Ñanekangýtapa ha ñamboyke Jehovápe oĩramo ñandejopýva? ¿Japerdétapa ñane esperánsa ha japytáta ñañeamarga? Ani hag̃ua oiko ñanderehe koʼã mbaʼe, japytavaʼerã pe lugár Jehová opreparavaʼekuépe ha jajerovia haʼe katuete ñandesalvataha (elee Habacuc 3:17, 18).

17, 18. a) ¿Mbaʼépa pe “y oporomoingovéva”? b) ¿Mbaʼépa orrepresenta “pe már oĩva kuarahyresẽ gotyo” ha “pe oĩva kuarahyreike gotyo”? c) ¿Mbaʼépa nde redesidi rejapo?

¹⁷ Ohasa rire Armagedón, Ñandejára  Rréinogui oĩva Jesucristo pópe osyry meméta pe “y oporomoingovéva”. ¿Mbaʼépa orrepresenta pe y? Entéro umi mbaʼe Jehová omeʼẽva ñandéve jaikove hag̃ua opa árare. ¿Ha mbaʼépa heʼise umi már oñeñeʼẽha Zacaríaspe? “Pe már oĩva kuarahyresẽ gotyo” haʼe hína már Muerto, ha “pe már oĩva kuarahyreike gotyo” katu, pe már Mediterraneo. Pe már Muerto orrepresenta umi omanovaʼekue ha oñemoingove jeýtavape. Ha már Mediterráneo katu orrepresenta pe “aty guasu” ohasátavape Armagedón (elee Zacarías 14:8, 9; Rev. 7:9-15, NM). Koʼã mokõi grúpo hoyʼu vove pe “rrío orekóvagui y oporomoingovéva”, isãsóta pe ñemano poguýgui jahupytýva Adán opeka rupi (Rev. 22:1, 2, NM).

¹⁸ Jehová oñangareko rupi ñanderehe, jajesalváta ko múndo aña oñehundi vove ha jaikóta imúndo pyahúpe oĩháme tekojoja. Ñañemoĩkena Ñandejára Rréino ykére ha jaike pe lugár Jehová opreparavaʼekuépe ha japyta upépe, ko múndo ndaijaʼéiramo jepe ñanderehe.