1. ¿Mbaʼépa jaikuaase avei koʼág̃a?

JESÚS omohuʼãmbotaitéma hembiapo ko yvy ape ári ha hemimboʼekuéra oikuaase mbaʼépa ohaʼarõ chupekuéra. Omano mboyvemi, cuatro ijapóstol oñemboja hendápe ha oporandu chupe: “¿Arakaʼépa oikóta koʼã mbaʼe? ¿Ha mbaʼépa oikóta ropilla hag̃ua nde reimemaha, ha ko múndo ára pahaite oñemoag̃uimaha?” (Mat. 24:3, NM; Mar. 13:3). Jesús ombohovái chupekuéra omeʼẽvo pe profesía jajuhúva Mateo kapítulo 24 ha 25-pe. Ko profesía rupive haʼe ohechauka oikotaha heta mbaʼe tuicháva. Jesús heʼi vaʼekue iñimportánte avei ñandéve g̃uarã jaikuaaségui mbaʼépa ñaneraʼarõ amo gotyove.

2. a) ¿Mbaʼépa oñehaʼã ontende porãve Jehová siervokuéra ohasávo pe tiémpo? b) ¿Mbaʼe mbaʼépa ñambohováita?

² Ohasávo pe tiémpo, Jehová siervokuéra oñemboʼe meme ha ohesaʼỹijo Jesús profesía oñeʼẽva umi ára paháre. ¿Maʼerãpa ojapo hikuái upéva? Ikatu hag̃uáicha ontende porã mbaʼe tiémpopepa oñekumplíta upéva. Ñantende hag̃ua mbaʼéichapa hesakãve ohóvo pe profesía, ñambohováita mbohapy porandu: ¿Arakaʼépa oñepyrũta pe “jehasa asy guasu”? ¿Arakaʼépa Jesús ohusgáta umi “ovecha” ha ‘kavarápe’? Ha ¿arakaʼépa Jesús ‘og̃uahẽta’, térã oúta? (Mat. 24:21, NM; Mt 25:31-33, NM).

3. ¿Mbaʼépa opensa vaʼekue Jehová siervokuéra pe ‘jehasa asy guasúre’?

³ Heta áñore Jehová siervokuéra opensa pe “jehasa asy guasu” oñepyrũ hague áño 1914-pe, oñepyrũre avei pe primera gérra mundiál. Oñeimoʼã kuri Jehová ‘omombyky hague umi ára’, térã ojoko pe gérra 1918-pe, ikatu hag̃uáicha umi unhído hembýva ko yvy ape ári opredika pe marandu porã opa tetãrupi (Mat. 24:21, 22, NM). Oñepensa vaʼekue avei ko múndo oĩva Satanás poguýpe oñehunditaha opa rire pe predikasión. Umi ermáno oimoʼã pe jehasa asy guasu  orekoha tres párte: oñepyrũ (1914–1918), upéi ojejoko peteĩ tiémpore (1918 rire), ha opáta Armagedónpe.

4. ¿Mbaʼépa hesakãve pe profesía Jesús omeʼẽ vaʼekuépe oñeʼẽrõ guare umi ára paháre?

⁴ Upe rire oñehesaʼỹijo porãve Jesús profesía oñeʼẽva umi ára paháre ha ojehechakuaa oĩha umi oñekumplíva mokõi hendáicha (Mat. 24:4-22). Ñepyrurã oñekumpli vaʼekue síglo primérope Judéape, ha segundo katu oñekumplíta ñane tiémpope ko yvy tuichakuére. Ñantendévo upéva hesakãve ñandéve heta mbaʼe Jesús heʼíva pe profesíape. *

5. a) ¿Mbaʼépa oñepyrũ vaʼekue 1914-pe? b) ¿Arakaʼépa oñepyrũ vaʼekue ‘ojehasa asy’ síglo primérope?

⁵ Jahechakuaa avei pe jehasa asy guasu noñepyrũi hague áño 1914-pe. ¿Mbaʼérepa jaʼe upéva? La Bíbliape jatopa profesía ohechaukáva pe jehasa asy guasu oñepyrũtaha oñepuʼã vove pe rrelihión japúre, ndahaʼéi umi tetã oñorairõvo oñondive. Upéicharõ, umi mbaʼe oiko vaʼekue 1914-pe nomoñepyrũi gueteri pe jehasa asy guasu, síno upérõ “oñepyrũta ramo” hetave provléma ‘ombohasa asýva’ umi héntepe (Mat. 24:8, NM). Ko “jehasa asy” orrepresenta avei pe oiko vaʼekue Jerusalén ha Judéape áño 33 guive 66 peve, Jesús ou rire.

6. ¿Mbaʼépa ohechaukáta pe jehasa asy guasu oñepyrũmaha?

 ⁶ ¿Mbaʼépa ohechaukáta pe jehasa asy guasu oñepyrũmaha? Jesús heʼi vaʼekue: “Pehecha vove pe mbaʼe ñanembojeguarúva ha oguerúva ñehundi oĩha pe lugár imarangatúvape, Ñandejára heʼi haguéicha proféta Daniel rupive (pe oleéva toñatende porã ontende hag̃ua ko mbaʼe), upérõ umi oĩva Judéape, todipara toho umi sérrore” (Mat. 24:15, 16, NM). Ko téxto oñekumpli ypy vaʼekue áño 66-pe. Upérõ pe ehérsito rrománo (“pe mbaʼe ñanembojeguarúva”) oĩ kuri “pe lugár imarangatúvape” ha ojagarra Jerusalén ha itémplo (pe lugár imarangatúva  umi hudíope g̃uarã). Péro ko téxto oñekumplipaitéta ág̃a pe Organización de las Naciones Unidas (“pe mbaʼe ñanembojeguarúva” ñane tiempopegua) oĩ vove “pe lugár imarangatúvape”, térã opuʼã vove umi rrelihión heʼívare ijehe kristianoha (hetápe g̃uarã haʼetéva peteĩ lugár imarangatúva) ha entéro rrelihión oĩvare Babilonia Guasúpe. Koʼã mbaʼe oikótava, oĩva avei Revelación 17:16-18-pe, omoñepyrũta pe jehasa asy guasu.

7. a) ¿Mbaʼéichapa ‘ojesalva’ vaʼekue heta kristiáno síglo primérope? b) ¿Mbaʼépa oikóta ñane renonderãme?

 ⁷ Jesús heʼi avei: “Umi ára oñemombykýta”. Upéva oñekumpli ypy vaʼekue pe ehérsito rrománo ojerretirárõ guare Jerusaléngui áño 66-pe. Upe rire umi kristiáno unhído oĩva Jerusalén ha Judéape osẽ odipara ikatu hag̃uáicha ‘ojesalva’ (elee Mateo 24:22; Mal. 3:17). Upéicharõ, ¿mbaʼépa oikóta oñepyrũ rire pe jehasa asy guasu? Jehová ndohejamoʼãi pe Naciones Unidas oataka pukueterei umi rrelihión japúpe, síno ‘omombykýta’ pe atáke ani hag̃ua oñehundi avei pe rrelihión añetegua. Péicha Ñandejára puévlo ikatúta ojesalva.

8. a) ¿Mbaʼépa oikóta oñepyrũ rire pe jehasa asy guasu? b) ¿Mbaʼe tiémpopepa umi unhído hembýva ko yvy ape ári ojegueraháta yvágape? (Ehecha pe nóta 2.)

  ⁸ ¿Mbaʼépa oikóta oñepyrũ rire pe jehasa asy guasu? Jesús heʼi vaʼekue ohasataha peteĩ tiémpo ha upe rire oñepyrũtaha Armagedón. ¿Mbaʼe mbaʼépa oikóta upe tiémpope? Upéva oñemyesakã Ezequiel 38:14-16-pe ha Mateo 24:29-31-pe (elee). * Upe rire, pe jehasa asy guasu oñemohuʼãta Armagedón rupive. Péicha avei oiko vaʼekue Jerusalén oñehundírõ guare áño 70-pe (Mal. 4:1). Pe jehasa asy guasúpe, oñemohuʼãtava Armagedónpe, oikóta heta mbaʼe “arakaʼeve oikoʼỹ haguéicha ko múndo ñepyrũmby guive” (Mat. 24:21, NM). Ohasapa rire koʼã mbaʼe, Cristo oñepyrũta ogoverna mil áño pukukue.

9. ¿Mbaʼéichapa omombarete Jehová puévlope pe profesía Jesús omeʼẽ vaʼekue pe jehasa asy guasúre?

 ⁹ Tuichaiterei ñanemombarete ko profesía oñeʼẽva pe jehasa asy guasúre. ¿Mbaʼérepa jaʼe upéva? Jaikuaa porãgui Jehová puévlo ohasataha pe jehasa asy guasu, tahaʼe haʼéva umi mbaʼe ijetuʼúva oikóva upe aja (Rev. 7:9, 14). Hiʼarive javyʼaiterei jaikuaágui Armagedónpe Jehová ohechaukataha haʼe añoite orekoha derécho oporosãmbyhy hag̃ua ha omopotĩtaha héra marangatu (Sal. 83:18; Ezeq. 38:23).

10. ¿Mbaʼe tiémpopepa ñaimoʼã vaʼekue ojehusgataha umi ovecha ha kavarápe?

¹⁰ Jahechamína koʼág̃a mbaʼéichapa oñekumplíta ambue profesía Jesús omeʼẽ vaʼekue ohechaukáva ojehusgataha umi ovecha ha kavarápe (Mat. 25:31-46). Ymave ñaimoʼã vaʼekue umi ára paha aja, oñepyrũva 1914 guive, ojehusgataha opavave tapichápe ojekuaa hag̃ua mávapa ovecha térã kavara. Ñapensa kuri umi omboykéva pe marandu porã ha omanóva oñepyrũ mboyve pe jehasa asy guasu, haʼeha peteĩ kavara, térã ndorekoiha esperánsa oikove jeývo.

11. ¿Mbaʼérepa jaʼekuaa Jesús noñepyrũi hague ohusga umi héntepe 1914-pe ohecha hag̃ua mávapa ovecha térã kavara?

¹¹ Áño 1995-pe La Atalaya omyesakã jey kuri Mateo 25:31, heʼihápe: “Pe Yvypóra Raʼy og̃uahẽ vove tuicha podér reheve entéro umi ánhel ndive, oguapýta itróno omimbipávape”. Jaikuaa ningo Jesús oñepyrũ hague ogoverna Ñandejára Rréinope áño 1914-pe, upéicharõ jepe, haʼe ndoguapýi gueteri upérõ “itróno omimbipávape” ohusga hag̃ua ‘opa tetãnguérape’ (Mat. 25:32, NM; embojoja Daniel 7:13 rehe). Péro pe ehémplo oñeʼẽva umi ovecha ha kavaráre, ohechauka Jesús haʼeha peteĩ Hués (elee Mateo 25:31-34, 41, 46). Jahechaháicha, Jesús noñepyrũi gueteri ohusga opa tetãnguérape 1914-pe. Upévare ikatu jaʼe upérõ noñepyrũi hague ohusga umi héntepe ohecha hag̃ua mávapa ovecha térã kavara. * Upéicharõ, ¿arakaʼépa Jesús oñepyrũta oporohusga?

12. a) ¿Arakaʼépa Jesús oñepyrũta ohusga opa tetãnguérape? b) ¿Mbaʼe mbaʼépa oikóta ohechaukaháicha Mateo 24:30, 31 ha 25:31-33, 46? (Ehecha avei pe nóta 4.)

  ¹² Pe profesía oñeʼẽva umi ára paháre ohechauka Jesús oñepyrũtaha oporohusga oñehundi rire umi rrelihión japu. Jahecha haguéicha  párrafo 8-pe, Mateo 24:30, 31 omombeʼu heta mbaʼe oikótava upe tiémpope. Ñahesaʼỹijóvo koʼã versíkulo oĩhápe Jesús profesía ha ñambojojáramo pe ehémplo oñeʼẽvare umi ovecha ha kavaráre, katuete jahechakuaáta ojojoguaha heta mbaʼépe. Por ehémplo: pe Yvypóra Raʼy og̃uahẽta tuicha podér reheve umi ánhel ndive; opa tetãnguéra oñembyatýta henondépe; umi ojehusgáva ha ojoguáva ovechápe ‘oñakãrapuʼãta’ orekógui esperánsa oikovévo “opa ára g̃uarã”, * ha umi ojehusgáva ha ojoguáva kavarápe katu “ojepytiʼanupãta ñembyasýgui”, oikuaágui ‘oñehunditaha opa ára g̃uarã’ (Mateo 25:31-33, 46, NM).

13. a) ¿Arakaʼépa Jesús ohusgáta opavave tapichápe ohecha hag̃ua mávapa ovecha térã kavara? b) ¿Mbaʼéichapa ñanepytyvõ ñane predikasiónpe jaikuaávo koʼã mbaʼe?

 ¹³ Upéicharõ, ¿mbaʼépa ikatu ñahaʼarõ? Ág̃a Jesús og̃uahẽ vove pe jehasa asy guasu aja, oñepyrũta ohusga umi hénte opa tetãyguápe ohecha hag̃ua mávapa ovecha térã kavara. Armagedónpe, og̃uahẽvo huʼãme pe jehasa asy guasu, umi tapicha ojoguáva kavarápe “oñehundíta” opa ára g̃uarã. ¡Ajépa tuichaite ñanepytyvõ jaikuaávo koʼã mbaʼe jahechakuaa hag̃ua mbaʼeichaitépa iñimportánte japredika pe marandu porã! Oñepyrũ mboyve pe jehasa asy guasu,  umi hénte oreko oportunida okambia hag̃ua opensáva ha oñepyrũ hag̃ua oguata pe tape poʼíre “oporogueraháva jeikove opaveʼỹvape” (Mat. 7:13, 14, NM). Koʼág̃a umi hénte ikatu ohechauka ojoguápa ovechápe térãpa kavarápe. Upéicharõ jepe, ñanemanduʼa vaʼerã ojehusgataha opavavépe pe jehasa asy guasu aja ha upépe ojekuaáta mávapa añetehápe ovecha ha mávapa kavara. Upévare tekotevẽ jasegi ñaipytyvõ hetave tapichápe ikatu hag̃uáicha ohendu ha oasepta pe marandu porã oñeʼẽva Ñandejára Rréino rehe.

14, 15. ¿Moõpa jajuhu umi cuatro téxto heʼihápe Jesús og̃uahẽtaha oporohusga hag̃ua?

 ¹⁴ Ñahesaʼỹijo rire Jesús profesía, ¿jahechakuaápa tekotevẽha ñantende porãve arakaʼépa oñekumplíta ambue mbaʼe haʼe heʼi vaʼekue oikotaha koʼã ára pahápe? Pe profesía voi omyesakã ñandéve. Jahechamína upéva.

¹⁵ Mateo 24:29 guive 25:46 peve, Jesús ohechauka vaʼekue mbaʼépa oikóta umi ára pahápe ha pe jehasa asy guasu aja. Koʼã téxtope Jesús heʼi ocho vése voi ‘og̃uahẽtaha’, térã outaha. * Imanduʼávo pe jehasa asy guasúre, haʼe heʼi: “Ohecháta hikuái pe Yvypóra Raʼy ouha umi arai ári”. “Ndapeikuaái hína mbaʼe díapa oúta pende Ruvicha.” “Peimoʼãʼỹve jave oúta pe Yvypóra Raʼy.” Ha pe ehémplo oñeʼẽvape umi ovecha ha kavara rehe, Jesús heʼi: “Yvypóra Raʼy og̃uahẽ vove tuicha podér reheve” (Mat. 24:30, 42, 44, NM; Mt 25:31, NM). Koʼã cuatro téxto oñeʼẽ hína pe tiémpo Jesús oútavare oporohusga hag̃ua. ¿Moõpa jajuhu avei umi ótro cuatro téxto Jesús heʼihápe outaha?

16. ¿Moõpa jajuhu avei umi ótro téxto heʼíva Jesús og̃uahẽtaha?

¹⁶ Oñeʼẽvo pe tembiguái jeroviaha ha iñarandúvare, Jesús heʼi: “¡Ovyʼaite upe tembiguái Ijára oúramo otopa chupe ojapoha upéicha!”. Pe ehémplope oñeʼẽva umi vírhen rehe, Jesús heʼi: “Haʼekuéra oho aja ojogua, og̃uahẽ pe nóvio”. Pe ehémplo oñeñeʼẽhápe umi talénto rehe, Jesús heʼi avei: “Heta tiémpo rire ou jey pe karai”. Ha upe ehémplope pe jára heʼi: “Upéicharire  ag̃uahẽvo oñemeʼẽ vaʼerãmoʼã chéve che pláta ha hetave voi katu” (Mat. 24:46, NM; Mt 25:10, 19, 27, NM). ¿Mbaʼe tiémpopepa oñekumplíta koʼã cuatro ehémplo ohechaukáva Jesús outaha?

17. ¿Mbaʼéichapa ymave oñentende vaʼekue Mateo 24:46?

¹⁷ Ymave ñane puvlikasionkuérape ojeʼe Jesús ou hague 1918-pe ha koʼã cuatro téxto oñekumpli hague upérõ. Por ehémplo, ñapensamína mbaʼéichapa ñantende vaʼekue umi mbaʼe Jesús heʼíva “pe tembiguái jeroviaha ha iñarandúva” rehe (elee Mateo 24:45-47.) Heʼívare versíkulo 46, ñaimoʼã kuri Jesús “ou” hague 1918-pe ohecha hag̃ua mbaʼéichapa oĩ umi unhído Ñandejára renondépe. Avei ñapensa kuri Jesús omoĩ hague pe tembiguái poguýpe opa mbaʼe orekóva 1919-pe (Mal. 3:1). Péro oñehesaʼỹijove rire pe profesía, ojehechakuaa tekotevẽha ñantende porãve arakaʼépa oñekumplíta umi mbaʼe Jesús heʼi vaʼekue oikotaha. ¿Mbaʼérepa jaʼe upéva?

18. ¿Mbaʼépa ñantende ñahesaʼỹijo rire Jesús profesía ohechaukáva haʼe ‘og̃uahẽtaha’?

 ¹⁸ Umi versíkulo oĩvape Mateo 24:46 mboyve, ojeporu pe ñeʼẽ “ou” oñeñeʼẽ hag̃ua pe tiémpo Jesús oútavare oporohusga hag̃ua pe jehasa asy guasu aja (Mat. 24:30, 42, 44). Ha jahecha haguéicha  párrafo 12-pe, Mateo 25:31 heʼi avei Jesús ‘og̃uahẽtaha’ oporohusga hag̃ua. Upéicharõ jaʼekuaa Jesús og̃uahẽtaha pe jehasa asy guasu aja omoĩ hag̃ua pe tembiguái jeroviaha ha iñarandúva poguýpe opa mbaʼe orekóva, heʼiháicha Mateo 24:46, 47. Ñahesaʼỹijo rire Jesús profesía, jahechakuaa umi ocho téxto heʼíva Jesús ‘og̃uahẽtaha’ oñeʼẽha pe tiémpo haʼe oporohusgataha rehe pe jehasa asy guasu aja.

19. ¿Mbaʼépa ñantende porãve koʼág̃a, ha mbaʼépa ñambohováita umi artíkulo oúvape?

¹⁹ ¿Mbaʼépa ñaaprende raʼe? Oñepyrũvo ko artíkulo, jaʼe kuri ñambohovaitaha mbohapy porandu ohechaukáva “arakaʼépa” oñekumplíta heta mbaʼe Jesús heʼi vaʼekue. Ñepyrurã jahecha kuri pe jehasa asy guasu noñepyrũi hague 1914-pe, síno oñepyrũtaha ág̃a pe Naciones Unidas opuʼã vove Babilonia Guasúre. Upe rire jahecha mbaʼérepa jaʼekuaa Jesús noñepyrũi hague 1914-pe ohusga umi héntepe ohecha hag̃ua mávapa ovecha térã kavara, síno upéva oikotaha pe jehasa asy guasu aja. Upéi oñemyesakã ñandéve Jesús nomoĩri hague 1919-pe pe tembiguái jeroviaha poguýpe opa mbaʼe orekóva, síno ojapotaha upéva pe jehasa asy guasu aja. Upéicharõ, koʼã mbohapy mbaʼe oikóta pe jehasa asy guasu aja. ¿Mbaʼéichapa koʼã mbaʼe ñahesaʼỹijo vaʼekue ñanepytyvõ ñantende porã hag̃ua pe ehémplo oñeʼẽva pe tembiguái jeroviaha ha iñarandúvare? ¿Mbaʼéichapa upéva ñanepytyvõ avei ñantende porã hag̃ua ambue ehémplo Jesús omeʼẽ vaʼekue oñeʼẽva koʼã ára paháre? Koʼã porandu iñimportánteva oñembohováita umi artíkulo oúvape.