Áño 1985-pe, arekórõ guare 10 áño, heta mitãʼi oúva Cambóyagui oike avei pe eskuéla ahahápe, oĩva Colúmbuspe (Ohio, Estados Unidos). Peteĩva oñeʼẽ vai vai ingléspe, ha omombeʼu hag̃ua chéve mbaʼéicha ojetortura ha ojejuka heta héntepe hetãme, ojapo divúho ojekuaahápe umi mbaʼe vai ojejapóva. Cherasẽ jepi pyharekue chemanduʼávo umi mbaʼe vaiete ohasa vaʼekuére umi mitã. Upévare amombeʼuseterei chupekuéra koʼẽrõitéma jaikotaha peteĩ paraísope ha umi omano vaʼekue oikove jeytaha, péro haʼekuéra nontendéi pe idióma añeʼẽva. Upéicha rupi, che mitãramo jepe adesidi aaprende kambojáno amombeʼu hag̃ua chupekuéra umi mbaʼe porã Jehová ojapótava. Péro napensái vaʼekue upe mbaʼe adesidíva tuicha chepytyvõtaha chetuicha rire.

Ijetuʼu vaʼekue chéve aaprende hag̃ua pe idióma kambojáno, upévare dos vése adesidi ahejávo, péro Jehová ojevale che tuvakuérare chemokyreʼỹ jey hag̃ua. Upéi, koléhiope che profesór ha che kompañerokuéra heʼi chéve iñimportanteveha astudia areko hag̃ua peteĩ profesión iporãva. Péro che aipota oiko chehegui prekursór, upévare koléhiope aiporavo umi kúrso chepytyvõtava atopa hag̃ua traváho ndoʼupamoʼãiva che tiémpo. Ha che kláse rire asẽ jepi predikasiónpe térã ajapo estúdio ha rrevisíta umi prekursór ndive. Amboʼe avei inglés heta kolehiánte oaprendesévape, ha upéva tuicha chepytyvõ tenondeve.

Arekórõ guare 16 áño aikuaa oñepyrũ hague peteĩ grúpo kambojánope, Long Béachpe (California, Estados Unidos). Aha avisita pe grúpo ha upépe chemboʼe hikuái aleekuaa hag̃ua kambojánope. Upéi, atermina rire che koléhio añepyrũma che prekursorádo ha apredika umi kambojáno oikóvape che róga jerére. Ha ambotývo 18 áño apensáma ava hag̃ua Cambóyape. Upépe ipeligrosoiterei, péro aikuaa avei umi 10 millones de avitánte apytégui oĩha hetaiterei nohendúitiva umi notísia porã. Upérõ upe tetãme oĩ peteĩ kongregasiónte, orekóva 13 puvlikadór. Arekórõ guare 19 áño aha vaʼekue avisita primera ves upe kongregasión, ha upéi dos áño haguépe aháma aiko upépe. Añemantene hag̃ua ha ajapo che prekursorádo, atradusi ha aporomboʼe inglés. Tiémpo rire, amenda peteĩ ermána ogustávare avei chupe umi méta aguerekóva. Oñondive heta kambojánope roipytyvõ oservi hag̃ua Ñandejárape.

Jehová omeʼẽ chéve opa mbaʼe “che pyʼaite guive aipotáva” (Sal. 37:4). Ñanembovyʼaiterei ñaipytyvõramo ñande rapichakuérape oikuaa hag̃ua Ñandejárape, ndaipóri ni peteĩ profesión ñanembovyʼáva upéicha. Ojapóma 16 áño aĩ hague Cambóyape, ha ajúrõ guare koʼápe oĩ vaʼekue peteĩ grupoʼi orekóva 13 puvlikadór, koʼág̃a katu oĩma 12 kongregasión ha 4 grúpo. (Omombeʼu Jason Blackwell.)