Mokõi prekursór opredika oikóvo ogahárupi Kéniape, ha oñeinvita chupekuéra oike hag̃ua peteĩ ógape. Upépe otopa hikuái tupápe peteĩ kuimbaʼe hete michĩetereíva ha ijyva mbykýva. Omombeʼu chupe hikuái Ñandejára oprometeha ‘pe ikarẽva opopo jeytaha guasúicha’ (Is. 35:6, ÑÑB). Pe kuimbaʼe ovyʼaiterei ohendúvo upéva ha opuka voi.

Oñemombeʼu umi prekursórpe Onesmus, orekóva 40 áño pota, ogueronase hague peteĩ mbaʼasy hérava osteogénesis imperfecta, térã huesos de cristal. Haʼe ningo reiete ikatu opẽ, ha upe mbaʼasy naipohãi ni ndorekói tratamiénto. Upévare Onesmus oikuaáma oikove aja pukukue oĩtaha sílla de rruédape ha heta osufritaha.

Onesmus oñepyrũ ostudia la Biblia. Péro isy ndoipotái oho rreunionhápe openságui ikatuha ojegolpea upérupi ha ohasa asyve upéi. Upémarõ umi ermáno ograva chupe umi rreunión ha haʼe ohendu hógape. Péro ostudia rire cinco mése, haʼe voi heʼi ohoseha rreunionhápe ojapeligrátaramo jepe.

¿Hasyvépa Onesmus oho haguére rreunionhápe? Nahániri. Haʼe omombeʼu: “Haʼete ajaliviavéva aime jave rreuniónpe”. Heʼi pe esperánsa orekóva oipytyvõha chupe oñeñandu porãve hag̃ua. Isy omombaʼeterei ohechávo imemby ovyʼaveha, upémarõ oñepyrũ avei ostudia la Biblia. Haʼe omombeʼu: “Che memby oserviseterei Ñandejárape ha upéva ningo pohã chupe g̃uarã”.

Upéi Onésmusgui oiko puvlikadór, tiémpo rire ojevautisa, ha koʼág̃a katu siérvo ministeriál. Ndaikatúiramo jepe oiporu hetyma ha peteĩ ijyva, haʼe ojapose opa ikatúva Jehová servísiope. Ojaposérõ guare iprekursorádo auxiliár, okyhyje ontrega hag̃ua pe solisitu. ¿Mbaʼérepa? Oikuaágui odepende vaʼerãha ótra persónare ogueraha hag̃ua chupe isílla de rruédape. Omombeʼúrõ guare upéva umi ermánope, haʼekuéra opromete oipytyvõtaha chupe. Upéicha rupi Onesmus ojapo iprekursorádo auxiliár.

Upéi ojaposéma iprekursorádo rregulár, péro okyhyje avei oikuaágui odepende jeytaha ermanokuérare. Péro peteĩ árape, olee rire pe téxto diário ikyreʼỹeterei opytávo. Pe díape oñehesaʼỹijo kuri Salmo 34:8, heʼihápe: “Peñehaʼã ha pehecháta ñande Ruete ipyʼaporãha” (ÑÑB). Onesmus ojepyʼamongeta ko téxtore ha odesidi ojapo iprekursorádo rregulár. Koʼág̃a opredika cuatro día a la semána ha ostudia la Biblia heta tapichándi, ha oprogresa ohóvo umi estudiánte. Áño 2010-pe oho pe Eskuéla Prekursorkuérape g̃uarãme. Ha ovyʼaiterei kuri omboʼe haguére chupekuéra pe ermáno opredika ypy vaʼekue chupe.

Onesmus tuvakuéra omanóma, péro umi ermáno ikongregasiongua oñangareko hese. Haʼe oagradeseterei umi mbaʼe porãita ohupytývare ha ohaʼarõitereíma oñekumpli ko promésa: “Avave ndeʼimoʼãi: ‘Cherasy hína’” (Is. 33:24).