Natekotevẽi ningo jaiko jajepyʼapy ha ñapensa mbaʼe lugárpepa oguapy vaʼerã Salón del Réinope umi oñemosẽ vaʼekue kongregasióngui. Rrevísta Ñemañaha heta vésema omokyreʼỹ tuvakuérape oipytyvõ hag̃ua ifamília oñemosẽ vaʼekuépe ha oikóva gueteri hógape oñemoag̃ui jey hag̃ua Jehováre, ohecháma guive oĩ porãha upéva. Heʼi haguéicha La Atalaya 15 de noviembre de 1988 páhina 19 ha 20-pe, tuvakuéra ikatu avei ostudia la Biblia ifamília menór de eda oñemosẽ vaʼekuéndi ha oikóva gueteri hógape. Upéva ikatu omokyreʼỹ pe imitãvape oñemoag̃ui jey hag̃ua Jehováre.

Ndaivaimoʼãi ningo peteĩ menór de eda oñemosẽ vaʼekue kongregasióngui oguapýramo kirirĩhapemi ituvakuéra ndive Salón del Réinope. Natekotevẽi peteĩ oñemosẽ vaʼekue kongregasióngui katuete oñemboguapy tapykuetépe, upévare marãve ndoikói oguapýramo ituvakuéra ndive oimehápe. Umi túva oipytyvõséta katuete ifamíliape omombarete hag̃ua ijerovia, ha omboguapýramo hendivekuéra ohechakuaáta oñatendépa hína pe rreuniónpe ikatu hag̃uáicha ideprovécho chupe.

Péro, ¿mbaʼépa ojejapokuaa pe oñemosẽ vaʼekue kongregasióngui ndoikovéimarõ ituvakuérandi? ¿Heʼisépa upéva ndaikatuiha oguapy ituvakuéra ndive rreunionhápe? Rrevísta Ñemañaha omyesakãma vaʼekue ymave mbaʼéichapa peteĩ kristiáno otrata vaʼerã ihénte oñemosẽ vaʼekuépe kongregasióngui ha ndoikovéimava hendivekuéra hógape. * Péro umi túva ohejáramo oguapy hendivekuéra rreunión aja, ndeʼiséi katuete ojeheʼaha hesekuéra. Umi ermáno iñeʼẽrendúva otratáramo ihénte oñemosẽ vaʼekuépe Ñandejára Ñeʼẽme heʼiháicha, natekotevẽi jajepyʼapy hesekuéra (1 Cor. 5:11, 13; 2 Juan 11).

Pe oñemosẽ vaʼekue oguapýramo ifamília ykére, térã ambue ermáno ykére, ha oñekomporta hekoitépe, natekotevẽi jajepyʼapy. Jaikóramo jaʼe moõpa oguapy vaʼerã upe tapicha rreunionhápe ikatu omoñepyrũ provléma. Opavave oñehaʼãramo ojapo la Biblia heʼíva, umíva apytépe pe oñemosẽ vaʼekue hentekuéra, ha nomoñepysangamoʼãi ermanokuérape, natekotevẽi avave heʼi oikóvo moõpa ojeguapy vaʼerã Salón del Réinope. *